पवित्र शास्त्राचे वाचन: खालील उताऱ्यांपैकी काही किंवा सर्व उतारे प्रार्थनापूर्वक वाचा:
मत्तय 27:1–23
मार्क 15:1–15
लूक 23:1–5
योहान 18:28–38
संदर्भ: येशूला पिलातासमोर दोनदा हजर करण्यात येते. पण मृत्युदंडाचा अंतिम निकाल देण्यापूर्वी पिलाताने येशूला हेरोदाकडे पाठवले होते, हे केवळ लूकच्या शुभवर्तमानात सांगितले आहे. इतर शुभवर्तमानांत पिलातासमोर येशूचा खटला सलग चालल्याचे वर्णन आहे. मात्र, पिलाताने सुरुवातीला येशूला ‘निर्दोष’ ठरवले आणि नंतर दबाव वाढल्यावर अनिच्छेने मृत्युदंडाचा निकाल दिला, असे सर्व शुभवर्तमानांत सांगितले आहे.
या ध्यानात पिलाताच्या पहिल्या निकालावर विशेष लक्ष द्या. त्या निकालात तो येशूला निर्दोष ठरवतो. त्याच्यासमोर आणलेल्या या धार्मिक वादात पिलाताला काही रस नाही. तरीही येशूच्या ठायी काहीतरी नीतिमान आहे, हे त्याला जाणवते असे दिसते. येशूविषयी त्याच्या पत्नीला पडलेले स्वप्न हेही त्यामागचे एक कारण होते (पाहा मत्तय 27:19).
पिलात हा यहुदियाचा रोमन राज्यपाल होता आणि तो सम्राट तिबेरियस सीझर ऑगस्टसच्या अधिपत्याखाली होता. पिलात कठोर शासक म्हणून ओळखला जात असे. बळाचा वापर करून शांतता राखण्याचा तो प्रयत्न करत असे. येशूला सोडले तर उठाव होईल, अशी त्याला भीती वाटत होती. म्हणून येशू निर्दोष आहे याची खात्री असूनही, त्याला निर्दोष ठरवल्याचे परिणाम स्वीकारण्याची पिलाताची तयारी नव्हती.
येशू स्वतःला राजा समजतो आणि त्यामुळे पिलाताच्या तसेच सम्राटाच्या सत्तेला आव्हान देतो, असा आरोप होता. पिलाताने येशूची चौकशी मुख्यतः याच आरोपावर केली.
चिंतन: या प्रसंगावर प्रार्थनापूर्वक चिंतन करा. त्यासाठी पुढील मुद्द्यांचा उपयोग करा.
- यहुदी अधिकाऱ्यांच्या ताब्यात येशूने रात्र घालवल्यानंतर पहाटे हा पहिला खटला चालला. कोणालाही मृत्युदंड देण्याचा अधिकार यहुद्यांना नव्हता. म्हणून त्यांनी येशूला रोमन राज्यपालाकडे आणले आणि त्याला मृत्युदंड द्यावा, अशी मागणी केली. येशू स्वतःला राजा बनवण्याचा प्रयत्न करत आहे आणि तो सम्राटासाठी धोकादायक आहे, असा त्यांनी दावा केला.
- तो प्रसंग डोळ्यांसमोर उभा करा. येशूचा जीव घेण्याचा धर्मनेत्यांचा आणि जमावाचा हेतू लक्षात घ्या. आपला हेतू साधण्यासाठी त्यांनी कसे कपट केले आणि सत्याचा विपर्यास कसा केला, याचाही विचार करा.
- पिलाताने येशूची केलेली चौकशी वेगवेगळ्या शुभवर्तमानांत कशी वर्णिली आहे, ते वाचा. या धार्मिक वादाबद्दल पिलात किती उदासीन आहे, हे लक्षात घ्या.
- येशूचे मौन आणि त्याने पिलाताला दिलेली मोजकी उत्तरे यांवरही मनन करा. तो स्वतःचा बचाव करत नाही, तर शिक्षा स्वीकारण्यास तयार होऊन तिथे उभा राहतो.
- योहान 18:38 मध्ये पिलात येशूला विचारतो, “सत्य म्हणजे काय?” सत्याची साक्ष देण्यासाठी आपण जगात आलो आहोत, असे येशूने सांगितल्यावर पिलात हा प्रश्न विचारतो. पिलाताच्या या प्रश्नावर स्वतःच्या जीवनाच्या संदर्भात मनन करा. सत्य म्हणजे नेमके काय? या प्रश्नाला तुम्ही काय उत्तर द्याल?
- पिलात येशूला सोडण्याचा प्रयत्न करतो, पण त्याला विरोध होतो. मग तो बरब्बा या गुन्हेगाराला पुढे आणतो आणि यहुद्यांना निवड करायला सांगतो: त्याने येशूला सोडावे की या कुख्यात गुन्हेगाराला? ही ‘राजकीय’ समस्या हाताळताना पिलाताच्या मनात काय विचार चालले असतील, याचा विचार करा.
- या प्रसंगाकडे बरब्बाच्या दृष्टीनेही पाहा. येशूऐवजी आपली सुटका व्हावी, अशी निवड लोकांनी केली, तेव्हा बरब्बाच्या मनात काय आले असेल, यावर मनन करा.
प्रमुख चित्र: पिलातासमोर येशू: पहिली चौकशी, तिसो
प्रायश्चित्तकाळातील ध्यानांची प्रस्तावना
- जीवनातील निर्णय आणि संकल्प
- झावळ्यांचा रविवार
- पवित्र गुरुवारापूर्वीच्या घडामोडी
- शेवटचे भोजन
- बागेत येशूची व्याकुळता
- येशूला अटक करून अन्नाससमोर आणले जाते
- येशूला कैफाससमोर आणले जाते
- येशूला पिलातासमोर आणले जाते
- येशूला हेरोदासमोर आणले जाते
- पिलातासमोर दुसरी सुनावणी
- येशू आपला क्रूस वाहतो आणि त्याला क्रूसावर खिळले जाते
- येशू क्रूसावरून बोलतो
- येशू क्रूसावर प्राण सोडतो
- आईच्या कुशीत येशूचे पार्थिव शरीर
- येशूला कबरीत ठेवले जाते
- पवित्र शनिवार
