Ang tanang 4 ka tomo anaa sa pormat nga paperback & eBook!
Ang Pagsabot Nagwagtang sa Pagduhaduha
Ikatulong Domingo sa Pasko sa Pagkabanhaw (Tuig A)
“Apan naglaom kami nga siya unta ang motubos sa Israel; ug labot pa niining tanan, ikatulong adlaw na karon sukad kini nahitabo. Hinuon, gipahibulong kami sa pipila ka babaye nga kauban namo: miadto sila sa lubnganan sayo sa buntag ug wala nila makita ang iyang lawas; mibalik sila ug misugilon nga nakakita gayod sila og panan-awon sa mga anghel nga nagpahibalo nga buhi siya.” Luke 24:21–23
Sa adlaw nga nabanhaw ang atong Ginoo gikan sa mga patay, ang pipila ka babaye nga miuban Kaniya miadto sa lubnganan aron dihogan ang lawas ni Jesus ug ilang nakitang walay sulod ang lubnganan. Usa ka anghel misulti kanila mahitungod sa Pagkabanhaw ni Jesus ug dayon kining mga babayhana miadto aron suginlan ang mga tinun-an sa ilang nakita. Ang tubag sa mga tinun-an gitala niining paagiha: “apan alang kanila ang ilang gisugilon morag walay kapuslanan, ug wala sila motuo kanila.”
Sa ulahi nianang adlawa, duha niadtong mga tinun-an nga nagduhaduha naglakaw paingon sa lungsod sa Emmaus. Samtang naglakaw sila, “nag-istoryahanay ug naglalisay” sila mahitungod sa nahitabo kang Jesus ug usab sa gisugilon kanila niining mga babayhana. Tin-aw sa ilang mga pulong nga nalibog ug naluya gayod sila tungod sa mga nanghitabo. Nakaila sila sa atong Ginoo panahon sa Iyang pagpangalagad sa katawhan. Nakapaminaw sila sa Iyang gamhanang mga pagtulon-an. Nasaksihan nila ang Iyang mga milagro. Naglaom sila nga Siya mao ang Mesiyas. Apan unya nakita nila Siya nga gidakop, gipakaulawan, gibunalan, gilansang sa krus ug gipatay. Ang kamatayon ni Jesus nakapaguol gayod kanila ug nakapaduhaduha sa ilang pagtuo Kaniya. Ug bisan human nila madungog nga nabanhaw Siya, dili gihapon sila makatuo. Busa, naglakaw sila sa dalan paingon sa Emmaus—naluya, nalibog ug nagduhaduha.
Samtang naglakaw kining mga tinun-an, ang atong Ginoo nagpakita kanila, apan wala nila Siya mailhi sa Iyang nabanhaw nga panagway. Gipadayag nila Kaniya ang ilang kalibog ug sa kataposan miingon si Jesus kanila, “Pagkabuang ninyo! Pagkahinay sa inyong mga kasingkasing sa pagtuo sa tanan nga gisulti sa mga propeta! Dili ba kinahanglan nga ang Kristo mag-antos niining mga butanga ug mosulod sa iyang himaya?” Human mipadayon si Jesus sa pagpasabot kanila sa Kasulatan, nangandoy pa sila nga makadungog og dugang. Gihangyo nila kining tawong wala nila mailhi nga mopabilin uban kanila ug mipabilin Siya. Nianang gabhiona, gipikas ni Jesus ang pan uban kanila, ug nianang sakramental nga buhat, nailhan nila Siya sa wala pa Siya mahanaw sa ilang panan-aw.
Kinahanglan natong makita ang atong kaugalingon niining mga tinun-an. Daghang mga butang sa kinabuhi ang makapaluya kanato. Sa dihang maningkamot kita sa pagsunod sa kabubut-on sa Dios apan makita nato nga ang mga butang wala mahitabo sumala sa atong gipaabot, matintal kita sa pagduhaduha. Ngano man kini? Unsa ang hinungdan sa pagduhaduha? Labaw sa tanan, ang mga pagduhaduha ug pagkawala sa kadasig nagagikan sa atong kapakyasan sa pagsabot sa hingpit nga plano sa Dios alang sa atong kinabuhi.
Kon nasabtan pa niining mga tinun-an, sukad sa sinugdanan, ang tanan nga gipasabot ni Jesus kanila sa dalan paingon sa Emmaus, wala unta sila mawad-i og paglaom. Wala unta sila mawad-an sa ilang paglaom. Ingon usab kanato, kon magsugod kita sa pagkawala sa paglaom sa atong kinabuhi, kini ilabina tungod kay napakyas kita sa hustong pagsabot sa balaang plano alang sa atong kinabuhi. Napakyas kita sa pagtan-aw nga gitugotan sa Dios ang pipila ka mga butang alang sa Iyang himaya. Gitugotan Niya ang pipila ka mga kalisdanan aron molalom ang atong pagtuo ug pagsalig Kaniya. Kon dili nato makita sa tanang butang ang Iyang kabubut-on nga nagtugot niini, maluya ug malibog kita.
Pamalandongi karon kining duha ka tinun-an. Nakabaton sila sa talagsaong pribilehiyo nga makagahin og taas nga panahon uban sa atong Ginoo sa panahon sa Iyang dayag nga pagpangalagad, makakita sa Iyang mga milagro ug makadungog sa Iyang mga wali. Apan sa dihang miabot ang Krus, nagduhaduha sila ug nawad-an og paglaom. Tugoti nga ang pagpamatuod niining mga tinun-an magpadayag kanimo sa mga paagi diin mahulog ka sa susamang mga tentasyon. Hingpit ba ang imong paglaom sa Dios ug sa Iyang plano alang sa imong kinabuhi? O gitugotan ba nimo ang nagkalainlaing mga krus nga imong giantos nga maglibog kanimo ug magdala kanimo sa pagduhaduha? Tugoti ang atong Ginoo nga mopakita kanimo pinaagi sa pag-ampo ug mopadayag kanimo sa Iyang hingpit nga plano. Buksi ang imong kaugalingon sa gasa sa pagsabot pinaagi sa pagsalig nga ang kaalam sa Dios magwagtang sa matag tentasyon nimo sa pagduhaduha, ug mopuli niini og pagsalig ug paglaom.
Ginoo nga hingpit og kaalam, ang Imong plano alang sa akong kinabuhi hingpit ug mahimayaon labaw pa sa mahanduraw. Kanunay kaayo nga dili ko masabtan ang Imong kabubut-on ug mahulog ako sa kalibog ug pagduhaduha. Palihog ablihi ang akong hunahuna sa Imong kamatuoran ug tabangi ako nga makita ang tanan sumala sa Imong pagtan-aw aron kanunay akong maglakaw nga adunay paglaom ug pagsalig Kanimo. Jesus, nagsalig ako Kanimo.
Espirituhanong Kahibalo Gikan sa Sulod
Ikatulong Domingo sa Pasko sa Pagkabanhaw (Tuig B)
“Nganong nabalaka man kamo? Ug nganong mitumaw man ang mga pangutana sa inyong mga kasingkasing? Tan-awa ang akong mga kamot ug mga tiil, nga ako gayod kini. Hikapa ako ug tan-awa, kay ang usa ka kalag walay unod ug mga bukog nga inyong makita nga ania kanako.” Luke 24:38–39
Handurawa kon mopakita si Jesus kanimo. Unsa kaha kon ipakita Niya kanimo ang mga samad sa Iyang mga kamot ug mga tiil ug dapiton ka sa paghikap Kaniya aron motuo ka. Motuo ka ba? Lagmit motuo ka, sa usa ka sukod. Kini mahimong sinugdanan sa usa ka kasinatian nga makapausab sa imong kinabuhi, sama sa nahitabo niining mga tinun-an. Ang pagpakita sa atong Ginoo ngadto sa mga tinun-an maoy nagdala sa ilang pagkausab gikan sa mga tawong naglibog ug nagduhaduha ngadto sa mga tawong napuno sa kalipay ug kadasig. Sa kataposan, manglakaw sila aron magsangyaw bahin kang Jesus isip mga saksi sa Iyang kamatayon ug Pagkabanhaw, uban sa kaisog ug sa tinguha nga ang tanan nga nakadungog kanila modangop kang Jesus isip ilang Manluluwas.
Sa unang pagbasa sa Misa karon, giasoy nga gibuhat gayod kini ni San Pedro. Human niya ayoha ang usa ka tawong bakol sa ganghaan sa Templo, nagtapok ang mga tawo nga puno sa kahibulong ug gisangyawan sila ni Pedro bahin kang Jesus. Gitapos niya ang iyang wali sa pag-ingon, “Sa ingon niini gituman sa Dios ang Iyang gipahibalo nang daan pinaagi sa baba sa tanang propeta, nga ang Iyang Cristo mag-antos. Busa, paghinulsol kamo ug pagkabig, aron mapapas ang inyong mga sala.”
Karon, gitugyan kanato ang mao rang misyon nga gihatag sa mga tinun-an sa atong Ginoo, ug kinahanglan magsangyaw kita uban sa mao rang kadasig, kaisog ug lig-ong pagtuo nga ilang gipakita sa ilang pagsangyaw. Una, kinahanglan mahimong sama kalig-on sa ilaha ang atong kasigurohan bahin sa kadaugan ni Jesus batok sa sala ug kamatayon. Kinahanglan talikdan nato ang tanang sala ug motuo nga ang kahingpitan sa kinabuhi makita lamang diha kang Cristo Jesus. Apan dayon kinahanglan itugyan nato ang atong tibuok kaugalingon sa pagsangyaw niining pagtuoha.
Sugdi pinaagi sa pagpamalandong kon unsa kalalom ang imong pagtuo kang Jesus isip Manluluwas sa Kalibotan. Bisan og matintal ka sa paghunahuna nga ang personal nga pagpakita ni Jesus kanimo makatabang sa pagpalalom sa imong pagtuo Kaniya, ang tinuod mao nga ang unang mga tinun-an wala makombinsir sa panguna tungod sa pisikal nga mga pagpakita ni Jesus. Hinuon, kini nga gasa miabot sa panguna pinaagi sa espirituhanong pagtandog sa ilang mga hunahuna. Human mopakita sa pisikal ngadto sa mga tinun-an, mabasa nato nga si Jesus “miabli sa ilang mga hunahuna aron masabtan ang Kasulatan.” Mao kini ang nakapakombinsir kanila labaw sa bisan unsang butang—ang espirituhanong gasa sa pagsabot. Ug kana nga gasa gitanyag kanimo karon, sama sa pagtanyag niini ngadto sa unang mga sumusunod ni Jesus.
Si Santo Tomas de Aquino nagpasabot nga ang espirituhanong gasa sa pagsabot usa ka gasa nga nagpadayag kanato sa mismong esensya sa Dios. Iyang gipasabot nga kini usa ka matang sa kahibalo nga mas lawom pa kaayo kay sa atong makuha pinaagi sa atong lima ka igbalati. Busa, ang pagtan-aw lamang sa usa ka butang pinaagi sa atong mga mata, paghikap niini o pagpamati niini dili makapakombinsir sama sa kahibalo nga makuha pinaagi sa espirituhanong gasa sa pagsabot. Ang gasa sa pagsabot makahimo kanato sa “pagbasa sa sulod” ug sa pagtugkad sa mismong esensya sa usa ka butang. Tungod niini, ang pisikal nga pagpakita ni Jesus tingali mao ang unang lakang padulong sa pagtuo, apan hangtod lamang nga kining maong mga tinun-an nakahibalag sa atong Ginoo sulod sa ilang mga kalag, ug nakasabot sa mismong esensya sa Iyang Pagkabanhaw diha sa ilang kinasuloran, nga sila nausab hangtod sa hangtod. Kini lamang nga matang sa kahibalo ang makakombinsir kanila sa paggula ug pagsangyaw sa mensahe sa kaluwasan.
Pamalandongi karon ang imong kaugalingong kahibalo mahitungod kang Jesus ug ang gahom sa Iyang Pagkabanhaw nga makausab sa imong kinabuhi. Nakigsulti ba ang Dios kanimo sa kinahiladman sa imong kalag? Nasabtan ba nimo kining kahibalo sa imong kinasuloran ug naablihan ba ang imong hunahuna? Paminawa pag-ayo ang atong Ginoo—dili lamang pinaagi sa imong mga dalunggan kondili labaw sa tanan pinaagi sa imong espiritu. Didto, sa imong kinasuloran, sama sa unang mga tinun-an, makaila ug motuo ka sa kinabuhi, kamatayon ug pagkabanhaw ni Cristo aron unya makagula ka nga gipalig-on sa pagsangyaw niining mga kamatuoran ngadto sa uban.
Akong Ginoo nga nagpadayag sa Imong kaugalingon, gipakita Mo ang Imong kaugalingon ngadto sa Imong mga tinun-an dili lamang sa pisikal kondili usab sa espirituhanong paagi, nga nagpadayag sa Imong mismong esensya diha sa ilang kinasuloran. Palihog itugyan usab kanako kining gasaha, minahal nga Ginoo. Hinaot nga makaila ako Kanimo ug motuo Kanimo sa tibuok kong kasingkasing. Samtang ginabuhat ko kini, palihog gamita ako isip instrumento sa Imong kalooy ngadto sa uban. Jesus, misalig ako Kanimo.
Usa ka Gatos Kalim-an ug Tulo ka Dagkong Isda
Ikatulong Domingo sa Pasko sa Pagkabanhaw (Tuig C)
Sa dihang nagbanagbanag na, nagtindog si Jesus sa baybayon; apan wala mailhi sa mga tinun-an nga si Jesus diay kadto. Miingon si Jesus kanila, “Mga anak, aduna ba kamoy nadakpan nga makaon?” Mitubag sila kaniya, “Wala.” Busa miingon siya kanila, “Itaktak ang pukot sa tuo nga kilid sa sakayan ug makadakop kamo.” Busa gitaktak nila kini, ug dili na nila kini mabira tungod sa kadaghan sa mga isda. Juan 21:4–6
Hinumdomi ang unang higayon nga adunay milagrosong pagdakop ug isda diha sa mga Ebanghelyo. Sa Lucas 5:1–7, si Jesus nagsangyaw ngadto sa mga tawo sa baybayon samtang naglingkod Siya sa sakayan ni Pedro nga dili layo gikan didto. Human sa pagsangyaw, giingnan ni Jesus si Pedro, “Palawod ngadto sa lawom nga tubig ug itaktak ang inyong mga pukot aron makadakop.” Gibuhat kini ni Pedro ug hilabihan kadaghan ang ilang nadakpan nga isda nga nanginahanglan ang mga Apostoles ug tabang aron mabira kini.
Sa Ebanghelyo karong adlawa, mga tulo ka tuig human niadtong unang milagrosong pagdakop, nagpakita si Jesus sa mga tinun-an gikan sa baybayon ug gisugo sila sa pagtaktak sa ilang mga pukot “sa tuo nga kilid sa sakayan.” Gibuhat nila kini ug nakadakop sila ug 153 ka dagkong isda. Sa iyang pagkomentaryo niining duha ka teksto, nagtudlo si San Agustin nga ang unang milagrosong pagdakop usa ka timaan nga ang Ebanghelyo isangyaw ngadto sa tanang katawhan, nga gipakita sa yano nga pag-ingon ni Jesus, “itaktak ang inyong mga pukot.” Apan human sa Pagkabanhaw, tin-aw nga giingnan ni Jesus ang mga tinun-an sa pagtaktak sa ilang mga pukot “sa tuo nga kilid” aron ipakita nga ang grasya gihatag na karon ngadto sa mga nagbarog sa Iyang tuo ug nahimulag gikan sa mga hinukman sa silot nga anaa sa Iyang wala. Busa, kining ikaduhang milagrosong pagdakop nagsimbolo sa kataposan sa kapanahonan sa dihang ang mga maayo ug ang mga daotan pagahukman.
Gipunting usab ni San Agustin nga ang 153 ka dagkong isda, nga nadakpan sa tuo nga kilid sa sakayan, simbolikong naghulagway niadtong dili lamang nagtuman sa Napulo ka Sugo kondili nakadawat usab sa Pito ka Gasa sa Espiritu Santo pinaagi sa grasya. Iyang gipasabot nga ang 10 + 7 = 17 ug kon imong idugang ang tanang numero gikan sa 1 hangtod sa 17, makuha nimo ang 153. Busa, kining 153 ka isda nagrepresentar sa tanan nga nakadawat sa Iyang gasa sa grasya ug nakab-ot ang kaluwasan. Ang sakayan nagrepresentar sa Simbahan, ug ang gasa sa kaluwasan gitanyag ni Cristo pinaagi sa Iyang Simbahan.
Usa ka tin-aw nga mensahe nga angay natong makuha gikan sa paghubad ni San Agustin mao nga ang grasya ug kalooy gitanyag ngadto sa tanan, apan dili tanan modawat niini. Sa kataposan sa atong kinabuhi ug sa kataposan sa kalibotan, mahitabo ang paghukom. Kadtong mitubag sa tanyag sa grasya ug kalooy, naghinulsol sa ilang mga sala ug nagtugyan sa ilang kinabuhi ngadto kang Kristo, makaambit sa Pagkabanhaw sa walay kataposan. Apan kadtong midumili sa pagsunod sa Iyang mga Sugo ug nagsira sa ilang kaugalingon ngadto sa gahom sa mga Gasa sa Espiritu Santo nga makapausab sa kinabuhi, mahimulag gikan sa walay kataposang kalipay.
Dili makapahimuot ang pag-atubang sa kamatuoran sa impiyerno, apan usa kini ka mensahe nga dili angay ibaliwala. Tinuod kini nga mensahe ug, busa, posible alang kanatong tanan nga mahiadto sa impiyerno. Busa, mahinungdanon nga pahinumdoman nato matag karon ug unya ang atong kaugalingon niining espirituhanong kamatuoran. Apil ka ba niadtong 153 ka dagkong isda nga nakaplagan sa tuong bahin sa sakayan? Gitugotan mo ba ang mga ministro ni Kristo sulod sa Simbahan, nga gihulagway sa mga tinun-an diha sa sakayan, sa pagdala kanimo ngadto kang Kristo pinaagi sa pagsangyaw ug sa mga Sakramento? Bisan pa og dali tingali kitang tanan motubag og “Oo” nianang pangutanaha, dili gayod nato angay kalimtan nga ang kaluwasan nagkinahanglan og lihok gikan kanato. Nagkinahanglan kini nga dawaton nato si Kristo Jesus pinaagi sa pagsunod sa Iyang mga Sugo ug magkinabuhi pinaagi sa gahom sa Espiritu Santo nga makapausab sa kinabuhi, nga gipaambit pinaagi sa Simbahan.
Pamalandongi karon ang simbolismo nga makita niining asoy sa Pagkabanhaw. Hunahunaa ang kamatuoran nga ang Ebanghelyo tinuod gayong gipaambit na kanimo. Naminaw ka ba sa Pulong sa Dios sumala sa gisangyaw sa Simbahan? Gitugotan mo ba nga mapuno ang imong kinabuhi sa grasya nga gihatag pinaagi sa mga Sakramento? Matinumanon ka bang nagsunod sa Napulo ka Sugo? Padayon ka bang nagbukas sa imong kaugalingon ngadto sa Pito ka Gasa sa Espiritu Santo? Paningkamoti nga maapil ka niadtong mga isda nga nadakpan sa “tuong bahin.” Ayaw gayod pagduhaduha nga tinuod ang impiyerno ug posible kang mahiadto niini. Tungod niana, ayaw gayod pag-uyog sa imong pagkamatinumanon kang Kristo, aron magpabilin kang lig-ong nakagamot sa Iyang grasya ug makaambit unya sa Iyang Pagkabanhaw.
Akong nabanhaw nga Ginoo, Imong gitanyag ang Imong grasya ug kalooy ngadto sa tanan, apan dili tanan mitubag. Nag-ampo ako nga kanunay akong maapil niadtong padayon nga motubag sa Imong pagdapit. Naghinulsol ako sa akong sala, hinigugma kong Ginoo. Palihog tabangi ako nga magpabiling matinumanon sa Imong mga sugo sa gugma ug matag adlaw mapuno sa Imong Espiritu nga makapausab sa kinabuhi. Jesus, misalig ako Kanimo.
Pagkaon alang sa Kahangtoran
Lunes sa Ikatulong Semana sa Pasko sa Pagkabanhaw
“Rabbi, kanus-a Ka miabot dinhi?” Mitubag si Jesus kanila ug miingon, “Amen, amen, sultihan Ko kamo, nangita kamo Kanako dili tungod kay nakakita kamo og mga ilhanan kondili tungod kay mikaon kamo sa mga tinapay ug nangabusog. Ayaw kamo pagtrabaho alang sa pagkaong madunot kondili alang sa pagkaong molungtad ngadto sa kinabuhing dayon, nga ihatag kaninyo sa Anak sa Tawo.” John 6:25–27
Unsa man ang imong gihagoan sa kinabuhi? Ang mga butang nga sa kataposan mahanaw ra? O ang mga butang nga molungtad sa walay kataposan? Usa kini ka mahinungdanong pangutana nga angay tubagon sa kinasingkasing. Kasagaran kaayo, gigugol nato ang kadaghanan sa atong kinabuhi, panahon ug kusog sa mga butang nga gamay rag bili alang sa kahangtoran.
Sa adlaw sa wala pa ang panag-istoryahanay nga gikutlo sa ibabaw, gipadaghan ni Jesus ang mga tinapay ug isda ug gipakaon ang lima ka libo ka panimalay. Dako kaayo ang pagdayeg sa mga tawo nga sa pagkasunod adlaw, sa dihang gigutom na usab sila, nangita sila kang Jesus ug nakakaplag Kaniya sa pikas daplin sa lanaw. Siyempre, nasabtan dayon ni Jesus ang kahimtang. Nahibalo Siya nga ang panon sa mga tawo nga nakakaplag Kaniya mas interesado sa laing pagkaon kay sa espirituhanong pagkaon nga molungtad sa walay kataposan. Busa, sa malumo nga paagi, gigamit ni Jesus ang higayon aron hatagan sila niining mubo nga pagtulon-an mahitungod sa labing mahinungdanon. Ang “pagkaon nga molungtad alang sa kinabuhing walay kataposan,” sa kinauyokan niini, mao ang pagtuo kang Jesus.
Handurawa nga usa ka niadtong mga tawo nga personal nga nakasaksi sa milagro sa pagpadaghan sa mga tinapay ug isda. Unsa kaha ang epekto niini kanimo? Makadala kaha kini kanimo ngadto sa lawom nga pagtuo kang Jesus, ang Anak sa Dios? O mas madani ka kaha sa libre ug milagrosong pagkaon? Ang makapainteres mao nga gipakaon ni Jesus ang lima ka libo sa dihang wala sila magpaabot ni magtinguha niini. Apan sa pagbalik nila sa pagkasunod adlaw nga nagpaabot ug nagtinguha niini, mibalibad Siya. Mibalibad si Jesus sa paghimo og laing milagro tungod kay gusto Niya nga mas lawom nga motan-aw ang mga tawo ngadto sa walay kataposang kamatuoran.
Sa atong kaugalingong kinabuhi, kasagarang lisod ang pagkinabuhi nga nag-una sa mas lawom ug walay kataposang kamatuoran. Sayon ra nga ipunting ang atong mga mata sa taphaw ug dili kaayo mahinungdanong mga bahin sa kinabuhi. Unsaon nako pagpangita og dugang kuwarta? O pagpalit og bag-ong sakyanan? O pagkaon og mas lami ug mahalon nga pagkaon? Unsaon nako paglingaw sa akong kaugalingon og mas maayo? Unsang bag-ong sinina ang angay nakong paliton? Ug daghan pa. Siyempre, walay daotan niining mga butanga, apan lumalabay silang tanan ug walay epekto sa atong kalag nga walay kataposan. Ug sa pagkatinuod, kon sobra ang atong pagtagad sa taphaw ug dili kaayo mahinungdanong mga bahin sa kinabuhi, makapalayo kini sa atong pagtagad gikan sa labing mahinungdanon.
Pamalandongi karon kining hagit ni Jesus. Ayaw paghago alang sa mga butang nga mahanaw; paghago alang sa walay kataposan. Tan-awa ang imong mga prayoridad sa kinabuhi. Asa nakapunting ang imong pagtagad? Unsa ang labing gikabalak-an nimo matag adlaw? Hinaot nga ang imong labing dakong kabalaka mao ang pagpalawom sa imong pagtuo sa Anak sa Dios. Hinaot nga kini mao ang pagkinabuhi sa gugma nga walay kataposan. Kon matinud-anon nimong susihon ang imong kinabuhi ug ang imong mga tumong ug makita nimo nga sobra ang imong kabalaka sa mga butang niining kalibotana, tugoti kining mga pulong sa atong Ginoo nga mosulti kanimo sa direkta aron makatipon ka og mga bahandi alang sa kinabuhing dayon.
Akong labing mahimayaong Ginoo, Ikaw ang Pagkaon nga walay kataposan. Ikaw ang Pagkaon alang sa kinabuhing dayon. Hatagi ako sa kaalam nga akong gikinahanglan, minahal nga Ginoo, aron iliso ang akong mga mata gikan sa lumalabay ug dili kaayo mahinungdanong mga butang niining kalibotana ug ipunting hinuon kini sa walay kataposan. Hinaot nga ipunting ko kanunay ang akong mga mata Kanimo ug mabuhi ako pinaagi sa akong pagtuo Kanimo. Jesus, misalig ako Kanimo.
Ang Tinapay sa Kinabuhi
Martes sa Ikatulong Semana sa Pasko sa Pagkabanhaw
Busa miingon sila kang Jesus, “Ginoo, hatagi kami kanunay niining pan.” Miingon si Jesus kanila, “Ako ang pan sa kinabuhi; ang moduol kanako dili gayod gutomon, ug ang motuo kanako dili gayod uhawon.” Juan 6:34–35
Hunahunaa kon dili ka na gayod gutomon o uhawon pag-usab. Sa natural nga bahin, makapainteres kini nga kahimtang. Siyempre, kon dili na gayod ka mobati og pisikal nga kagutom o kauhaw, tingali dili na usab nimo matagamtam ang kalipay sa lamian nga pagkaon ug ilimnon. Busa nganong gusto man ni bisan kinsa nga mawad-an sa maong mga kalipay?
Siyempre, wala maghisgot si Jesus bahin sa natural nga pagkaon ug ilimnon; naghisgot Siya bahin sa labaw sa kinaiyahan nga kagutom ug kauhaw. Ug wala Siya mag-ingon nga ang espirituhanong pagkaon ug ilimnon nga Iyang gianhi aron ihatag kanato magwagtang sa atong abilidad sa pagtagamtam sa espirituhanong katagbawan. Sa kasukwahi, nag-ingon si Jesus nga ang espirituhanong pagkaon ug ilimnon nga Iyang ihatag mosangpot sa walay kataposang kahingpitan ug katagbawan.
Ang Kapitulo 6 sa Ebanghelyo ni Juan padayong basahon sulod niining semanaha, ang Ikatulong Semana sa Pasko sa Pagkabanhaw. Kining kapituloha naghatag kanato sa naandang gitawag nga “Pakigpulong bahin sa Pan sa Kinabuhi.” Kini ang lawom, mistiko ug makahuloganong pagtulon-an ni Juan bahin sa Labing Balaang Eukaristiya.
Una sa tanan, makatabang ang pagtan-aw niining Ebanghelyo sulod sa konteksto niini. Hinumdomi nga sa miaging adlaw, gihimo ni Jesus ang milagro sa pagpadaghan sa mga pan ug isda, ug ang panon sa mga tawo nga Iyang gipakaon nangita na usab karon og dugang pagkaon. Gigamit ni Jesus ang ilang tinguha alang sa dugang pagkaon aron sugdan ang pagtudlo kanila bahin sa Labing Balaang Eukaristiya, ug gusto Niyang buhaton usab kini alang kanimo.
Ibutang ang imong kaugalingon niining hitaboa. Unsa ang labing gigutom ug giuhaw nimo? Tingali abunda ka sa pisikal nga pagkaon, apan tingali dili usab. Kon abunda ka, unsa pa man ang imong gipangandoy? Unsa ang imong gitinguha? Sa higayon nga mailhan nimo ang imong kinalawomang mga tinguha karon, gamita kining mga tinguhaa aron tugotan ang atong Ginoo nga tudloan ka bahin sa Pan sa Kinabuhi. Tingali makatabang ang pag-ingon sa atong Ginoo, “Mao kini ang akong mga tinguha sa kinabuhi karon…” Unya, tugoti ang imong kaugalingon nga madungog si Jesus nga moingon kanimo, “Gusto Kong mohatag kanimo og labaw pa kaayo niini. Ako ang imong tinuod nga gipangandoy. Kon moduol ka Kanako, matuman ang tanan mong mga tinguha ug labaw pa.” Sa kinatibuk-an, mao kini ang panag-istoryahanay ni Jesus ug niining panona sa tibuok Kapitulo 6 sa Juan.
Nagtuo ka ba nga ang Labing Balaang Eukaristiya makahimo sa pagtagbaw kanimo sa kinahiladman sa imong pagkatawo? Kasagaran, moduol kita niining Sakramento nga tapolan ug wala magtagad. Tungod niini, kasagaran dili nato tinuod nga madawat ang atong Ginoo sa paagi nga makahatag niining labing lawom nga kalipay ug katagbawan.
Pamalandongi karon ug sa tibuok niining semanaha ang imong paagi sa pagduol sa Balaang Komunyon. Ang Eukaristiya mao si Kristo Mismo. Usa kini ka gasa nga dili lamang makasustento kanato sa tanang paagi kondili makadani usab kanato ngadto sa labing dakong mga kalipay sa Langit. Tuohi ang mga pulong ni Jesus niining balaang kapitulo sa Ebanghelyo ni Juan. Kay kon palawmon nimo ang imong pagtuo sa tanan nga gisulti ni Jesus, magsugod ka sa pagkaamgo nga ang tanan nimong gipangandoy sa kinabuhi magsugod sa pagkatuman pinaagi niining bililhong gasa sa mga paagi nga labaw pa sa imong mahanduraw.
Akong Ginoo nga anaa sa Eukaristiya, Ikaw ang Tinapay sa Kinabuhi. Ikaw ang tanan kong gitinguha sa kinabuhi. Hatagi ako sa grasya sa pagsabot, minahal nga Ginoo, aron motuo ako sa tanan nga Imong gipadayag mahitungod sa Labing Balaang Eukaristiya. Nagtuo ako, akong Diyos. Tabangi ang akong kakulang sa pagtuo. Jesus, misalig ako Kanimo.
Balaang Pagtan-aw
Miyerkules sa Ikatulong Semana sa Pasko sa Pagkabanhaw
“Kay kini mao ang kabubut-on sa akong Amahan, nga ang matag usa nga makakita sa Anak ug motuo kaniya makabaton og kinabuhing dayon, ug banhawon ko siya sa kataposang adlaw.” Juan 6:40
Nagtuo ka ba kang Jesus? Sa walay duhaduha, ang tubag mao ang “Oo.” Apan ang pagtuo sa atong Ginoo kinahanglan nga molalom matag adlaw nga molabay. Busa, kon ikaw adunay pagtuo kang Jesus, mahimo usab nimong angkonon nga dili pa igo ang imong pagtuo. Niining bahin sa Ebanghelyo diin gipadayon ang “Pakigpulong mahitungod sa Tinapay sa Kinabuhi,” gitawag kita ni Jesus sa pagbuhat og duha ka butang. Una, kinahanglan nato Siyang makita. Ikaduha, kinahanglan kitang motuo. Sugdan nato ang una.
Sa dihang unang gisulti ni Jesus kining mga pulonga ngadto sa panon sa katawhan, nakita gayod nila ang Iyang pisikal nga presensya. Apan daghan kanila wala makakita lapas sa makita sa gawas. Nakita nila ang Iyang mga milagro, nadungog ang Iyang pagtulon-an, apan diyutay ra kaayo ang nakakita sa mas lawom nga kamatuoran nga si Jesus mao ang Anak sa Walay Kataposang Amahan ug ang Manluluwas sa Kalibotan.
Kon motuo ka sa atong Ginoo ug sa tanan Niyang pagkamao, kinahanglan una nimo Siyang makita. Usa sa labing maayong paagi sa pagpalambo niining “balaang pagtan-aw” sa atong Ginoo mao ang pagtutok Kaniya diha sa Labing Balaang Eukaristiya. Kon motambong ka sa Misa o mogahin og panahon sa adorasyon ug motan-aw sa Labing Balaang Eukaristiya, unsa ang imong makita? Makita ba nimo ang Walay Kataposang Anak? Makita ba nimo ang Iyang balaang pagka-Diyos? Makita ba nimo ang imong Diyos ug ang Ginoo sa tanan?
Samtang nagtindog o nagluhod kita atubangan sa atong Ginoo nga anaa sa Labing Balaang Eukaristiya, dali ra kaayong mabalda ang atong pagtagad. Dali rang tugotan ang atong hunahuna nga mahisalaag ngadto sa daghang ubang bahin sa atong adlaw-adlaw nga kinabuhi ug dili makita ang walay kataposang Anak sa Diyos nga ania uban kanato.
Pamalandongi karon ang imong paagi sa pagtan-aw sa atong Ginoo. Kon gusto nimong palawmon ang imong pagtuo, sugdi sa imong pagtan-aw. Sugdi pinaagi sa pagpamalandong kon giunsa nimo pagtan-aw si Jesus nga anaa sa Labing Balaang Eukaristiya. Kon gipanalanginan ka nga makauban Siya karong adlawa sa Balaang Misa o sa adorasyon, susiha ang imong paagi sa pagtan-aw Kaniya. Itutok ang imong panan-aw Kaniya. Tuyoa gayod ang pagpahayag sa imong pagtuo sa Iyang balaang presensya. Ilha ang Iyang pagka-Diyos, ang Iyang himaya, ang Iyang pagkabalaan ug ang Iyang sagradong presensya. Kon makatan-aw ka lapas sa makita sa gawas ug mabayaw ang tabil nga nagtabon sa Iyang himaya, kining balaang gasa sa pagtan-aw motultol usab ngadto sa gasa sa lawom nga pagtuo.
Akong Ginoo nga kanunayng ania, kinasingkasing akong nagpasalamat Kanimo sa Imong pag-anhi kanako diha sa Labing Balaang Eukaristiya. Nagpasalamat ako Kanimo sa Imong balaang presensya ug himaya. Tabangi ako nga makakita lapas sa tabil sa panagway sa tinapay ug bino aron mas tin-aw kong makita ang Imong pagka-Diyos. Samtang makita ko ang Imong balaang presensya, minahal nga Ginoo, tabangi ako sa pagpahayag sa akong pagtuo Kanimo uban sa mas dakong kasigurohan ug pagtuo. Jesus, misalig ako Kanimo.
Ang Unod sa Atong Ginoo
Huwebes sa Ikatulong Semana sa Pasko sa Pagkabanhaw
Ako ang buhing tinapay nga mikunsad gikan sa langit; bisan kinsa nga mokaon niining tinapaya mabuhi sa walay kataposan; ug ang tinapay nga Akong ihatag mao ang Akong Unod alang sa kinabuhi sa kalibotan.” Juan 6:51
Si Jesus nagsugod na sa pagpukaw sa pagbati sa pipila sa panon. Misugod sila sa pagbiaybiay Kaniya tungod kay miingon Siya nga Siya mao ang “tinapay nga mikunsad gikan sa langit.” Busa, daghan niadtong nangita kang Jesus sa paglaom nga makadawat pag-usab og libre nga pagkaon pinaagi sa milagro misugod sa pagbagulbol sa usag usa ug pagbiaybiay Kaniya. Tungod niini, si Jesus misugod sa pagsulti nga mas tin-aw ug mas makapakurat. Ug labaw pa niana, miingon Siya nga dili lamang Siya ang “buhing tinapay nga mikunsad gikan sa langit,” kondili nga kadtong buot “mabuhi sa walay kataposan” kinahanglan usab mokaon sa Iyang “Unod.”
Unsa kaha ang imong reaksiyon sa maong pamahayag kon usa ka sa mga tawo sa panon? Hunahunaa nga bag-o pa lamang nimo nakita, sa imong kaugalingong mga mata, ang milagro sa pagpadaghan sa mga tinapay ug isda. Busa, sa labing menos, makaamgo ka unta nga si Jesus usa ka talagsaong tawo. Apan unsa kaha ang imong reaksiyon niining pamahayag ni Jesus, “ug ang tinapay nga Akong ihatag mao ang Akong Unod alang sa kinabuhi sa kalibotan,” kon nadungog nimo kini niadtong higayona? Lagmit, ang imong reaksiyon sama ra sa imong reaksiyon karon sa pagtulon-an bahin sa Labing Balaang Eukaristiya.
Daghan niadtong nakadungog ni Jesus nga nagsulti sa ingon tingali naghunahuna nga medyo talagsaon ang Iyang gisulti. Ang uban kusog unta og reaksiyon, samtang ang uban walay pagtagad. Apan ang pipila lahi gayod unta og reaksiyon. Ang pipila makadungog unta niining bag-o ug makapakurat nga mga pulong ni Jesus, makaamgo nga wala nila hingpit masabti ang Iyang gipasabot, apan motuo gihapon pag-ayo tungod sa gasa sa pagtuo. Sa usa ka paagi, mahibalo sila sa kahiladman sa ilang konsensiya nga kinahanglan gayod nilang kan-on ang Unod Niya nga mikunsad gikan sa Langit, kay Siya gayod ang Tinapay sa Kinabuhi.
Ang pagtuo sa Eukaristiya—sa kamatuoran nga kining mga gasa sa Sagradong Hostiya ug sa Bililhong Dugo nga mahikap ug makita mao gayod ang Lawas ug Dugo, Kalag ug Pagka-Dios sa Walay Kataposang Anak sa Dios—mahitabo lamang pinaagi sa gasa sa pagtuo nga naglihok sa sulod ug nagbag-o kanato. Sa unsang laing paagi man nimo matuohan ang maong pagtulon-an? Sa unsang laing paagi man nimo matuohan nga natuman na kining mga pulong sa Ebanghelyo karon? Ug nga ang pagdawat sa Labing Balaang Eukaristiya mao ang dalan padulong sa kinabuhing walay kataposan? Ang gasa sa pagtuo sa Labing Balaang Eukaristiya mao lamang ang bugtong paagi aron masabtan, dawaton ug tuohan pag-ayo ang gisulti sa atong Ginoo niining Balaang Ebanghelyo.
Pamalandongi karon si Jesus nga nagsulti niining labing balaang mga pulong sa unang higayon: “…ang tinapay nga Akong ihatag mao ang Akong Unod alang sa kinabuhi sa kalibotan.” Samtang mamalandong ka niining mga pulong diha sa pag-ampo, hunahunaa kon unsa kalalom ang imong pagtuo niini. Unsa kalalom ang imong pagtuo sa Labing Balaang Eukaristiya? Ang Eukaristiya mao ang katumanan niining tekstoha, ug ang atong diosnong Ginoo nagdapit kanimo dili lamang sa pagtuo sa Iyang balaang mga pulong, kondili sa pagtugot usab nga kining kamatuoran magbag-o kanimo sa mga paagi nga labaw pa sa imong mahunahuna.
Akong Ginoo sa Eukaristiya, Ikaw gayod ang Tinapay sa Kinabuhi, ug ang tanan nga mokaon sa Imong Unod ug moinom sa Imong Dugo makapanunod sa kinabuhing walay kataposan. Nagtuo gayod ako niini, minahal nga Ginoo. Nagtuo ako nga ang Labing Balaang Eukaristiya mao Ikaw, ang Imong Kalag ug Pagka-Dios, nga gihatag kanako aron makaambit ako sa Imong balaang kinabuhi. Ihatag kanako ang grasya nga akong gikinahanglan aron molalom ang akong pagtuo sa Labing Balaang Eukaristiya, aron mas hingpit akong madani ngadto sa mga kalipay sa Imong Gingharian nga Walay Kataposan. Jesus, misalig ako Kanimo.
Usa ka “Balaang Kahadlok”
Biyernes sa Ikatulong Semana sa Pasko sa Pagkabanhaw
“Amen, amen, sultihan Ko kamo, kon dili kamo mokaon sa Unod sa Anak sa Tawo ug moinom sa Iyang Dugo, wala kamoy kinabuhi diha kaninyo. Bisan kinsa nga mokaon sa Akong Unod ug moinom sa Akong Dugo adunay kinabuhing walay kataposan, ug banhawon Ko siya sa kataposang adlaw. Kay ang Akong Unod tinuod nga pagkaon, ug ang Akong Dugo tinuod nga ilimnon.” Juan 6:53–55
Sa pilosopikal nga panglantaw, mapuslanon nga pamalandongan ang nagkalainlaing butang nga daw mga “puwersang nagbanggaay.” Ang kaayo daw sukwahi sa kadaotan. Ang kahayag sukwahi sa kangitngit. Ang kainit sukwahi sa katugnaw. Ug ang kinabuhi sukwahi sa kamatayon. Apan tinuod ba silang magkasukwahi sa diwa nga mga puwersa silang nagbanggaay? Kon susihon pag-ayo, tin-aw nga ang kaayo ug kadaotan, kahayag ug kangitngit, kainit ug katugnaw, ug kinabuhi ug kamatayon dili gayod mga “puwersang nagbanggaay”; hinuon, ang kadaotan mao lamang ang pagkawala sa kaayo, ang kangitngit ang pagkawala sa kahayag, ang katugnaw ang pagkawala sa kainit, ug ang kamatayon ang pagkawala sa kinabuhi. Ug bisan tuod kining pilosopikal nga kalainan daw dili kaayo makapainteres sa uban, ug makapalibog sa uban pa, usa kini ka mapuslanong kamatuoran nga pamalandongan ubos sa kahayag sa Ebanghelyo karong adlawa.
Ang Ebanghelyo karong adlawa nagsulti kanato nga ang dili “pagkaon sa Unod sa Anak sa Tawo ug pag-inom sa iyang Dugo” mosangpot sa kamatayon. Ang kamatayon mao ang pagkawala sa kinabuhi, ug ang Eukaristiya mao ang tinubdan sa kinabuhi. Si Jesus nag-ingon nga kon dili kamo mokaon sa Iyang Unod ug moinom sa Iyang Dugo, “wala kamoy kinabuhi diha kaninyo.”
Kining maisogong pagtulon-an ni Jesus angay nga makapahunong kanato aron susihon ang atong pagtagad sa Labing Balaang Eukaristiya. Usahay malit-agan kita sa paghunahuna nga ang pagtambong sa Misa ug pagdawat sa Komunyon usa ka “pabor” nga atong gihimo alang sa atong Ginoo. Apan sa pagkatinuod, kini ang labing dakong pabor sa Dios alang kanato, kay ang Eukaristiya mao ang ganghaan ngadto sa kinabuhing dayon. Ug kon wala kini, wala kitay kinabuhi sa atong sulod. Ang atong mga espiritu mamatay tungod kay mawad-an kita sa presensya sa Dios.
Mapuslanon kaayo ang pagsusi sa dili maayong sangpotanan sa dili pagdawat sa Labing Balaang Eukaristiya. Usahay kinahanglan natong hunahunaon ang mga sangpotanan sa atong mga buhat aron madasig kita sa mas dakong pagkamatinud-anon. Tungod niini, ang pagpamalandong sa kamatuoran nga ang dili pagkaon sa Unod sa Anak sa Dios mosangpot sa kamatayon angay gayod nga makapadasig kanato. Angay kini mopuno kanato sa balaang kahadlok nga mawala ang presensya sa Dios nga naghatag og kinabuhi dinhi sa atong sulod. Kining “balaang kahadlok” usa ka tinuod nga gasa gikan sa Dios ug, sa pagkatinuod, usa sa Pito ka Gasa sa Espiritu Santo.
Pamalandongi karong adlawa ang imong kinahiladman nga pagtagad sa Labing Balaang Eukaristiya. Giisip ba nimo ang imong pag-apil sa Balaang Misa nga usa lamang ka pabor nga imong gitanyag sa atong Ginoo? O nakita ba nimo kini sumala sa tinuod niini nga kahulogan: ang tinubdan nga naghatag sa kinabuhing dayon? Pamalandongi kon unsa gayod kaimportante kining bililhong gasa ug bag-oha ang imong saad sa matinud-anon ug debotong pag-apil niining labing balaang Gasa.
Akong Ginoo nga anaa sa Eukaristiya, ang Imong Unod ug Dugo mao gayod ang tinubdan sa kinabuhing dayon alang sa tanan nga modawat Kanimo uban sa pagtuo. Nagpasalamat ako Kanimo, hinigugmang Ginoo, alang niining labing bililhong Gasa sa Labing Balaang Eukaristiya, ug nangamuyo ako nga kanunay unta akong mapuno sa dakong kagutom ug kauhaw alang Kanimo. Jesus, misalig ako Kanimo.
Usa ka “Lisod” ug Lawom nga Misteryo
Sabado sa Ikatulong Semana sa Pasko sa Pagkabanhaw
Tungod niini, daghan sa iyang mga tinun-an mibalik sa ilang kanhing pagkinabuhi ug wala na mouban kaniya. Busa miingon si Jesus sa Napulog Duha, “Gusto ba usab ninyong mobiya?” John 6:66–67
Ang Ebanghelyo karong adlawa nagtapos sa matahom ug lawom nga wali bahin sa Tinapay sa Kinabuhi (tan-awa ang John 6:22–71). Kon basahon nimo kini nga wali gikan sa sinugdanan hangtod sa kataposan, mamatikdan nga si Jesus nagsugod sa mas kinatibuk-ang mga pahayag bahin sa Tinapay sa Kinabuhi nga mas sayon dawaton, ug mibalhin ngadto sa mas piho nga mga pahayag nga mahagiton. Sa wala pa ang bahin nga anaa sa Ebanghelyo karong adlawa, gitapos Niya ang Iyang pagtulon-an pinaagi sa tin-aw kaayong pag-ingon, “Ang mokaon sa akong unod ug moinom sa akong dugo magpabilin dinhi kanako ug ako diha kaniya.” Human kini isulti ni Jesus, daghan sa mga naminaw Kaniya ang mibiya Kaniya ug wala na mosunod Kaniya.
Sa kinatibuk-an, adunay tulo ka kasagarang tinamdan ang mga tawo ngadto sa Labing Balaang Eukaristiya. Ang usa mao ang lawom nga pagtuo. Ang lain mao ang pagkawalay pagtagad. Ug ang ikatulo mao ang atong makita sa Ebanghelyo karong adlawa: ang dili pagtuo. Kadtong mibiya kang Jesus sa Ebanghelyo karong adlawa mibuhat niini kay miingon sila, “Lisod kining gisulti; kinsa may makadawat niini?” Pagkamahinungdanon niining pahayag ug pangutana nga angay natong pamalandongan.
Tinuod, sa usa ka paagi, nga ang pagtulon-an ni Jesus bahin sa Labing Balaang Eukaristiya usa ka lisod dawaton nga pulong. Apan ang “lisod” wala magpasabot nga daotan. Lisod kini sa diwa nga ang pagtuo sa Eukaristiya mahimo lamang pinaagi sa usa ka pagtuo nga nagagikan sa lawom nga pagpadayag sa Dios sa sulod sa kasingkasing. Sa kahimtang niadtong mibiya kang Jesus, nadungog nila ang Iyang pagtulon-an, apan sirado ang ilang mga kasingkasing sa gasa sa pagtuo. Nagpabilin sila sa pagsabot nga nakabase lamang sa pangatarongan, ug busa, ang hunahuna sa pagkaon sa Unod ug Dugo sa Anak sa Dios labaw pa sa ilang masabtan. Busa kinsa man ang makadawat sa maong pahayag? Kadto lamang nga maminaw sa atong Ginoo samtang Siya nakigsulti kanila sa sulod sa ilang kasingkasing. Ang maong lig-on nga pagsalig sa kinasuloran nga nagagikan sa Dios mao lamang ang mahimong pamatuod sa kamatuoran sa Balaang Eukaristiya.
Nagtuo ka ba nga kon modawat ka nianang daw “pan ug bino” lamang, si Kristo mismo ang imong tinuod nga gidawat? Nasabtan mo ba kining pagtulon-an sa atong Ginoo bahin sa Tinapay sa Kinabuhi? Usa kini ka lisod dawaton nga pulong ug usa ka malisod nga pagtulon-an, busa kinahanglan gayod kining hatagan og bug-at nga pagtagad. Alang niadtong wala hingpit nga mosalikway niini nga pagtulon-an, anaa usab ang tentasyon nga medyo magpakawalay-pagtagad niini. Dali ra kining masaypan og sabot nga simbolismo lamang sa paagi sa pagsulti sa atong Ginoo. Apan ang maong simbolismo labaw pa gayod sa simbolismo lamang. Usa kini ka lawom, mahagiton, ug makapausab sa kinabuhi nga pagtulon-an kon giunsa nato pag-ambit sa diosnon ug walay kataposang kinabuhi nga buot sa atong Ginoo nga ihatag kanato.
Pamalandongi karon kon unsa kalawom ang imong pagtuo niining lisod dawaton nga pulong ni Jesus. Ang kamatuoran nga kini usa ka “lisod” nga pulong angay mag-aghat kanimo sa seryosong pagsusi sa imong kaugalingong pagtuo o sa kakulang niini. Ang gitudlo ni Jesus makapausab sa kinabuhi. Naghatag kini og kinabuhi. Ug kon tin-aw na kining masabtan, mahagit ka sa pagpili tali sa pagtuo sa tibuok mong kasingkasing o sa pagtalikod tungod sa kawalay pagtuo. Tugoti ang imong kaugalingon nga motuo sa Labing Balaang Eukaristiya sa tibuok mong kasingkasing, ug imong makita nga nagtuo ka sa usa sa labing lawom nga mga Misteryo sa Pagtuo.
Akong mahimayaong Ginoo, ang Imong pagtulon-an bahin sa Labing Balaang Eukaristiya labaw pa sa masabtan sa tawo. Usa kini ka misteryo nga hilabihan kalawom nga dili gayod namo hingpit nga masabtan kining bililhong gasa. Ablihi ang akong mga mata, minahal nga Ginoo, ug pakigsulti sa akong hunahuna aron maminaw ako sa Imong mga pulong ug motubag uban sa labing lawom nga pagtuo. Jesus, misalig ako Kanimo.
Ang tanang 4 ka tomo anaa sa pormat nga paperback & eBook!
Amazon – Google Play – iTunes – Barnes and Noble