Tan-awa Usab: Mga Santos sa Simbahang Katolika >>>
Mga kinutlo nga makapadasig gikan sa mga Santos sa Simbahang Katolika:
“Miabot sa imong kinabuhi ang kasakit ug pag-antos, apan hinumdomi nga ang kasakit, kasubo, ug pag-antos mga halok lamang ni Jesus — usa ka timaan nga nahiduol ka pag-ayo Kaniya nga mahimo ka Niyang halokan.” Santa Madre Teresa sa Calcutta
“Kon walay palas-anon sa mga kasakitan, imposible nga makab-ot ang kinatas-an sa grasya. Ang gasa sa grasya motubo samtang motubo ang pakigbisog.” Santa Rosa sa Lima
“Ang mapainubsanong kalag dili mosalig sa iyang kaugalingon, kondili magbutang sa tanan niyang pagsalig diha sa Dios.” Santa Faustina
“Ang pagtuo mao ang pagtuo sa wala nimo makita. Ang ganti sa pagtuo mao ang pagkakita sa imong gituohan.” San Agustin sa Hipona
“Dili ako mosalig sa gugma sa isigkatawo nga walay igasto ug dili makapasakit.” Papa Francisco
“Hibaw-i nga ang labing dakong pag-alagad nga ikahalad sa tawo ngadto sa Dios mao ang pagtabang sa pagkakabig sa mga kalag.” Santa Rosa sa Lima
“Ang sekreto sa kalipay mao ang pagkinabuhi sa matag gutlo ug ang pagpasalamat sa Dios alang sa tanan nga Iyang gipadala kanato adlaw-adlaw diha sa Iyang kaayo.” Santa Gianna Molla
“Gawas sa sala, ang kabalaka mao ang labing dakong kadaotan nga mahimong modangat sa usa ka kalag. Gisugo ka sa Dios sa pag-ampo, apan gidid-an ka Niya sa pagkabalaka.” San Francisco de Sales
“Ug ang Ginoo miingon kanako, ‘Anak Ko, labing makapahimuot ka Kanako pinaagi sa pag-antos. Sa imong mga pag-antos sa lawas ingon man sa hunahuna, anak Kong babaye, ayaw pangitag pag-unong gikan sa mga binuhat. Gusto Ko nga ang kahumot sa imong pag-antos mahimong putli ug walay sagol. Gusto Ko nga imong buhian ang imong pagkahigot, dili lamang sa mga binuhat, kondili usab sa imong kaugalingon…Kon labi nimong higugmaon ang pag-antos, anak Kong babaye, labi usab nga maputli ang imong gugma alang Kanako.’” Santa Maria Faustina Kowalska: Ang Diosnong Kalooy diha sa Akong Kalag
“Ayaw tugoti nga adunay magbangotan tungod kay balikbalik siyang nahulog: kay ang kapasayloan nabanhaw na gikan sa lubnganan!” San Juan Crisostomo
“Ang pagtuo sa pagkabanhaw ni Jesus nagpahayag nga adunay kaugmaon alang sa matag tawo; ang pangandoy alang sa kinabuhing walay kataposan nga kabahin sa pagkatawo sa tawo gitubag gayod. Anaa ang Dios: mao kana ang tinuod nga mensahe sa Pasko sa Pagkabanhaw. Bisan kinsa nga nagsugod pa lamang sa pagsabot kon unsay kahulogan niini nasayod usab kon unsay kahulogan sa pagkatinubos.” Papa Benedicto XVI
“Si Maria, nga mao ang Birhen nga Labing Putli, mao usab ang Dalangpanan sa mga Makasasala. Nasayod siya kon unsa ang sala, dili tungod kay nakasinati siya sa pagkahulog niini, dili tungod kay nakatilaw siya sa mapait nga mga pagbasol niini, kondili tungod kay nakita niya ang gibuhat niini ngadto sa iyang Diosnong Anak.” Venerable Fulton Sheen
“Ang kalibotan nagtanyag kanimo og kaharuhay, apan wala ka buhata alang sa kaharuhay. Gibuhat ka alang sa pagkahalangdon.” Papa Benedicto XVI
“Ang Eukaristiya mao ang sekreto sa akong adlaw. Naghatag kini og kusog ug kahulogan sa tanan nakong buluhaton sa pag-alagad sa Simbahan ug sa kalibotan.” Papa San Juan Pablo II
“Walay halangdong butang nga makab-ot kon walay paglahutay sa daghang kalisdanan.” Santa Catalina sa Siena
“Diha sa akong labing lawom nga samad nakita ko ang imong himaya ug nasulawan ako niini.” San Agustin sa Hipona
“Nakaplagan ko kining daw nagkasumpaki nga kamatuoran: kon mohigugma ka hangtod nga kini mosakit, mahimong wala nay kasakit, kondili mas dakong gugma na lamang.” Santa Madre Teresa sa Calcutta
“Daghan og gipangayo ang tinuod nga gugma, apan ang katahom niini anaa gayod sa mga butang nga gipangayo niini.” Papa Francisco
“Dili kitang tanan makahimo og dagkong mga butang, apan makahimo kita og gagmayng mga butang uban sa dakong gugma.” Santa Madre Teresa sa Calcutta
“Ang pagbaton og katungod sa pagbuhat sa usa ka butang dili gayod pareho sa pagkaanaa sa matarong sa pagbuhat niini.” G.K. Chesterton
“Dili tanang santos maayo ang pagsugod, apan maayo ang ilang pagtapos.” San Juan Vianney
“Ipunting kanunay ang imong mga mata sa Dios ug itugyan Kaniya ang pagbuhat. Mao ra kana ang buhat nga angay nimong kabalak-an.” Santa Juana Francisca de Chantal
“Ang yawa nahadlok sa mga kasingkasing nga nagdilaab sa gugma sa Dios.” Santa Catalina sa Siena
“Ang pagkatintal usa ka timailhan nga ang kalag makapahimuot pag-ayo sa Ginoo.” San Padre Pio sa Pietrelcina
“Dili maayo nga tugotan nato ang atong mga hunahuna nga mosamok o mabalaka kanato bisan gamay.” Santa Teresa sa Ávila
“Ayaw gayod kahadlok nga basin sobra ra ang imong paghigugma sa Mahal nga Birhen. Dili gayod molabaw ang imong paghigugma kaniya kay sa paghigugma ni Jesus kaniya.” San Maximiliano Kolbe
“Ang matag kaliwatan makabig pinaagi sa santos nga labing mosupak niini.” G.K. Chesterton
“Kon padad-an ka sa Dios ug daghang pag-antos, timailhan kini nga Siya adunay dagkong mga laraw alang kanimo, ug sa pagkatinuod buot Niyang himoon kang santos.” San Ignacio de Loyola
“Ang among mga kasingkasing gibuhat alang Kanimo, O Ginoo, ug dili kini mahimutang hangtod nga makapahulay kini diha Kanimo.” San Agustin sa Hipona
“Jesus, tabangi ako sa pagpasimple sa akong kinabuhi pinaagi sa pagkat-on kon unsang matang sa tawo ang buot nimo nga mahimo ako – ug sa pagkahimong maong tawo.” Santa Teresita sa Lisieux
“Ang tawo nga anaa kaniya ang Dios walay nakulang: ang Dios lamang igo na.” Santa Teresa sa Ávila
“Ipakatap ang gugma bisan asa ka moadto. Ayaw gayod tugoti nga adunay moduol kanimo nga mobiya nga dili mas malipayon.” Santa Madre Teresa sa Calcutta
“Ang kinabuhi uban kang Kristo usa ka kahibulongang panimpalad.” San Juan Pablo II
“Ayaw kahadlok, kay ania Ako uban kanimo; ayaw kaluya; Ako ang imong Dios. Lig-onon Ko ikaw, ug tabangan Ko ikaw, ug sapnayon Ko ikaw sa akong tuong kamot sa hustisya.” Isaias 41:10
“Ang kaugmaon nagsugod karon, dili ugma.” San Juan Pablo nga Bantogan
“Ang Ginoo mahigugmaon sa tawo, ug dali nga mopasaylo, apan mahinay nga mosilot. Busa walay tawo nga angay mawad-an ug paglaom sa iyang kaugalingong kaluwasan.” San Cirilo sa Jerusalem
“Dili ka gayod magmalipayon kon ang imong kalipay nagsalig lamang sa pagbaton sa imong gusto. Usba ang imong gipuntingan. Pangita ug bag-ong sentro. Tinguhaa ang kabubut-on sa Dios, ug walay tawo nga makakuha sa imong kalipay gikan kanimo.” Venerable Fulton Sheen
“Mahimo kang tawo nga gilaraw sa Dios nga mahimo ka, ug imong padilaabon ang kalibotan!” Santa Catalina sa Siena
“Ang usa lamang ka buhat sa putli nga gugma mas makapahimuot kanako kay sa usa ka libo nga dili hingpit nga mga pag-ampo.” Jesus (Sumala kang Santa Faustina)
“Bisan pa ug usa ka kasundalohan ang magkampo batok kanako, ang akong kasingkasing dili mahadlok; Bisan pa ug gubat ang ipahamtang batok kanako, bisan niana mosalig gihapon ako.” Salmo 27:3
“Ang tinuod nga gugma anaa sa pagbuhat ug maayo ngadto sa mga nagbuhat ug daotan kanato, ug sa ingon makabig nato sila.” San Alfonso de Ligorio
“Ang pagtuo sama sa masanag nga silaw sa adlaw. Pinaagi niini makita nato ang Dios diha sa tanang butang ingon man ang tanang butang diha sa Dios.” San Francisco de Sales
“Ang Espiritu Santo naggiya kanato sama sa usa ka inahan. Gigunitan Niya sa kamot ang Iyang anak aron giyahan…sama sa tawo nga makakita nga naggiya sa usa ka buta.” San Juan Vianney
“Dili ako makahimo ug dagkong mga butang, apan buot kong buhaton ang tanan, bisan ang labing gagmayng mga butang, alang sa labaw nga himaya sa Dios.” San Domingo Savio
“Kon dili ka makapakaon ug usa ka gatos ka tawo, pakan-a bisan usa lamang.” Santa Madre Teresa sa Calcutta
“Amahan, nangita ako: nagduhaduha ako ug walay kasigurohan, apan palihog, O Dios, bantayi ang matag lakang ko ug giyahi ako.” San Agustin sa Hipona
“Gihigugma Ko Ikaw, O akong Dios, ug ang bugtong tinguha ko mao ang paghigugma Kanimo hangtod sa kataposang gininhawa sa akong kinabuhi. Gihigugma ko Ikaw, O akong Dios nga takos higugmaon sa walay kinutoban, ug mas pilion ko pa ang mamatay nga nahigugma Kanimo kay sa mabuhi nga walay paghigugma Kanimo. Gihigugma ko Ikaw, Ginoo, ug ang bugtong grasya nga akong gipangayo mao ang paghigugma Kanimo hangtod sa kahangturan…Akong Dios, kon ang akong dila dili makasulti sa matag gutlo nga gihigugma ko Ikaw, buot ko nga ang akong kasingkasing magsubli niini Kanimo sa matag pagginhawa ko.” San Juan Vianney
“Kinahanglan natong higugmaon ang Dios tungod Kaniya mismo, sa duha ka hinungdan; walay mas makataronganon, ug walay mas mapuslanon.” San Bernardo sa Clairvaux
“Kon ikaw mao ang tawo nga angay nimong mahimo, imong padilaabon ang tibuok kalibotan!” Santa Catalina sa Siena
“Aron makabig ang usa ka tawo, adtoa siya, kupti sa kamot ug giyahi siya.” San Tomas de Aquino
“Kon mapainubsanon ka, walay makaapekto kanimo, bisan ang pagdayeg o ang kaulawan, kay nahibalo ka kon unsa ka.” Santa Madre Teresa sa Calcutta
“Ayaw hatagi og hilabihang bili ang maayong mga paghukom sa mga tawo bahin kanimo, kay gihigugma Ko ikaw sa hingpit nga gugma. Gigahin Ko ang Akong kinabuhi dinhi sa yuta diha sa mga pagpaubos ug pagbiaybiay ug sa usa ka tinagong kinabuhi. Sa ingon niini gihimaya Ko ang Akong Amahan, gipahimutang ang mga patukoranan sa Akong Simbahan, ug gitambalan ang mga kadaotan sa garbo. Mao kini ang dalan nga kinahanglan mong subayon.” Ang Atong Ginoo ngadto kang Beata Maria Celeste Crostarosa
Mga Kinutlo bahin sa Pag-antos:
“Gusto kong mag-antos ug bisan magmaya tungod sa gugma, kay mao kini ang akong paagi sa pagsabwag og mga bulak. Walay bulak nga akong makaplagan nga dili nako isabwag ang mga gihay niini alang kanimo; ug sa tibuok panahon mag-awit ako; oo, kanunayng mag-awit, bisan sa pagpanguha og mga rosas taliwala sa mga tunok; ug kon mas taas ug mas hait ang mga tunok, mas matam-is ang akong awit!” Santa Teresita sa Lisieux
“Dili angay hunahunaon nga ang usa ka tawo nga nag-antos wala mag-ampo. Iyang gihalad ngadto sa Dios ang iyang mga pag-antos, ug sa daghang higayon daghan kaayo siyag pag-ampo, nga mas tinuod pa kay sa usa nga mopahilayo aron mag-inusara ug mamalandong pag-ayo, ug, kon makapuga siyag pipila ka luha, maghunahuna nga mao na kana ang pag-ampo.” Santa Teresa sa Ávila
“Kon mosibog ako sa pag-antos, badlongon ako ni Jesus ug sultihan nga wala Siya magdumili sa pag-antos. Unya moingon ako, ‘Jesus, ang Imong kabubut-on ug dili ang akoa’. Sa kataposan nakombinsir ako nga ang Dios lamang ang makahimo kanakong malipayon, ug diha Kaniya gibutang ko ang tanan kong paglaom…” Santa Gemma Galgani
“Kadtong nag-ampo ug nag-antos, nga nagtugyan sa uban sa pagbuhat, dili modan-ag dinhi sa yuta; apan pagkamasanagon sa purongpurong nga ilang isul-ob sa gingharian sa kinabuhi! Bulahan ang ‘apostolado sa pag-antos’!” San Josemaría Escrivá
Wala ako mahibalo kon unsay mahitabo kanako; usa lamang ka butang ang akong nahibaloan nga sigurado, nga ang Ginoo dili gayod mapakyas sa pagtuman sa Iyang mga saad. “Ayaw kahadlok, paantuson Ko ikaw, apan hatagan Ko usab ikaw og kusog sa pag-antos,” kanunayng giingon ni Jesus kanako. “Gusto Ko nga ang imong kalag maputli ug masulayan pinaagi sa usa ka adlaw-adlaw nga tinagong pagkamartir”. . .“Kapila na kaha,” miingon si Jesus kanako bag-o pa lamang, “nga gibiyaan mo Ako, anak Ko, kon wala Ko ikaw ilansang sa krus.” San Padre Pio sa Pietrelcina
“Ang usa ka krus nga gipas-an sa yanong paagi, ug walay maong pagbalikbalik sa paghigugma sa kaugalingon nga mopadako sa mga kalisdanan, dili na usa ka krus. Ang malinawong pag-antos dili na pag-antos. Moreklamo kita sa pag-antos! Mas dako unta ang atong katarongan sa pagreklamo kon wala kita mag-antos, kay walay laing makahimo kanatong mas mahisama sa Atong Ginoo kay sa pagpas-an sa Iyang Krus. O, pagkatahom sa panaghiusa sa kalag uban sa Atong Ginoong Jesucristo pinaagi sa gugma ug sa gahom sa Iyang Krus!” San Juan Vianney
“Ang mga pagsulay ug kalisdanan naghatag kanato og kahigayonan sa pagbayad-sala alang sa atong nangaging mga kasaypanan ug mga sala. Sa maong mga higayon ang Ginoo moduol kanato sama sa usa ka mananambal aron ayohon ang mga samad nga gibilin sa atong mga sala. Ang kalisdanan mao ang langitnong tambal.” San Agustin sa Hippo
“Nalambigit sa umaabot nga Gingharian sa Dios ang paglaom nianang himaya nga nagsugod diha sa Krus ni Cristo. Ang Pagkabanhaw nagpadayag niini nga himaya — eskatolohikal nga himaya. … Kadtong nakig-ambit sa mga pag-antos ni Cristo gitawag usab, pinaagi sa ilang kaugalingong mga pag-antos, sa pagpakig-ambit sa himaya” San Juan Pablo II, Salvifici Doloris
Mga Kinutlo alang sa Kwaresma:
“Ingon nga ang Kuwaresma mao ang panahon alang sa mas dakong gugma, paminawa ang kauhaw ni Jesus…’Paghinulsol ug tumoo’ ang giingon ni Jesus kanato. Unsay angay natong hinulsolan? Ang atong pagkawalay pagtagad, ang katig-a sa atong kasingkasing. Unsay angay natong tuohan? Giuhaw si Jesus bisan karon, diha sa imong kasingkasing ug diha sa mga kabos — Nasayod Siya sa imong kahuyang. Ang imong gugma lamang ang Iyang gusto, ang kahigayonan lamang sa paghigugma kanimo ang Iyang gusto.” Santa Madre Teresa sa Calcutta
“Ang pamatuod sa gugma anaa sa mga buhat. Kon diin anaa ang gugma, nagbuhat kini og dagkong mga butang. Apan kon mohunong kini sa pagbuhat, mohunong usab kini sa pagkaanaa.” Papa San Gregorio nga Bantogan
“Ang Kuwaresma nag-awhag kanato nga pasudlon ang Pulong sa Dios sa atong kinabuhi ug sa ingon niini mahibaloan ang sukaranang kamatuoran: kinsa kita, diin kita gikan, asa kita kinahanglang moadto, unsang dalan ang kinahanglan natong subayon sa kinabuhi…” Papa Benedicto XVI
“Walay bisan unsa, bisan unsa pa kini kagamay, nga kon giantos tungod sa Dios, molabay nga walay merito sa panan-aw sa Dios.” Thomas à Kempis
“Isalikway ang imong kaugalingon aron mosunod kang Cristo; disiplinaha ang imong lawas; ayaw patuyangi ang imong kaugalingon, hinunoa higugmaa ang pagpuasa.” San Benito sa Nursia
“Bisan kinsa nga buot mahimong akong sumusunod kinahanglan magdumili sa iyang kaugalingon, magpas-an sa iyang krus matag adlaw, ug mosunod sa akong mga lakang.” Lucas 9:23
“Dili gayod angayng magsugod ang usa ka tawo og bisan unsa nga dili niya matuhop sa pag-ampo.” Wala mailhi
“Ang Kuwaresma sama sa usa ka taas nga ‘espirituhanong pag-inusara’ diin makabalik kita sa atong kinasuloran ug makapaminaw sa tingog sa Dios, aron mapildi ang mga panulay sa Daotan. Usa kini ka panahon sa espirituhanong ‘pakigbisog’ nga kinahanglan natong masinati uban ni Jesus, dili uban sa garbo ug mapangahason nga pagsalig sa kaugalingon, kondili pinaagi sa paggamit sa mga hinagiban sa pagtuo: pag-ampo, pagpaminaw sa pulong sa Dios ug penitensiya. Niining paagiha makahimo kita sa pagsaulog sa Pasko sa Pagkabanhaw diha sa kamatuoran, nga andam sa pagbag-o sa mga saad sa atong Bunyag.” Papa Benedicto XVI
Mga Kinutlo bahin sa Pagpuasa:
“Ang pagpuasa naghinlo sa kalag, nagpataas sa hunahuna, nagpasakop sa unod ngadto sa espiritu, naghimo sa kasingkasing nga mahinulsulon ug mapaubsanon, nagpatibulaag sa mga panganod sa daotang pangibog, nagpalong sa kalayo sa kaulag, ug nagpasiga sa tinuod nga kahayag sa kaputli. Balik pag-usab sa imong kinasuloran.” San Agustin sa Hippo
“Panalangini kadtong nagtunglo kaninyo, ug pag-ampo alang sa inyong mga kaaway, ug pagpuasa alang niadtong naglutos kaninyo.” Didache
“Sa dihang ang usa ka tawo magsugod sa pagpuasa, dihadiha mangandoy siya diha sa iyang hunahuna sa pagpakigsulti sa Dios.” San Isaac nga Siryano
“Ang pagpuasa mao ang kalag sa pag-ampo, ug ang kalooy mao ang dugong naghatag ug kinabuhi sa pagpuasa. Busa kon mag-ampo ka, pagpuasa; kon magpuasa ka, pagpakita ug kalooy; kon gusto nimong dunggon ang imong pangamuyo, dungga ang pangamuyo sa uban. Kon dili nimo sirad-an ang imong dalunggan ngadto sa uban, ablihan nimo ang dalunggan sa Dios alang kanimo.” San Pedro Crisologo
“Kon busog ang tiyan, sayon ra ang pagsulti bahin sa pagpuasa.” San Jeronimo
“Nagpuasa ka ba? Hatagi ako ug pamatuod niini pinaagi sa imong mga buhat. Kon makakita ka ug tawong kabos, kaloy-i siya. Kon makakita ka ug higala nga gipasidunggan, ayaw siya kasinahi. Ayaw itugot nga ang imong baba lamang ang magpuasa, kondili usab ang mata, ang dalunggan, ang mga tiil, ang mga kamot, ug ang tanang bahin sa atong mga lawas.” San Juan Crisostomo
“Kinahanglan kitang magpuasa sa tibuok natong kasingkasing, sa ato pa, sa kinabubut-on, sa bug-os nga kasingkasing, sa tanang bahin ug sa hingpit.” San Francisco de Sales
“Gitago sa Dios ang ganti sa walay kataposang himaya diha sa atong mga pagsalikway sa kaugalingon ug sa pagbuntog sa atong kaugalingon, nga kanunay natong gipaningkamotan uban sa dakong kalumo.” Santa Juana Francisca de Chantal
“Ang Kasulatan puno sa mga tudling nga nagpamatuod nga ang pagpuasa dili imbensiyon sa tawo kondili gitukod sa Dios, ug nga kini adunay daghang kaayohan, dili usa lamang. Ug nga ang pagpuasa sa usa ka tawo mahimong makahatag ug kaayohan sa lain, ang atong Manluluwas mismo nagpakita niini sa Iyang pag-ingon nga ang pipila ka matang sa mga yawa dili maabog gikan sa usa ka tawo pinaagi sa lain nga tawo ‘kon walay pag-ampo ug pagpuasa.’ Busa nahibulong ako nga ilang gisupak sa ingon niining paagiha ang pagpuasa ug ang ubang pagpenitensiya sa lawas.” San Tomas Moro
“Ang pagpuasa suod kaayong nalambigit sa pag-ampo. Kay ang hunahuna sa usa nga napuno sa pagkaon ug ilimnon nabug-atan pag-ayo nga dili na kini makapataas sa kaugalingon ngadto sa pagpamalandong sa Dios, ni gani makasabot kon unsay kahulogan sa pag-ampo.” Katesismo sa Konsilyo sa Trento
“Ang kataposang tumong sa pagpuasa mao ang pagtabang sa matag usa kanato sa paghalad sa kaugalingon sa hingpit ngadto sa Dios.” Papa Benedicto XVI
