ಎರಡನೆಯ ವಾಸಸ್ಥಾನಗಳು

ಪ್ರಾರ್ಥನೆಯಲ್ಲಿ ಸೌಮ್ಯವಾದ ದೃಢತೆ

ಪಾಠ ಹದಿನಾಲ್ಕು: ಎರಡನೆಯ ನಿವಾಸಗಳನ್ನು ಪ್ರವೇಶಿಸುವುದು

ಈ ಅಧ್ಯಾಯದಲ್ಲಿ ಸಂತ ತೆರೇಸಾ, ಪ್ರಾರ್ಥನೆ ಮತ್ತು ಮನಃಪರಿವರ್ತನೆಯ ಜೀವನದ ಆರಂಭದಲ್ಲಿರುವ ತಮ್ಮ ಸಹೋದರಿಯರನ್ನು ಈ ಪಯಣದಲ್ಲಿ ದೃಢವಾಗಿ ಮುಂದುವರಿಯುವಂತೆ ಪ್ರೋತ್ಸಾಹಿಸುತ್ತಾರೆ. ಮಾನಸಿಕ ಪ್ರಾರ್ಥನೆಯ ಅಭ್ಯಾಸವನ್ನೂ ಸದ್ಗುಣದಲ್ಲಿ ಬೆಳವಣಿಗೆಯನ್ನೂ ಉತ್ತೇಜಿಸುವ ಮೂಲಕ ಅವರು ಹೀಗೆ ಮಾಡುತ್ತಾರೆ.

ಈ ಅಧ್ಯಾಯವು ಈಗಾಗಲೇ ಪ್ರಾರ್ಥನೆಯನ್ನು ಅಭ್ಯಾಸಿಸಲು ಪ್ರಾರಂಭಿಸಿರುವವರ ಕುರಿತಾಗಿದೆ. ಮೊದಲನೆಯ ಮಹಲುಗಳಲ್ಲಿ [ವಾಸಸ್ಥಾನಗಳಲ್ಲಿ] ಉಳಿಯಬಾರದೆಂಬುದರ ಮಹತ್ವವನ್ನು ಅವರು ಅರಿತಿದ್ದಾರೆ. ಆದರೆ ಆ ಮಹಲುಗಳನ್ನು [ವಾಸಸ್ಥಾನಗಳನ್ನು] ಬಿಟ್ಟು ಹೊರಬರಲು ಬೇಕಾದಷ್ಟು ದೃಢಸಂಕಲ್ಪವು ಅವರಲ್ಲಿ ಇನ್ನೂ ಇರುವುದಿಲ್ಲ; ಪಾಪಕ್ಕೆ ಎಡೆಮಾಡಿಕೊಡುವ ಸಂದರ್ಭಗಳನ್ನು ಅವರು ತಪ್ಪಿಸಿಕೊಳ್ಳುವುದಿಲ್ಲ. ಇದು ಬಹಳ ಅಪಾಯಕರ ಸ್ಥಿತಿ (II.I #2).

ಎರಡನೆಯ ವಾಸಸ್ಥಾನಗಳಲ್ಲಿರುವವರು ಅನುಭವಿಸುವ ಅತಿ ದೊಡ್ಡ ಅಡೆತಡೆಗಳಲ್ಲಿ ಎರಡು ಎಂದರೆ ಪ್ರಾರ್ಥನೆಯಿಂದ ವಿಮುಖರಾಗುವುದು ಮತ್ತು ಮತ್ತೆ ಪಾಪಕ್ಕೆ ಬೀಳುವುದು. ಮಾನಸಿಕ ಪ್ರಾರ್ಥನೆಯ ಅಭ್ಯಾಸದ ಮೂಲಕ ತಮ್ಮ ಸದ್ಗುಣವನ್ನು ಬಲಪಡಿಸಿಕೊಳ್ಳುವುದೇ ಇವುಗಳಿಗೆ ಪರಿಹಾರ.

ಮಾನಸಿಕ ಪ್ರಾರ್ಥನೆ ಎಂದರೆ ಕೇವಲ ತುಟಿಗಳಿಂದಲ್ಲ, ಮನಸ್ಸಿನಿಂದ ದೇವರೊಂದಿಗೆ ಸಂವಾದಿಸುವುದು. ಮನಸ್ಸು ಬೇರೆಲ್ಲೋ ಇರುವಾಗಲೂ ತುಟಿಗಳಿಂದ ಪ್ರಾರ್ಥನೆಗಳನ್ನು ಹೇಳಬಹುದು. ಸಂತ ತೆರೇಸಾರ ಪ್ರಕಾರ ಇದು ಪ್ರಾರ್ಥನೆಯಲ್ಲ. ಒಬ್ಬ ವ್ಯಕ್ತಿ ಸಾಂಪ್ರದಾಯಿಕ ಪ್ರಾರ್ಥನೆಯನ್ನು ಹೇಳುತ್ತಾ, ಹೇಳುವ ಪ್ರತಿಯೊಂದು ವಿಷಯಕ್ಕೂ ಗಮನಕೊಡುವುದು ಮಾನಸಿಕ ಪ್ರಾರ್ಥನೆಯ ಒಂದು ರೂಪವಾಗಿದೆ. ಅನೇಕ ಜನರಿಗೆ, ಇದು ತೋರುವುದಕ್ಕಿಂತ ಹೆಚ್ಚು ಕಷ್ಟಕರವಾಗಿದೆ. ಉದಾಹರಣೆಗೆ, ನಾವು “ಪರಲೋಕದಲ್ಲಿರುವ ನಮ್ಮ ತಂದೆಯೇ” ಎಂಬ ಪ್ರಾರ್ಥನೆಯನ್ನು ಮಾಡುವಾಗ, ಬಹುಸಾರಿ ಆಳವಾದ ಉದ್ದೇಶವಿಲ್ಲದೆ ಅಥವಾ ನಾವು ಹೇಳುತ್ತಿರುವುದರ ಅರಿವಿಲ್ಲದೆ ಕೇವಲ ಪದಗಳನ್ನು ಉಚ್ಚರಿಸುತ್ತೇವೆ. ಇದಕ್ಕೊಂದು ಪರಿಹಾರವೆಂದರೆ, ಪ್ರಾರ್ಥನೆಯನ್ನು ನಿಧಾನವಾಗಿ ಹೇಳುತ್ತಾ, ಹೇಳುವ ಪ್ರತಿಯೊಂದು ಪದವನ್ನು ಧ್ಯಾನಿಸುವುದು.

ಮಾನಸಿಕ ಪ್ರಾರ್ಥನೆಯ ಇನ್ನೊಂದು ರೂಪ ಧ್ಯಾನವಾಗಿದೆ. ಪವಿತ್ರ ಗ್ರಂಥದ ಒಂದು ವಾಕ್ಯಭಾಗವನ್ನಾಗಲಿ, ದೇವರ ಕುರಿತಾದ ಯಾವುದಾದರೂ ಬೋಧನಾ ಸತ್ಯವನ್ನಾಗಲಿ, ಹೀಗೆ ನಮ್ಮ ವಿಶ್ವಾಸದ ಯಾವುದಾದರೂ ಸತ್ಯವನ್ನು ಚಿಂತಿಸುವ ಅಭ್ಯಾಸವೇ ಧ್ಯಾನ. ಒಬ್ಬರು ಧ್ಯಾನಿಸುವಾಗ, ಉದ್ದೇಶಪೂರ್ವಕವಾಗಿ ಈ ಸತ್ಯವನ್ನು ಮನಸ್ಸಿನಲ್ಲಿ ಇರಿಸಿಕೊಂಡು, ವಿವಿಧ ದೃಷ್ಟಿಕೋನಗಳಿಂದ ಮತ್ತು ವಿವಿಧ ರೀತಿಗಳಲ್ಲಿ ಅದನ್ನು ಮತ್ತೆ ಮತ್ತೆ ಪರಿಗಣಿಸುತ್ತಾರೆ. ಕೆಲವೊಮ್ಮೆ ಈ ಧ್ಯಾನದಲ್ಲಿ ಕಲ್ಪನಾಶಕ್ತಿ ಹೆಚ್ಚು ತೊಡಗಿರುತ್ತದೆ; ಇನ್ನು ಕೆಲವೊಮ್ಮೆ ಮುಖ್ಯವಾಗಿ ಮಾನವ ವಿವೇಚನಾಶಕ್ತಿಯನ್ನು ಬಳಸಲಾಗುತ್ತದೆ. ಪ್ರಾರ್ಥನೆಯ ವಿವಿಧ ವಿಧಾನಗಳ ಇನ್ನಷ್ಟು ಸಮಗ್ರ ವಿವರಣೆಗಾಗಿ ಈ ಪುಸ್ತಕದ ಪೀಠಿಕೆಯನ್ನು ನೋಡಿ.[1]

ಒಬ್ಬರು ಮಾನಸಿಕ ಪ್ರಾರ್ಥನೆಯನ್ನು ಅಭ್ಯಾಸಿಸಲು ಪ್ರಾರಂಭಿಸಿದಾಗ, ಅವರ ಇಚ್ಛಾಶಕ್ತಿ ಬಲಗೊಳ್ಳುತ್ತದೆ ಮತ್ತು ಸದ್ಗುಣದ ಬಯಕೆ ಅವರಲ್ಲಿ ಬೆಳೆಯತೊಡಗುತ್ತದೆ. ತಮ್ಮ ಹಿಂದಿನ ಪಾಪಗಳ ಮೂರ್ಖತನವನ್ನು ಅವರು ಅರಿಯತೊಡಗುತ್ತಾರೆ ಮತ್ತು ಅವುಗಳನ್ನು ಜಯಿಸಲು ಪ್ರಾರಂಭಿಸುತ್ತಾರೆ. ಆದರೆ ಇದು ಒಂದು ಹೋರಾಟ. ಈ ಅಧ್ಯಾಯದ ಬಹುಭಾಗವು ಆ ಹೋರಾಟದ ಮೇಲೆ ಗಮನಹರಿಸಿ, ಹಿಂದಿನ ಜೀವನಶೈಲಿಗೆ ಮರಳದೆ ದೃಢವಾಗಿ ಮುಂದುವರಿಯುವಂತೆ ಆತ್ಮವನ್ನು ಪ್ರೋತ್ಸಾಹಿಸುತ್ತದೆ.

ಚಿಂತನೆ: ನಿಮ್ಮ ಪ್ರಾರ್ಥನಾ ಜೀವನವನ್ನು ವರ್ಣಿಸಬೇಕಾದರೆ, ಅದರ ಬಗ್ಗೆ ನೀವು ಏನು ಹೇಳುವಿರಿ? ಪ್ರತಿದಿನ ಮತ್ತು ಪ್ರತಿವಾರ ನೀವು ಹೇಗೆ ಪ್ರಾರ್ಥಿಸುತ್ತೀರಿ? ನೀವು ಎಷ್ಟು ಬಾರಿ ಪ್ರಾರ್ಥಿಸುತ್ತೀರಿ ಎಂಬುದನ್ನು ಚಿಂತಿಸುವ ಮೂಲಕ ಪ್ರಾರಂಭಿಸಿ. ಪ್ರತಿದಿನ ಪ್ರಾರ್ಥನೆಗೆ ಮಾತ್ರವೇ ಸಮಯವನ್ನು ಮೀಸಲಿಡುತ್ತೀರಾ? ಇಲ್ಲದಿದ್ದರೆ, ಪವಿತ್ರತೆಯ ಈ ಎರಡನೆಯ ಹಂತವನ್ನು ಪ್ರವೇಶಿಸಲು ಪ್ರಾರಂಭಿಸುವುದಕ್ಕೆ ಇದು ನಿಮಗೆ ಅಗತ್ಯವಾದ ಹೆಜ್ಜೆಯಾಗಿದೆ.

ನೀವು ಪ್ರತಿದಿನ ಪ್ರಾರ್ಥನೆಗೆ ಸಮಯ ಕಳೆಯುತ್ತಿದ್ದರೆ, ಆ ಪ್ರಾರ್ಥನೆ ಎಷ್ಟು ಆಳವಾಗಿದೆ? ನಿಜವಾದ ಅರ್ಥದಲ್ಲಿ ಪ್ರಾರ್ಥಿಸಲು, ಪ್ರಾರ್ಥನೆಗಳನ್ನು ಬಾಯಿಂದ ಪಠಿಸುವುದಷ್ಟೇ ಸಾಕಾಗುವುದಿಲ್ಲ. ನೀವು ಪ್ರಾರ್ಥನೆಗಳನ್ನು ಹೇಳುವಾಗ, ಹೇಳುವ ಎಲ್ಲವನ್ನೂ ಎಚ್ಚರಿಕೆಯಿಂದ ಪರಿಗಣಿಸುತ್ತೀರಾ? ಆ ಪ್ರಾರ್ಥನೆಗಳನ್ನು, ಪವಿತ್ರ ಗ್ರಂಥದ ವಾಕ್ಯಭಾಗಗಳನ್ನು ಅಥವಾ ನಮ್ಮ ವಿಶ್ವಾಸದ ಬೋಧನೆಗಳನ್ನು ಧ್ಯಾನಿಸಲು ಸಹ ಸಮಯ ಕಳೆಯುತ್ತೀರಾ?

ಪ್ರತಿದಿನ ಪ್ರಾರ್ಥಿಸಲು ಸಂಕಲ್ಪ ಮಾಡಿ; ಆ ಪ್ರಾರ್ಥನೆಯನ್ನು ನಿಜವಾದ ಪ್ರಾರ್ಥನೆಯನ್ನಾಗಿ ಮಾಡಲು ಸಂಕಲ್ಪ ಮಾಡಿ. ಈ ಹಿಂದೆ ನಿಮ್ಮ ಪ್ರಾರ್ಥನಾ ಜೀವನ ಸೀಮಿತವಾಗಿದ್ದರೆ ನಿರುತ್ಸಾಹಗೊಳ್ಳಬೇಡಿ. ಬದಲಾಗಿ, ಈ ಅರಿವಿಗಾಗಿ ಕೃತಜ್ಞರಾಗಿರಿ. ಪ್ರತಿದಿನ ನಿಜವಾದ ಪ್ರಾರ್ಥನೆಯ ಅಭ್ಯಾಸವನ್ನು ರೂಢಿಸಿಕೊಳ್ಳಲು ದೃಢವಾಗಿ ಸಂಕಲ್ಪ ಮಾಡುವುದಕ್ಕೆ ಈ ಅರಿವನ್ನು ಬಳಸಿಕೊಳ್ಳಿ.

ನನ್ನ ಪ್ರೀತಿಯ ಪ್ರಭುವೇ, ನೀನು ನನ್ನನ್ನು ನಿಜವಾದ ಪ್ರಾರ್ಥನೆಯ ಜೀವನಕ್ಕೆ ಕರೆದಿರುವೆ. ನೀನು ಬಯಸುವ ರೀತಿಯಲ್ಲಿ ಪ್ರಾರ್ಥನೆಯ ಅಭ್ಯಾಸಕ್ಕೆ ನಿಷ್ಠನಾಗಿರಲು ನಾನು ವಿಫಲನಾಗಿದ್ದೇನೆ. ನನ್ನ ಜೀವನದ ಈ ಅತ್ಯಂತ ಮೂಲಭೂತ ಭಾಗಕ್ಕೆ ಪ್ರತಿದಿನ ಸಮಯವನ್ನು ಮೀಸಲಿಡುವ ನನ್ನ ಸಂಕಲ್ಪವನ್ನು ಬಲಪಡಿಸಲು ದಯವಿಟ್ಟು ನನಗೆ ನೆರವಾಗು. ಪ್ರೀತಿಯ ಪ್ರಭುವೇ, ನಾನು ನಿನ್ನನ್ನು ಪೂರ್ಣ ಹೃದಯದಿಂದ ಅರಿತು ಪ್ರೀತಿಸುವಂತಾಗಲು, ನನಗೆ ಪ್ರಾರ್ಥಿಸಲು ಕಲಿಸು.

ನನ್ನಲ್ಲಿ ನೆಲೆಸಿರುವ ಪರಮ ಪವಿತ್ರ ತ್ರಿತ್ವವೇ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆ, ನಿಮ್ಮಲ್ಲಿ ಭರವಸೆಯಿಡುತ್ತೇನೆ, ನನ್ನ ಜೀವನವನ್ನು ನಿಮಗೆ ಸಮರ್ಪಿಸುತ್ತೇನೆ.

ಪಾಠ ಹದಿನೈದು: ಪ್ರಭು ಮಾತನಾಡುವುದನ್ನು ಆಲಿಸುವುದು

ಎರಡನೆಯ ವಾಸಸ್ಥಾನಗಳಲ್ಲಿರುವ ವ್ಯಕ್ತಿ ಅನುಭವಿಸುವ ಅತ್ಯಂತ ದೊಡ್ಡ ಸಾಂತ್ವನಗಳಲ್ಲಿ ಒಂದು, ತನ್ನ ಪ್ರಾರ್ಥನೆಯ ಮೂಲಕ ದೇವರು ಮಾತನಾಡುವುದನ್ನು ಕೇಳಿಸಿಕೊಳ್ಳುವ ಸಾಮರ್ಥ್ಯವಾಗಿದೆ. ಆದರೆ ದೇವರ ಸೌಮ್ಯವಾದ ಸ್ವರಕ್ಕೆ ಸಂಪೂರ್ಣವಾಗಿ ಸ್ಪಂದಿಸಲು ಆಗದಿರುವುದು ಅವರಿಗೆ ತೀವ್ರವಾದ ವ್ಯಥೆಯನ್ನು ಉಂಟುಮಾಡುತ್ತದೆ.

ನಾವು ಆತನನ್ನು ಬಯಸಬೇಕು ಮತ್ತು ಆತನ ಸಹವಾಸಕ್ಕಾಗಿ ಶ್ರಮಿಸಬೇಕು ಎಂಬ ಉತ್ಕಟ ಹಂಬಲ ನಮ್ಮ ಈ ಪ್ರಭುವಿಗಿದೆ. ಆದ್ದರಿಂದ ತನ್ನ ಬಳಿಗೆ ಬರುವಂತೆ ಆತನು ನಮ್ಮನ್ನು ಎಡೆಬಿಡದೆ, ಮತ್ತೆ ಮತ್ತೆ ಕರೆಯುತ್ತಾನೆ. ಆತನ ಈ ಸ್ವರವು ಎಷ್ಟು ಮಧುರವಾಗಿದೆ ಎಂದರೆ, ಆತನ ಆಜ್ಞೆಯನ್ನು ತಕ್ಷಣವೇ ಪಾಲಿಸಲು ಆಗದ ಆ ಬಡ ಆತ್ಮವು ದುಃಖದಿಂದ ತಲ್ಲಣಗೊಳ್ಳುತ್ತದೆ. ಹೀಗಾಗಿ, ನಾನು ಹೇಳುವಂತೆ, ಆತನ ಸ್ವರವನ್ನು ಕೇಳಲು ಆಗದಿದ್ದರೆ ಅನುಭವಿಸುವುದಕ್ಕಿಂತಲೂ ಹೆಚ್ಚು ಯಾತನೆಯನ್ನು ಅದು ಅನುಭವಿಸುತ್ತದೆ (II.I #4).

ಈ ನಿವಾಸಗಳಲ್ಲಿರುವ ವ್ಯಕ್ತಿಯು ಪದೇಪದೇ ಪಾಪದಲ್ಲಿ ಬೀಳುತ್ತಾನೆ ಮತ್ತು ಪ್ರಾರ್ಥನೆಯ ಮೂಲಕ ಮತ್ತೆ ಆ ಪಾಪದಿಂದ ಎದ್ದೇಳುತ್ತಾನೆ. ಇದು ಹಿಂದಿಗಿಂತಲೂ ಹೆಚ್ಚಿನ ಆಧ್ಯಾತ್ಮಿಕ ಯಾತನೆಯನ್ನು ಉಂಟುಮಾಡುವ ನೋವಿನ ಹೋರಾಟವಾಗಿದೆ. ತಾನು ಇನ್ನೂ ಎಷ್ಟು ದೂರ ಸಾಗಬೇಕಿದೆ ಎಂಬುದನ್ನು ಕಾಣಲು ಆರಂಭಿಸಿರುವುದರಿಂದ ಮತ್ತು ತನ್ನ ದೌರ್ಬಲ್ಯ ಹಾಗೂ ಪಾಪವನ್ನು ಕಂಡು ಧೃತಿಗೆಡುವುದರಿಂದ ಈ ಯಾತನೆ ಉಂಟಾಗುತ್ತದೆ. ಕೆಲವು ದೃಷ್ಟಿಗಳಲ್ಲಿ, ಮೊದಲನೆಯ ನಿವಾಸಗಳಲ್ಲಿರುವುದು ಹೆಚ್ಚು ಸುಲಭವಾಗಿತ್ತು; ಏಕೆಂದರೆ ಆಗ ವ್ಯಕ್ತಿಗೆ ತನ್ನ ಅನೇಕ ಪಾಪಗಳ ಅರಿವು ಅಷ್ಟಾಗಿ ಇರಲಿಲ್ಲ. ಆದರೆ ಎರಡನೆಯ ನಿವಾಸಗಳಲ್ಲಿ ಅನುಭವಿಸುವ ಯಾತನೆಯು ಒಳ್ಳೆಯದೇ, ಏಕೆಂದರೆ ಅದು ಮುಂದೆ ಸಾಗಲು ಮತ್ತು ಬದಲಾಗಲು ಪ್ರೇರಣೆಯಾಗುತ್ತದೆ. ತನ್ನ ಹೃದಯವು ದೇವರ ಪ್ರೀತಿಯಿಂದ ಹೆಚ್ಚು ಹೆಚ್ಚು ಪ್ರಜ್ವಲಿಸಿದಂತೆ, ಆಂತರಿಕ ಆಧ್ಯಾತ್ಮಿಕ ಯಾತನೆಯನ್ನು ಅನುಭವಿಸುವ ತನ್ನ ಸಾಮರ್ಥ್ಯವೂ ಹೆಚ್ಚುತ್ತದೆ ಎಂಬ ವಿರೋಧಾಭಾಸವನ್ನು ಈ ವ್ಯಕ್ತಿಯು ಅರ್ಥಮಾಡಿಕೊಳ್ಳಲು ಆರಂಭಿಸುತ್ತಾನೆ. ಇದೂ ಒಳ್ಳೆಯದೇ, ಏಕೆಂದರೆ ಆತ್ಮವು ಆಳವಾಗಿ ಪ್ರೀತಿಸಲು ಸಮರ್ಥವಾದಾಗ, ಆ ಪ್ರೀತಿಯಲ್ಲಿ ವಿಫಲವಾದರೆ ಹೆಚ್ಚು ಯಾತನೆಯನ್ನು ಅನುಭವಿಸುವುದಕ್ಕೂ ತನ್ನನ್ನು ತೆರೆದುಕೊಳ್ಳುತ್ತದೆ.

ಈ ಹಂತದಲ್ಲಿ ಇದೆಲ್ಲವೂ ಸಾಧ್ಯವಾಗುವುದು ಏಕೆಂದರೆ, ಮೊದಲ ಬಾರಿಗೆ, ವ್ಯಕ್ತಿಯು ದೇವರು ತನ್ನೊಂದಿಗೆ ಮಾತನಾಡುವುದನ್ನು ಕೇಳಲು ಆರಂಭಿಸುತ್ತಾನೆ. ಪವಿತ್ರ ಗ್ರಂಥವನ್ನು ಧ್ಯಾನಿಸುವ ಮೂಲಕ, ವ್ಯಕ್ತಿಯು ದೇವರ ಚಿತ್ತವನ್ನು ಅರ್ಥಮಾಡಿಕೊಳ್ಳಲು ಆರಂಭಿಸುತ್ತಾನೆ. ಯೇಸುವಿನ ಜೀವನವನ್ನು ಮನನ ಮಾಡುವ ಮೂಲಕ, ಅವರನ್ನು ಅನುಸರಿಸಲು ಪ್ರೇರಿತನಾಗುತ್ತಾನೆ. ವಿವಿಧ ಸಾಂಪ್ರದಾಯಿಕ ಪ್ರಾರ್ಥನೆಗಳನ್ನು ಭಕ್ತಿಯಿಂದ ಹೇಳುವ ಮೂಲಕ, ಅವುಗಳ ಮಾತುಗಳನ್ನು ತನ್ನ ಅಂತರಂಗದಲ್ಲಿ ಅಳವಡಿಸಿಕೊಳ್ಳಲು ಆರಂಭಿಸುತ್ತಾನೆ. ಆಧ್ಯಾತ್ಮಿಕ ವಾಚನ, ಪ್ರವಚನಗಳಿಗೆ ಗಮನಕೊಡುವುದು ಮತ್ತು ಇತರ ಆಧ್ಯಾತ್ಮಿಕ ಅಭ್ಯಾಸಗಳ ಮೂಲಕ ದೇವರ ಧ್ವನಿಯು ಹೆಚ್ಚು ಹೆಚ್ಚು ಸ್ಪಷ್ಟವಾಗುತ್ತದೆ. ಈ ರೀತಿಗಳಲ್ಲಿ, ದೇವರು ಮಾತನಾಡುತ್ತಿದ್ದಾರೆ ಮತ್ತು ವ್ಯಕ್ತಿಯು ಕೇಳುತ್ತಿದ್ದಾನೆ.

ಮನನ: ನೀವು ಪ್ರಾರ್ಥನಾಪೂರ್ವಕ ಧ್ಯಾನವನ್ನು ಅಭ್ಯಾಸ ಮಾಡುವಾಗ, ದೇವರು ನಿಮಗೆ ಏನು ಹೇಳುತ್ತಿದ್ದಾರೆ? ನೀವು ಏನನ್ನು “ಕೇಳುತ್ತೀರಿ?” ದೇವರು ವಿವಿಧ ರೀತಿಗಳಲ್ಲಿ ಮಾತನಾಡುತ್ತಾರೆ, ಮತ್ತು ನಾವು ಅವರ ಧ್ವನಿಯನ್ನು ಗುರುತಿಸಲು ಕಲಿಯಬೇಕು.

ಕಳೆದ ವಾರದಲ್ಲಿ, ನೀವು ಒಂದು ನಿರ್ದಿಷ್ಟ ಪ್ರಾರ್ಥನೆಯನ್ನು ಹೇಳುತ್ತಾ ಅದರ ಅರ್ಥವನ್ನು ಧ್ಯಾನಿಸಿದಾಗ, ಆ ಪ್ರಾರ್ಥನೆಯ ಯಾವುದಾದರೂ ಒಂದು ಅಂಶದ ಕಡೆಗೆ ಆಕರ್ಷಿತರಾದಿರಾ? ಹಾಗಿದ್ದರೆ, ಅದು ದೇವರು ನಿಮ್ಮೊಂದಿಗೆ ಮಾತನಾಡುತ್ತಿರುವುದಾಗಿರಬಹುದು. ದಿನದ ಕೆಲಸಕಾರ್ಯಗಳಲ್ಲಿ ತೊಡಗಿರುವಾಗ, ನಿಮ್ಮ ಮನಸ್ಸು ನಿಮ್ಮ ಪ್ರಾರ್ಥನೆಯಲ್ಲಿನ ಯಾವುದಾದರೂ ಒಂದು ಚಿತ್ರಣದ ಕಡೆಗೆ ಮತ್ತೆ ಮತ್ತೆ ಮರಳುತ್ತದೆಯೇ? ಹಾಗಿದ್ದರೆ, ಅದು ದೇವರ ಧ್ವನಿಯಾಗಿದ್ದು, ಅವರ ಚಿತ್ತವನ್ನು ನಿಮಗೆ ತಿಳಿಸುತ್ತಿರಬಹುದು. ಯಾವುದಾದರೂ ಪ್ರವಚನ, ಆಧ್ಯಾತ್ಮಿಕ ಪುಸ್ತಕ ಅಥವಾ ಬೇರೆ ಭಕ್ತಿಯ ಆಚರಣೆ ನಿಮ್ಮ ಗಮನವನ್ನು ಸೆಳೆದಿದೆಯೇ? ಹಾಗಿದ್ದರೆ, ಆ ಪವಿತ್ರ ಅಭ್ಯಾಸಗಳಲ್ಲಿ ತೊಡಗುವುದನ್ನು ಮುಂದುವರಿಸಿ.

ನೀವು ಪ್ರಾರ್ಥನಾಪೂರ್ವಕವಾಗಿ ಧ್ಯಾನಿಸಿದ ಬಳಿಕ, ಆ ಪ್ರಾರ್ಥನೆಯಲ್ಲಿ ನಿಮ್ಮ ಮನಸ್ಸನ್ನು ಅತ್ಯಂತ ಆಳವಾಗಿ ಸ್ಪರ್ಶಿಸಿದ ವಿಷಯವನ್ನು ಕುರಿತು ಯೋಚಿಸಲು ಸ್ವಲ್ಪ ಸಮಯ ಕಳೆಯಿರಿ. ಅನಂತರ, ಮತ್ತೊಮ್ಮೆ ಆ ಧ್ಯಾನಕ್ಕೆ ಮರಳಿ ಬನ್ನಿ. ಒಳ್ಳೆಯ ಊಟ ಅಥವಾ ರಜಾದಿನಗಳ ಸವಿಯನ್ನು ಆಸ್ವಾದಿಸುವಂತೆ ಅದನ್ನು ಆಸ್ವಾದಿಸಿ.

ನಿಮ್ಮ ಪಾಪದ ಕುರಿತೂ ಯೋಚಿಸಿ. ನೀವು ಪ್ರಾರ್ಥಿಸುವಾಗ ಒಂದು ನಿರ್ದಿಷ್ಟ ಪಾಪವು ನೆನಪಿಗೆ ಬಂದು, ಆ ಪಾಪಕ್ಕಾಗಿ ನಿಮಗೆ ನಾಚಿಕೆಯಾದರೆ, ನಿಮ್ಮ ಜೀವನದಲ್ಲಿ ಈ ಕ್ಷಣ ನೀವು ಗಮನಹರಿಸಬೇಕೆಂದು ದೇವರು ಬಯಸುವುದು ಇದೇ ಆಗಿರಬಹುದು ಎಂಬುದನ್ನು ತಿಳಿಯಿರಿ. ಅದರ ಕುರಿತೇ ಅತಿಯಾಗಿ ಚಿಂತಿಸುತ್ತಿರಬೇಡಿ; ಅದರ ಅರಿವಿರಲಿ, ಅದನ್ನು ಜಯಿಸಲು ಅನುಗ್ರಹಕ್ಕಾಗಿ ಪ್ರಾರ್ಥಿಸಿ, ಆ ಅನುಗ್ರಹದೊಂದಿಗೆ ಸಹಕರಿಸಲು ದೃಢವಾಗಿ ನಿರ್ಧರಿಸಿ ಮತ್ತು ಮುಂದೆ ಸಾಗಿರಿ. ನೀವು ಮತ್ತೆ ಆ ಪಾಪದಲ್ಲಿ ಬಿದ್ದರೆ, ಕೈಬಿಡಬೇಡಿ ಮತ್ತು ಧೃತಿಗೆಡಬೇಡಿ. ಪ್ರಾರ್ಥಿಸುತ್ತಲೇ ಇರಿ ಮತ್ತು ದೇವರ ಧ್ವನಿಯನ್ನು ಕೇಳುತ್ತಲೇ ಇರಿ. ನೀವು ನಿಮ್ಮ ಪಾಲಿನ ಪ್ರಯತ್ನವನ್ನು ಮಾಡಿ ಎಂದಿಗೂ ಕೈಬಿಡದಿದ್ದರೆ, ನಿಮ್ಮ ಜೀವನದ ಪ್ರತಿಯೊಂದು ಪಾಪವನ್ನೂ ಜಯಿಸಲು ಅವರು ನಿಮಗೆ ಸಹಾಯಮಾಡಬಲ್ಲರು ಮತ್ತು ಖಂಡಿತವಾಗಿಯೂ ಸಹಾಯಮಾಡುತ್ತಾರೆ ಎಂದು ಭರವಸೆಯಿಡಿ.

ಅತ್ಯಂತ ತಾಳ್ಮೆಯುಳ್ಳ ಯೇಸುವೇ, ನೀವು ಹಗಲಿರುಳು ನನ್ನೊಂದಿಗೆ ಮಾತನಾಡುತ್ತೀರಿ; ಆದರೂ ಎಷ್ಟೋ ಬಾರಿ ನಾನು ಆಲಿಸುವುದಿಲ್ಲ. ನಿಮ್ಮ ಸೌಮ್ಯವಾದ ಮತ್ತು ಸ್ಪಷ್ಟವಾದ ಧ್ವನಿಯನ್ನು ನಾನು ಪರಿಚಯಿಸಿಕೊಳ್ಳುವಂತೆ ದಯಮಾಡಿ ನನ್ನ ವಿಶ್ವಾಸದ ಕಿವಿಗಳನ್ನು ತೆರೆಯಿರಿ. ನೀವು ಹೇಳುವುದೆಲ್ಲವನ್ನೂ ಮಾಡಲು ಆನಂದಭರಿತವಾದ ಮತ್ತು ದೃಢವಾದ ಸಂಕಲ್ಪದೊಂದಿಗೆ ನಿಮಗೆ ಕಿವಿಗೊಟ್ಟು ಪ್ರತಿಕ್ರಿಯಿಸಲು ನನಗೆ ಸಹಾಯಮಾಡಿ.

ನನ್ನೊಳಗೆ ನೆಲೆಸಿರುವ ಪರಮ ಪವಿತ್ರ ತ್ರಿತ್ವವೇ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆ, ನಿಮ್ಮಲ್ಲಿ ಭರವಸೆಯಿಡುತ್ತೇನೆ, ನನ್ನ ಜೀವನವನ್ನು ನಿಮಗೆ ಸಮರ್ಪಿಸುತ್ತೇನೆ.

ಪಾಠ ಹದಿನಾರು: ಸ್ಥಿರತೆ

ಪ್ರಾರ್ಥನೆ, ಪ್ರವಚನಗಳು, ಆಧ್ಯಾತ್ಮಿಕ ವಾಚನ ಅಥವಾ ಇತರ ಮಾರ್ಗಗಳ ಮೂಲಕ ದೇವರು ವಿವಿಧ ರೀತಿಗಳಲ್ಲಿ ನಮ್ಮೊಂದಿಗೆ ಮಾತನಾಡುವಾಗ, ನಾವು ಅವರ ಧ್ವನಿಯನ್ನು ಕೇಳಿ ಅರ್ಥಮಾಡಿಕೊಳ್ಳಲು ಆರಂಭಿಸಿದಂತೆ, ನಮ್ಮೊಳಗೆ ಒಂದು ಹೋರಾಟವನ್ನು ನಡೆಸಬೇಕಾಗುತ್ತದೆ. ಕೆಲವೊಮ್ಮೆ, ಮುಂದೆ ಸಾಗುವ ನಮ್ಮ ಸಾಮರ್ಥ್ಯವನ್ನು ನಾವು ಪ್ರಶ್ನಿಸುತ್ತೇವೆ ಮತ್ತು ಹೆಚ್ಚು ಸುಲಭವಾಗಿದ್ದ ನಮ್ಮ ಹಿಂದಿನ ಆಧ್ಯಾತ್ಮಿಕ ಸ್ಥಿತಿಗೆ ಮರಳುವ ಯೋಚನೆ ಮಾಡುತ್ತೇವೆ. ನಾವು ದೃಢವಾಗಿ ಮುಂದುವರಿದು, ಪವಿತ್ರತೆಯಲ್ಲಿ ಬೆಳೆಯುವ ಬಯಕೆಯನ್ನು ಆರಿಸದಿದ್ದರೆ, ದೇವರು ನಮ್ಮೊಂದಿಗೆ ತಾಳ್ಮೆಯಿಂದ ಇರುತ್ತಾರೆ.

…ಏಕೆಂದರೆ ಮಹೋನ್ನತರಾದ ಅವರು ಅನೇಕ ದಿನಗಳವರೆಗೆ, ಅಷ್ಟೇ ಅಲ್ಲ, ವರ್ಷಗಳವರೆಗೆ ಕಾಯಲು ಸಂಪೂರ್ಣವಾಗಿ ಸಿದ್ಧರಾಗಿದ್ದಾರೆ; ವಿಶೇಷವಾಗಿ, ನಾವು ದೃಢವಾಗಿ ಮುಂದುವರಿಯುತ್ತಿರುವುದನ್ನು ಮತ್ತು ನಮ್ಮಲ್ಲಿ ಒಳ್ಳೆಯ ಬಯಕೆಗಳಿರುವುದನ್ನು ಅವರು ಕಂಡಾಗ. ಇಲ್ಲಿ ಅತ್ಯಂತ ಅಗತ್ಯವಾಗಿರುವುದು ಇದೇ; ಇದು ನಮ್ಮಲ್ಲಿದ್ದರೆ, ನಾವು ಅಪಾರವಾಗಿ ಲಾಭಪಡೆಯುವುದು ತಪ್ಪದು (II.I #6).

ಆಧ್ಯಾತ್ಮಿಕ ಬೆಳವಣಿಗೆಯ ಈ ಹಂತದಲ್ಲಿ ದೃಢವಾಗಿ ಮುಂದುವರಿಯುವುದೇ ಮುಖ್ಯ. ನಮ್ಮ ಮೇಲೆ ಸಾವಿರಾರು ಪ್ರಲೋಭನೆಗಳು ಎರಗುತ್ತವೆ. ನಮ್ಮ ಪ್ರಯಾಣವನ್ನು ಕೈಬಿಡುವ ಆಲೋಚನೆಗಳ ಮೂಲಕ ದೆವ್ವಗಳು ಕ್ರೂರವಾಗಿ ದಾಳಿ ಮಾಡುತ್ತವೆ. ನಾವು ನಮ್ಮ ಹಿಂದಿನ ಪಾಪಗಳನ್ನು ನೆನಪಿಸಿಕೊಳ್ಳುತ್ತೇವೆ ಮತ್ತು ಅವುಗಳಿಗೆ ಮರಳುವ ಯೋಚನೆ ಮಾಡುತ್ತೇವೆ. ದೇವರನ್ನು ಪ್ರೀತಿಸುವ ನಮ್ಮ ಬಯಕೆ ಬೆಳೆದಂತೆ, ನಾವು ಬದಲಾಗಬೇಕಾದ ಅಗತ್ಯವನ್ನೂ ಪ್ರಯಾಣದಲ್ಲಿ ಇನ್ನೂ ಎಷ್ಟು ದೂರ ಸಾಗಬೇಕಿದೆ ಎಂಬುದನ್ನೂ ಕಂಡುಕೊಳ್ಳುವಾಗ, ಹೊಸ ಬಗೆಯ ಆಂತರಿಕ ಯಾತನೆಯನ್ನು ಅನುಭವಿಸುತ್ತೇವೆ. ಹೀಗಾದಾಗ, ನಾವು ಕಡಿಮೆ ಪ್ರೀತಿಸುತ್ತಿದ್ದ ಕಾಲಕ್ಕೆ ಮರಳುವ ಪ್ರಲೋಭನೆಗೆ ಒಳಗಾಗುತ್ತೇವೆ; ಏಕೆಂದರೆ ಕೆಲವು ದೃಷ್ಟಿಗಳಲ್ಲಿ ಆ ಜೀವನರೀತಿ ಹೆಚ್ಚು ಸುಲಭವಾಗಿತ್ತು. ಈ ಹಂತದಲ್ಲಿ ನಾವು ದೃಢವಾಗಿ ಮುಂದುವರಿಯದಿದ್ದರೆ, ಎಲ್ಲವೂ ಕಳೆದುಹೋಗುತ್ತದೆ.

ಈ ಹಂತದಲ್ಲಿ ದೃಢವಾಗಿ ಮುಂದುವರಿಯಲು ಉತ್ತಮ ಮಾರ್ಗವೆಂದರೆ ನಿಮ್ಮ ಆತ್ಮದ ಸಾಮರ್ಥ್ಯಗಳನ್ನು ದೇವರ ಚಿತ್ತಕ್ಕೆ ಅನುಗುಣವಾಗಿ ಬಳಸುವುದು. ನಿರ್ದಿಷ್ಟವಾಗಿ ಹೇಳುವುದಾದರೆ, ಈ ಹೋರಾಟದಲ್ಲಿ ನೀವು ನಿಮ್ಮ ಮಾನವ ತರ್ಕಶಕ್ತಿ, ಸ್ಮರಣಶಕ್ತಿ, ಇಚ್ಛಾಶಕ್ತಿ ಮತ್ತು ತಿಳಿವಳಿಕೆಯನ್ನು ಬಳಸಬೇಕು. ನಿಮ್ಮನ್ನು ಕರೆಯಲಾಗಿರುವ ಮಾರ್ಗದಿಂದ ವಿಮುಖರಾಗುವುದು ಎಷ್ಟು ಮೂರ್ಖತನವೆಂದು ನಿಮ್ಮ ತರ್ಕಶಕ್ತಿಯಿಂದ ಗುರುತಿಸಬೇಕು. ವಿಶ್ವಾಸವು ನಿಮ್ಮ ತರ್ಕಶಕ್ತಿಗೆ ಮಾರ್ಗದರ್ಶನ ನೀಡಬೇಕು; ಒಳ್ಳೆಯ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ಸ್ಪಷ್ಟವಾಗಿ ಯೋಚಿಸಲು ವಿಶ್ವಾಸದ ಮೂಲಕ ಕಲಿತದ್ದನ್ನು ನೀವು ಬಳಸಬೇಕು. ಪಾಪದ ದುಷ್ಪರಿಣಾಮಗಳನ್ನು ನೆನಪಿಸಿಕೊಳ್ಳಲು ನಿಮ್ಮ ಸ್ಮರಣಶಕ್ತಿ ಸಹಾಯ ಮಾಡುತ್ತದೆ; ಆ ಕೆಟ್ಟ ನೆನಪುಗಳು ಮುಂದೆ ಅವುಗಳಿಂದ ದೂರವಿರಲು ನಿಮ್ಮನ್ನು ಪ್ರೇರೇಪಿಸಬೇಕು. ನಿಮ್ಮ ಇಚ್ಛಾಶಕ್ತಿಯಿಂದ, ದಿವ್ಯ ಪ್ರಿಯತಮನು ನಿಮ್ಮನ್ನು ತನ್ನೆಡೆಗೆ ಸೆಳೆಯಲು ಅವಕಾಶ ಕೊಟ್ಟು, ಎಲ್ಲಕ್ಕಿಂತ ಮಿಗಿಲಾಗಿ ಆತನನ್ನೇ ಆರಿಸಿಕೊಳ್ಳಬೇಕು. ನೀವು ಹೀಗೆ ಮಾಡುವಾಗ, ದೇವರನ್ನು ಆರಿಸಿಕೊಳ್ಳುವುದರ ಜ್ಞಾನವನ್ನೂ, ನಿಮ್ಮ ಬದುಕಿಗಾಗಿ ಆತನ ಪವಿತ್ರ ಚಿತ್ತವನ್ನೂ, ಸರಿಯಾದ ಮಾರ್ಗದಲ್ಲಿ ನಡೆಯುವಾಗ ಮುಂದೆ ದೊರೆಯಲಿರುವ ಅನೇಕ ಒಳಿತುಗಳನ್ನೂ ಗ್ರಹಿಸಲು ನಿಮ್ಮ ತಿಳಿವಳಿಕೆ ನೆರವಾಗುತ್ತದೆ.

ಮನನ: ನಿಮ್ಮ ಆಧ್ಯಾತ್ಮಿಕ ಪಯಣದಲ್ಲಿ ಕೆಲವೊಮ್ಮೆ ನಿರುತ್ಸಾಹಗೊಳ್ಳುತ್ತೀರಾ? ಹಾಗಿದ್ದರೆ, ನಿಮ್ಮ ಮನಸ್ಸು ಮತ್ತೆ ಯಾವುದರ ಕಡೆಗೆ ತಿರುಗುತ್ತದೆ? ಹಿಂದಿನ ಪಾಪದ ಕೆಟ್ಟ ಅಭ್ಯಾಸಗಳ ಕಡೆಗೆಯೇ? ಹಾನಿಕರವಾದ ಸಂಬಂಧದ ಕಡೆಗೆಯೇ? ದೇವರನ್ನು ಕಡಿಮೆ ಪ್ರೀತಿಸುವುದು ಸುಲಭವಾಗಿದ್ದ ಕಾಲದ ಕಡೆಗೆಯೇ? ಕ್ಷಣಿಕ ಸುಖಗಳು ಮತ್ತು ಭೋಗಗಳ ಕಡೆಗೆಯೇ? ಇವು ಮೂರ್ಖತನದ, ಹಾನಿಕರ ಅನ್ವೇಷಣೆಗಳೆಂದು ತಳ್ಳಿಹಾಕಿರಿ. ನಿಮಗಾಗಿ ಕಾದಿರುವ ಮಹಿಮಾಮಯ ಬದುಕನ್ನು ನೀವು ಕಂಡುಕೊಳ್ಳದಂತೆ ತಡೆಯಲು ಪ್ರಯತ್ನಿಸುವ ಅನೇಕ ದೆವ್ವಗಳಿಂದ ಬರುವ ಪ್ರಲೋಭನೆಗಳೇ ಇವು.

ಇತ್ತೀಚೆಗೆ ದೇವರು ನಿಮ್ಮೊಂದಿಗೆ ಮಾತನಾಡಿದ ವಿಷಯಗಳ ಕುರಿತು ಯೋಚಿಸಿರಿ. ನೀವು ಸಾಂತ್ವನ, ಪ್ರೋತ್ಸಾಹ, ಆನಂದ ಮತ್ತು ಭರವಸೆಯನ್ನು ಅನುಭವಿಸಿದ ಪ್ರೇರಣಾದಾಯಕ ಕ್ಷಣಗಳನ್ನು ನೆನಪಿಸಿಕೊಳ್ಳಿರಿ. ಈ ವಿಚಾರಗಳನ್ನು ಮತ್ತೆ ನಿಮ್ಮ ಮನಸ್ಸಿನಲ್ಲಿ ತುಂಬಿಕೊಳ್ಳಿರಿ. ನಿಮ್ಮ ಇಚ್ಛಾಶಕ್ತಿ ಮತ್ತು ಬಯಕೆಗಳು ಅವುಗಳ ಮೇಲೆ ನೆಲೆಗೊಳ್ಳಲು ಅವಕಾಶ ಕೊಡಿರಿ. ದೇವರಿಂದ ವಿಮುಖರಾಗುವುದರ ಮೂರ್ಖತನವನ್ನೂ, ಆತನ ಕಡೆಗೆ ಕರೆದೊಯ್ಯುವ ಕಷ್ಟಕರವಾದ ಇಕ್ಕಟ್ಟಿನ ಮಾರ್ಗದಲ್ಲಿ ನಡೆಯುವುದರ ಜ್ಞಾನವನ್ನೂ ಪರಿಶೀಲಿಸಿರಿ. ಪ್ರೀತಿಯಿಂದ ಬರುವ ನೋವಿಗೆ ಹೆದರಬೇಡಿರಿ. ಈ ನೋವು ತ್ಯಾಗಮಯ ಪ್ರೀತಿಯಾಗಿದೆ ಮತ್ತು ಅದು ಯಾವಾಗಲೂ ಬದುಕಿನಲ್ಲಿ ಇನ್ನಷ್ಟು ಆಳವಾದ ತೃಪ್ತಿಯನ್ನು ನೀಡುತ್ತದೆ. ದೇವರು ನಿಮಗೆ ನೀಡಿರುವ ಪ್ರತಿಯೊಂದು ಸಾಧನವನ್ನೂ ಬಳಸಿರಿ. ದೃಢವಾಗಿ ಮುಂದುವರಿಯಿರಿ, ಮುಂದುವರಿಯಿರಿ, ಮುಂದುವರಿಯಿರಿ. ಕೈಬಿಡಬೇಡಿರಿ, ಭರವಸೆ ಕಳೆದುಕೊಳ್ಳಬೇಡಿರಿ; ಏಕೆಂದರೆ ಪರಿಪೂರ್ಣತೆಯ ಲೋಕವೊಂದು ನಿಮಗಾಗಿ ಕಾದಿದೆ.

ಜ್ಞಾನವಂತನಾದ ನನ್ನ ಪ್ರಭುವೇ, ನನಗೆ ಯಾವುದು ಉತ್ತಮವೆಂದು ನಿನಗೆ ತಿಳಿದಿದೆ; ನನ್ನ ಪರಿಪೂರ್ಣತೆಯತ್ತ ಕರೆದೊಯ್ಯುವ ಪರಿಪೂರ್ಣ ಮಾರ್ಗವೂ ನಿನಗೆ ತಿಳಿದಿದೆ. ನಿನ್ನ ಜ್ಞಾನವನ್ನು ಅರಿಯಲು ಮತ್ತು ನಿನ್ನ ಮಹಾ ಪ್ರೀತಿಯನ್ನು ಅನುಭವಿಸಲು ದಯಮಾಡಿ ನನಗೆ ಸಹಾಯ ಮಾಡು. ನಾನು ಹಾಗೆ ಮಾಡುವಾಗ, ಆರಂಭದಲ್ಲಿ ಇದು ಎಷ್ಟೇ ಕಷ್ಟವೆನಿಸಿದರೂ, ಎಲ್ಲಕ್ಕಿಂತ ಮಿಗಿಲಾಗಿ ನಿನ್ನನ್ನೇ ಆರಿಸಿಕೊಳ್ಳಲು ದಯಮಾಡಿ ನನಗೆ ಮನಸ್ಸಿನ ಸ್ಪಷ್ಟತೆಯನ್ನು ದಯಪಾಲಿಸು. ನನ್ನ ಆತ್ಮದ ಆಳದಲ್ಲಿ ವಾಸಿಸುವ ನಿನ್ನ ಕಡೆಗಿನ ಪಯಣದಲ್ಲಿ ದೃಢವಾಗಿ ಮುಂದುವರಿಯಲು ನನಗೆ ಸಹಾಯ ಮಾಡು. ಪ್ರಿಯ ಪ್ರಭುವೇ, ನಾನು ನಿನ್ನನ್ನೇ ಆರಿಸಿಕೊಳ್ಳುತ್ತೇನೆ; ಲೋಕವನ್ನೂ, ಅದರ ಆಮಿಷಗಳನ್ನೂ, ಅದರ ಸುಳ್ಳುಗಳನ್ನೂ ಹಿಂದೆ ಬಿಟ್ಟುಬಿಡುತ್ತೇನೆ.

ಪಾಠ ಹದಿನೇಳು: ನರಕದ ಎಲ್ಲ ಶಕ್ತಿಗಳ ವಿರುದ್ಧ ಹೋರಾಡುವುದು

ನಿರುತ್ಸಾಹವನ್ನು ಜಯಿಸಲು ಇರುವ ಅತ್ಯುತ್ತಮ ಮಾರ್ಗಗಳಲ್ಲಿ ಒಂದು, ಸತ್ಯದಿಂದ ನಿಮ್ಮನ್ನು ಸಜ್ಜುಗೊಳಿಸಿಕೊಳ್ಳುವುದು. ನೀವು ತಿಳಿದಿರಬೇಕಾದ ಒಂದು ಸತ್ಯವೇನೆಂದರೆ, ನೀವು ಪವಿತ್ರತೆಯಲ್ಲಿ ಬೆಳೆಯುತ್ತಿರುವುದನ್ನು ದೆವ್ವಗಳು ಕಂಡಾಗ, ತಮ್ಮಲ್ಲಿರುವ ಸರ್ವಶಕ್ತಿಯಿಂದಲೂ ನಿಮ್ಮ ಮೇಲೆ ದಾಳಿ ಮಾಡುತ್ತವೆ.

ಈ ಸಮಯದಲ್ಲಿ ಆತ್ಮವು ಖಂಡಿತವಾಗಿಯೂ ದೊಡ್ಡ ಪರೀಕ್ಷೆಗಳನ್ನು ಅನುಭವಿಸುತ್ತದೆ; ವಿಶೇಷವಾಗಿ, ಅದರ ಸ್ವಭಾವ ಮತ್ತು ಅಭ್ಯಾಸಗಳು ಇನ್ನಷ್ಟು ಮುಂದುವರಿಯಲು ಸಿದ್ಧವಾಗಿವೆ ಎಂದು ಪಿಶಾಚನು ಕಂಡರೆ, ಅದನ್ನು ಮತ್ತೆ ಹಿಂದಕ್ಕೆ ತಳ್ಳಲು ನರಕದ ಎಲ್ಲ ಶಕ್ತಿಗಳೂ ಒಂದಾಗುತ್ತವೆ (II.I #11).

ಈ ಯೋಚನೆ ಭಯ ಹುಟ್ಟಿಸಬಹುದು, ಆದರೆ ಅದು ಹಾಗಿರಬೇಕಾಗಿಲ್ಲ. ನಮ್ಮ ಲೋಕದಲ್ಲಿರುವ ಪತಿತ ದೆವ್ವಗಳು ಪ್ರಭಾವ ಬೀರುವ ಮತ್ತು ವಿಚಾರಗಳನ್ನು ಮನಸ್ಸಿನಲ್ಲಿ ಸೂಚಿಸುವ ತಮ್ಮ ಸಹಜ ಶಕ್ತಿಗಳನ್ನು ಉಳಿಸಿಕೊಂಡಿವೆ. ಅವು ಸ್ವರ್ಗದಿಂದ ಪತನಗೊಂಡಿರುವುದರಿಂದ, ಈಗ ಆ ಸಹಜ ಶಕ್ತಿಗಳನ್ನು ಬಳಸಿ ನಿಮ್ಮನ್ನು ದೇವರಿಂದ ದೂರಮಾಡಲು ಮತ್ತು ಅವುಗಳ ದುಃಸ್ಥಿತಿಯಲ್ಲಿ ನೀವೂ ಪಾಲುಗೊಳ್ಳುವಂತೆ ನಿಮ್ಮನ್ನು ಒಪ್ಪಿಸಲು ಪ್ರಯತ್ನಿಸುತ್ತವೆ.

ದುಷ್ಟನಿಂದ ಮತ್ತು ಅವನ ದೆವ್ವಗಳ ಪಡೆಗಳಿಂದ ಬರುವ ಈ ಪ್ರಲೋಭನೆಗಳನ್ನು ಎದುರಿಸಲು, ಅವುಗಳ ಧ್ವನಿಗಳನ್ನು ಗುರುತಿಸಲು ಕಲಿಯುವುದು ಮುಖ್ಯ. ನಾವು ಅವುಗಳ ಧ್ವನಿಗಳನ್ನು ಗುರುತಿಸಲು ಕಲಿಯುವುದು ಅವುಗಳಿಗೆ ಕಿವಿಗೊಡಲು ಅಲ್ಲ, ಬದಲಾಗಿ ಅವು ಮಾತನಾಡಿದ ಕ್ಷಣದಲ್ಲೇ ಅವುಗಳನ್ನು ತಳ್ಳಿಹಾಕಲು.

ಆಧ್ಯಾತ್ಮಿಕ ಬೆಳವಣಿಗೆಯ ಈ ಹಂತದಲ್ಲಿ, ನಿಮ್ಮನ್ನು ಹಿಂದಿನ ಸ್ಥಿತಿಗೆ ಮರಳಿ ತಳ್ಳಲು ಮತ್ತು ನಿಮ್ಮ ಆಧ್ಯಾತ್ಮಿಕ ಪಯಣದಲ್ಲಿ ನೀವು ಮುಂದುವರಿಯದಂತೆ ತಡೆಯಲು “ನರಕದ ಎಲ್ಲ ಶಕ್ತಿಗಳೂ ಒಂದಾಗುತ್ತವೆ” ಎಂದು ಸಂತ ತೆರೇಸಾ ಮತ್ತೆ ಮತ್ತೆ ಬಹಳ ಸ್ಪಷ್ಟವಾಗಿ ಹೇಳುತ್ತಾರೆ. ನೀವು ಸಾಕಷ್ಟು ಒಳ್ಳೆಯವರಲ್ಲ, ಸಾಕಷ್ಟು ಪವಿತ್ರರಲ್ಲ, ನೀವು ಹಿಂದೆ ಆನಂದಿಸುತ್ತಿದ್ದ ಎಷ್ಟೋ ವಿಷಯಗಳನ್ನು ಬಿಟ್ಟುಕೊಡಬೇಕಾಗುತ್ತದೆ ಎಂದು ಅವು ನಿಮ್ಮ ಮನಸ್ಸಿಗೆ ಸೂಚಿಸುತ್ತವೆ; ನಿಮ್ಮನ್ನು ಹಿಮ್ಮೆಟ್ಟಿಸಲು ಇನ್ನೂ ಸಾವಿರಾರು ಸುಳ್ಳುಗಳನ್ನು ಹೇಳುತ್ತವೆ. ಈ ದೆವ್ವಗಳ ಹತಾಶೆಯಿಂದಾಗಿ ನಿಮ್ಮ ಮೇಲೆ ಒತ್ತಿ ಬರುವ ಸುಳ್ಳುಗಳ ಈ ಪಡೆಗಳನ್ನು ನೀವು ಎದುರಿಸುವಾಗ, ಆಧ್ಯಾತ್ಮಿಕ ಪಯಣದ ಈ ಭಾಗವು ಬಹಳ ನೋವಿನಿಂದ ಕೂಡಿರಬಹುದು. ಈ ಸುಳ್ಳುಗಳನ್ನು ಸರಳವಾಗಿ, ವಿವೇಚನೆಯಿಂದ, ಸೌಮ್ಯವಾಗಿ ಮತ್ತು ಶಾಂತವಾಗಿ ಗುರುತಿಸಿ ತಳ್ಳಿಹಾಕುವುದೇ ಗುರಿ. ಅಷ್ಟೇ.

ಮನನ: ನಮ್ಮ ಪ್ರಭುವಿನೊಂದಿಗಿನ ನಿಮ್ಮ ಸಂಬಂಧದಲ್ಲಿ ನೀವು ಮುಂದುವರಿಯುವಾಗ, ಕೆಲವೊಮ್ಮೆ ನಿಮ್ಮ ಹಿಂದಿನ ಬದುಕು, ನಿಮ್ಮ ಪಾಪ, ನಿಮ್ಮ ಹೋರಾಟಗಳು ಅಥವಾ ಇತರ ನಿರುತ್ಸಾಹಗೊಳಿಸುವ ವಿಚಾರಗಳ ಬಗ್ಗೆ ಬಿಡದೆ ಯೋಚಿಸುತ್ತಿರುವುದನ್ನು ಗಮನಿಸುತ್ತೀರಾ? ಹಾಗಿದ್ದರೆ, ಇವು ಹೆಚ್ಚಾಗಿ ನಿಮ್ಮ ಬಗ್ಗೆ ಅಸೂಯೆಪಡುವ ಈ ಪತಿತ ದೂತರ ಹತಾಶೆಯಿಂದ ಬರುವ ಪ್ರಲೋಭನೆಗಳಾಗಿರಬಹುದು. ಆದರೆ ಹೆದರಬೇಡಿರಿ, ಅವುಗಳನ್ನು ಜಯಿಸುವ ಶಕ್ತಿಯನ್ನು ದೇವರು ನಿಮಗೆ ನೀಡಿದ್ದಾನೆ. ಆದರೂ, ನಿಮ್ಮನ್ನು ಹಿಮ್ಮೆಟ್ಟಿಸಲು ಅವು ಮಾಡುವ ಪ್ರಯತ್ನಗಳ ಅರಿವು ನಿಮಗಿರುವುದು ಸಹಾಯಕವಾಗಿದೆ.

ನೀವು ಎದುರಿಸಲು ಹೋರಾಡುತ್ತಿರುವ ಯಾವುದೇ ಬಲವಾದ ಪ್ರಲೋಭನೆಗಳ ಕುರಿತು ಯೋಚಿಸಿರಿ. ಅವುಗಳನ್ನು ನೆನಪಿಸಿಕೊಳ್ಳುವಾಗ, ಅವು ದುಷ್ಟನು ನಿಮಗೆ ಹೇಳುತ್ತಿರುವ ಸುಳ್ಳುಗಳೆಂದು ಗುರುತಿಸಿರಿ. ಅವುಗಳಿಗೆ ಹೆದರಬೇಡಿರಿ; ಏಕೆಂದರೆ ಯೇಸು ಕೂಡ ತಾನು ಪ್ರಲೋಭನೆಗೆ ಒಳಗಾಗಲು ಅವಕಾಶ ಕೊಟ್ಟನು. ಎಲ್ಲ ಪ್ರಲೋಭನೆಗಳನ್ನೂ ಜಯಿಸಿ, ನಾವು ಆತನ ಮಾರ್ಗದಲ್ಲಿ ನಡೆಯಲು ನಮ್ಮನ್ನು ಸಮರ್ಥರನ್ನಾಗಿಸುವುದಕ್ಕಾಗಿಯೇ ಆತನು ಹೀಗೆ ಮಾಡಿದನು.

ನೀವು ಅನುಭವಿಸುವ ಪ್ರಲೋಭನೆಗಳು ನಿಮ್ಮ ಅಂತರಂಗದಲ್ಲಿ ಯಾತನೆಯನ್ನು ಉಂಟುಮಾಡಿದರೆ, ಇದು ಒಳ್ಳೆಯದೇ ಎಂದು ತಿಳಿಯಿರಿ. ನೀವು ಮಾಡುತ್ತಿರುವ ಒಳ್ಳೆಯ ಕೆಲಸಗಳನ್ನೂ ನೀವು ಸಾಧಿಸುತ್ತಿರುವ ಪ್ರಗತಿಯನ್ನೂ ಪಿಶಾಚನು ಗಮನಿಸುತ್ತಿದ್ದಾನೆ ಎಂಬುದಕ್ಕೆ ಇದು ಒಂದು ಸೂಚನೆ. ಪಾಪವನ್ನು ತಿರಸ್ಕರಿಸಿ, ಹೆಚ್ಚು ಪ್ರಾರ್ಥಿಸಿ, ಸದ್ಗುಣಗಳಲ್ಲಿ ಬೆಳೆಯುವ ಮೂಲಕ ದೇವರಿಗೆ ಇನ್ನಷ್ಟು ಹತ್ತಿರವಾಗಲು ದೃಢನಿಶ್ಚಯ ಮಾಡಿ, ಅವನ ಪ್ರಯತ್ನಗಳನ್ನು ವಿಫಲಗೊಳಿಸಿ.

ಸಕಲ ಶಕ್ತಿಯ ಪ್ರಭುವೇ, ಪ್ರಲೋಭನೆಯನ್ನೇ ಜಯಿಸಲು ಮತ್ತು ನಿಮ್ಮ ದೈವಿಕ ಶಕ್ತಿಯಲ್ಲಿ ನಾನು ಪಾಲುಗೊಳ್ಳುವಂತೆ ಮಾಡಲು, ನಿಮ್ಮ ಮಾನವ ಜೀವನದಲ್ಲಿ ನೀವು ಅನೇಕ ಪ್ರಲೋಭನೆಗಳನ್ನು ಸಹಿಸಿಕೊಂಡಿರಿ. ನಿಮ್ಮನ್ನು ಇನ್ನಷ್ಟು ಭಕ್ತಿಯಿಂದ ಅನುಸರಿಸಲು ನಾನು ದೃಢನಿಶ್ಚಯ ಮಾಡುತ್ತಿರುವಾಗ, ಪ್ರತಿಯೊಂದು ಅಡೆತಡೆ ಮತ್ತು ಪ್ರಲೋಭನೆಯನ್ನು ಜಯಿಸಲು ನನಗೆ ಬೇಕಾದ ಅನುಗ್ರಹಕ್ಕಾಗಿ ಪ್ರಾರ್ಥಿಸುತ್ತೇನೆ. ನರಕದ ಶಕ್ತಿಗಳು ನಾನಾ ರೀತಿಯಲ್ಲಿ ನನ್ನ ಮೇಲೆ ದಾಳಿ ಮಾಡುವಾಗ, ನೀವು ನನ್ನ ಪರವಾಗಿ ಯುದ್ಧವನ್ನು ಗೆಲ್ಲುವಂತೆ ನಾನು ಶಾಂತಿಯಿಂದಲೂ ಭರವಸೆಯಿಂದಲೂ ನಿಮ್ಮ ಕಡೆಗೆ ತಿರುಗುವಂತಾಗಲಿ.

ಪಾಠ ಹದಿನೆಂಟು: ಆಧ್ಯಾತ್ಮಿಕ ಸಂಗಾತಿಗಳು

ತಮ್ಮ ಉಪದೇಶಗಳ ನಡುವೆ, ಸಂತ ತೆರೇಸಾ ಒಂದು ಪ್ರಾಯೋಗಿಕ ಸಲಹೆಯನ್ನು ನೀಡಲು ಸ್ವಲ್ಪ ವಿರಮಿಸುತ್ತಾರೆ:

ಸರಿಯಾದ ಮಾರ್ಗದಲ್ಲಿ ನಡೆಯುತ್ತಿರುವ ಇತರರೊಂದಿಗೆ ಒಡನಾಟ ಹೊಂದಿರುವುದು ಒಬ್ಬ ವ್ಯಕ್ತಿಗೆ ಬಹಳ ಮಹತ್ವದ ಸಂಗತಿಯಾಗಿದೆ: ತಾನು ಇರುವ ಕೋಣೆಗಳಲ್ಲಿ ಕಾಣುವವರೊಂದಿಗೆ ಮಾತ್ರವಲ್ಲದೆ, ಕೇಂದ್ರಕ್ಕೆ ಇನ್ನಷ್ಟು ಹತ್ತಿರವಿರುವ ಕೋಣೆಗಳನ್ನು ಪ್ರವೇಶಿಸಿದ್ದಾರೆಂದು ತನಗೆ ತಿಳಿದಿರುವವರೊಂದಿಗೂ ಬೆರೆಯಬೇಕು. ಏಕೆಂದರೆ ಅವರು ಅವನಿಗೆ ಬಹಳ ಸಹಾಯಕರಾಗುವರು; ಅವನು ಅವರೊಂದಿಗೆ ಎಷ್ಟು ನಿಕಟವಾದ ಸಂಬಂಧ ಬೆಳೆಸಿಕೊಳ್ಳಬಹುದೆಂದರೆ, ಅವರು ಅವನನ್ನೂ ತಮ್ಮೊಂದಿಗೆ ಕರೆದೊಯ್ಯುವರು (II.I #12).

ನಮ್ಮ ಅಸ್ತಿತ್ವದ ಆಳದಲ್ಲಿ ಆಧ್ಯಾತ್ಮಿಕ ಸ್ನೇಹಕ್ಕಾಗಿ ಹಂಬಲವಿದೆ. ಪತಿ-ಪತ್ನಿಯರು ಅತ್ಯಂತ ಆಪ್ತ ಸ್ನೇಹಿತರಾಗಿದ್ದು, ಸ್ವರ್ಗದ ಕಡೆಗಿನ ತಮ್ಮ ಪಯಣದಲ್ಲಿ ಪರಸ್ಪರ ಸಹಾಯ ಮಾಡಬೇಕು. ಕುಟುಂಬದ ಇತರ ಸದಸ್ಯರೂ ನಮ್ಮ ಪಯಣದಲ್ಲಿ ಆಧ್ಯಾತ್ಮಿಕ ಆಸರೆಯಾಗಬೇಕು.

ನಿಜ, ಕೆಲವೊಮ್ಮೆ ಕುಟುಂಬದ ಸದಸ್ಯರು ನಮ್ಮ ಪಯಣದಲ್ಲಿ ಸಹಾಯಕರಾಗಿರುವುದಕ್ಕಿಂತ ಹೆಚ್ಚಾಗಿ ಅಡ್ಡಿಯಾಗಿರುತ್ತಾರೆ. ಅಂತಹ ಸಂದರ್ಭಗಳಲ್ಲಿ ಅವರೊಂದಿಗೆ ನಡೆದುಕೊಳ್ಳುವಾಗ ಪ್ರೀತಿ ಮತ್ತು ಕರುಣೆಯೇ ನಮ್ಮ ಮುಖ್ಯ ಕಾಳಜಿಯಾಗಿರಬೇಕು. ಆದರೂ ನಮ್ಮ ಪಯಣದಲ್ಲಿ ನಮಗೆ ಆಧ್ಯಾತ್ಮಿಕ ಸಂಗಾತಿಗಳ ಅಗತ್ಯವಿದೆ. ಕುಟುಂಬದ ಸದಸ್ಯರು ನಮ್ಮ ಜೀವನದಲ್ಲಿ ಈ ಪಾತ್ರವನ್ನು ನಿರ್ವಹಿಸದಿದ್ದರೆ, ನಮ್ಮ ಹಾದಿಯಲ್ಲಿ ನಮಗೆ ಬೆಂಬಲ ಮತ್ತು ಪ್ರೋತ್ಸಾಹ ನೀಡಲು ಇತರರನ್ನು ಹುಡುಕಬೇಕು.

ಆಧ್ಯಾತ್ಮಿಕ ಸ್ನೇಹಿತರು ಸಾಮಾನ್ಯ ಸ್ನೇಹಿತರಿಗಿಂತ ಭಿನ್ನರಾಗಿರುತ್ತಾರೆ. ಸಾಮಾನ್ಯ ಸ್ನೇಹಿತರೆಂದರೆ ನಮ್ಮೊಂದಿಗೆ ಒಂದೇ ಆಸಕ್ತಿಯನ್ನು ಹಂಚಿಕೊಳ್ಳುವ ಮತ್ತು ಆ ಆಸಕ್ತಿಯ ಚಟುವಟಿಕೆಗಳಲ್ಲಿ ಒಟ್ಟಿಗೆ ತೊಡಗಿಕೊಳ್ಳಲು ಇಷ್ಟಪಡುವ ವ್ಯಕ್ತಿಯಾಗಿರಬಹುದು. ಆದರೆ ಆಧ್ಯಾತ್ಮಿಕ ಸ್ನೇಹಿತರು ನಮ್ಮ ವಿಶ್ವಾಸವನ್ನೂ ದೇವರಿಗೆ ಇನ್ನಷ್ಟು ಹತ್ತಿರವಾಗಬೇಕೆಂಬ ನಮ್ಮ ಬಯಕೆಯನ್ನೂ ಹಂಚಿಕೊಳ್ಳುತ್ತಾರೆ. ಸಂತ ತೆರೇಸಾ ಇಂತಹ ವ್ಯಕ್ತಿಗಳ ಎರಡು ವರ್ಗಗಳನ್ನು ಗುರುತಿಸುತ್ತಾರೆ. ಮೊದಲನೆಯದಾಗಿ, ಕೆಲವರು ನಾವು ಈಗ ವಾಸಿಸುತ್ತಿರುವ ಅದೇ ಆಂತರಿಕ ವಾಸಸ್ಥಾನದಲ್ಲಿ ಇರುವಂತೆ ಕಾಣುತ್ತಾರೆ. ಇವರ ವಿಶ್ವಾಸದ ಪಯಣ ನಮ್ಮ ಪಯಣದಂತೆಯೇ ಇರುತ್ತದೆ. ಎರಡನೆಯದಾಗಿ, ಕೆಲವರು ತಮ್ಮ ಆಧ್ಯಾತ್ಮಿಕ ಜೀವನದಲ್ಲಿ ಮುಂದುವರಿದಿರುವಂತೆ ಕಾಣುತ್ತಾರೆ. ಈ ಸಂಗಾತಿಗಳು ನಮ್ಮ ಪಯಣದಲ್ಲಿ ನಮಗೆ ನೆರವಾಗುವಂತೆ, ನಾವು ಅವರನ್ನು ಹುಡುಕಿ ಅವರೊಂದಿಗೆ ಸಮಯ ಕಳೆಯಬೇಕು.

ಚಿಂತನೆ: ನಿಮಗೆ ಸ್ಫೂರ್ತಿ ನೀಡುವವರು ಯಾರು? ತಮ್ಮ ವಿಶ್ವಾಸವನ್ನು ಬಹಿರಂಗವಾಗಿ ಜೀವಿಸಿ, ನಿಮಗೆ ಪ್ರೋತ್ಸಾಹದ ಮೂಲವಾಗಿರುವ ಯಾರಾದರೂ ನಿಮಗೆ ತಿಳಿದಿದ್ದಾರೆಯೇ? ಕುಟುಂಬದ ಒಬ್ಬರು ಅಥವಾ ಹೆಚ್ಚು ಸದಸ್ಯರು ಈ ಪಾತ್ರವನ್ನು ವಹಿಸುವಂತಿದ್ದರೆ ಅದು ಅತ್ಯುತ್ತಮ. ಬಹುಶಃ ನೀವು ಇನ್ನಷ್ಟು ಸಮಯ ಕಳೆಯಬಹುದಾದ ಯಾರಾದರೂ ದೇವಾಲಯದಲ್ಲಿ ಇರಬಹುದು. ನೀವು ಪವಿತ್ರತೆಯಲ್ಲಿ ಬೆಳೆಯಲು ನೆರವಾಗುವ ಹಲವರು ಇರುವ ಪ್ರಾರ್ಥನಾ ಕೂಟವೊಂದು ಇರಬಹುದು. ಬಹುಶಃ ತಮ್ಮ ವಿಶ್ವಾಸವನ್ನು ಬಹಿರಂಗವಾಗಿ ಹಂಚಿಕೊಳ್ಳುವ ಪಾಡ್‌ಕಾಸ್ಟ್ ನಿರೂಪಕರು, ಬ್ಲಾಗ್ ಬರಹಗಾರರು ಅಥವಾ ಸಾಮಾಜಿಕ ಮಾಧ್ಯಮ ಬಳಕೆದಾರರು ಇರಬಹುದು; ಅವರಿಂದ ನೀವು ಸ್ಫೂರ್ತಿ ಪಡೆಯಬಹುದು.

ಆಧ್ಯಾತ್ಮಿಕ ಸಂಗಾತಿಗಳ ಒಡನಾಟವು ನಮ್ಮ ಆಧ್ಯಾತ್ಮಿಕ ಪಯಣವನ್ನು ಸುಗಮಗೊಳಿಸುತ್ತದೆ. ನಿಮ್ಮ ಜೀವನದಲ್ಲಿ ಅಂತಹ ವ್ಯಕ್ತಿಯನ್ನು ಕಂಡುಕೊಳ್ಳಲು ಕಷ್ಟಪಡುತ್ತಿದ್ದರೆ, ಇದನ್ನೂ ನಿಮ್ಮ ಪ್ರಾರ್ಥನೆಗಳಲ್ಲಿ ಒಂದಾಗಿಸಿಕೊಳ್ಳಿ. ದೇವರು ನಿಮ್ಮ ಜೀವನದಲ್ಲಿ ಇದೊಂದು ಅಗತ್ಯವೆಂದು ಕಂಡರೆ, ಈ ಕೊಡುಗೆಯನ್ನು ನೀವು ಅವರಲ್ಲಿ ಕೇಳಿಕೊಂಡಾಗ ಅವರು ನಿಮ್ಮ ಪ್ರಾರ್ಥನೆಗೆ ಉತ್ತರಿಸುವರು ಎಂದು ತಿಳಿಯಿರಿ. ದೇವರ ಮಾರ್ಗದರ್ಶನಕ್ಕೆ ತೆರೆದ ಮನಸ್ಸುಳ್ಳವರಾಗಿರಿ. ಆರೋಗ್ಯಕರ ಆಧ್ಯಾತ್ಮಿಕ ಸ್ನೇಹವು ನಿಮಗೆ ಗೊಂದಲ ಅಥವಾ ಪ್ರಲೋಭನೆಯ ಮೂಲವಾಗುವುದಿಲ್ಲ. ಅದರಲ್ಲಿ ಅನಾರೋಗ್ಯಕರ ಸ್ವಾಮ್ಯಭಾವ ಇರುವುದಿಲ್ಲ. ಬದಲಾಗಿ, ಅಂತಹ ವ್ಯಕ್ತಿಯು ನಿಮ್ಮನ್ನು ಸೌಮ್ಯವಾಗಿ ಪ್ರೋತ್ಸಾಹಿಸುವರು; ದೇವರ ಕಡೆಗಿನ ನಿಮ್ಮ ಆಂತರಿಕ ಪಯಣದಲ್ಲಿ ಇನ್ನಷ್ಟು ಮುಂದುವರಿಯುವುದು ಹೇಗೆಂದು ನಿಮಗೆ ಕಲಿಸಲು ದೇವರು ಅವರನ್ನು ಬಳಸಿಕೊಳ್ಳುವರು.

ಪರಮ ಪವಿತ್ರ ಪ್ರಭುವೇ, ನೀವು ಈ ಭೂಮಿಯ ಮೇಲೆ ನಡೆದಾಡಿದಾಗ, ನಿಮಗೆ ಅನೇಕ ಸಂಗಾತಿಗಳು ಮತ್ತು ಸ್ನೇಹಿತರು ಇದ್ದರು. ನೀವು ವಿಶೇಷವಾಗಿ ನಿಮ್ಮ ಪ್ರೀತಿಯ ತಾಯಿಗೆ ಬಹಳ ಹತ್ತಿರವಾಗಿದ್ದಿರಿ ಮತ್ತು ಅವರ ಮೂಲಕ ಅಪಾರ ಪ್ರೀತಿ ಮತ್ತು ಸಾಂತ್ವನವನ್ನು ಪಡೆದಿರಿ. ನನ್ನೊಂದಿಗೆ ಸ್ವರ್ಗದ ಕಡೆಗೆ ಒಂದೇ ಹಾದಿಯಲ್ಲಿ ನಡೆಯಲು ಬಯಸುವ ನಿಜವಾದ ಸ್ನೇಹಿತರನ್ನು ದಯವಿಟ್ಟು ನನಗೆ ದಯಪಾಲಿಸಿ. ಅವರ ಮೂಲಕ ನನಗೆ ಆಸರೆಯಾಗಿ, ನನಗೆ ಮಾರ್ಗದರ್ಶನ ನೀಡಿ, ಅಗತ್ಯದಲ್ಲಿರುವವರಿಗೆ ನಾನೂ ಅಂತಹ ಸಂಗಾತಿಯಾಗಲು ನೆರವಾಗಿ.

ಪಾಠ ಹತ್ತೊಂಬತ್ತು: ದೃಢಸಂಕಲ್ಪ

ಸಂತ ತೆರೇಸಾ ಮುಂದೆ ಬರುವ ಈ ಸಲಹೆಯನ್ನು ಈಗಾಗಲೇ ನಮಗೆ ನೀಡಿದ್ದರೂ, ಯಾರಾದರೂ, “ಮತ್ತು ನೀವು ಇದನ್ನು ಮರೆಯಬಾರದು, ಏಕೆಂದರೆ ಇದು ಬಹಳ ಮುಖ್ಯ” ಎಂದು ಹೇಳಿದಾಗಲೆಲ್ಲ ನಾವು ಬಹಳ ಗಮನವಿಟ್ಟು ಕೇಳಬೇಕು.

ಪ್ರಾರ್ಥನೆಯಲ್ಲಿ ಆರಂಭಿಕ ಹಂತದಲ್ಲಿರುವವನು ಮಾಡಬೇಕಾದುದೆಲ್ಲವೂ—ಮತ್ತು ನೀವು ಇದನ್ನು ಮರೆಯಬಾರದು, ಏಕೆಂದರೆ ಇದು ಬಹಳ ಮುಖ್ಯ—ಶ್ರಮಿಸುವುದು, ದೃಢನಿಶ್ಚಯದಿಂದಿರುವುದು ಮತ್ತು ತನ್ನ ಚಿತ್ತವನ್ನು ದೇವರ ಚಿತ್ತಕ್ಕೆ ಹೊಂದಿಸಲು ಸಾಧ್ಯವಾದಷ್ಟು ಶ್ರದ್ಧೆಯಿಂದ ತನ್ನನ್ನು ಸಿದ್ಧಪಡಿಸಿಕೊಳ್ಳುವುದೇ ಆಗಿದೆ (II.I #15).

ಶ್ರಮಿಸಿ, ದೃಢನಿಶ್ಚಯದಿಂದಿರಿ ಮತ್ತು ನಿಮ್ಮ ಚಿತ್ತವನ್ನು ದೇವರ ಚಿತ್ತಕ್ಕೆ ಹೊಂದಿಸಿಕೊಳ್ಳಿ. ನಾವು ಈ ಸಲಹೆಯನ್ನು ಅರ್ಥಮಾಡಿಕೊಳ್ಳಬೇಕೆಂದು ಸಂತ ತೆರೇಸಾ ಆಳವಾಗಿ ಬಯಸುತ್ತಾರೆ.

ನಮ್ಮ ಚಿತ್ತವನ್ನು ದೇವರ ಚಿತ್ತಕ್ಕೆ ಹೇಗೆ ಹೊಂದಿಸಿಕೊಳ್ಳುವುದು? ಸಾಧ್ಯವಾದಷ್ಟು ಶ್ರದ್ಧೆಯಿಂದ ನಮ್ಮನ್ನು ಸಿದ್ಧಪಡಿಸಿಕೊಂಡಾಗ ಇದನ್ನು ಅತ್ಯುತ್ತಮವಾಗಿ ಸಾಧಿಸಬಹುದು. ಶ್ರದ್ಧೆಯಿಂದಿರಲು ನಾವು ಬಹಳವಾಗಿ ಶ್ರಮಿಸಬೇಕು ಮತ್ತು ಪವಿತ್ರರಾಗಲು ದೃಢವಾಗಿ ನಿಶ್ಚಯಿಸಬೇಕು.

ನಮ್ಮ ಇಚ್ಛೆಯನ್ನು ದೇವರ ಚಿತ್ತಕ್ಕೆ ಹೊಂದಿಸಿಕೊಳ್ಳಲು ಅಸಾಧಾರಣವಾದ ಆಧ್ಯಾತ್ಮಿಕ ಅನುಭವಗಳು ಬೇಕಾಗಿಲ್ಲ. ನಮಗೆ ದರ್ಶನಗಳಾಗಲಿ, ದಿವ್ಯ ವಾಣಿಗಳಾಗಲಿ, ಖಾಸಗಿ ಪ್ರಕಟಣೆಗಳಾಗಲಿ ಬೇಕಾಗಿಲ್ಲ. ನಮ್ಮ ಪವಿತ್ರತೆಯನ್ನು ಇತರರು ಗಮನಿಸಬೇಕೆಂದೂ ಇಲ್ಲ. ದೇವರು ಪ್ರತಿದಿನ ನಮ್ಮಿಂದ ಏನನ್ನು ಕೇಳುತ್ತಿದ್ದಾರೆ ಎಂಬುದನ್ನು ವಿವೇಚಿಸಿ, ಅದನ್ನು ದೃಢಸಂಕಲ್ಪದಿಂದ ಮಾಡುವುದಷ್ಟೇ ನಮಗೆ ಬೇಕಾಗಿರುವುದು.

ಕೆಲವೊಮ್ಮೆ ನಾವು ಪ್ರಾರ್ಥಿಸುವಾಗ, ದೇವರನ್ನು ನಮ್ಮ ಇಚ್ಛೆಗೆ ಹೊಂದಿಸಲು ಪ್ರಯತ್ನಿಸುತ್ತೇವೆ. ಯಾವುದು ಉತ್ತಮವೆಂದು ನಮಗೆ ಅನಿಸುತ್ತದೆಯೋ ಅದನ್ನು ಅವರಿಗೆ ಹೇಳಿ, ನಾವು ಕೇಳಿದಂತೆಯೇ ಅವರು ಮಾಡಬೇಕೆಂದು ಪ್ರಾರ್ಥಿಸುತ್ತೇವೆ. ಆದರೆ ನಾವು ಹಿಡಿಯಬೇಕಾದ ದಾರಿ ಇದಲ್ಲ. ನಮ್ಮ ಇಚ್ಛೆಯನ್ನು ದೇವರ ಚಿತ್ತಕ್ಕೆ ಹೊಂದಿಸಿಕೊಳ್ಳುವುದೆಂದರೆ, ನಮ್ಮ ಸ್ವಂತ ಇಚ್ಛೆ, ಆದ್ಯತೆಗಳು, ಗುರಿಗಳು ಮತ್ತು ಬಯಕೆಗಳನ್ನು ತೊಡೆದುಹಾಕಲು ಶ್ರದ್ಧೆಯಿಂದ ಶ್ರಮಿಸುವುದು. ಇದಕ್ಕಾಗಿ ನಾವು ನಿಜವಾಗಿಯೂ ನಮ್ಮ ಸ್ವಾರ್ಥಕ್ಕೆ ಸಾಯಬೇಕು. ನಾವು ಇಷ್ಟಪಡುವುದನ್ನು ಬಿಟ್ಟುಕೊಟ್ಟು, ದೇವರ ಚಿತ್ತವನ್ನಷ್ಟೇ ಇಷ್ಟಪಡಲು ನಮ್ಮನ್ನು ಸಿದ್ಧಪಡಿಸಿಕೊಳ್ಳಬೇಕು. ನಮ್ಮ ಸ್ವಂತ ಇಚ್ಛೆಯಿಂದ ಹೀಗೆ ಅಂತರಂಗದಲ್ಲಿ ನಿರ್ಲಿಪ್ತರಾಗುವುದೇ, ಪ್ರಾರ್ಥನೆಯ ಮೂಲಕ ದೇವರ ಚಿತ್ತಕ್ಕೆ ಹೊಂದಿಕೊಳ್ಳಲು ನಾವು ಮಾಡಬಹುದಾದ ಅತ್ಯುತ್ತಮ ಸಿದ್ಧತೆ. ನಾವು ಮುಕ್ತ ಮನಸ್ಸಿನಿಂದ, ಸಿದ್ಧರಾಗಿ, ಒಪ್ಪಿಗೆಯಿಂದ ಇರುವುದನ್ನು ದೇವರು ಕಂಡಾಗ, ನಮ್ಮ ಜೀವನಕ್ಕಾಗಿ ಅವರಿಗಿರುವ ಪರಿಪೂರ್ಣ ಯೋಜನೆಯನ್ನು ಅವರು ಪ್ರಕಟಿಸಲು ಪ್ರಾರಂಭಿಸುತ್ತಾರೆ. ಆರಂಭದಲ್ಲಿ ಇದಕ್ಕೆ ಬಹಳ ಪ್ರಯತ್ನ, ಬಹಳ ತ್ಯಾಗ, ಸಮರ್ಪಣೆ, ಮುಕ್ತ ಮನಸ್ಸು ಮತ್ತು ದೃಢನಿಶ್ಚಯ ಬೇಕಾಗುತ್ತವೆ. ಆದರೆ ನೀವು ಸ್ವೇಚ್ಛೆಯಿಂದ ಎಷ್ಟು ಹೆಚ್ಚು ಮುಕ್ತರಾಗುತ್ತೀರೋ, ಅಷ್ಟು ಹೆಚ್ಚು ದೇವರ ಚಿತ್ತಕ್ಕೆ ಸಿದ್ಧರಾಗುತ್ತೀರಿ.

ಮನನ: ನಿಮ್ಮ ಸ್ವಂತ ಇಚ್ಛೆ, ಆದ್ಯತೆಗಳು ಮತ್ತು ಆಲೋಚನೆಗಳನ್ನು ಬಿಟ್ಟುಕೊಡುವುದು ನಿಮಗೆ ಎಷ್ಟು ಸುಲಭ? ದೇವರು ನಿಮ್ಮ ಜೀವನವನ್ನು ನಡೆಸುವಂತೆ ನೀವು ನಿಮ್ಮ ಸ್ವಾರ್ಥಕ್ಕೆ ಸಾಯಲು ಸಾಧ್ಯವೇ? ನಮ್ಮ ಇಡೀ ಅಸ್ತಿತ್ವವನ್ನು ದೇವರ ಚಿತ್ತಕ್ಕೆ ಹೊಂದಿಸಿಕೊಳ್ಳುವುದು ಮೊದಲಿಗೆ ಕಷ್ಟಕರವಾದ ಕೆಲಸದಂತೆ ಕಾಣಬಹುದು. ಆದರೆ ನೀವು ಒಂದೊಂದೇ ಹೆಜ್ಜೆಯಾಗಿ ಮುಂದುವರಿದರೆ, ಅದನ್ನು ಮಾಡಲು ಸಾಧ್ಯವಾಗುತ್ತದೆ.

ನೀವು ಪ್ರಾರ್ಥಿಸುವಾಗ, ದೇವರು ಏನು ಮಾಡಬೇಕೆಂದು ನೀವು ಬಯಸುತ್ತೀರಿ ಎಂಬುದನ್ನು ಅವರಿಗೆ ಹೇಳುತ್ತೀರಾ? ಅತಿಯಾಗಿ ಮುದ್ದಿಸಲ್ಪಟ್ಟ ಮಗು ತನ್ನ ಹಠವನ್ನು ಸಾಧಿಸಿಕೊಳ್ಳಲು ಪ್ರಯತ್ನಿಸುವಂತೆ, ನೀವು ದೇವರನ್ನು ನಿಯಂತ್ರಿಸಲು ಪ್ರಯತ್ನಿಸುತ್ತೀರಾ? ಹಾಗಿದ್ದರೆ, ಸ್ವಾರ್ಥವೆಂಬ ಆ ಪಾಪವನ್ನು ಒಪ್ಪಿಕೊಳ್ಳಿ ಮತ್ತು ಅದರ ಮೂರ್ಖತನವನ್ನೂ ಒಪ್ಪಿಕೊಳ್ಳಿ. ಮೊದಲಿಗೆ ಕಷ್ಟವಾಗಬಹುದಾದರೂ, ನೀವು ಇದನ್ನು ಮಾಡಬಲ್ಲಿರಿ ಎಂಬುದನ್ನು ತಿಳಿಯಿರಿ. ಚಿಕ್ಕ ಚಿಕ್ಕ ರೀತಿಗಳಲ್ಲಿ ಆರಂಭಿಸಿ. “ನಿಮ್ಮ ಚಿತ್ತದ ಪ್ರಕಾರ ನನಗೆ ಆಗಲಿ” ಎಂದು ಹೇಳಿದ ನಮ್ಮ ಪೂಜ್ಯ ಮಾತೆಯ ಪ್ರಾರ್ಥನೆಯನ್ನು ನೀವು ಪ್ರಾರ್ಥಿಸಿ. ಹಾಗೆಯೇ, ತೋಟದಲ್ಲಿ ಯೇಸು, “ನನ್ನ ಚಿತ್ತವಲ್ಲ, ನಿಮ್ಮ ಚಿತ್ತವೇ ನೆರವೇರಲಿ” ಎಂದು ಹೇಳಿದ ಪ್ರಾರ್ಥನೆಯನ್ನೂ ಪ್ರಾರ್ಥಿಸಿ. ಪ್ರತಿದಿನ ಈ ಪ್ರಾರ್ಥನೆಗಳನ್ನು ಹೇಳಿ. ಅವುಗಳನ್ನು ಧ್ಯಾನಿಸಿ, ಮನನ ಮಾಡಿ, ನಿಮ್ಮ ಅಂತರಂಗದಲ್ಲಿ ಆಳವಾಗಿ ಬೇರೂರಲು ಬಿಡಿ. ಹೀಗೆ ನೀವು ಪ್ರಾರ್ಥಿಸುವುದನ್ನು ದಿನದಿಂದ ದಿನಕ್ಕೆ ಹೆಚ್ಚು ಮನಃಪೂರ್ವಕವಾಗಿ ಹೇಳುವಂತಾಗಲಿ.

ನೀವು ಈ ಪ್ರಾರ್ಥನೆಗಳನ್ನು ನಿಧಾನವಾಗಿ ಪರಿಪೂರ್ಣಗೊಳಿಸುತ್ತಾ ಹೋದಂತೆ, ನೀವು ಇನ್ನೂ ಹಿಡಿದುಕೊಂಡಿರುವ ಸಣ್ಣಪುಟ್ಟ ವಿಷಯಗಳನ್ನು ದೇವರು ನಿಮಗೆ ತೋರಿಸಲು ಪ್ರಾರಂಭಿಸುತ್ತಾರೆ ಎಂಬುದನ್ನು ತಿಳಿಯಿರಿ. ಅಂತಿಮವಾಗಿ ನಮ್ಮ ಜೀವನದಲ್ಲಿರುವ ಎಲ್ಲವೂ ದೇವರ ಚಿತ್ತಕ್ಕೆ ಹೊಂದಿಕೆಯಾಗಬೇಕು. ಹಾಗೆ ಮಾಡಲು ದೃಢವಾಗಿ ಸಂಕಲ್ಪಿಸಿ, ಆ ಪ್ರಕ್ರಿಯೆಯನ್ನು ಆರಂಭಿಸಿ. ದೇವರ ಅನುಗ್ರಹದಿಂದ ನೀವು ಪಟ್ಟುಬಿಡದೆ ಮುಂದುವರಿದರೆ, ದೇವರ ಚಿತ್ತವೇ ನಿಮ್ಮ ಇಚ್ಛೆಯಾಗುತ್ತದೆ; ನಿಮ್ಮ ಇಚ್ಛೆ ದೇವರ ಚಿತ್ತವಾಗುವುದಿಲ್ಲ.

ನನ್ನ ನಿಸ್ವಾರ್ಥ ಪ್ರಭುವೇ, ಗೆತ್ಸೆಮನೆ ತೋಟದಲ್ಲಿಯೂ ನಿಮ್ಮ ಪವಿತ್ರ ಜೀವನದುದ್ದಕ್ಕೂ ನೀವು ಸದಾ ನಿಮ್ಮ ಮಾನವ ಇಚ್ಛೆಯನ್ನು ಪಿತನ ಚಿತ್ತಕ್ಕೆ ಹೊಂದಿಸಿಕೊಂಡಿರಿ. ನಿಮ್ಮ ಪೂಜ್ಯ ಮಾತೆಯೂ ಮಂಗಳವಾರ್ತೆಯ ಸಂದರ್ಭದಲ್ಲಿ ಈ ಪರಿಪೂರ್ಣ ಸಮರ್ಪಣೆಯನ್ನು ಪ್ರತಿಧ್ವನಿಸಿ, ತಮ್ಮ ಸ್ವರ್ಗಾರೋಪಣದವರೆಗೂ ಈ ಪ್ರಾರ್ಥನೆಯನ್ನು ಮುಂದುವರಿಸಿದರು. ದಯವಿಟ್ಟು ನನ್ನ ಪ್ರಾರ್ಥನೆ ಮತ್ತು ಸಮರ್ಪಣೆಯನ್ನು ನಿಮ್ಮ ಹಾಗೂ ನಿಮ್ಮ ಪೂಜ್ಯ ಮಾತೆಯ ಪ್ರಾರ್ಥನೆ ಮತ್ತು ಸಮರ್ಪಣೆಯೊಂದಿಗೆ ಒಂದಾಗಿಸಲು ನನಗೆ ಸಹಾಯ ಮಾಡಿ. ನೀವಿಬ್ಬರೂ ಪರಲೋಕದಲ್ಲಿರುವ ಪಿತನಿಗೆ ಈ ಅರ್ಪಣೆಯನ್ನು ಸಲ್ಲಿಸುತ್ತಿರುವಾಗ, ನಿಮ್ಮೊಡನೆ ಸೇರಲು ನನಗೆ ಅವಕಾಶ ನೀಡಿ. ಪಿತನೇ, ನಿಮ್ಮ ಚಿತ್ತವು ಪರಲೋಕದಲ್ಲಿ ನೆರವೇರುವಂತೆ ಭೂಲೋಕದಲ್ಲಿಯೂ ನೆರವೇರಲಿ. ನಿಮ್ಮ ಚಿತ್ತದ ಪ್ರಕಾರ ನನಗೆ ಆಗಲಿ.

ಪಾಠ ಇಪ್ಪತ್ತು: ಪಾಪದಿಂದ ಒಳಿತು

ಪಾಪವು ದೇವರಿಂದ ಬರುವುದಿಲ್ಲ. ಅದು ದೇವರನ್ನು ತಿರಸ್ಕರಿಸುವುದಾಗಿದೆ. ಆದರೆ ತಮ್ಮ ಅನಂತ ಶಕ್ತಿಯಿಂದ, ದೇವರು ನಮ್ಮ ಪಾಪದಿಂದಲೂ ಒಳ್ಳೆಯದನ್ನು ಉಂಟುಮಾಡಬಲ್ಲರು.

ಹೀಗಿರುವಾಗ, ನೀವು ಕೆಲವೊಮ್ಮೆ ವಿಫಲರಾದರೂ ಧೈರ್ಯ ಕಳೆದುಕೊಳ್ಳಬೇಡಿ ಅಥವಾ ಮುನ್ನಡೆಯಲು ಮಾಡುವ ಪ್ರಯತ್ನವನ್ನು ನಿಲ್ಲಿಸಬೇಡಿ; ಏಕೆಂದರೆ ನಿಮ್ಮ ಪತನದಿಂದಲೂ ದೇವರು ಒಳ್ಳೆಯದನ್ನು ಉಂಟುಮಾಡುತ್ತಾರೆ… (II.I #16).

ನಮ್ಮ ಪಾಪದಿಂದ ಯಾವ ಒಳ್ಳೆಯದು ಉಂಟಾಗಬಹುದು? ನಾವು ಪಾಪಮಾಡಿ, ಅದರ ದುಷ್ಪರಿಣಾಮಗಳನ್ನು ಅನುಭವಿಸುವಾಗ, ದೇವರು ನಮ್ಮನ್ನು ತಮ್ಮ ಬಳಿಗೆ ಮರಳಿ ಕರೆತರಬಲ್ಲರು. ದೇವರ ಅನುಪಸ್ಥಿತಿಯ ಅಂತರಂಗದ ಅರಿವಿನ ರೂಪದಲ್ಲಿಯೂ, ನಿಮ್ಮ ಆತ್ಮದ ಕೋಟೆಯೊಳಗೆ ಅವರನ್ನು ಹುಡುಕುವ ನವೀಕೃತ ಬಯಕೆಯ ರೂಪದಲ್ಲಿಯೂ ಇದು ಉಂಟಾಗುತ್ತದೆ.

ಮೊದಲನೆಯದಾಗಿ, ನೀವು ಆಂತರಿಕ ಪ್ರಾರ್ಥನೆಯ ಮೂಲಕ ವಿಶ್ವಾಸದ ಪಯಣವನ್ನು ಆರಂಭಿಸಿದ ನಂತರ, ಕೆಲವೊಮ್ಮೆ ವಿವಿಧ ಪ್ರಲೋಭನೆಗಳನ್ನು ಅನುಭವಿಸುವಿರಿ. ದೇವರು ಕೆಲವೊಮ್ಮೆ ನಿಮ್ಮ ಒಳಿತಿಗಾಗಿ ಈ ಪ್ರಲೋಭನೆಗಳಿಗೆ ಅವಕಾಶ ನೀಡುತ್ತಾರೆ. ಉದಾಹರಣೆಗೆ, ಒಬ್ಬ ವ್ಯಕ್ತಿಯ ಮೇಲಿನ ಕೋಪ, ಆಸ್ತಿಪಾಸ್ತಿಗಳ ದುರಾಸೆ, ಶಾರೀರಿಕ ಬಯಕೆಗಳು ಅಥವಾ ಬೇರೆ ಯಾವುದೇ ಆಲೋಚನೆಯಲ್ಲಿ ನೀವು ಬಿಡದೆ ಮುಳುಗಿದ್ದರೆ, ಆ ಆಲೋಚನೆ ತಮ್ಮಿಂದ ಬಂದದ್ದಲ್ಲ ಎಂದು ನಿಮಗೆ ಕಲಿಸಲು, ಅದರಿಂದ ಉಂಟಾಗುವ ಬಳಲಿಕೆಯನ್ನು ಅನುಭವಿಸಲು ದೇವರು ಅವಕಾಶ ನೀಡಬಹುದು. ಅಥವಾ, ನೀವು ಪ್ರಾರ್ಥನೆಯಲ್ಲಿ ಪಟ್ಟುಬಿಡದೆ ಮುಂದುವರಿಯಲು ಪ್ರಯತ್ನಿಸುತ್ತಿರುವಾಗ ಅದು ಶುಷ್ಕವಾಗಿಯೂ ಸ್ಫೂರ್ತಿಯಿಲ್ಲದಂತೆಯೂ ಕಂಡುಬಂದರೆ, ಪ್ರಾರ್ಥಿಸುವ ನಿಮ್ಮ ಸಂಕಲ್ಪವನ್ನು ಬಲಪಡಿಸುವ ಮಾರ್ಗವಾಗಿ ದೇವರು ಈ ಶುಷ್ಕತೆಗೆ ಅವಕಾಶ ನೀಡುತ್ತಿರಬಹುದು.

ಒಂದು ವೇಳೆ ಶೋಧನೆಯು ಪಾಪವಾಗಿ, ಗಂಭೀರ ಪಾಪವಾಗಿಯೂ ಪರಿಣಮಿಸಿದರೆ, ದೇವರು ನಿಮಗಾಗಿ ಎರಡು ಕಾರ್ಯಗಳನ್ನು ಮಾಡಲು ಸಿದ್ಧರೂ ಇಚ್ಛೆಯುಳ್ಳವರೂ ಆಗಿದ್ದಾರೆ ಎಂಬುದನ್ನು ತಿಳಿಯಿರಿ. ಮೊದಲನೆಯದಾಗಿ, ನೀವು ಪಶ್ಚಾತ್ತಾಪಪಟ್ಟರೆ ಅವರು ನಿಮ್ಮನ್ನು ಕ್ಷಮಿಸಲು ಸಿದ್ಧರಿದ್ದಾರೆ. ಎರಡನೆಯದಾಗಿ, ಆ ಪಾಪದ ಪರಿಣಾಮಗಳನ್ನು ನೀವು ನೆನಪಿನಲ್ಲಿಟ್ಟುಕೊಳ್ಳಬೇಕೆಂದು ಅವರು ಬಯಸುತ್ತಾರೆ. ನಿಮ್ಮನ್ನು ನಾಚಿಕೆ ಅಥವಾ ಅಪರಾಧಭಾವದಲ್ಲಿ ಬಿಟ್ಟುಬಿಡುವುದಕ್ಕಲ್ಲ, ಬದಲಾಗಿ ಅಂಥ ಆಯ್ಕೆಗಳ ಮೂರ್ಖತನವನ್ನು ನಿರಂತರವಾಗಿ ನೆನಪಿಸುವುದಕ್ಕಾಗಿ. ಆಗ ನಿಮ್ಮ ಶೋಧನೆಗಳು ಮತ್ತು ಪಾಪವು ಅನುಗ್ರಹವಾಗಿ ಪರಿವರ್ತನೆಗೊಳ್ಳುತ್ತವೆ. ಅದರ ಮೂಲಕ ದೇವರು ನಿಮ್ಮನ್ನು ಬಲಪಡಿಸಿ, ನೀವು ಮತ್ತೆ ಬೀಳದಂತೆ ಕಾಪಾಡುತ್ತಾರೆ; ಹೀಗೆ ನೀವು ನಿಮ್ಮ ಆಧ್ಯಾತ್ಮಿಕ ಪಯಣದಲ್ಲಿ ಮುಂದೆ ಸಾಗಬಹುದು.

ಆತ್ಮಾವಲೋಕನ: ಈಗ ನಿಮ್ಮ ಮನಸ್ಸನ್ನು ಬಿಡದೆ ಕಾಡುವ, ನಿಮ್ಮನ್ನು ಕುಗ್ಗಿಸುವ ಆಲೋಚನೆಗಳು ಯಾವುದಾದರೂ ಇವೆಯೇ? ನಿರುತ್ಸಾಹಕ್ಕೂ ಆಂತರಿಕ ನಿರ್ಜನತೆಗೂ ಕಾರಣವಾಗುವ ಯಾವುದಾದರೂ ವಿಷಯವನ್ನು ನೀವು ಮತ್ತೆ ಮತ್ತೆ ಚಿಂತಿಸುತ್ತಿದ್ದೀರಾ? ಹಾಗಿದ್ದರೆ, ಈ ಆಲೋಚನೆಗಳನ್ನು ತೊಡೆದುಹಾಕಬೇಕೆಂಬ ಅರಿವು ನಿಮಗೆ ಬರಲೆಂದು ದೇವರು ಸದ್ಯಕ್ಕೆ ಅನುಮತಿಸುತ್ತಿರುವ ಶೋಧನೆಗಳೇ ಇವು ಎಂದು ಕೂಡಲೇ ಗುರುತಿಸಿರಿ. ಆ ಆಲೋಚನೆಗಳನ್ನು ತಿರಸ್ಕರಿಸಿರಿ. ನಿಮ್ಮ ಆತ್ಮದಲ್ಲಿ ಶಾಂತಿ ಮರುಸ್ಥಾಪನೆಯಾಗುವಂತೆ ದೇವರಿಂದ ತಿಳಿವಳಿಕೆಯನ್ನು ಪಡೆಯಲು ಪ್ರಾರ್ಥಿಸಿರಿ.

ಇದಲ್ಲದೆ, ನೀವು ಪದೇ ಪದೇ ಬಿದ್ದಿರುವ ಪಾಪಗಳು ಯಾವುದಾದರೂ ಇವೆಯೇ? ಹಾಗಿದ್ದರೆ, ಆ ಪಾಪದಿಂದ ನಿಮ್ಮ ಅಂತರಂಗದಲ್ಲಿ ಆದ ಅನುಭವವೇನು? ನೀವು ಅದನ್ನು ಸ್ಪಷ್ಟವಾಗಿ ನೋಡುತ್ತಿದ್ದರೆ, ಆ ಅನುಭವವು ಭಾರವಾದ ಹೊರೆಯಾಗಿತ್ತು ಮತ್ತು ದೇವರ ಸಾನ್ನಿಧ್ಯದ ಆಂತರಿಕ ಅರಿವನ್ನು ಕಳೆದುಕೊಳ್ಳುವಂತೆ ಮಾಡಿತು ಎಂಬುದನ್ನು ಗಮನಿಸುವಿರಿ. ಮುಂದೆ ಆ ಪಾಪದ ಹಾಗೂ ನಿಮಗೆ ಶೋಧನೆಯಾಗಿ ಬರುವ ಇತರ ಎಲ್ಲ ಪಾಪಗಳ ವಿರುದ್ಧ ಹೋರಾಡಲು ಆ ಅನುಭವವನ್ನು ಒಂದು ಆಯುಧವಾಗಿ ಬಳಸಿರಿ.

ಪ್ರಾರ್ಥನೆಯಲ್ಲಿ ದೃಢವಾಗಿ ಮುಂದುವರಿಯಲು ನಿಮಗೆ ಸಾಧ್ಯವಾಗುತ್ತಿದೆಯೇ? ಅಥವಾ ಈಗ ನಿಮ್ಮ ಪ್ರಾರ್ಥನೆಯು ಶುಷ್ಕವಾಗಿ, ಬರಡಾಗಿ, ಸ್ಫೂರ್ತಿಯಿಲ್ಲದಂತೆ ತೋರುತ್ತಿದೆಯೇ? ಪ್ರಾರ್ಥನೆ ಕಷ್ಟವಾಗಿದ್ದರೆ, ಅದಕ್ಕೆ ನಿಷ್ಠರಾಗಿರಲು ಸಂಕಲ್ಪಿಸಿರಿ. ಪ್ರಾರ್ಥನೆಯನ್ನು ಮಾಡುತ್ತಲೇ ಇರಿ! ಈ ಶುಷ್ಕತೆಗೆ ಕಾರಣ, ಒಂದೋ ನೀವು ಪ್ರಾರ್ಥನೆಯಲ್ಲಿ ಮನಸ್ಸು ಚಂಚಲವಾಗಲು ಸ್ವಇಚ್ಛೆಯಿಂದ ಅವಕಾಶ ನೀಡುತ್ತಿರುವುದು, ಇಲ್ಲವೇ ದೇವರು ನಿಮ್ಮ ಸಂಕಲ್ಪವನ್ನೂ ತಮ್ಮ ಮೇಲಿನ ಭಕ್ತಿಯನ್ನೂ ಬಲಪಡಿಸಲು ಇದನ್ನು ಅನುಮತಿಸುತ್ತಿರುವುದು. ಕಾರಣ ಏನೇ ಆಗಿದ್ದರೂ, ನೀವು ಅನುಭವಿಸುವ ಯಾವುದೇ ಶುಷ್ಕತೆಯನ್ನು ಹಿಂದೆಂದಿಗಿಂತಲೂ ಹೆಚ್ಚು ಶ್ರದ್ಧೆಯಿಂದ ಮತ್ತು ಬದ್ಧತೆಯಿಂದ ಪ್ರಾರ್ಥಿಸಲು ಮುಂದೊತ್ತುವ ಸಾಧನವಾಗಿ ಬಳಸಿರಿ.

ಕ್ಷಮಾಶೀಲರೂ ಸಹನಾಶೀಲರೂ ಆದ ನನ್ನ ಪ್ರಭುವೇ, ನನ್ನ ಪೂರ್ಣ ಹೃದಯದಿಂದ ನಿಮ್ಮನ್ನು ಪ್ರೀತಿಸಲು ನೀವು ನನ್ನನ್ನು ಆಹ್ವಾನಿಸುತ್ತೀರಿ. ಕೆಲವೊಮ್ಮೆ ನಾನು ಈ ಪ್ರೀತಿಯಲ್ಲಿ ವಿಫಲನಾಗಿ ಪಾಪದ ಸುಲಭ ದಾರಿಗೆ ಮರಳುತ್ತೇನೆ. ದಯವಿಟ್ಟು ನನ್ನ ಪಾಪವನ್ನು ಕ್ಷಮಿಸಿರಿ. ನನ್ನ ಹಿಂದಿನ ಪಾಪಗಳು, ನನ್ನ ಶೋಧನೆಗಳು ಮತ್ತು ಪ್ರಾರ್ಥನೆಯಲ್ಲಿ ನಾನು ಅನುಭವಿಸುವ ಶುಷ್ಕತೆಯೂ ಸಹ ಉತ್ಸಾಹದಿಂದಲೂ ದೃಢಸಂಕಲ್ಪದಿಂದಲೂ ನಿಮ್ಮ ಬಳಿಗೆ ಮರಳಲು ಪ್ರೇರಣೆಗಳಾಗುವಂತೆ, ನನ್ನ ತಪ್ಪುಗಳಿಂದ ಪಾಠ ಕಲಿಯಲು ನನಗೆ ಸಹಾಯ ಮಾಡಿರಿ.

ಪಾಠ ಇಪ್ಪತ್ತೊಂದು: ಅಂತರ್ಮುಖತೆಯ ಪ್ರಾರ್ಥನೆ

ಎರಡನೆಯ ವಾಸಸ್ಥಾನಗಳಲ್ಲಿ, ವಾಚಿಕ ಪ್ರಾರ್ಥನೆ ಮತ್ತು ಧ್ಯಾನದ ಜೊತೆಗೆ, ತಾವು “ಅಂತರ್ಮುಖ ಏಕಾಗ್ರತೆಯ ಪ್ರಾರ್ಥನೆ” ಎಂದು ಕರೆಯುವ ಪ್ರಾರ್ಥನೆಯನ್ನೂ ನೀವು ಅಭ್ಯಾಸ ಮಾಡಬೇಕೆಂದು ಸಂತ ತೆರೇಸಾ ವಿವರಿಸುತ್ತಾರೆ.

ಪ್ರಯಾಸದ ಪ್ರಯತ್ನಗಳನ್ನು ಮಾಡುವ ಮೂಲಕ ಅಂತರ್ಮುಖ ಏಕಾಗ್ರತೆಯನ್ನು ಆರಂಭಿಸಲಾಗುವುದಿಲ್ಲ; ಅದು ನಿಧಾನವಾಗಿ ಮೂಡಿಬರಬೇಕು. ಆ ಬಳಿಕ ನೀವು ಒಂದೊಂದು ಬಾರಿಯೂ ಅದನ್ನು ಹೆಚ್ಚು ಹೊತ್ತು ಅಭ್ಯಾಸ ಮಾಡಲು ಸಾಧ್ಯವಾಗುತ್ತದೆ (II.I #18).
ಮೊದಲು ನಮ್ಮ ಸ್ವಂತ ಆತ್ಮದೊಳಗೆ ಪ್ರವೇಶಿಸದೆ—ನಮ್ಮನ್ನು ನಾವು ಅರಿತುಕೊಳ್ಳದೆ, ನಮ್ಮ ಸ್ವಭಾವದ ದೀನಸ್ಥಿತಿಯನ್ನೂ ನಾವು ದೇವರಿಗೆ ಸಲ್ಲಿಸಬೇಕಾದುದನ್ನೂ ಕುರಿತು ಚಿಂತಿಸದೆ, ಅವರ ಕರುಣೆಯನ್ನು ನಿರಂತರವಾಗಿ ಬೇಡಿಕೊಳ್ಳದೆ—ನಾವು ಸ್ವರ್ಗವನ್ನು ಪ್ರವೇಶಿಸಬಹುದು ಎಂದು ಭಾವಿಸುವುದು ಅಸಂಬದ್ಧವಾಗಿದೆ (II.I #19).

ಧ್ಯಾನವು ಪ್ರಾರ್ಥನೆಯ ಒಂದು ರೂಪ. ಇದರಲ್ಲಿ ನೀವು ನಮ್ಮ ವಿಶ್ವಾಸದ ಬೋಧನೆಗಳು, ಸುವಾರ್ತೆಗಳ ಘಟನೆಗಳು ಅಥವಾ ಸುಂದರ ಪ್ರಾರ್ಥನೆಗಳಂತಹ ಬಾಹ್ಯ ಸತ್ಯಗಳನ್ನು ತೆಗೆದುಕೊಂಡು, ಅವುಗಳನ್ನು ನಿಮ್ಮ ಮನಸ್ಸಿನಲ್ಲಿ ಮತ್ತೆ ಮತ್ತೆ ಚಿಂತಿಸುವ ಮೂಲಕ ಅಂತರಂಗದಲ್ಲಿ ಅಳವಡಿಸಿಕೊಳ್ಳುತ್ತೀರಿ. ಧ್ಯಾನದ ಮೂಲಕ ದೇವರು ನಮಗೆ ಅನೇಕ ವಿಷಯಗಳನ್ನು ಕಲಿಸುತ್ತಾರೆ ಮತ್ತು ಚಿತ್ರಣಗಳ ಹಾಗೂ ವಿಚಾರಗಳ ಮೂಲಕ ತಮ್ಮ ಪ್ರೀತಿಯನ್ನು ನಮಗೆ ಪ್ರಕಟಿಸುತ್ತಾರೆ.

ಮುಂದಿನ ಪ್ರಾರ್ಥನಾ ವಿಧಾನವನ್ನು “ಅಂತರ್ಮುಖ ಏಕಾಗ್ರತೆ” ಎಂದು ಕರೆಯಲಾಗುತ್ತದೆ. ಧ್ಯಾನದಂತೆಯೇ ಇದನ್ನೂ ನಾವು “ಮಾನಸಿಕ ಪ್ರಾರ್ಥನೆ” ಎಂದು ಕರೆಯುತ್ತೇವೆ. ಅಂದರೆ, ನಮ್ಮ ಸ್ವಂತ ಪ್ರಯತ್ನದಿಂದ ಈ ಪ್ರಾರ್ಥನಾ ವಿಧಾನದಲ್ಲಿ ತೊಡಗಿಕೊಳ್ಳಲು ನಾವು ಆಯ್ಕೆ ಮಾಡಬಹುದು. ತಮ್ಮ ಪರಿಪೂರ್ಣತೆಯ ಮಾರ್ಗ ಎಂಬ ಪುಸ್ತಕದ 28 ಮತ್ತು 29ನೆಯ ಅಧ್ಯಾಯಗಳಲ್ಲಿ ಅವರು ಅಂತರ್ಮುಖ ಏಕಾಗ್ರತೆಯ ಪ್ರಾರ್ಥನೆಯನ್ನು ವಿವರವಾಗಿ ಕಲಿಸುತ್ತಾರೆ. ದೇವರು ನಮ್ಮೊಳಗೆ ವಾಸಿಸುತ್ತಾರೆ. ಪ್ರಾರ್ಥನೆಯು ನಿಮ್ಮ ಆತ್ಮದ ಮಧ್ಯದಲ್ಲಿರುವ ಗುಪ್ತ ಕೋಣೆಯತ್ತ ಇನ್ನಷ್ಟು ಆಳವಾಗಿ ಸಾಗುವ ಪಯಣವಾಗಿದೆ. ಅಲ್ಲಿ ನಿಮ್ಮ ಪ್ರಾರ್ಥನೆಯು ಪರಿಪೂರ್ಣಗೊಳ್ಳುತ್ತದೆ ಮತ್ತು ದೇವರ ಪರಿಪೂರ್ಣತೆ ನೆಲೆಸಿರುತ್ತದೆ. ಆದ್ದರಿಂದ, ಅಂತರ್ಮುಖ ಏಕಾಗ್ರತೆಯ ಪ್ರಾರ್ಥನೆಯು ದೇವರೊಂದಿಗೆ ಏಕಾಂತದಲ್ಲಿರಲು ನೀವು ಉದ್ದೇಶಪೂರ್ವಕವಾಗಿ ನಿಮ್ಮೊಳಗೆ ಪ್ರವೇಶಿಸಲು ಆರಂಭಿಸುವ ಒಂದು ವಿಧಾನವಾಗಿದೆ.

ಪ್ರಾಯೋಗಿಕವಾಗಿ ಹೇಳುವುದಾದರೆ, ಆರಂಭದಲ್ಲಿ ಈ ಪ್ರಾರ್ಥನಾ ವಿಧಾನವನ್ನು ಉತ್ತಮವಾಗಿ ಅಭ್ಯಾಸ ಮಾಡಲು, ನಿಮ್ಮ ಕಣ್ಣುಗಳನ್ನು ಮುಚ್ಚಿ, ಬಾಹ್ಯ ಇಂದ್ರಿಯಗಳೆಲ್ಲವನ್ನೂ ಕಡೆಗಣಿಸಿ, ಅಂತರಂಗದಲ್ಲಿರುವ ಅರಸನನ್ನು ಹುಡುಕಬೇಕು. ಉದಾಹರಣೆಗೆ, ನಿಮ್ಮ ಆತ್ಮವನ್ನು ರತ್ನಗಳಿಂದಲೂ ಚಿನ್ನದಿಂದಲೂ ತುಂಬಿದ ಸುಂದರ ಕೋಟೆಯಾಗಿ ಕಲ್ಪಿಸಿಕೊಳ್ಳಲು ನೀವು ಪ್ರಯತ್ನಿಸಬಹುದು. ದೇವರು ಆಸೀನರಾಗಿರುವ ಸಿಂಹಾಸನವೇ ನಿಮ್ಮ ಹೃದಯ ಎಂದು ನೀವು ಕಲ್ಪಿಸಿಕೊಳ್ಳಬಹುದು. ಬಳಿಕ ಈ ಕೋಟೆಯೊಳಗಿನ ಅಲಂಕಾರಗಳೇ ನಿಮ್ಮ ಸದ್ಗುಣಗಳು ಎಂದು ಪರಿಗಣಿಸಬಹುದು. ಈ ಅಂತರ್ಮುಖ ಏಕಾಗ್ರತೆಯ ಮೂಲಕ ನೀವು ದೇವರನ್ನು ಸಂಧಿಸಲು ಆರಂಭಿಸುವುದು ಮಾತ್ರವಲ್ಲದೆ, ಮಹಾ ಅರಸನ ಬೆಳಕಿನಲ್ಲಿ ನಿಮ್ಮ ಪಾಪಗಳನ್ನೂ ಸದ್ಗುಣಗಳನ್ನೂ ಕುರಿತು ಚಿಂತಿಸುವಾಗ, ನಿಮ್ಮನ್ನು ನೀವು ಇನ್ನಷ್ಟು ಪೂರ್ಣವಾಗಿ ಅರಿತುಕೊಳ್ಳಲೂ ಆರಂಭಿಸುತ್ತೀರಿ.

ನೀವು ನಿಮ್ಮ ಅಂತರಂಗವನ್ನು ಅವಲೋಕಿಸುವಾಗ, ಪ್ರಭುವಿನ ಪ್ರಾರ್ಥನೆಯನ್ನು ತೆಗೆದುಕೊಂಡು, ದೇವರಿಗೆ ಅದನ್ನು ಬಹಳ ನಿಧಾನವಾಗಿ, ವೈಯಕ್ತಿಕವಾಗಿ, ಮನಸ್ಸಿಟ್ಟು, ಪ್ರೀತಿಯಿಂದ ಹೇಳಲು ಬಯಸಬಹುದು. ಅಥವಾ ನಿಮ್ಮ ಅತ್ಯಂತ ಆಳವಾದ ಹೋರಾಟಗಳು, ಭಯಗಳು, ಚಿಂತೆಗಳು ಮತ್ತು ಪಾಪವನ್ನು ತೋಡಿಕೊಳ್ಳಲು ಬಯಸಬಹುದು. ಬಳಿಕ ಸ್ತುತಿ ಮತ್ತು ಕೃತಜ್ಞತೆಯ ಸುದೀರ್ಘ ಪ್ರಾರ್ಥನೆಯನ್ನು ಅವರಿಗೆ ಅರ್ಪಿಸಬಹುದು. ಆರಂಭದಲ್ಲಿ ನೀವು ಮಾತನಾಡುತ್ತೀರಿ ಮತ್ತು ಆಲಿಸುತ್ತೀರಿ. ನಂತರ, ಅಂತರಂಗದಲ್ಲಿ ಏಕಾಗ್ರಗೊಂಡಾಗ, ನೀವು ಅರಸರೊಂದಿಗೆ ಸುಮ್ಮನೆ ಕುಳಿತು, ಪ್ರೀತಿಯಿಂದ ಅವರನ್ನು ದಿಟ್ಟಿಸುತ್ತೀರಿ; ಏನನ್ನೂ ಮಾತನಾಡದೆ, ನಿಮ್ಮ ಇಚ್ಛಾಶಕ್ತಿ, ಭಾವನೆಗಳು ಮತ್ತು ಇಡೀ ಆತ್ಮದಿಂದ ಅವರನ್ನು ಪ್ರೀತಿಸುತ್ತೀರಿ. ಹಲವು ತಿಂಗಳುಗಳ ಅಭ್ಯಾಸದ ಬಳಿಕ, ಈ ಪ್ರಾರ್ಥನೆ ಒಂದು ರೂಢಿಯಾಗುತ್ತದೆ; ಆಗ ಅಂತರಂಗದಲ್ಲಿ ಏಕಾಗ್ರಗೊಂಡ ಮನಸ್ಥಿತಿಯಲ್ಲೇ ನಿಮ್ಮ ದಿನವನ್ನು ಕಳೆಯುವುದು ನಿಮಗೆ ಹೆಚ್ಚು ಸುಲಭವಾಗುತ್ತದೆ.

ಮನನ: ನಿಮ್ಮ ಆತ್ಮದ ಆಳದಲ್ಲಿ ದೇವರೊಂದಿಗೆ ಮಾತನಾಡಲು ನಿಮಗೆ ಸಾಧ್ಯವಾಗುತ್ತದೆಯೇ? ನಿಮ್ಮೊಳಗಿರುವ ಅವರ ದಿವ್ಯ ಸಾನ್ನಿಧ್ಯಕ್ಕೆ ನೀವು ಗಮನಕೊಡುತ್ತೀರಾ? ನಿಮ್ಮಲ್ಲಿರುವ ಅನೇಕ ದೌರ್ಬಲ್ಯಗಳನ್ನು—ನಿಮ್ಮ ಪಾಪಗಳು, ನಿಮ್ಮ ಪ್ರಲೋಭನೆಗಳು, ನಿಮ್ಮ ಗಾಯಗಳು ಮತ್ತು ನಿಮ್ಮ ಗೊಂದಲವನ್ನು—ಸಹ ನೀವು ಕಾಣಬಲ್ಲಿರಾ? ನಿಮ್ಮ ಆತ್ಮದ ಅಂತರಂಗವು ವಾಸಿಸಲು ಮಹಿಮೆಯಿಂದ ಕೂಡಿದ ಸ್ಥಳವಾಗಿದೆ; ಆದರೂ ಎಷ್ಟೋ ಜನರು ಎಂದಿಗೂ ಅಲ್ಲಿಗೆ ಪ್ರವೇಶಿಸುವುದೇ ಇಲ್ಲ. ಎಷ್ಟೋ ಜನರು ತಮ್ಮ ಸುತ್ತಲಿನ ಲೋಕದಲ್ಲೇ ಸಂಪೂರ್ಣವಾಗಿ ತಲ್ಲೀನರಾಗಿ ಉಳಿಯುತ್ತಾರೆ; ತಮ್ಮೊಳಗಿನ ಲೋಕವನ್ನು ಕಂಡುಕೊಳ್ಳಲು ಎಂದಿಗೂ ಸಮಯವನ್ನು ಮೀಸಲಿಡುವುದಿಲ್ಲ ಅಥವಾ ಪ್ರಯತ್ನಿಸುವುದಿಲ್ಲ. ನೀವು ಅಂತಹವರಲ್ಲಿ ಒಬ್ಬರೇ?

ಅಂತರ್ಮುಖ ಏಕಾಗ್ರತೆಯ ಪ್ರಾರ್ಥನೆಯನ್ನು ಕಲಿಯಬೇಕು; ಅದನ್ನು ಅಭ್ಯಾಸ ಮಾಡುವುದರಿಂದ ಮಾತ್ರ ಕಲಿಯಲು ಸಾಧ್ಯ. ಈ ಪಯಣಕ್ಕೆ ನಿಮ್ಮನ್ನು ಸಮರ್ಪಿಸಿಕೊಳ್ಳಿ. ಪ್ರತಿದಿನ ಪ್ರಾರ್ಥನೆಗೆ ಅನುಕೂಲವಾದ ಸ್ಥಳದಲ್ಲಿ ಶಾಂತವಾಗಿ ಕುಳಿತುಕೊಳ್ಳಲು ಸಮಯವನ್ನು ಕಂಡುಕೊಳ್ಳಿ, ಕಣ್ಣುಗಳನ್ನು ಮುಚ್ಚಿ ದೇವರೊಂದಿಗೆ ಮಾತನಾಡಲು ಆರಂಭಿಸಿ. ಇದನ್ನು ಮಾಡುವುದು ಕಷ್ಟವೆನಿಸಿದರೂ, ಮಾಡುತ್ತಲೇ ಇರಿ. ಇದೇ ರೀತಿಯಲ್ಲಿ ಮತ್ತೆ ಮತ್ತೆ ಪ್ರಾರ್ಥಿಸುವುದನ್ನು ಮುಂದುವರಿಸಿ. ಪ್ರತಿದಿನ ಆ ಪ್ರಾರ್ಥನೆಯ ಸಮಯಕ್ಕಾಗಿ ಕಾತರದಿಂದ ಕಾಯಿರಿ. ಈ ರೀತಿಯಲ್ಲಿ ಪ್ರಾರ್ಥನೆಯ ಅಭ್ಯಾಸವನ್ನು ಬೆಳೆಸಿಕೊಳ್ಳಿ ಮತ್ತು ಆ ಅಭ್ಯಾಸವನ್ನು ನಿಮ್ಮ ದೈನಂದಿನ ಜೀವನದಲ್ಲಿಯೂ ಮುಂದುವರಿಸಲು ಪ್ರಯತ್ನಿಸಿ. ಈ ಲೋಕವು ನೀಡಬಲ್ಲ ಎಲ್ಲವನ್ನೂ ಎಷ್ಟೋ ಮೀರಿದ ನಿಮ್ಮೊಳಗಿನ ಲೋಕವನ್ನು ಕಂಡುಕೊಳ್ಳಲು ಹೀಗೆ ಮಾಡುವುದು ಅಗತ್ಯವಾದ ಒಂದು ಹೆಜ್ಜೆಯಾಗಿದೆ.

ನನ್ನ ಪ್ರಭುವೇ, ನನ್ನ ಅರಸರೇ, ನನ್ನ ಆತ್ಮದ ಅತ್ಯಂತ ಗುಪ್ತವಾದ ಕೋಣೆಯಲ್ಲಿ ನಿನ್ನ ಪರಿಪೂರ್ಣತೆಯಲ್ಲಿ ವಾಸಿಸುತ್ತಾ, ನೀನು ನನ್ನೊಳಗೆ ನೆಲೆಸಿರುವೆ. ಮನಸ್ಸಿಟ್ಟು ನನ್ನ ದೃಷ್ಟಿಯನ್ನು ನಿನ್ನತ್ತ ತಿರುಗಿಸಲು, ನಿನ್ನೊಂದಿಗೆ ಮಾತನಾಡಲು, ನಿನ್ನ ಸ್ವರವನ್ನು ಆಲಿಸಲು ಮತ್ತು ಸುಮ್ಮನೆ ನಿನ್ನೊಂದಿಗೆ ಇರಲು ದಯವಿಟ್ಟು ನನಗೆ ಸಹಾಯ ಮಾಡು. ನಾನು ಹೀಗೆ ಮಾಡುವಾಗ, ನಾನು ಯಾರು ಮತ್ತು ನಾನು ಹೇಗೆ ಬದಲಾಗಬೇಕು ಎಂಬುದನ್ನು ಕಂಡುಕೊಳ್ಳಲು ದಯವಿಟ್ಟು ನನಗೆ ಸಹಾಯ ಮಾಡು. ನನ್ನ ಇಡೀ ದಿನವು ಅಂತರಂಗದ ಏಕಾಗ್ರತೆಯಿಂದ ತುಂಬಿ ನಿನ್ನ ಮೇಲೆಯೇ ಕೇಂದ್ರೀಕೃತವಾಗಿರುವಂತೆ, ಈ ಪ್ರಾರ್ಥನಾ ವಿಧಾನದಲ್ಲಿ ದೃಢವಾಗಿ ಮುಂದುವರಿಯಲು ನನಗೆ ಸಹಾಯ ಮಾಡು.

ಅಂತರಂಗದಲ್ಲಿ ನೆಲೆಸಿರುವ ಪರಮಪವಿತ್ರ ತ್ರಿತ್ವವೇ, ನಾನು ನಿನ್ನನ್ನು ಪ್ರೀತಿಸುತ್ತೇನೆ, ನಿನ್ನಲ್ಲಿ ಭರವಸೆಯಿಡುತ್ತೇನೆ, ನನ್ನ ಜೀವನವನ್ನು ನಿನಗೆ ಸಮರ್ಪಿಸುತ್ತೇನೆ.

ಪರಿವಿಡಿ

ಈ ಪುಟವನ್ನು ಹಂಚಿಕೊಳ್ಳಿ:

ಹಂಚಿಕೊಳ್ಳಲು ಇನ್ನಷ್ಟು ಆಯ್ಕೆಗಳು