Sa dihang ang usa ka kalag bug-os nang midawat sa hiyas sa pagkamapainubsanon ug dayon midawat sa kinabuhi sa masaligon nga pagtugyan sa Dios, maablihan ang mga ganghaan sa kalooy. Kini nga kapitulo mamalandong niining kasinatian sa kalooy gikan sa upat ka panglantaw. Una, ang kalooy sa Dios nga personal nga mibaha niining mapainubsanon ug masaligon nga kalag moabot aron makalingkawas sa kalag gikan sa sala. Ikaduha, sa dihang nakalingkawas na gikan sa sala, ang kalag makasinati diha sa iyang kinasuloran og mas mahimayaon pa nga grasya sa kagawasan ug bag-ong kinabuhi diha sa Dios. Ikatulo, ang walay kinutobang kinaiya sa kalooy dili masulod lamang sa kasingkasing niining tawhana, busa ang kalooy magsugod sa pag-awas gikan kaniya ngadto sa kinabuhi sa uban pinaagi sa mga buhat sa pagpasaylo ug pagpasig-uli. Ikaupat, sa dihang ang mapainubsanon, masaligon ug maloloy-ong kalag motanyag sa kalooy sa pagpasaylo ug dawaton kini sa laing tawo, maporma ang usa ka espirituhanong bugkos sa tinuod nga panaghigalaay diha kang Cristo. Ang gugma nga andam mosakripisyo dayon mohatag og kinabuhi nianang bugkosa, nga mamunga og dili masukod nga maayong bunga.
Ang kaluoy gituyo nga dawaton gikan sa Dios ug ihatag ngadto sa uban sa walay kinutoban. Ang atong relasyon sa Dios ug ang pagdawat sa Iyang kaluoy kinahanglang mahimong pundasyon sa atong kinabuhi. Samtang motubo kita sa gugma sa Dios, ang pagkabalaan nga atong masinati mahimong giya ug tinubdan sa atong pagpakigrelasyon sa usag usa. Ang matag tawo nga ibutang sa Dios sa atong kinabuhi makasinati sa kaluoy sa Dios pinaagi kanato sa paagi nga pilion sa Dios. Samtang magpabilin kitang bukas ngadto Kaniya, gamiton kita Niya aron maporma ang balaang mga bugkos sa gugma uban sa tanan nga andam modawat nianang gugma.
Kaluoy alang sa Sala โ Pagpasaylo o Pagkondenar
Sayon hunahunaon nga ang kaluoy ug ang hustisya nagkasumpaki. Apan dili kini tinuod. Ang hustisya mao ang resulta sa usa sa duha ka matang sa kaluoy: ang kaluoy sa pagpasaylo o ang kaluoy sa pagkondenar. Ang kaluoy nga ihatag ngadto sa usa ka makasasala bug-os nga nag-agad sa kinaiya sa kasingkasing nianang makasasalaha. Kadtong sinsero nga nagbasol ug mahinulsolon gitanyagan og pagpasaylo. Kadtong nagpabiling gahi og ulo ug nagdumili sa pag-ila sa ilang sala makadawat og pagkondenar. Ang pagpasaylo ug ang pagkondenar parehong mga buhat sa kaluoy sa Dios. Ang pagkondenar nagtuman sa hustisya sa Dios pinaagi sa pagpahinabo sa mga sangpotanan sa sala aron tawgon ang makasasala ngadto sa paghinulsol. Ang pagpasaylo nagtuman sa hustisya sa Dios pinaagi sa pagdawat sa sinserong pagbasol sa makasasala ug nagwagtang sa sala. Ang pagkondenar nagbilin sa usa ka tawo nga ginapos ug gibug-atan sa sala. Ang pagpasaylo nagbilin sa usa ka tawo nga gawasnon gikan nianang mga gaposa.
Ang labing maayong paagi aron masabtan kining duha ka matang sa kaluoy mao ang pagtan-aw sa Dios ug sa Iyang gugma alang kanato sumala sa gipadayag niini diha sa Balaang Kasulatan. Ania ang duha ka teksto sa Balaang Kasulatan nga angay gahinan og panahon aron masabtan ang kaluoy sa Dios nga moabot sa dagway sa pagpasaylo pagkondenar
Pagpasaylo sa Babayeng Nanapaw:
Unya gidala sa mga eskriba ug sa mga Pariseo ang usa ka babaye nga nasakpan nga nanapaw ug gipatindog siya sa taliwala. Miingon sila kaniya, โMagtutudlo, kining babayhana nasakpan gayod sa akto sa pagpanapaw. Karon, sa balaod, gisugo kami ni Moises sa pagbato sa maong mga babaye. Busa unsa may imong ikasulti?โ Gisulti nila kini aron sulayan siya, aron aduna silay ikasumbong batok kaniya. Miyukbo si Jesus ug misugod sa pagsulat sa yuta pinaagi sa iyang tudlo. Apan sa dihang nagpadayon sila sa pagpangutana kaniya, mitul-id siya ug miingon kanila, โAng usa kaninyo nga walay sala maoy unang mobato kaniya.โ Miyukbo siya pag-usab ug misulat sa yuta. Ug sa ilang pagkadungog niini, tagsa-tagsa silang mibiya, sugod sa mga tigulang. Busa nahibilin siyang nag-inusara uban sa babaye nga anaa sa iyang atubangan. Unya mitul-id si Jesus ug miingon kaniya, โBabaye, hain na man sila? Wala bay bisan usa nga mikondenar kanimo?โ Mitubag siya, โWala, ginoo.โ Unya miingon si Jesus, โDili usab ako mokondenar kanimo. Lakaw, [ug] sukad karon ayaw na pagpakasala.โ John 8:3-11
Ang babaye niining sugilana nagkinahanglan og pagpasaylo. Nasakpan siya sa akto gayod sa pagpanapaw ug nakasala og bug-at nga sala. Ang silot nga gilatid sa balaod alang sa iyang sala mao ang kamatayon. Apan imbis nga mokondenar, gipili ni Jesus ang pagpasaylo. Ug nianang buhata sa pagpasaylo, hingpit Niyang gituman ang hustisya pinaagi niining matang sa kaluoy.
Niining sugilana, wala hatagi ni Jesus og pasangil ang sala niining babayhana o isipa ang iyang pagpanapaw nga โdili dakong butang.โ Hinuon, sa Iyang pag-ingon ngadto kaniya, โDili usab ako mokondenar kanimoโ ug โLakaw, ug sukad karon ayaw na pagpakasala,โ giila ni Jesus ang iyang sala ug ang Iyang katungod sa pagkondenar kaniya. Busa, ang tinuod nga kaluoy nagkinahanglan nga matinud-anong ilhon ang mga sala sa usa ka tawo ug tin-aw nga makita ang mga sangpotanan niadtong mga sala.
Usa ka bahin niining sugilana, nga wala hisgoti sa dayag, mao nga nasayod si Jesus sa kasingkasing niining babayhana. Nasayod Siya nga nahibalo siya sa iyang sala ug nasayod Siya nga nagbasol siya niini. Napaubos siya ug gidawat niya kini nga pagkamapainubsanon. Kining mapainubsanong pag-ila ug pagkaamgo sa iyang sala mao ang nakapahimo kang Jesus sa pagtanyag og pagpasaylo imbis nga pagkondenar. Gidawat niya kadtong kaluoy uban ang pagsalig. Kon aduna pa siyay kinaiya nga nagpakamatarong sa kaugalingon nga tungod niini midumili siya sa pag-ila sa iyang pagkasad-an, ang kaluoy ni Jesus unta mipadayag sa dagway sa pagkondenar.
Pagkondenar sa mga Eskriba ug mga Pariseo:
Bisan kinsa nga magpataas sa iyang kaugalingon ipaubos; apan bisan kinsa nga magpaubos sa iyang kaugalingon ipataas.
โAlaut kamo, mga eskriba ug mga Pariseo, mga salingkapaw! Inyong gisirhan ang gingharian sa langit atubangan sa mga tawo. Kamo mismo dili mosulod, ug dili usab ninyo tugotan nga makasulod kadtong naningkamot sa pagsulod.
โAlaut kamo, mga eskriba ug mga Pariseo, mga salingkapaw! Molatas kamo sa dagat ug sa yuta aron makabig ang usa ka tawo, ug sa dihang makabig na siya, himoon ninyo siyang anak sa Gehenna nga labaw pa kaninyo sa makaduha.
โAlaut kamong mga butang giya, nga nagaingon, โKon ang usa manumpa pinaagi sa templo, walay bili ang iyang panumpa, apan kon manumpa siya pinaagi sa bulawan sa templo, obligado siya sa pagtuman niini.โ Mga butang buang, hain man ang labaw, ang bulawan, o ang templo nga nagbalaan sa bulawan? Ug nagaingon kamo, โKon ang usa manumpa pinaagi sa halaran, walay bili ang iyang panumpa, apan kon manumpa siya pinaagi sa gasa nga anaa sa halaran, obligado siya sa pagtuman niini.โ Mga buta, hain man ang labaw, ang gasa, o ang halaran nga nagbalaan sa gasa? Ang manumpa pinaagi sa halaran nanumpa pinaagi niini ug sa tanan nga anaa niini; ang manumpa pinaagi sa templo nanumpa pinaagi niini ug kaniya nga nagpuyo niini; ang manumpa pinaagi sa langit nanumpa pinaagi sa trono sa Dios ug kaniya nga naglingkod niini.
โAlaut kamong mga magtutudlo sa Balaod ug mga Pariseo, mga salingkapaw. Nagahatag kamo sa ikapulo sa yerbabuyna, anet ug kumino, apan gipasagdan ninyo ang mas mahinungdanong mga butang sa Balaod: paghukom ug kalooy ug pagkamatinumanon. [Apan] kini ang angay ninyong buhaton, nga dili usab pasagdan ang uban. Mga butang giya, nga nagaayag sa lamok apan nagatulon sa kamelyo!
โAlaut kamong mga magtutudlo sa Balaod ug mga Pariseo, mga salingkapaw. Gihinloan ninyo ang gawas sa kopa ug pinggan, apan sa sulod puno kini sa pagpangawat ug pagpatuyang sa kaugalingon. Butang Pariseo, hinloi una ang sulod sa kopa, aron mahinlo usab ang gawas niini.
โAlaut kamong mga magtutudlo sa Balaod ug mga Pariseo, mga salingkapaw. Sama kamo sa mga lubnganan nga gipaputi sa apog, nga maanindot tan-awon sa gawas, apan sa sulod puno sa mga bukog sa mga patay ug sa tanang matang sa kahugawan. Sa samang paagi, sa gawas daw matarong kamo, apan sa sulod puno kamo sa pagkasalingkapaw ug pagbuhat ug daotan.
โAlaut kamong mga magtutudlo sa Balaod ug mga Pariseo, mga salingkapaw. Nagatukod kamo sa mga lubnganan sa mga propeta ug nagadayandayan sa mga handomanan sa mga matarong, ug nagaingon kamo, โKon nabuhi pa kami sa panahon sa among mga katigulangan, dili unta kami makig-uban kanila sa pagpaagas sa dugo sa mga propeta.โ Sa ingon nagapamatuod kamo batok sa inyong kaugalingon nga kamo mga anak niadtong mipatay sa mga propeta; karon pun-a ninyo ang taksanan nga gisugdan sa inyong mga katigulangan! Mga bitin, kaliwat sa mga malalang bitin, unsaon ninyo pag-ikyas sa hukom sa Gehenna? Busa, tan-awa, nagapadala Ako kaninyo ug mga propeta ug mga maalamong tawo ug mga magtutudlo sa Balaod; ang uban kanila inyong patyon ug ilansang sa krus, ang uban inyong latigohon sa inyong mga sinagoga ug gukdon gikan sa usa ka lungsod ngadto sa lain, aron maangkon ninyo ang tulubagon sa tanang dugo sa mga matarong nga giula sa yuta, gikan sa dugo sa matarong nga si Abel hangtod sa dugo ni Zacarias, anak ni Baraquias, nga inyong gipatay taliwala sa sangtuwaryo ug sa halaran. Amen, nagaingon Ako kaninyo, kining tanan moabot niining kaliwatana.โ Mateo 23:12-36
Kining sunodsunod nga mga pulong sa pagkondenar gikutlo sa kinatibuk-an aron ipakita ang tin-aw, gamhanan ug molapos sa kasingkasing nga pagkondenar nga gipahayag ni Jesus ngadto sa mga magtutudlo sa Balaod ug mga Pariseo. Miingon si Jesus, โAlaut kamoโฆโ sa pito ka sunodsunod nga higayon, nga nagpakita nga ang Iyang pagbadlong usa ka hingpit nga pagkondenar. Ang pangutana dinhi mao kini: Nagpakita ba kini ug kakulang sa kalooy ni Jesus, diin gipili Niya ang hustisya kay sa kalooy?
Sumala sa gipasabot sa ibabaw, ang hustisya ug kalooy wala magkasumpaki. Ang hustisya ug kalooy nagtinabangay. Ang paagi sa paghatag sa kalooy ug sa pagtuman sa hustisya nag-agad sa kasingkasing sa modawat. Niining teksto, ang hustisya ni Jesus natuman pinaagi sa pagkahingpit sa pagkondenar. Ang pagkapinal ug kabug-at sa mga pulong nga gisulti ni Jesus nagpadayag nga ang mga kasingkasing sa mga magtutudlo sa Balaod ug mga Pariseo bug-os nga nagmagahi. Kulang sila sa pagkamapainubsanon ug, busa, dili sila makadangop kang Jesus uban sa pagsalig. Wala gayod sila bisan gamayng pagkaandam sa pag-ila sa ilang mga sala ug paghinulsol niini. Busa, talagsaong puno sa kalooy ang gibuhat ni Jesus sa pagpahayag niining gamhanang pagkondenar. Puno kini sa kalooy tungod kay ang Iyang pito ka pilo nga pagkondenar nagtumong sa pagkabig sa ilang mga kasingkasing pinaagi sa pagpadayag kanila sa ilang mga sala. Ang paglaom ni Jesus mao unta nga, sa ilang pagkadungog niining pagkondenar, maminaw sila, magpaubos, maghinulsol ug mangayo ug pasaylo. Makasiguro kita nga kon bisan usa kanila naghinulsol human niining pagbadlong, itanyag unta kaniya ang pasaylo. Apan kon nagpadayon sila sa pagmagahi sa ilang mga sala, nan ang hustisya sa Dios matuman unta pinaagi sa hukom nga ilang nadawat gikan niining hingpit nga pagkondenar.
Siyempre, kini nga libro naghunahuna nga ang pagkamapainubsanon ug pagsalig sa Dios mga butang nga imo nang gipaningkamotan ug, busa, wala ka magkinahanglan sa ingon niini nga buhat sa pagkondenar gikan sa atong Ginoo. Bisan pa niana, makatabang nga pahinumdoman ka niining matang sa kalooy nga gihatag sa Dios ngadto sa mga mapahitas-on ug magahi ug kasingkasing, aron mahinumdom ka sa padayong panginahanglan sa pagpaningkamot nga magmapainubsanon ug mosalig matag adlaw. Bisan ang matinumanong Kristohanon mahimong mahulog sa sala. Kon makasala ka, andam ka bang maghinulsol ug magpaubos sa imong kaugalingon atubangan sa Dios? Kon dili, masinati nimo ang samang pagkondenar nga gipahayag ni Jesus ngadto sa mga magtutudlo sa Balaod ug mga Pariseo. Ang epekto niining pagkondenar mao ang hilabihang pag-antos sa sulod sa pagkatawo sa dagway sa pagkaulipon sa sala ug sa mga epekto niini. Ug bug-at kana nga palas-anon. Bisan pa niana, kining pagkondenar usa ka buhat sa kalooy nga nagtumong sa pagkabig sa makasasala.
Usa ka Kalooy nga Labaw pa sa Pagpasaylo โ Kagawasan ug Bag-ong Kinabuhi diha kang Cristo
Bisan tuod ang kalooy una alang sa kapasayloan sa mga sala, wala kini matapos diha. Sa higayon nga ang pasaylo gitanyag ug gidawat sa imong kasingkasing, ang Dios nagdapit kanimo sa pag-ambit sa kagawasan ug himaya sa Iyang madagayaong kinabuhi. Kining ikaduhang ang-ang sa kalooy makita sa sugilanon sa Mausikong Anak.
Ang Mausikong Anak:
Sa dihang nahigmata siya sa kamatuoran, naghunahuna siya, โPila ka mga sinuholan sa akong amahan ang adunay labaw pa sa igo nga pagkaon, apan ania ako, himatyon sa kagutom. Motindog ako ug moadto sa akong amahan ug moingon kaniya, โAmahan, nakasala ako batok sa langit ug batok kanimo. Dili na ako takos nga tawgon nga imong anak; tagda ako sama sa usa sa imong mga sinuholan.โโ Busa mitindog siya ug mibalik sa iyang amahan. Samtang layo pa siya, nakita na siya sa iyang amahan, ug napuno kini sa kaluoy. Midagan siya paingon sa iyang anak, migakos ug mihalok kaniya. Miingon ang iyang anak kaniya, โAmahan, nakasala ako batok sa langit ug batok kanimo; dili na ako takos nga tawgon nga imong anak.โ Apan mimando ang iyang amahan sa iyang mga sulugoon, โDad-a dayon ang labing maayong kupo ug isul-ob kaniya; butangi og singsing ang iyang tudlo ug sandalyas ang iyang mga tiil. Kuhaa ang gipatambok nga nating baka ug ihawa kini. Unya magsaulog kita pinaagi sa usa ka kombira, kay kining akong anak namatay na, apan nabuhi pag-usab; nawala siya, apan nakaplagan na.โ Unya nagsugod ang pagsaulog. Lucas 15:18-24
Kini nga teksto nagpakita sa anak nga nahigmata sa kamatuoran human makasinati sa mga sangpotanan sa iyang gubot nga pagkinabuhi ug mihimog tinuyo nga pagpili sa pagpangayo og pasaylo sa iyang amahan. Usa sa mga nakadasig kaniya mao ang iyang makaluluoy nga kahimtang sa kinabuhi ug ang kakulang sa pagkaon. Nadasig usab siya sa pagkaamgo nga nakasala siya ug nga maluluy-on ang iyang amahan.
Bisan tuod dili hingpit ang iyang kasubo ug pagbasol sa sala, igo na kini aron madawat dayon niya ang gasa sa kapasayloan gikan sa iyang amahan. Apan kini nga teksto nagpadayag og labaw pa kay sa usa lamang ka buhat sa pagpasaylo. Ang amahan dili lamang nagpasaylo, kondili nagdapit usab sa iyang anak nga makig-ambit sa kadagaya sa iyang kalipay. Gihimo niya kini pinaagi sa pagsul-ob kaniya sa labing maayong kupo, pagbutang og singsing sa iyang tudlo, pag-ihaw sa gipatambok nga nating baka ug pagsaulog pinaagi sa usa ka dakong kombira. Ang anak miduol sa amahan nga naglaom lamang og kapasayloan ug igong ikasustento. Apan ang amahan wala makapugong sa iyang kalipay sa pagbalik sa anak ug madagayaong mibubo sa iyang kaluoy ngadto kaniya.
Mao usab kini alang kanato samtang atong masinati ang kalooy sa Dios. Kon magbasol kita, bisan kon dili hingpit ang atong pagbasol, ang Dios mopasaylo. Dali Siyang mopasaylo sa madagayaong paagi, bisan unsa pa ang atong sala. Sa atong bahin, mahimong lisod sabton kon unsa kasayon alang sa Dios ang pagpasaylo. Kasagaran ubos kaayo ang atong gilaoman sa Iyang pagpasaylo ug dili nato maamgohan nga mas dako pa gayod ang Iyang tinguha sa pagpasaylo kay sa atong tinguha nga mapasaylo. Tungod niana, mahimong lisod usab tugkaron nga ang Dios buot motanyag og labaw pa sa pagpasaylo. Buot usab Niyang dapiton kita sa pagsaulog sa Iyang mahimayaong kombira. Usa kini ka kombira diin atong madawat ang walay kinutobang mga gasa sa kagawasan, kalipay, kalinaw, pailob, kusog ug uban pa. Buot sa Dios nga ihatag kanato ang matag maayong gasa ug buot Niya kining ihatag sa madagayaong paagi. Sa atong bahin, kinahanglan lamang nga andam ug kinabubut-on natong dawaton ang tanan nga gawasnon Niyang pilion nga ihatag.
Usa sa unang mga kasinatian nga atong mabatonan sa dihang mapasaylo na ang atong sala mao ang kagawasan (pagkalingkawas). Kitang tanan adunay gawasnong kabubut-on, bisan kon magpabilin kita sa atong sala. Apan ang โkagawasanโ (pagkalingkawas) labaw pa gayod niini. Ang kagawasan mao ang sulodnong kasinatian diin maputol ang atong pagkagapos sa sala aron ang atong mga kasingkasing mahiusa na sa Dios ug sa Iyang balaang kabubut-on. Kini nga kasinatian sama sa pagkuha sa usa ka espirituhanong kabug-at gikan sa atong mga kalag.
Isip pagtandi, handurawa ang usa ka tawo nga anaa sa bilanggoan. Usa ka adlaw, usa ka maghuhukom nagpakitag kaluoy ug mihatag og hingpit nga pasaylo. Adunay kalipay sa pagkapasaylo apan adunay labaw pa nga kalipay sa pagkagawas gikan sa bilanggoan. Dugang pa, handurawa nga kining mao nga binilanggo, sa iyang paggawas, gihatagan og dagayang bahandi ug ang iyang kanhing kinabuhi gipahiuli kaniya sa napulo ka pilo. Ang bag-ong kinabuhi nga nasinati niining kanhing binilanggo labaw pa sa kapasayloan; sa dili madugay mahimo kining pagdiskobre ug paggamit sa kagawasan samtang sugdan na niya ang pagkinabuhi sa bag-ong kinabuhi nga gihatag kaniya.
Busa, ang โkombira sa kaluoyโ una sa tanan naglakip sa hingpit nga kagawasan gikan sa sala, gikan sa pagkasad-an, gikan sa kaulaw ug gikan sa tanang mga kadena sa sala. Apan gikan niana, ang kadagaya sa kalipay nga nagpaabot labaw pa sa atong masabtan. Kasagaran kaayo matintal kita sa pagkupot sa atong nangaging mga sala, bisan kon napasaylo na kita. Ang kagawasan nagpasabot nga atong maamgohan ug masinati ang kamatuoran nga dili kita masukod lamang pinaagi sa kinatibuk-an sa atong nangaging mga sayop. Aduna kitay kaugmaon. Ug kana nga kaugmaon usa ka mahimayaong pagpakig-ambit sa bag-ong kinabuhi nga giplano sa Dios alang kanato. Gipalingkawas kita gikan sa mga kadena sa sala ug gidapit kita sa pagkinabuhi sa usa ka bag-o ug mahimayaong kinabuhi diha kang Cristo.
Samtang masinati ang bag-ong kinabuhi, magsugod usab kitang makasinati sa mga Bunga sa Espiritu. Ingon sa gihisgotan sa miaging kapitulo, kining mga Bunga sa Espiritu makatabang kanato sa pag-ila sa kabubut-on sa Dios. Apan dili lamang kini mga timaan nga mogiya kanato kon unsa ang angay natong buhaton. Labaw pa kaayo kini niana. Ang mga Bunga sa Espiritu walay kinutoban ug padayong motubo sa atong kinabuhi samtang mas lawom kitang mosulod sa kaluoy sa Dios. Mahimo kining tawhanong kasinatian sa atong bag-ong kinabuhi diha kang Cristo. Sa naandan, naghisgot kita og napulog duha ka Bunga sa Espiritu Santo. Kini nga mga bunga mao ang mosunod:
Gugma: Usa ka katakos sa pagpakitag pag-atiman ug debosyon sa atong mga hunahuna ug mga buhat, uban sa samang gugma nga gihatag sa Dios ngadto sa tanan
Usa ka espirituhanong kasinatian nga mobayaw kanato, molig-on kanato, ug mohatag kanatog kalipay
Kalinaw: Ang presensya sa dakong kalma sa maayong mga panahon ug sa mga panahong puno sa hagit
Pailob: Usa ka katakos sa paglahutay sa bisan unsang moabot, uban sa kalinaw ug kalig-on ug walay kasuko o kapakyasan sa buot
Pagkamaluluy-on: Usa ka kinaiya sa paghatag og mahunahunaon ug makalipay nga mga pulong ug mga buhat
Pagkamaayo: Pagkatinuod sa hiyas ug kinaiya
Pagkamainantuson: Kalig-on kon ang mga krus sa kinabuhi bug-at ug dugayng molungtad
Pagkamalumo: Pagkamapinugnganon sa buot, kalinaw, pagkabalanse sa espiritu, ug pagkadili mapagarbohon
Pagkamatinumanon: ย Lig-on ug dili matarog nga pagtugyan sa kaugalingon ngadto sa Dios ug sa Iyang Gingharian
Pagkaligdong: Hiyas sa pagtan-aw sa kaugalingon sa matinud-anon ug putli nga paagi, ug sa pagtagad sa kaugalingong lawas uban sa pagtahod ug pagtahod sa pagkabalaan niini
Pagpugong sa Kaugalingon: Kalig-on sa pagbuntog sa kaugalingong mga pangibog ug tinguha ug sa pagsukol sa mga tentasyon
Kaputli: Lawom nga pagtahod sa kaugalingong seksuwalidad ingon man sa seksuwalidad sa uban
Paggahin ug panahon sa pagpamalandong uban sa pag-ampo niining mga panalangin gikan sa Dios.ย Ang pagsabot niini usa ka paagi sa pagsabot sa kasinatian sa bag-ong kinabuhi diha kang Kristo.ย Ang matag usa niining mga bunga nagpakita sa usa ka piho nga pagpadayag niining bag-ong kinabuhi.ย Nagtinguha ang Dios nga ihatag kining tanan ngadto sa mga mapaubsanon ug masaligon ug nakadawat sa hingpit nga kapasayloan sa ilang mga sala.ย Ingon nga imong gipamalandongan kining mga bunga sa miaging kapitulo isip mga timaan sa pag-ila sa kabubut-on sa Dios, pamalandongi kini karon isip mga panalangin nga gihatag kanimo aron malunod ka sa hilabihan kadagayang kinabuhi sa kalooy sa Dios.
Ang Hilabihan nga Kadagaya sa Kalooy โ Kalooy nga Moawas Ngadto sa mga Sala sa Uban
Ang kalooy kinahanglang moawas gikan sa imong kinabuhi ngadto sa kinabuhi sa uban.ย Ang pag-awas sa kalooy sa Dios gikan sa imong kinabuhi ngadto sa kinabuhi sa uban mahitabo sa samang paagi nga imong nadawat ang kalooy.ย Una, gitawag ka sa paghatag ug kalooy nga gitumong ngadto sa mga sala sa uban.ย Magsugod kita pag-usab pinaagi sa pagpamalandong sa usa ka tudling sa Balaang Kasulatan aron makita nato ang mga butang sa hustong panglantaw.
Sambingay sa Sulugoon nga Dili Mopasaylo
Unya miduol si Pedro ug nangutana kaniya, โGinoo, kon ang akong igsoon makasala batok kanako, kapila ko ba siya pasayloon? Hangtod ba sa pito ka higayon?โย Mitubag si Jesus, โSultihan ko ikaw, dili pito ka higayon kondili kapitoan ug pito ka higayon.ย Busa ang gingharian sa langit mahimong ikasama sa usa ka hari nga mihukom sa paghusay sa mga utang sa iyang mga sulugoon.ย Sa pagsugod niya sa paghusay, gidala ngadto kaniya ang usa ka tawo nga nakautang kaniya ug hilabihan kadakong kantidad.ย Kay wala man siyay ikabayad niini, gimando sa iyang agalon nga ibaligya siya, uban sa iyang asawa, iyang mga anak, ug sa tanan niyang kabtangan, aron ikabayad sa utang.ย Tungod niini, mihapa ang sulugoon sa iyang atubangan, miyukbo kaniya, ug miingon, โPalihog, pailobi ako, ug bayran ko ikaw sa tanan.โย Natandog sa kalooy ang agalon niadtong sulugoon, busa gibuhian niya siya ug gipasaylo ang iyang utang.ย Sa paggawas niadtong sulugoon, nakita niya ang usa sa iyang mga isigkasulugoon nga nakautang kaniya ug mas gamay kaayong kantidad.ย Iya kining gigunitan ug gisugdan sa pagtuok, nga nag-ingon, โBayri ang imong utang.โย Miluhod ang iyang isigkasulugoon ug nangamuyo kaniya, โPalihog, pailobi ako, ug bayran ko ikaw.โย Apan midumili siya. Hinuon, iyang gipapriso kini hangtod nga mabayran ang utang.ย Sa pagkakita sa iyang mga isigkasulugoon sa nahitabo, naguol sila pag-ayo, ug miadto sila sa ilang agalon ug gisugilon ang tibuok hitabo.ย Gipatawag siya sa iyang agalon ug giingnan, โDaotan ka nga sulugoon! Gipasaylo ko ang tibuok mong utang kay nangamuyo ka man kanako.ย Dili ba unta angay ka usab nga malooy sa imong isigkasulugoon, sama sa akong pagkalooy kanimo?โย Unya sa iyang kasuko gitugyan siya sa iyang agalon ngadto sa mga tigpaantos hangtod nga mabayran niya ang tibuok utang.ย Mao usab kini ang buhaton kaninyo sa Akong langitnong Amahan, gawas kon ang matag usa kaninyo mopasaylo sa iyang igsoon gikan sa iyang kasingkasing.โย Mateo 18:21-35
Kini nga sambingay nagbutang sa daghang butang sa hustong panglantaw.ย Dili lamang niini gipadayag nga ang Dios andam ug buot mopasaylo sa โhilabihan kadaghanโ nga sala sa imong kinabuhi, kondili gipadayag usab niini nga human niana kinahanglan kang mohatag sa samang kalawom nga kapasayloan ngadto sa uban.ย Ug kon dili nimo kini buhaton, mawala kanimo ang kapasayloan nga imong nadawat.
Ang kalooy, sa kinaiyahan gayod niini, mao nga kon madawat nimo kini gikan sa Dios, kinahanglan nimo kining ihatag sa uban sa samang sukod.ย Mahinungdanon nga masabtan nga kini gikinahanglan gayod sa mismong kinaiyahan sa kalooy.ย Sama ra nga kinahanglan nimong tan-awon ang imong kaugalingon isip usa ka imbudo sa kalooy.ย Dili kini ibubo sa Dios sa imong kinabuhi gawas kon andam kang moabli sa imong kasingkasing aron tugotan kini nga moagos pagawas.ย Ang bisan unsang pagsulay sa paghupot sa kalooy alang lamang sa imong kaugalingon, nga dili kini ihatag sa uban, maoy hinungdan sa diha-diha nga paghunong niining walay kinutobang gasa gikan sa Dios.
Dugang pa, mahinungdanon nga masabtan nga kon mas ablihan nimo ang imong kasingkasing aron ibubo ang kalooy sa uban, mas daghang kalooy usab ang ibubo sa Dios sa imong kinabuhi.ย Adunay direktang kalambigitan tali niini.ย Ang pagsabot niining kamatuorana angayng modasig kanimo nga magmainiton sa pagpakita ug kalooy sa labing dako nga sukod.
Ang unang lakang sa paghatag ug kalooy gitumong ngadto sa mga sala sa laing tawo.ย Sa usa ka pagsabot, anaa ka sa usa ka bulahan nga kahimtang kon adunay makasala batok kanimo.ย Dili kini nagpasabot nga ang ilang sala usa ka panalangin sa bisan unsang paagi.ย Hinunoa, bulahan ka sa pagsabot nga ang sala nga gibuhat sa laing tawo batok kanimo naghatag kanimo ug usa ka pagdapit sa pagpasaylo.ย Gipadayag niini ang gahom sa Dios kay makahimo man ang Dios sa pag-usab sa mga sala nga gibuhat sa laing tawo batok kanimo ngadto sa usa ka kahigayonan alang sa imong kaugalingong pagkabalaan ug sa ilang pagkakabig.ย Mahimo kang balaan samtang imong sundogon ug ambitan ang pagpasaylo nga gipakita sa Dios kanimo.ย Hinumdomi ang Bulahang Panultihon, โBulahan ang mga maluluy-on, kay sila kaloy-anโ (Mateo 5: 7).
Hinumdomi usab ang giingon sa sinugdanan niining kapituloha, nga madawat lamang nimo ang kapasayloan sa Dios kon nagbasol ka sa imong mga sala. Kon magpabilin kang gahig ulo sa imong mga sala, ipahamtang sa Dios ang Iyang pagkondenar aron matuman ang Iyang hustisya ug makabig ang imong kasingkasing. Kining mao rang prinsipyoha magamit usab sa paagi sa imong pagpakita og kalooy ngadto sa uban. Bisan tuod kinahanglan ka kanunayng mopasaylo, usahay makasugat ka og mga tawo nga magpabiling gahig ulo sa ilang sala batok kanimo. Kon mahitabo kini, ang kapasayloan nga imong itanyag kanila kinahanglan usab nga mahimong usa ka balaang pagbadlong nga puno sa gugma. Ang imong pagbadlong dili mahimong usa ka paghukom sa ilang mga kasingkasing, kay ang Dios lamang ang nasayod sa kasingkasing. Apan, kinahanglan kini nga pagbadlong sa mga buhat nga sa ilang kaugalingong kinaiya makasasala.
Ang labing dakong pagbadlong nga puno sa gugma nga imong mahatag sa uban mao ang pagpasaylo kanila. Pinaagi sa pagpasaylo, sa pagkatinuod imong gitumbok ang makasasalang buhat. Wala nimo kini hatagi og katarongan; gipasaylo nimo kini. Giila nimo nga ang usa ka piho nga buhat obhetibong sayop sa dihang moingon ka nga gipasaylo nimo kini. Ang uban modawat niini nga pagpasaylo ug mahitabo ang tinuod nga pagpasig-uli. Ang uban dili moangkon sa ilang sayop nga gibuhat ug, busa, ang imong buhat sa pagpasaylo mahimong tinubdan sa pagkondenar sa Dios. Apan kini kaluoy! Dili kini paghukom sa kasingkasing sa usa ka tawo, kondili paghukom sa iyang buhat. Sa pagkatinuod, kon walay ingon niini nga paghukom, dili mahimong itanyag ang pagpasaylo.
Sa labing maayong kahimtang, kon adunay makasala batok kanimo, mangayo siya og pasaylo. Niana nga kahimtang, mas sayon ang pagpasaylo ug ang hingpit nga pagpasig-uli. Apan, kon ang uban dili mangayo sa imong kapasayloan, ug magpabilin silang gahig ulo sa ilang sayop nga mga buhat, kinahanglan nimo silang โkondenahonโ pinaagi sa imong buhat sa pagpasaylo. Gikan niana, ang Dios na ang mopadayon ug motuman sa gusto Niyang tumanon.
kalooy sa pagkondenar nga gitawag ka sa paghatag ngadto sa uban adunay nagkalainlaing mga porma. Pananglitan, kon ginikanan ka, kanunay kang tawgon sa pagtul-id sa imong mga anak tungod sa gugma. Kinahanglan nimong hukman ang ilang mga buhat ug magmalig-on ka kanila kon ang ilang mga buhat supak sa balaod sa Dios. Kinahanglan usab nimong tul-iron ang imong kapikas, mga igsoon, mga higala ug uban pa sa tukmang paagi ug sa tukmang panahon. Apan, ang pagtul-id kanunayng magsugod sa usa ka buhat sa pagpasaylo sulod sa imong kasingkasing ug magtumong lamang sa buhat mismo.
Unsa man kon adunay magpabiling gahig ulo sa iyang sala batok kanimo? Unsaon nimo pagtubag? Ang mosunod nga mga teksto sa Balaang Kasulatan maayong mga giya:
โKon ang imong igsoon makasala [batok kanimo], adtoa siya ug sultihi sa iyang sayop nga kamong duha lamang. Kon maminaw siya kanimo, nabawi nimo ang imong igsoon. Kon dili siya maminaw, pagdala og usa o duha pa ka tawo, aron โang matag kamatuoran mapamatud-an pinaagi sa pagpamatuod sa duha o tulo ka mga saksi.โ Kon dili siya maminaw kanila, isulti kini sa simbahan. Kon dili gihapon siya maminaw bisan sa simbahan, tagda siya sama sa imong pagtagad sa usa ka Hentil o usa ka maniningil og buhis.โ Mateo 18:15-17
โBisan kinsa nga dili modawat kaninyo o maminaw sa inyong mga pulongโgawas kamo nianang balaya o lungsora ug itaktak ang abog gikan sa inyong mga tiil.โ Mateo 10:14
Kon moadto ka sa usa ka tawo aron sultihan siya sa iyang sala, kinahanglan mag-amping ka aron husto nimong masabtan ang mga pulong ni Jesus. Ang katungdanan sa โinigsoong pagtul-idโ dili pagtugot kanimo sa paghukom sa kasingkasing sa uban. Hinunoa, mahinungdanon nga ang mga buhat mismo lamang sa mga tawo nga gitawag ka sa pagtul-id maoy imong tan-awon, ug dili ka magpakaaron-ingnon nga nahibalo ka sa ilang mga tuyo. Dako kaayo ang kalainan tali niining duha ka paagi.
Ang paghukom sa mga buhat nagpasabot lamang nga imong pamalandongan ang imong makita sa gawas, ug atubangon kini uban sa gugma kon ang buhat makita nga supak sa balaod sa Dios ug nagpahinabo og usa ka matang sa panagbangi. Pananglitan, kon adunay mosulti og bastos ug mapanawayong mga pulong mahitungod sa uban, dili kinahanglan nga mahibalo ka sa iyang kasingkasing aron mahibaloan nga kadtong mga pulonga dili angay. Busa, ang imong inigsoong pagtul-id dili mahimong usa ka paghukom nga kini nga tawo usa ka makasasala; hinuon, kini usa ka paghukom nga ang mga pulong nga gisulti dili uyon sa balaod sa Dios. Bisan tuod dili dayon mamatikdan kini nga kalainan, mahinungdanon kini alang sa usa ka matinud-anong pagtul-id sa uban.
Sa mas piho nga pananglitan, ingnon ta nga ang usa ka higala mosulti og daghang mapintas ug dili angay nga mga pulong mahitungod sa usa ka kauban sa trabaho. Unsaon nimo pagtubag? Kinahanglan nimong timan-an kining mapintas nga mga pulong ug hisgotan kini uban sa imong higala. Mahimo nimo siyang pangutan-on og dugang mahitungod sa iyang kasagmuyo ug paningkamotan nga mas masabtan siya. Samtang ginabuhat nimo kini, kon mas klarong ipakita sa imong higala nga napuno siya sa kasuko ug dili makapasaylo, nan aduna kay kahigayonan sa malumong pagsulti mahitungod sa panginahanglan sa pagpasaylo. Niining kahimtanga, gipadayag sa imong higala ang iyang konsensiya sa paagi nga mahimo nimong hisgotan ang iyang gisulti.
O, ingnon ta nga ang usa ka kapikas mosulti og mapanawayong pulong tungod sa kalit nga pagsilaob sa kasuko. Sa dihang mokalma na ang mga pagbati, mahinungdanon nga ipahibalo kaniya kining kalit nga pagbuto sa kasuko. Ang labing angay, ug labing maluluy-on, mao ang pagsulti sa imong kapikas nga ang mga pulong nga gisulti nakapasakit. Ang pagbuhat niini dili paghukom sa iyang kasingkasing; paghukom kini sa iyang makita nga mga buhat. Dugang pa, kon dili direktang atubangon ug ayohon kining mga buhata, lisod ang pagpasig-uli ug ang mas lawom nga pagsulod sa usa ka relasyon sa gugma sa paglabay sa mga tuig.
Laing mahinungdanong butang sa pagdesisyon sa pagtul-id sa usa ka tawo mao ang pagkonsiderar kon andam ba siya o dili sa pagdawat sa pagtul-id. Pananglitan, kon init pa kaayo ang mga pagbati ug tataw kaayo ang kapakyasan sa mga gilaoman, mas maluluy-on ang paghulat ug paghisgot niining mga buhata sa ulahi. Ikasubo, adunay mga relasyon nga nagpadayon sa panagbingkil ug, busa, lisod kaayo ang pagpangita og pagpasig-uli pinaagi sa pagtul-id. Bisan pa niana, kinahanglan kanunay adunay paglaom nga mahitabo ra kini sa kataposan.
Kon sa imong pagtimbangtimbang dili pa hustong panahon sa paghisgot sa buhat nga nakapasakit o dili angay, mahinungdanon nga bisan pa niana, itanyag nimo sa imong kasingkasing ang kaluoy sa pagpasaylo. Ug kon grabe ang kasakit, kinahanglan mas dako pa gayod ang pagpasaylo, bisan kon dili mahimo ang pagpasig-uli. Hinumdomi nga ang โpagpasayloโ nagpasabot lamang nga maghimo ka og usa ka sulodnong buhat sa kaluoy, nga nagpasaylo kanila diha sa imong kasingkasing. Ang โpagpasig-uliโ nagpasabot nga ang tawo nga nakasala nagbasol, nangayo sa imong pagpasaylo, midawat niini gikan kanimo ug, busa, ang inyong relasyon napasig-uli ug nalig-on.
Pag-ampo alang sa Kalooy sa Pagpasaylo
Usa ka makatabang nga paagi sa pagtanyag og pagpasaylo diha sa imong kasingkasing ngadto sa usa ka tawo nga nagpabiling gahi og ulo mao ang pag-ampo alang nianang tawhana. Apan, ang pagpasaylo sa usa nga nakapasakit kanimo mahimong lisod kaayo. Dili kini usa ka butang nga imong mahimo dayon sulod lang sa usa ka gabii. Nagkinahanglan kini og dakong grasya ug pagtugyan sa Dios. Ug nagkinahanglan kini og daghang pag-ampo.
Si Jesus dili gayod mangayo kanato nga mobuhat og bisan unsa nga dili usab Siya andam nga buhaton. Gikan sa Krus, gipasaylo Niya kadtong bag-o pa lamang mipasipala Kaniya sa hilabihan ka mabangis nga paagi. Ang koronilya sa ubos gihimo aron makatabang niadtong naglisod sa pagpasaylo sa uban. Kon mao kini ang imong kahimtang, ampoa kini matag adlaw, aron ang Dios makalingkawas kanimo gikan niining palas-ana.
Ang Koronilya alang sa Kalooy sa Pagpasaylo sa Uban
Ang mosunod nga koronilya (nga lahi sa Koronilya sa Diosnong Kalooy) giampo usab gamit ang rosaryo. Ang mga pag-ampo gikuha gikan sa Balaang Kasulatan. Ang unang pag-ampo naggikan kang San Esteban, ang unang Kristohanong martir. Gisulti niya kini sa wala pa siya mamatay tungod sa pagbato kaniya:
โGinoo, ayaw ipasangil kanila kining salaa.โย Buhat 7:60
Ang ikaduhang pag-ampo gibase sa mga pulong mismo ni Jesus samtang nagbitay Siya sa Krus ug himalatyon:
โAmahan, pasayloa sila, kay wala sila mahibalo sa ilang gibuhatย Lucas 23:34
Sugdi sa usa ka Amahan Namo, usa ka Maghimaya Ka Maria ug sa Nagatuo Ako.
Unya, sa dakong lugas sa matag dekada sa rosaryo, pag-ampo:
Ginoo, ayaw ipasangil kanila kining salaa, kay Ikaw puno sa kalooy ug pagkamabination alang sa tanan. Palihog hatagi ako sa grasya sa pagpasaylo aron masundog ko ang Imong hingpit nga gugma.
Dayon, sa napulo ka gagmayng lugas sa matag dekada sa rosaryo, iampo:
Amahan, pasayloa sila, kay wala sila mahibalo sa ilang gibuhat.
Human sa tanang lima ka dekada, taposa pinaagi sa pagsulti niini sa tulo ka higayon:
Ginoong Jesus, Anak sa Dios nga Buhi, kaloy-i ako nga makasasala.
Amen.
Kini usa ka gamhanang pag-ampo nga gibase sa Balaang Kasulatan. Kon naglisod ka sa pagpasaylo sa usa ka tawo nga nakapasakit kanimo ug nagdumili sa pagpasig-uli, sugdi ang pag-ampo niining koronilya alang nianang tawhana matag adlaw. Mahibulong ka kon unsa kadako ang ikatabang niini.
Sa labing maayong kahimtang, kon imong itanyag ang pagpasaylo, ang nakasala kanimo mapainubsanong modawat sa imong pasaylo, ug mahitabo ang pagpasig-uli. Apan, kasagaran kaayong mahitabo nga ang tawo nga imong gipasaylo dili moangkon sa iyang gibuhat ug, busa, dili bukas sa imong buhat sa pagpasaylo. Tungod niini, dili mahitabo ang pagpasig-uli. Tingali nag-ampo ka na alang sa usa ka tawo (sama sa imong kapikas o anak), ug balikbalik na siyang gipasaylo sa imong kasingkasing, apan dili niya dawaton ang imong pasaylo, nga nagpadayon sa iyang sala ug sa panglantaw nga siya lamang ang matarong. Makapasubo nga kon mahitabo kini, ang imong mahimo lamang mao ang pagpadayon sa pagpasaylo. Kon mao kini ang imong kahimtang, ayaw kawad-i og kadasig. Ang pagkawala sa kadasig usa ka direktang pag-atake sa paglaom, ug sa higayon nga mawala ang paglaom, ang mapinasayloong kasingkasing mahimong bugnaw ug masuk-anon. Ayaw itugot nga mahimong ingon niana ka.
Kon ang usa ka tawo sa imong kinabuhi magmagahi gihapon sa iyang makapasakit nga mga buhat, ang imo na lamang mahimo mao ang pag-ampo ug paghulat sa higayon nga andam na siyang makig-uli. Hinumdomi ang naunang teksto mahitungod sa Mausikong Anak. Niana nga sugilanon, ang amahan naghulat ug padayon nga nagpaabot sa pagbalik sa iyang anak. Nakita niya ang iyang anak gikan sa halayo ug midagan siya aron sa pagsugat kaniya. Kinahanglan ingon usab niana ang imong buhaton. Kinahanglan padayon kang motan-aw sa โhalayo,โ nga mangita og bisan unsang timailhan nga andam na ang tawo nga kinahanglan nimong makahiuli. Kon makamatikod ka og bisan unsang pagkaandam, hatagi kini og pagtagad ug pangandam sa pagpakita og kaluoy ug pagpasaylo.
Apan, sa pipila ka kahimtang mahimong moabot ang panahon sa โpagyabyab sa abog gikan sa imong mga tiil,โ sumala sa gipakita sa teksto sa Kasulatan nga gikutlo sa sayo pa. Unsay gipasabot niini? Kini usa ka balaang pagpakig-ambit sa kaluoy sa pagkondenar. Kon nakagamot na pag-ayo ang pagpagahi sa kasingkasing, ug nahimo na ang tanang paningkamot sa pagpakig-uli, mahimong moabot ang panahon nga ang labing maluluy-ong butang nga imong mahimo ngadto sa uban mao ang โpagpahid sa abog gikan sa imong mga tiil.โ Wala kini magpasabot nga tagdon nimo sila sa bastos, mapanghusga ug makasasalang paagi. Hinunoa, nagpasabot kini nga ipakita nimo kanila ang mga sangpotanan sa ilang mga buhat diha sa inyong relasyon. Gitugotan nimo nga ang ilang dayag nga pagpagahi sa kasingkasing mapakita sa mas makita nga paagi. Apan kini kaluoy.
Kini nga buhat sa โpagyabyab sa abog gikan sa imong mga tiilโ mahimong mahitabo sa nagkalainlaing paagi. Pananglitan, mahimong ang imong kasubo na lamang ang bugtong angay nga tubag nga imong mahatag sa usa ka tawo. Dili sa paagi sa dili-direktang pagkaagresibo, kondili sa maluluy-on ug masulob-ong paagi (โBulahan ang mga masulob-onโฆโ Mateo 5:4). Kon grabe ang pagpagahi sa kasingkasing, ang masulob-ong kahilom mahimong usa ka dakong buhat sa gugma. Kini usa ka paagi sa pagpakita sa mga sangpotanan sa dili hapsay nga mga buhat sa uban. Ang masulob-ong kahilom mahimong usa ka โmakusogโ nga pagpabanaag sa mga sangpotanan sa pagdumili sa uban sa pagpakig-uli.
Apan pag-amping, pag-ampo, pagpasaylo diha sa imong kasingkasing ug tugoti ang Dios sa paggiya kanimo. Sa makausa pa, ang dili-direktang pagkaagresibo dali rang makatabon sa kaugalingon ilalom niining matang sa kaluoy. Apan ang dili-direktang pagkaagresibo mao ra gihapon kana: pagkaagresibo. Ug ang pagkaagresibo dili kaluoy. Kon gitawag ka sa usa ka matang sa masulob-ong kahilom ngadto sa uban, kinahanglan kanunay nga magpabilin ang lig-ong paglaom nga mahitabo ang pagpasig-uli. Ug maingon nga ang amahan sa sugilanon sa Mausikong Anak nagtindog nga naghulat ug nagtan-aw sa halayo aron makig-uli sa iyang anak, kinahanglan usab nga kanunay kang andam ug kinabubut-ong makig-uli sa dihang motungha bisan ang labing gamay nga kahigayonan.
Hinaot nga kining kasinatian nga gihisgotan sa ibabaw dili na kinahanglan sa imong labing suod nga mga relasyon. Hinaot nga ang mga kasingkasing kanunayng bukas sa pagpasig-uli. Kon ingon niana, ang madagayaong Kombira sa Kaluoy naghulat nga masinati sa matag relasyon. Ug kanang Kombira sa Kaluoy gipadayag pinaagi sa gasa sa gugma nga andam mosakripisyo.
Ang Kalipay sa Espirituhanong Panaghigalaay ug sa Pagsakripisyo sa Kaugalingon diha sa Paghatag
Sumala ni Santo Tomas de Aquino, โWalay bisan unsa niining yutaa nga angay hatagag mas dakong bili kay sa tinuod nga panaghigalaayโ (Bahin sa Pagkahari, Alang sa Hari sa Cipro, libro 1, kapitulo 11, parapo 77). Ang bugkos sa tinuod nga panaghigalaay mamugna kon ang kalooy sa Dios ihatag ug dawaton sa paagi nga molapas sa pagpasaylo lamang sa mga sala. Ang tinuod nga panaghigalaay resulta sa duha ka tawo nga ang matag usa nahiusa kang Cristo ug, tungod niini, ang matag usa nagpadayag sa gugma ni Cristo ngadto sa usa. Kini nga matang sa โpanaghigalaay diha kang Cristoโ magamit sa matag relasyon sa gugma nga imong gisudlan. Siyempre, dili nimo mahimong โlabing suodโ nga higala ang tanan nimong mahimamat, ni mahimo kang makighigala sa tanan sumala sa kasagarang pagsabot sa panaghigalaay. Ang panahon ug kusog naglimite sa atong katakos sa pagsulod sa suod nga mga relasyon uban sa daghang tawo. Apan makahimo ka sa pagtukod og โtinuod nga bugkos sa panaghigalaayโ uban sa matag tawo nga nagkinabuhi diha kang Cristo, bisan kon kana nga panaghigalaay naglangkob lamang sa mubo nga panag-istoryahanay matag karon ug unya. Niana nga kahimtang, mahimo gihapon kining tinubdan sa dakong kalipay tungod kay makaambit kini sa pagbubo sa kalooy sa Dios. Ang โtinuod nga bugkos sa panaghigalaayโ mahimo usab matukod tali niadtong nagkailhanay sa mas lawom nga paagi. Ang mga kapikas sa kaminyoon, mga silingan, โlabing suodโ nga mga higala, mga igsoon, ug uban pa, maoy mga relasyon nga sa labing maayong kahimtang moambit usab sa balaang bugkos sa panaghigalaay diha kang Cristo.
Sa unsang paagi masinati ang tinuod nga panaghigalaay diha kang Cristo? Sa unsang paagi kini ikinabuhi? Una, hinumdomi ang Ebanghelyo ni Juan: โWalay gugma nga labaw pa niini, nga ang usa motugyan sa iyang kinabuhi alang sa iyang mga higalaโ (Juan 15:13). Mahinungdanong timan-an nga gitawag kita ni Jesus sa pagtugyan sa atong kinabuhi alang sa atong mga โhigala.โ Kini nagpasabot nga ang kinatas-ang ang-ang sa kalooy ikahatag lamang ngadto niadtong atong nakapasig-ulian ug atong kaambit sa usa ka bugkos diha kang Cristo. Sama sa nahisgotan na, kon ang usa ka tawo magpabiling gahi og ulo sa iyang sala batok kanato, dili mahimo nga ikahatag ang kalooy niining sunod nga ang-ang. Ang ilang pagkagahi og ulo nagpabilin kanato sa ang-ang sa pagpasaylo, ug padayon nilang masinati ang โpagkondenarโ sa atong pagpasaylo hangtod nga sila maghinulsol ug modawat sa atong pagpasaylo diha sa ilang kasingkasing.
Sa dihang tinuod ka nang nakig-uli sa laing tawo ug busa mga higala na kamo diha kang Cristo, gitawag ka sa madagayaong paghatag sa kalooy sa Dios ngadto kaniya. Kini sa kinahiladman matuman diha sa gugma nga nagsakripisyo, diin imong unahon ang laing tawo ug higugmaon siya sa tibuok mong pagkatawo. Kini mao ang paghatag sa imong kaugalingon mismo. Kining giladmon sa gugma nga nagsakripisyo masinati sa nagkalainlaing paagi sa nagkalainlaing tawo, apan kanunay kini nga pag-ambit sa hingpit nga gugma ni Cristo nga nagsakripisyo, sumala sa hingpit nga pagpadayag niini diha sa Krus. Sa piho gayod, kini kanunay nga usa ka bug-os ug kinabubut-ong gasa sa imong kaugalingon alang sa laing tawo.
Ang unang angay natong timan-an bahin sa gugma nga nagsakripisyo mao nga kini โnagsakripisyo.โ Ang pagsakripisyo dali rang masaypag sabot nga usa ka butang nga negatibo ug dili tilinguhaon. Kini tungod kay, kon tan-awon gikan sa kahakog, kini dili tilinguhaon. Sa atong kahakog, may kahilig kita sa pagkuha inay sa paghatag. Apan ang kalooy nagpagawas kanato gikan niining matang sa kahakog ug nagtugot kanato sa pagkaplag og labaw pang mahimayaong paagi sa pagkinabuhi. Hinumdomi ang Kasulatan, โKay bisan kinsa nga buot moluwas sa iyang kinabuhi mawad-an niini, apan bisan kinsa nga mawad-an sa iyang kinabuhi tungod Kanako makakaplag niiniโ (Mateo 16:25). Ang pagkawala sa imong kinabuhi tungod kang Cristo ug, sa ingon, ang pagkahimong instrumento sa Iyang kalooy mao ang katuyoan sa paglalang kanimo. Busa, sa buhat sa paghatag sa imong kaugalingon, imong madiskobrehan ang imong kaugalingon ug mahimo kang hingpit nga tawo diha sa nahingpit nga kahimtang sa grasya. Ang pagbuhat niini mao ang paagi aron mahimo kang tawo nga gituyo sa paglalang kanimo. Mahimo kang mas tawhanon pinaagi sa pagkinabuhi sa paagi nga gituyo alang kanimo, nga mas hingpit nga mahimong tawo nga gituyo sa Dios sa Iyang paglalang kanimo.
Kining giladmon sa gugma nga gipaambit tali sa mga kapikas sa kaminyoon makita diha sa ilang pagsuportahay kon ang matag kapikas nag-atiman sa kaayohan sa usa. Ang mga anak kanunayng maatiman ug ang pipila ka panginahanglan matubag kon ang mga ginikanan mohatag kanila niining lawom nga gugma nga walay kondisyon. Sulod sa pamilya, adunay espesyal nga katungdanan sa paghatag sa imong kaugalingon sa bug-os nga paagi.
Apan, ang kalooy walay kinutoban diha sa kasingkasing ni Cristo. Busa, adlaw-adlaw kang dasigon sa Dios sa paghalad sa imong kasingkasing ngadto sa uban sa nagkalainlaing paagi. Bisan tuod wala kini maghatag sa laing tawo og katungod sa pagpangayo kanimo og labaw pa kay sa gitawag sa Dios nga imong ihatag, ang imong mga buhat sa kalooy ngadto sa matag tawo ikinabuhi gihapon sa bug-os ug walay kondisyon nga paagi. Kasagaran, panalanginan ka usab sa Dios pinaagi sa pipila ka tawo nga imong gipaambitag dakong bahin sa imong kasingkasing ug kinabuhi. Kon kining mga panaghigalaay adunay pagpaambitay sa kalooy sa Dios, ang bunga niini nga mga bugkos makapalahutay, makapausab, makapadasig ug balaan. Bisan si Jesus adunay mga tawo sa Iyang kinabuhi nga Iyang gikaambitan og espesyal nga bugkos sa panaghigalaay, nga Iyang gigahinan og dugang nga panahon ug kusog. Hunahunaa ang mga Apostoles, si Maria, si Marta ug si Lazaro. Apan ang panaghigalaay ni Jesus miabot usab ngadto sa tanang tawo, bisan ngadto niadtong Iyang nakahinabi sulod lamang sa mubong higayon. Padayon Niyang gihatag ang Iyang kasingkasing, uban sa pagsakripisyo, ngadto niadtong andam modawat sa Iyang gugma.
Ang yawe sa gugma nga nagsakripisyo dili kaayo ang kadaghanon sa panahon ug kusog nga imong ihatag sa laing tawo; kondili, ang kalidad sa gugma nga gipakita. Ang kalidad sa gugma nga ihatag ngadto sa usa ka โhigalaโ diha kang Cristo kinahanglan kanunay nga anaa sa kinatas-ang ang-ang nga mahimo. Bisan kon kini naglangkob lamang sa usa ka mubong higayon.
Ang gugmang mapinasakripisyo โmakapasakitโ usab sa usa ka diwa. Makapasakit kini kay kining ang-ang sa gugma nagkinahanglan og makanunayong pagpili nga mapaubsanong unahon ang uban. Nagkinahanglan kini og padayon nga pagkamatay sa kaugalingon aron mahimong makanunayong instrumento sa kalooy sa Dios, ingon nga gipadayag kini gikan sa Krus. Makapasakit ang gugma. Apan kini usa ka kasakit nga matam-is usab. Ang katam-is niini makita sa maayong bunga nga motungha gikan sa paghatag sa imong kasingkasing sa labing hingpit nga paagi. Ug kon masinati kining โkatam-is,โ ang mapinasakripisyong bahin sa gugma dili gayod usa ka palas-anon.
Ang laing kasinatian nga mahimo natong maagian nga โmakapasakitโ mao ang espirituhanong pagkauga. Sa ilang kinahiladman, daghan sa mga santos ang nakasinati og usa ka matang sa pagkauga sa ilang relasyon sa Dios. Alang kanila, daw wala ang Dios bisan tuod suod gayod Siya nga anaa kanila. Apan kining kasinatian sa pagkauga gitugotan aron ang santos magsugod sa paghigugma sa Dios sa mas lawom pa gayod nga ang-ang: ang ang-ang sa kabubut-on. Mangitngit ang ilang pagtan-aw sa Dios, dili nila mabati ang Iyang presensya, apan mopili gihapon sila sa paghigugma Kaniya ug mopili sa pagtuman sa Iyang kabubut-on tungod sa gugma, dili tungod sa ilang gibati.
Usahay, mahimo usab natong masinati kining pagkauga sa atong paghigugma sa uban. Pananglitan, ang mga ginikanan dili kanunay makasinati og kalipay sa pagbati sa tanan nilang gibuhat aron higugmaon ug atimanon ang ilang mga anak. Kanunay adunay pagbati sa katagbawan nga naggikan sa ilang mapinasakripisyong gugma, apan kining gugma dili kanunay gipalihok sa maayong pagbati. Sa pagkatinuod, kon mawala kanang maayong pagbati, ang ilang gugma mahimo pang mas balaan ug mas mapuslanon alang sa ilang mga anak. Kini tungod kay kining matang sa gugma mas mapinasakripisyo ug gibuhat tungod lamang sa kalooy, isip pagsundog sa Krus ni Kristo. Mahimo kining mas walay pagpangita sa kaugalingong kaayohan ug mas nagtutok sa kaayohan sa uban. Ang paghatag sa kaugalingon tungod sa gugma kasagaran makahatag og maayong pagbati, apan kon dili kini makahatag niana, dili kita angay matingala o mawad-an og kadasig. Kinahanglan natong tan-awon kadtong mga higayona isip mga kahigayonan sa paghalad sa atong mga kasingkasing sa mas hingpit ug mas walay pagpangita sa kaugalingong kaayohan nga paagi.
Kon matag adlaw imong ihatag ang imong kaugalingon sa mapinasakripisyong paagi, ilabina ngadto sa mga tawo nga imong kaambit sa espirituhanong โpanaghigalaayโ diha kang Kristo, magsugod ka sa pagkakita nga ang imong mga buhat sa kalooy ngadto kanila lalom gayod nga naghatag og kinabuhi ug nagsustento niini. Ang pagpaambit sa kalooy ngadto sa laing tawo gamhanang mopataas kanimo ngadto sa usa ka mahimayaong kinabuhi diha kang Kristo. Sa pagbuhat niini ug sa pagtugot nga ang kalooy sa Dios moagos pinaagi kanimo, ang Iyang kalooy moagos una ngadto sa imong kaugalingong kalag. Ang pagdawat ug dayon ang pagkahimong instrumento sa kalooy adunay sangpotanan nga mopuno kanato og dakong katagbawan sa kinabuhi. Himoa kini nga imong tumong matag adlaw. Pangita og mga kahigayonan, diha sa imong pakig-uban sa mga tawo nga imong gikauliay, sa pagtugyan sa imong kinabuhi nga walay pagpugong. Kon buhaton mo kini, imong makita nga ang kalooy nga imong madawat gikan sa Dios ug ipaambit ngadto sa uban walay kinutoban. Imo usab makita nga ang pagkinabuhi niining ang-ang sa kalooy mao ang labing paspas nga paagi sa paglakaw sa dalan padulong sa tinuod nga pagkabalaan.
Sama sa nahisgotan sa sinugdanan niining bahina, โWalay bisan unsa dinhi sa yuta nga angayng pabilhan labaw sa tinuod nga panaghigalaayโ (Santo Tomas de Aquino). Ug kon kanang panaghigalaay ituslob sa kalooy sa Dios, masinati diha niini ang mga Bunga sa Espiritu Santo. Dako ang kalipay, ug ang kusog nga madawat sa usag usa gikan nianang panaghigalaaya naghimo sa matag sakripisyo sa gugma nga takos gayod ihatag. Paningkamoti nga mahimong mahimayaon sa ingon niining paagiha ang tanan mong panaghigalaay, ilabina ang mga relasyon sa pamilya, ug ang Dios mahimong buhi gayod diha sa imong kinabuhi, moduol kanimo ug molihok pinaagi kanimo diha sa kinabuhi sa mga tawo nga imong gihigugma.
Ang Dalan Padulong sa Pagkabalaan โ Usa ka Katingbanan sa Atong Halangdong Tawag
Kining mubo nga basahon nagtanyag og mga pagpamalandong bahin sa tulo ka hiyas nga mahinungdanon kaayo sa pagkahimong balaan. Gikinahanglan ang tanan nga tulo, kay ang matag usa nagtukod diha sa lain. Apan ang kataposang bunga sa pagkinabuhi sa pagkamapainubsanon, pagsalig ug kalooy mao ang usa ka kinabuhi nga adunay lawom nga personal nga katagbawan ug usab nagdala og dakong kausaban sa kinabuhi sa uban.
Kon magkinabuhi kita sa pagkabalaan, nga sa kataposan mohatag sa atong kaugalingon sa mapinasakripisyong paagi, ang bunga mao ang kalipay nga dili mahulagway sa mga pulong, kay diha sa labing halangdong buhat sa pagtugyan sa atong kaugalingon tungod sa kalooy, mosulod kita sa usa ka lawom nga panaghiusa uban sa Dios.
Kap. 5 – Usa ka Buhing Halad sa Gugma
Anaa usab sa eBook o Paperback:
Amazon – Google Play – iTunes – Barnes and Noble
