Ang matag usa sa tulo ka basahon sa Seryeng My Catholic Life! mahimong gamiton sa usa ka 8 ka semana nga programa sa pagtuon sa pagtuong Katoliko nga inyong maapilan, sa kinatibuk-ang 24 ka semana aron matuki ang tibuok Katekismo sa Simbahang Katolika! Kining programa sa pagtuon sa gagmayng mga grupo maayo kaayo alang niining mga kahimtanga ug sa uban pa:
Pamilya – Nganong dili man pundokon ang mga sakop sa pamilya alang sa walo ka semana nga pagtuon sa atong pagtuo?!
Mga Higala – Sugdi ang usa ka pagtuon uban sa inyong mga higala ug pagdapit og bag-ong mga higala!
Kasilinganan – Maayo kaayo kini nga paagi sa pagsangyaw sa Maayong Balita diha mismo sa inyong kasilinganan. Pagpadala og sulat sa pagdapit sa inyong mga silingan. Tingali matingala kamo kon unsa kadaghan ang interesado!
Parokya – Pakigsulti sa inyong kura paroko aron makakuha og pagtugot sa pagsugod og usa o labaw pang mga grupo sa pagtuon diha sa inyong simbahan.
R.C.I.A. – Maayo kaayo kini nga gamit alang niadtong nangandam nga mahimong Katoliko. Kon gamiton ang tanang tulo ka serye, matuki ang tibuok Katekismo! Tan-awa ang Giya sa R.C.I.A. alang sa dugang kasayoran.
Kinsa ang mahimong magsugod og programa? – Gidisenyo kining programa aron sayon rang organisahon ug pangulohan ni bisan kinsang Katoliko. Dili kinahanglan nga eksperto kamo sa pagtuong Katoliko aron maoy manguna sa pagsugod niini. Kon gibati ninyo nga gitawag kamo sa pagsugod niini, nan “Ayaw kahadlok” ug sugdi na!
Unsa ang inyong gikinahanglan? – Ang mga materyales naglakip sa usa sa tulo ka basahon sa katekesis gikan sa My Catholic Life! nga Serye ingon man sa mga giya sa pagtuon nga anaa sa ubos. Ang mga basahon mabasa sa internet, makuha isip libreng elektronikong mga basahon o isip giimprentang basahon nga humok og hapin. Walay laing gikinahanglan ang mga partisipante gawas sa usa ka kopya sa basahon nga gitun-an. Gamiton sa mga pangulo sa grupo ang mga materyales nga anaa sa ubos. Ang matag partisipante kinahanglan motambong nga andam na, nga nakabasa na sa kapitulo alang nianang gabhiona.
Unsa may dagan sa mga tigom? – Ang pagkahimong pangulo sa usa ka gamayng grupo dili ingon kalisod sa unang pagtan-aw. Dili ninyo kinahanglan ang espesyal nga pagbansay ni ang naunang pagtuon sa teolohiya. Ang inyong gikinahanglan mao lamang ang maayong pagpangorganisar ug ang pagkaandam sa pagdumala niining programa. Sa pipila ka bahin, dili kini kaayo lahi sa pag-organisar og usa ka salo-salo.
Hapsay rang modagan ang tigom sa grupo sa pagtuon kon sundon lamang ninyo ang gihatag nga han-ay. Tugoti ang Espiritu Santo nga mangulo ug matingala kamo kon unsa gayod kini kasayon. Ania ang sukaranang han-ay alang sa matag tigom:
5 minutos – Pagtapok & pagpakig-uban.
10 minutos – Pangbukas nga pag-ampo ug Balaang Kasulatan sumala sa gihatag sa giya sa matag sesyon.
50 minutos – Hisgoti ang mga pangutana alang sa panaghisgot. Ang matag usa angay dapiton sa pagpaambit o pagpangutana kon gusto niya. Likayi nga usa o duha lamang ka tawo ang mopatigbabaw sa panaghisgot. Hatagi og turno ang matag usa sa lingin ug ayaw kahadlok sa pagpaambit! Ang inyong mga pagsabot mahimong makatabang sa uban nga mas masabtan ang mga hilisgutan. Ang inyong pangutana mahimo usab gayod nga mao ang pangutana sa uban.
20 minutos – Hatagi og turno ang matag usa aron makapaambit kon unsay labing nakatandog kanila gikan sa panaghisgot nianang gabhiona o unsay labing nakalibog kanila, aron makabaton og dugang katin-awan o pagsabot gikan sa uban.
5 minutos – Panapos nga pag-ampo sumala sa gimando sa kaubang giya sa pagtuon alang sa matag sesyon.
Unsaon nako pagsugod? – Adunay tulo ka sayon nga lakang aron makasugod:
- Pagpadala og email ngadto sa usa ka grupo, tawagi ang inyong mga higala, ipahibalo kini sa kasilinganan, pagbutang og pahibalo sa buletin sa parokya, o imantala kini sa Facebook! Susiha kon kinsa ang interesado ug dasiga sila og gamay. Tigoma ang ilang impormasyon sa pagkontak aron makahatag kamo kanila og dugang kasayoran kon mahibaloan na ninyo kon kinsa ang interesado.
- Sa dili pa o human ninyo mahibaloi kon kinsa ang interesado, pagtino og sinemana nga oras ug dapit alang sa tigom. Ang panagtigom dili angay molapas sa usa ka oras ug tunga. Paningkamoti nga pilion ang samang dapit sulod sa walo ka sunodsunod nga semana. Ipadala kana nga kasayoran ngadto sa inyong grupo uban sa sumpay ngadto sa basahon nga inyong tun-an. Kinahanglan silang pahibaloon nga basahon ang pasiuna ug Kapitulo Usa sa dili pa ang unang panagtigom.
- Himoa ang inyong unang tigom. Mahimong mag-andam kamo og pipila ka meryenda ug magsugod sa pakighimamat samtang nangabot ang tanan. Gikan niana, ang giya sa pagtuon na ang mogiya kaninyo. Sunda lamang ang han-ay nianang giya ug pahimusli ang pagkat-on sa inyong pagtuo!
