Pagpakig-uban sa Makasasala
Ikanapulong Domingo sa Ordinaryong Panahon, Tuig A
Samtang nagkaon siya didto sa iyang balay, daghang maniningil og buhis ug mga makasasala ang miabot ug miduyog kang Jesus ug sa iyang mga tinun-an sa pagpangaon. Nakita kini sa mga Pariseo ug miingon sila sa iyang mga tinun-an, โNganong nakigkaon man ang inyong magtutudlo sa mga maniningil og buhis ug sa mga makasasala?โ Mateo 9:10-11
Usa sa labing daotang mga sala nga mahimong mabuhat sa usa ka tawo mao ang pagpakamatarong sa kaugalingon ug ang pagkamahukmanon ngadto sa uban. Mao kini ang sala sa mga Pariseo. Makapahupay ang pagmatikod nga si Jesus walay pagpanuko sa pagpakig-uban sa mga maniningil og buhis ug sa uban nga giisip sa katilingban nga โmga makasasala.โ Kini naglakip gayod sa daghang matang sa sala, apan ilabina sa mga sala nga naggikan sa kahuyang sa tawo. Hinuon, sama sa atong makita sa dili maihap nga mga higayon diha sa Ebanghelyo, mapintas kaayo si Jesus ngadto sa mga tawo nga mohukom ug mokondenar sa uban.
Kini nga sala kasagarang makita ilabina sa mga tawong โsimbahanon.โ Sa โsimbahanon,โ ang atong gipasabot mao kadtong mga aktibong nagkinabuhi sa ilang pagtuo, sa mga debosyon, sa kinabuhi sa parokya, ug bisan kadtong nalambigit sa pagdumala sa Simbahan. Dili gayod kini magamit sa tanan, kay daghan ang hilabihang nalambigit sa Simbahan nga tinuod nga mga santos sa Dios. Bisan pa niana, kinahanglan kitang magbantay niining salaa ug mapaubsanong mosusi sa atong kaugalingong kasingkasing aron makita kon anaa ba kini.
Unsay dagway niini nga sala sa atong panahon karon? Kasagaran kini makita diha sa mga tabi, pagsaway ug pagbiaybiay sulod sa Simbahan, ug mosangpot sa pagkabahinbahin sa mga sakop sa Simbahan. Kining ulahing gihisgotang epekto sa maong sala, nga mao ang pagpahinabo og pagkabahinbahin, usa ka timailhan nga angay natong bantayan aron mapamalandongan ang bisan unsang pakigbisog nato batok niining sala nga sama sa mga Pariseo.
Pamalandongi karon ang bisan kinsa sulod sa Simbahan nga imong gikabingkilan. Aduna bay tawo, o pundok sa mga tawo, nga dili nimo ikahiusa? Mamatikdan ba nimo nga nanghimantay ka sa uban? Kon mao, ilha nga ang kapintas ni Jesus ngadto sa mga Pariseo mahimong magamit usab kanimo. Ayaw pagpanuko sa pag-angkon dayon ug sa mapaubsanong paagi niining sayopa, ug tugoti ang atong Ginoo nga mopalingkawas kanimo gikan niining mga tentasyon.
Ginoo, tabangi ako nga mahigawas gikan sa kasingkasing nga masawayon ug mahukmanon. Hatagi ako sa grasya nga akong gikinahanglan aron mobiya sa akong kaugalingong pagpakamatarong ug mapainubsanong mangita sa kaayohan sa uban. Hinaot nga dawaton ko ang tanang tawo sa akong kinabuhi sama sa Imong gibuhat, hinigugmang Ginoo. Pun-a ako og kasingkasing nga may kaluoy ug tinuod nga kalooy, ilabina alang sa mga nakigbisog batok sa sala. Jesus, nagsalig ako Kanimo.
Usa ka Gahi og Ulo ug Masukihong Kasingkasing
Ikanapulong Domingo sa Ordinaryong Panahon, Tuig B
Ang mga magtutudlo sa Balaod nga nangabot gikan sa Jerusalem miingon, โGiyawaan siya ni Beelzebul,โ ug โPinaagi sa pangulo sa mga yawa iyang gipapahawa ang mga yawa.โ Marcos 3:22
Ang mga eskriba sad-an sa usa ka mangil-ad nga sala nga gitawag og โpagbutangbutang.โ Ang Katesismo sa Simbahang Katolika nag-ingon nga ang usa ka tawo sad-an niini nga sala kon siya, โโฆpinaagi sa mga pahayag nga supak sa kamatuoran, makadaot sa dungog sa uban ug makahatag og hinungdan sa bakak nga mga paghukom mahitungod kanila.โ Ang Katesismo naghisgot usab og usa ka mas gaan nga sala nga gitawag og โdinalidal nga paghukomโ ug nag-ingon nga sad-an niini ang tawo โnga, bisan sa hilom lamang, nagtuo nga tinuod, nga walay igong basihan, ang moral nga kasaypanan sa iyang isigkatawoโ (Katesismo #2477). Daw klaro kaayo nga ang mga eskriba grabeng sad-an niining duha ka sala.
Ang importanteng timan-an niining mapasipalahong mga pulong batok kang Jesus mao nga ang mga eskriba dili unta mosulti sa ingon nga mga butang kon wala pa sila hingpit nga nagtugyan sa ilang kaugalingon ngadto niining mga sala sa pagbutangbutang ug dinalidal nga paghukom. Dili mahimo nga makasala niining mga paagiha sa gamay lamang nga sukod. Kining mga salaa nagkinahanglan og dakong daotang tuyo, pagkagahi og ulo ug determinasyon. Tungod niana, kining mga salaa mahimong makadaot pag-ayo ug, alang sa kadaghanan kanato, mahimo kining dili na nato makaya.
Kon ikaw ang gipunting sa ingon niana kapintas nga pagtratar sa laing tawo, lagmit makapahimo kini kanimo nga mohunong ug matugob sa kakurat, kasakit, kasuko ug kalibog. Lisod kaayo nga dili matandog sa ingon niana nga pag-atake.
Apan unsa may gibuhat ni Jesus? Gitubag Niya ang ilang pagkondenar ug dayon gipatin-aw nga ang ilang gisulti usa ka โsala batok sa Espiritu Santo.โ Kining matanga sa sala dili mapasaylo tungod sa pagkamasukihon ug pagdumili sa makasasala sa paghinulsol. Ang tawo nga nagasala batok sa Espiritu Santo hilabihan nang mitugyan sa iyang sala nga dili na siya bukas sa pagbag-o. Makahahadlok kini ug mosangpot sa walay kataposang pagkahinukman sa silot.
Tingali usa ka mahinungdanong leksiyon nga angay natong makuha gikan niining teksto mao ang pagpahinumdom nga dili gayod nato angay tugotan ang atong kaugalingon nga magmagahi sa atong sala. Dili gayod kita angay mahimong hilabihan ka nakagamot sa atong sala ug, ilabina, sa atong kaugalingong pagpakamatarong nga dili na kita andam maminaw, mangatarongan, ug mapainubsanong magbag-o sa dihang makaamgo kita nga nasayop kita. Ang mga eskriba dili bukas sa pagbag-o ug kini mao ang labing daotang bahin sa ilang sala.
Pamalandongi karon kon ikaw ba usab nakigbisog sa pagkamasukihon ug pagkagahi og ulo. Ayaw kahulog niining lit-aga kay usa kini ka sala batok sa Espiritu Santo. Pamalandongi kon unsa ka kabukas sa pagbag-o ug itugyan ang imong kaugalingon sa dalan sa pagpaubos. Kini usa ka dalan nga dili gayod nimo pagabasolan nga imong gisubay.
Akong mapainubsanong Ginoo, sa dihang makasala ako, tabangi ako nga mahimong bukas sa pag-ila sa akong kasaypanan. Haw-asa ako gikan sa kalagmitan sa pagmagahi og ulo ug sa katig-a sa kasingkasing. Tabangi ako nga magpabiling mapainubsanon sa kanunay ug himoa ako nga andam magbag-o. Gihigugma ko Ikaw, hinigugmang Ginoo. Tabangi ako nga higugmaon ang tanan Mong katawhan uban sa matinud-anon ug mapainubsanong kasingkasing. Jesus, nagsalig ako Kanimo.
Kabag-o sa Kinabuhi
Ikanapulong Domingo sa Ordinaryong Panahon, Tuig C
Sa pagkakita sa Ginoo kaniya, naluoy siya pag-ayo kaniya ug miingon, โAyaw paghilak.โ Miduol siya ug mihikap sa lungon; tungod niini mihunong ang mga nagpas-an, ug siya miingon, โBatan-ong lalaki, sultihan ko ikaw, bangon!โ Ang patay milingkod ug misugod sa pagsulti, ug gitugyan siya ni Jesus ngadto sa iyang inahan. Lucas 7:13-15
Kining gamhanang sugilanon sa pagbanhaw ni Jesus sa usa ka patay nga tawo seguradong nakapuno sa mga nakasaksi niining milagro sa hilabihang kahingangha. Ilabina ang inahan, seguradong magmapasalamaton kang Jesus hangtod sa hangtod tungod kay nadawat niya pag-usab ang iyang anak human mawala ang tanang paglaom. Naghilak siya tungod sa pagkawala sa iyang anak, nga sa walay duhaduha namatay nga sayo ra kaayo ug wala pa sa hustong panahon, ug sa kalit lang nausab ang tanan. Ang iyang kasubo nahimong dili matukib nga kalipay. Labing makatabang ang pagpamalandong sa nagkasukwahing mga pagbati niining hitaboa. Ang kalipay ug pagpasalamat nga iyang gibati sa misunod nga mga adlaw, mga semana, mga bulan ug bisan mga tuig seguradong hilabihan kadako.
Kining milagroha sa walay duhaduha usa ka buhat sa gugma alang niining inahana aron mahupay ang iyang kasubo, apan usa usab kini ka gamhanang buhat nga matagnaon diin gipili ni Jesus nga ipadayag kanato ang saad nga Iyang gitanyag sa tanan nga adunay balaang kasubo sa kinabuhi ug niadtong nag-antos tungod sa ilang gugma. Ang pag-antos ug kasubo kabahin sa kinabuhi, apan kadtong nag-antos ug nagsubo tungod sa ilang balaang gugma sa Dios ug sa uban angay usab nga magpaabot nga ang gahum sa Dios nga makapausab mosulod sa ilang kasubo ug magpatungha og kabag-o sa kinabuhi sa paagi nga ang Dios lamang ang makahimo.
Kining kabag-o sa kinabuhi tingali dili mao ang pisikal nga pagbanhaw sa usa ka minahal gikan sa mga patay dinhi niining kinabuhia, apan ang kalipay ug kalinaw nga buot ihatag sa Dios kanato makahatag usab sa samang katagbawan ug kaayohan sama nianang buhata. Giunsa kini pagkahitabo? Mahitabo kini pinaagi sa pagtangtang sa Dios sa atong bug-at nga mga palas-anon sa paagi nga ang Iyang kaalam lamang ang makatugkad. Apan kinahanglan natong masayran nga kining saara sa Dios tinuod ug usa ka pagdapit nga gitanyag kanato matag adlaw.
Kon kini maayo alang kanato ug alang sa atong pagkabalaan, ang Dios makahimo ug magpatungha gayod og milagro sa atong kinabuhi. Usahay ang Iyang mga milagro mabati ug makapahingangha, ug usahay dili kini dayon mamatikdan ug mga gasa kini sa kinasuloran diin Iyang ibubo ang usa ka pinasahing grasya sa pagtuo, paglaom o gugma. Apan kining gasaha tinuod ug angay nato kining pangitaon ug laoman.
Pamalandongi karon ang bisan unsang kasubo o pag-antos nga imong giantos. Samtang imo kining gibuhat, paningkamoti nga iusa kana nga pag-antos sa Krus ni Cristo. Salig Kaniya ug itugyan ang imong kaugalingon ngadto Kaniya. Samtang imo kining gibuhat, ablihi ang imong kaugalingon sa talagsaong mga paagi nga buot sa Dios nga magpatungha og kabag-o sa kinabuhi alang kanimo. Dawata ang paagi nga Iyang gipili sa pagbuhat niini ug tugoti Siya sa pagtanyag kanimo sa paghupay nga imong gikinahanglan. Ang kalooy ug pagkamabination sa Ginoo labaw pa sa imong matugkad, ug dili gayod ka Niya pakyason kon mosalig ka lamang.
Ginoo sa tanang paglaom, gitugyan ko gayod ang tanan Kanimo. Gisalig ko Kanimo ang akong kinabuhi ug ang tanan kong pag-antos ug kasubo. Palihog dawata ako ug usba ang akong kinabuhi sumala sa Imong hingpit nga laraw. Gihigugma ko Ikaw, hinigugmang Ginoo. Jesus, nagsalig ako Kanimo.
Mga Kabulahanan
Lunes sa Ikanapulong Semana sa Ordinaryong Panahon
โฆkay ila ang Gingharian sa langit.
โฆkay sila pagahupayon.
โฆkay sila makapanunod sa yuta.
โฆkay sila pagabusgon.
โฆkay sila pagakaloy-an.
โฆkay sila makakita sa Dios.
โฆkay sila pagatawgon nga mga anak sa Dios.
โฆkay ila ang Gingharian sa langit.
โฆkay dako ang inyong ganti sa langit.
(Tan-awa ang Mateo 5)
Gilista sa ibabaw ang tanang ganti sa pagkinabuhi sumala sa mga Bulahan. Basaha kini sa hinay ug uban sa pag-ampo. Gitinguha mo ba kining maayong mga bunga? Kining mga ganti sa mga Bulahan? Siyempre, gitinguha mo kini! Maayong espirituhanong batasan ang pagsugod sa ganti, ang epekto sa usa ka butang, ug ang pagtugot nga motubo ang tinguha alang niana nga ganti. Ingon usab niana ang sala. Maayong batasan, ilabina kon ang usa nakigbisog batok sa usa ka naandang sala, ang pagsugod sa epekto niana nga sala (ang dili maayong epekto) ug ang pagpangutana kon gitinguha ba nimo kini o dili.
Apan karon ania kanato ang mga Bulahan. Ug samtang atong gipamalandongan ang mga bunga sa mga Bulahan, dili nato malikayan ang paghinapos nga gitinguha gayod nato kini sa kinahiladman sa atong kasingkasing. Maayo kini ug mapuslanong pagkaamgo nga atong maabot.
Gikan niana, kinahanglan lamang natong modugang og usa pa ka lakang. Sa higayon nga makahinapos na kita, uban sa lawom nga kombiksiyon, nga gitinguha nato ang mga bunga sa mga Kabulahanan, kinahanglan na lamang natong idugang ang unang lakang. Atong ilakip ang Kabulahanan niini nga tinguha aron atong masabtan ug tuohan nga ang Kabulahanan maayo ug angay tinguhaon. Apan komosta man ang mga Kabulahanan? Nagtinguha ka baโฆ
Ang pagkakabos sa espiritu,
ang pagbangotan,
ang pagkaaghop,
ang pagkagutom ug pagkauhaw sa pagkamatarong,
ang pagkamaloloy-on,
ang pagkaputli sa kasingkasing,
ang pagkahimong tigpasiugda sa kalinaw,
ang pagdawat sa paglutos tungod sa pagkamatarong,
ug ang pag-antos sa mga pag-insulto ug paglutos ug sa bakak nga pagsulti sa tanang matang sa daotan batok kanimo tungod kang Jesus?
Tingali oo o tingali dili. Ang uban daw makapadani samtang ang uban daw mabug-at nga palas-anon. Apan kon kining mga Kabulahanan masabtan sa hustong paagi diha sa kahayag sa ilang mga bunga (nga mao ang mga panalangin nga ilang gihatag), nan ang atong tinguha alang sa mga paagi ngadto nianang maayong bunga (ang Kabulahanan) angay usab nga motubo.
Tingali karon, mahimo nimong susihon kon unsang Kabulahanan ang labing lisod nimong tinguhaon ug pangandoyon. Sa higayon nga mailhan nimo kini, tan-awa ang bunga nga gipatungha niini ug paggahin og panahon sa pagpamalandong niana nga Kabulahanan sulod niana nga kahulogan. Makatabang kini kanimo nga motubo sa pagkabulahan!
Akong labing bulahang Ginoo, tabangi ako nga mahimong mapaubsanon ug maaghop, putli sa kasingkasing ug maloloy-on, tigpasiugda sa kalinaw ug andam modawat sa bisan unsang paglutos nga moabot kanako. Tabangi ako sa pagdawat sa tanan uban sa kalipay ug sa pangandoy alang sa Imong Gingharian. Jesus, nagsalig ako Kanimo.
Pagdala og Kausaban
Martes sa Ikanapulong Semana sa Ordinaryong Panahon
โKamo ang asin sa yutaโฆKamo ang kahayag sa kalibotan.โ Mateo 5:13a&14a
Asin ug kahayag, mao kana kita. Hinaot unta! Nakapamalandong ka na ba kon unsay kahulogan sa pagkahimong asin o kahayag niining kalibotana?
Magsugod kita niining hulagwaya. Handurawa nga nagluto ka og lami kaayong sabaw sa mga utanon gamit ang tanang labing maayong sagol. Hinay kining nagbukal sulod sa pipila ka oras ug ang sabaw daw lami kaayo. Apan nahutdan ka diay og asin ug ubang mga panakot. Busa, gipasagdan mo lang nga hinay nga mobukal ang sabaw ug naglaom nga maayo ra ang sangpotanan. Sa dihang hingpit na kining naluto, imong gitilawan ug, sa imong kasagmuyo, medyo walay lami. Busa, nangita ka hangtod nga nakit-an mo ang kulang nga sagol, ang asin, ug gidugangan mo kini sa hustong gidaghanon. Human sa laing tunga sa oras nga hinay nga pagpabukal, gitilawan mo kini pag-usab ug nalipay ka pag-ayo. Katingalahan gayod ang mahimo sa asin!
O handurawa nga naglakawlakaw ka sa lasang ug nasaag. Samtang nangita ka sa imong agianan paggawas, misalop ang adlaw ug hinayhinay nga mingitngit. Dag-om ang langit busa walay makita nga mga bituon o bulan. Mga tunga sa oras human sa pagsalop sa adlaw, anaa ka na sa hingpit nga kangitngit taliwala sa lasang. Samtang naglingkod ka didto, kalit nimong nakita ang hayag nga bulan nga mitungha taliwala sa mga panganod. Takdol ang bulan ug ang dag-om nga langit nag-anam og haw-as. Sa kalit, ang takdol nga bulan mihatag og dakong kahayag sa imong agianan nga nakatultol ka na usab agi sa ngitngit nga lasang.
Kining duha ka hulagway nagpakita kanato sa kamahinungdanon sa bisan gamay lamang nga asin ug gamay lamang nga kahayag. Bisan gamay lamang, mausab na ang tanan!
Ingon usab niana kita sa atong pagtuo. Ang kalibotan nga atong gipuy-an mangitngit sa daghang paagi. Halos wala usab ang โlamiโ sa gugma ug kalooy. Gitawag ka sa Dios sa pagdugang nianang gamayng lami ug sa paghatag nianang gamayng kahayag aron ang uban makakaplag sa ilang dalan.
Sama sa bulan, dili ikaw ang tinubdan sa kahayag. Imo lamang gisalamin ang kahayag. Buot sa Dios nga mosidlak pinaagi kanimo ug buot Niya nga imong isalamin ang Iyang kahayag. Kon bukas ka niini, Iyang ipahilayo ang mga panganod sa hustong panahon aron magamit ka Niya sa paagi nga Iyang gipili. Ang imong katungdanan mao lamang ang pagpabiling bukas.
Pamalandongi karon kon unsa ka kabukas. Pag-ampo matag adlaw nga gamiton ka sa Dios sumala sa Iyang balaang katuyoan. Iandam ang imong kaugalingon sa pagdawat sa Iyang balaang grasya ug mahibulong ka sa paagi nga Iyang magamit ang gagmayng mga butang sa imong kinabuhi aron makadala og kausaban.
Ginoo sa kahayag, buot gayod ako nga Imong gamiton. Buot akong mahimong asin ug kahayag. Buot akong makahatag og maayong kausaban niining kalibotana. Gitugyan ko ang akong kaugalingon Kanimo ug sa pag-alagad Kanimo. Jesus, nagsalig ako Kanimo.
Ang Gugma Anaa sa mga Detalye
Miyerkules sa Ikanapulong Semana sa Panahon Sulod sa Tuig
โAmen, sultihan Ko kamo, hangtod nga mahanaw ang langit ug ang yuta, walay bisan ang labing gamayng letra o ang labing gamayng bahin sa usa ka letra nga mahanaw gikan sa balaod, hangtod nga matuman ang tanang butang.โ Mateo 5:18
Makapainteres kining pamahayag ni Jesus. Daghan ang mahimong isulti mahitungod niini kalabot sa balaod ug sa pagtuman ni Jesus sa balaod. Apan usa ka butang nga angay pamalandongan mao ang dakong paningkamot ni Jesus sa pagpakita sa kamahinungdanon dili lamang sa usa ka letra sa balaod, kondili, sa mas piho nga paagi, sa labing gamayng bahin sa usa ka letra.
Ang kinalabwang balaod sa Dios, nga gidala ngadto sa kahingpitan diha kang Cristo Jesus, mao ang gugma. โHigugmaa ang Ginoo nga imong Dios sa tibuok mong kasingkasing, sa tibuok mong hunahuna, sa tibuok mong kalag ug sa tibuok mong kusog.โ Ug, โHigugmaa ang imong isigkatawo sama sa imong kaugalingon.โ Kini mao ang kinalabwang katumanan sa balaod sa Dios.
Kon atong tan-awon kining teksto sa ibabaw diha sa kahayag sa kahingpitan sa balaod sa gugma, madungog nato si Jesus nga nag-ingon nga ang mga detalye sa gugma, bisan ang labing gamayng detalye, adunay dakong kamahinungdanon. Sa pagkatinuod, ang mga detalye mao ang makapatubo sa gugma sa hilabihan kadako. Kon mas gamay ang detalye nga gitagad sa usa ka tawo diha sa gugma sa Dios ug sa gugma sa isigkatawo, mas hingpit ang iyang pagtuman sa balaod sa gugma ngadto sa labing taas nga sukod.
Hunahunaa karon kadtong mga tawo nga gibutang sa Dios sa imong kinabuhi aron imong higugmaon. Kini ilabinang magamit sa mga sakop sa pamilya ug labi na gayod sa mga kapikas sa kaminyoon. Unsa ka ka matinagdanon sa matag gamayng buhat sa kaayo ug pagkamaluluy-on? Kanunay ka bang mangita og mga higayon sa paghatag og pulong nga makadasig? Naningkamot ka ba, bisan sa labing gagmayng detalye, sa pagpakita nga nagtagad ka, anaa ka alang kanila, ug may kabalaka ka kanila? Ang gugma anaa sa mga detalye ug ang mga detalye nagpadayag pag-ayo niining mahimayaong pagtuman sa balaod sa gugma sa Dios.
Ginoo sa tanang gugma, tabangi ako nga magmatinagdanon sa tanang dagko ug daghang gagmayng paagi diin gitawag ako sa paghigugma Kanimo ug sa uban. Ilabina, tabangi ako sa pagpangita sa labing gagmayng mga higayon sa pagpakita niining gugma ug sa ingon matuman ang Imong balaod. Jesus, nagsalig ako Kanimo.
Pagbayad sa Kataposang Sentimo
Huwebes sa Ikanapulong Semana sa Ordinaryong Panahon
โPakighusay dayon sa imong kontra samtang nagpaingon pa kamo sa hukmanan. Kay kon dili, itugyan ka sa imong kontra ngadto sa maghuhukom, ug itugyan ka sa maghuhukom ngadto sa guwardiya, ug ilabay ka ngadto sa bilanggoan. Amen, sultihan Ko ikaw, dili ka makagawas hangtod nga mabayran nimo ang kataposang sentimo.โ Mateo 5:25-26
Makahadlok kana nga hunahuna! Sa sinugdan, kini nga sugilanon mahimong tan-awon nga naghulagway sa hingpit nga pagkawala sa kalooy. โDili ka buhian hangtod nga mabayran mo ang kataposang sentabo.โ Apan sa pagkatinuod, kini usa ka buhat sa dakong gugma.
Ang mahinungdanon dinhi mao nga buot ni Jesus nga mapasig-uli kita ngadto Kaniya ug sa usag usa. Sa piho, buot Niya nga mawala sa atong mga kalag ang tanang kasuko, kapaitan ug pagdumot. Mao kana nga miingon Siya, โPakighusay dayon sa imong kaatbang samtang nagpaingon pa kamo sa hukmanan.โ Sa laing pagkasulti, pangayo og pasaylo ug pakig-uli sa dili ka pa moatubang sa lingkoranan sa paghukom sa diosnong hustisya.
Ang hustisya sa Dios hingpit nga matagbaw kon magpaubos kita, mangayo og pasaylo sa atong mga sayop, ug sinserong maningkamot sa pagtul-id sa atong nabuhat nga kadaot. Niana, ang matag โsentimoโ nabayran na. Apan ang dili dawaton sa Dios mao ang pagkagahi og ulo. Ang pagkagahi og ulo usa ka bug-at nga sala nga dili mapasaylo gawas kon biyaan kini. Ang pagkagahi og ulo sa pagdumili sa pag-angkon sa atong sayop sa usa ka panagbangi maoy labing angay kabalak-an. Ang pagkagahi og ulo sa atong pagdumili sa pag-usab sa atong mga pamaagi angay usab kabalak-an pag-ayo.
Ang silot mao nga ipatuman sa Dios ang Iyang hustisya kanato hangtod nga sa kataposan maghinulsol kita. Ug kini usa ka buhat sa gugma ug kalooy sa Dios tungod kay ang Iyang paghukom ilabinang nagtumong sa atong sala, nga mao lamang ang nagbabag sa atong paghigugma sa Dios ug sa uban.
Ang pagbayad hangtod sa kataposang sentabo mahimo usab nga tan-awon isip usa ka hulagway sa Purgatoryo. Gisultihan kita ni Jesus nga usbon ang atong kinabuhi karon, nga mopasaylo ug maghinulsol karon. Kon dili nato kini buhaton, kinahanglan gihapon natong atubangon kadtong mga sala human sa kamatayon, apan mas maayo gayod nga buhaton kini karon.
Pamalandongi kon unsa ang kinahanglan nimong โhusayon uban sa imong kaatbangโ karong adlawa. Kinsa ang imong kaatbang? Kinsa ang imong gikayugtan karong adlawa? Pag-ampo nga ipakita sa Dios kanimo ang dalan aron mahigawas ka nianang palas-ana ug makatagamtam ka sa tinuod nga kagawasan!
Ginoo, tabangi ako sa pagpasaylo ug sa pagkalimot. Tabangi ako sa pagpangita sa bisan unsang nagpugong kanako sa hingpit nga paghigugma Kanimo ug sa tanan kong isigkatawo. Putlia ang akong kasingkasing, O Ginoo. Jesus, nagsalig ako Kanimo.
Paglikay sa Sala
Biyernes sa Ikanapulong Semana sa Ordinaryong Panahon
โKon ang imong tuong mata maoy hinungdan nga makasala ka, lugita kini ug ilabay. Mas maayo pa alang kanimo nga mawad-an ka og usa ka bahin sa imong lawas kay sa itambog ang imong tibuok lawas ngadto sa Gehena. Ug kon ang imong tuong kamot maoy hinungdan nga makasala ka, putla kini ug ilabay.โ Mateo 5:29-30a
Mao ba gayod kini ang gipasabot ni Jesus? Sa literal nga paagi?
Makasiguro kita nga kining makapakurat nga mga pulong dili usa ka literal nga sugo, kondili usa ka simbolikong pahayag nga nagsugo kanato sa paglikay sa sala uban sa dakong kadasig, ug sa paglikay sa tanan nga magdala kanato ngadto sa sala. Ang mata mahimong sabton isip usa ka bintana ngadto sa atong kalag diin nagpuyo ang atong mga hunahuna ug mga tinguha. Ang kamot mahimong tan-awon isip usa ka simbolo sa atong mga buhat. Busa, kinahanglan natong wagtangon ang matag hunahuna, pagbati, tinguha, ug buhat nga magdala kanato ngadto sa sala.
Ang tinuod nga yawi sa pagsabot niining maong teksto mao ang pagtugot nga matandog kita sa gamhanang mga pulong nga gigamit ni Jesus. Wala Siya magpanuko sa pagsulti sa makapakurat nga paagi aron ipadayag kanato ang tawag nga atubangon uban sa dakong kadasig ang bisan unsang nagdala og sala sa atong kinabuhi. โLugita kiniโฆputla kini,โ miingon Siya. Sa laing pagkasulti, wagtanga ang imong sala ug ang tanan nga magdala kanimo ngadto sa sala sa hingpit ug walay pagduhaduha. Ang mata ug ang kamot dili makasasala sa ilang kaugalingon; hinuon, niining simbolikong pinulongan, gihisgotan sila isip mga butang nga magdala ngadto sa sala. Busa, kon ang pipila ka hunahuna o mga buhat magdala kanimo ngadto sa sala, kini ang mga bahin nga angay nimong tutokan ug wagtangon.
Mahitungod sa atong mga hunahuna, usahay tugotan nato ang atong kaugalingon nga maghunahuna pag-ayo ug balikbalik mahitungod niini o niana. Tungod niini, kining mga hunahuna mahimong magdala kanato ngadto sa sala. Ang labing mahinungdanon mao ang โpaglugitโ nianang unang hunahuna nga mamunga og daotan.
Mahitungod sa atong mga buhat, usahay ibutang nato ang atong kaugalingon sa mga kahimtang nga makatintal kanato ug magdala ngadto sa sala. Kining mga kahigayonan sa pagpakasala kinahanglang putlon gikan sa atong kinabuhi.
Pamalandongi karong adlawa kining direkta kaayo ug gamhanang mga pulong sa atong Ginoo. Himoa nga ang kusog sa Iyang mga pulong maoy magdasig sa pagbag-o ug sa paglikay sa tanang sala.
Akong Ginoo nga daghag gipangayo kanako, nagbasol ako sa akong sala ug nangayo ako sa Imong kalooy ug pasaylo. Palihog tabangi ako sa paglikay sa tanan nga magdala kanako ngadto sa sala ug sa pagtugyan Kanimo sa tanan kong hunahuna ug buhat matag adlaw. Jesus, nagsalig ako Kanimo.
Pagkamatinud-anon
Sabado sa Ikanapulong Semana sa Ordinaryong Panahon
โHimoa nga ang inyong โOoโ magpasabot og โOo,โ ug ang inyong โDiliโ magpasabot og โDili.โ Ang bisan unsang labaw pa niini gikan sa Daotan.โ Mateo 5:37
Makapainteres kining mga pulonga. Sa sinugdan, daw sobra ra ang pag-ingon nga โAng bisan unsang lain pa gikan sa Daotan.โ Apan siyempre, tungod kay kini mga pulong ni Jesus, mga pulong kini sa hingpit nga kamatuoran. Busa, unsa man ang gipasabot ni Jesus?
Kining mga pulonga gikan kang Jesus diha sa konteksto sa Iyang pagtudlo kanato mahitungod sa moralidad sa pagpanumpa. Sa kinauyokan, ang leksiyon usa ka pagpatin-aw sa sukaranang prinsipyo sa โpagkamatinud-anonโ nga makita sa Ikawalong Sugo. Gisultihan kita ni Jesus nga magmatinud-anon, nga isulti ang atong gipasabot ug tinuoron ang atong gisulti.
Usa sa mga hinungdan nga gihisgotan kini ni Jesus, sulod sa Iyang pagtulon-an bahin sa pagpanumpa, mao nga dili na unta kinahanglan ang usa ka maligdong nga panumpa sa atong ordinaryong inadlaw-adlaw nga panag-istoryahanay. Tinuod, adunay mga panumpa nga adunay maligdong nga kinaiya, sama sa mga panaad sa Kaminyoon o sa mga panaad ug mga saad nga maligdong nga gihimo sa mga pari ug mga relihiyoso. Sa pagkatinuod, sa matag Sakramento adunay usa ka matang sa maligdong nga saad nga gihimo. Apan, ang kinaiya niini nga mga saad labaw nga usa ka dayag nga pagpahayag sa pagtuo kaysa usa ka paagi sa pagpanubag sa mga tawo sa ilang mga saad.
Ang tinuod mao nga ang Ikawalong Sugo, nga nagtawag kanato nga mahimong mga tawong matinud-anon ug matarong, angay nang igo sa tanang inadlaw-adlaw nga kalihokan. Dili na kinahanglan nga kita โmanumpa sa Diosโ bahin niini o niana. Dili kita angay mobati nga kinahanglan natong kombinsihon ang uban nga nagsulti kita sa tinuod sa usa o laing kahimtang. Hinunoa, kon kita mga tawong matinud-anon ug matarong, nan igo na ang atong pulong ug ang atong isulti mahimong tinuod tungod lamang kay kita ang nagsulti niini.
Pamalandongi karon kon unsa ka kamatinud-anon sa tanang bahin sa imong kinabuhi. Naanad ka na ba sa pagsulti sa tinuod diha sa dagko ug gagmay nga mga butang sa kinabuhi? Nailhan ba sa mga tawo kining kinaiyaha diha kanimo? Ang pagsulti sa tinuod ug ang pagkahimong tawo nga nagkinabuhi sa kamatuoran maoy mga paagi sa pagmantala sa Ebanghelyo pinaagi sa atong mga buhat. Ipahinungod ang imong kaugalingon sa pagkamatinud-anon karon ug ang Ginoo magbuhat ug dagkong mga butang pinaagi sa imong mga pulong.
Ginoo sa kamatuoran, tabangi ako nga mahimong usa ka tawong matinud-anon ug matarong. Nagbasol ako sa mga higayon nga akong gituis ang kamatuoran, nanglimbong sa tago nga mga paagi, ug dayag nga namakak. Tabangi ako nga ang akong โOoโ kanunay mahiuyon sa Imong labing balaan nga kabubut-on ug tabangi ako nga kanunay motalikod sa mga dalan sa kasaypanan. Jesus, nagsalig ako Kanimo.
Ikanapulog Usang Semana sa Ordinaryong Panahon
Anaa usab sa Paperback & eBook
