मराठी

देव : तुमच्या जीवनाचा जिव्हाळ्याचा मार्गदर्शक

पवित्र तासाचा क्रम

बोध: आपला निर्माणकर्ता देव आपल्याशी अत्यंत वैयक्तिक नाते ठेवतो. तो या जगाच्या ‘पलीकडे’ आहे, म्हणजेच तो या जगाहून कितीतरी श्रेष्ठ आहे आणि त्याच्या मर्यादांपलीकडे आहे. पण त्याच वेळी तो या जगाच्या अगदी ‘निकट’ आहे आणि विशेषतः तुमच्या अगदी जवळ आहे. म्हणजेच तो तुमच्याजवळ आहे, तुमच्याशी त्याचे जिव्हाळ्याचे नाते आहे, तो तुमची काळजी घेतो आणि तुमच्यावर प्रेम करतो. तुमचे शरीर, मन आणि आत्मा यांचा प्रत्येक पैलू पूर्णपणे व्यापून टाकण्याची त्याला उत्कट इच्छा आहे.

देव तुम्हाला पूर्णपणे ओळखतो. तरीही तो स्वतःला तुमच्यावर लादणार नाही किंवा त्याचे प्रेम व मार्गदर्शन स्वीकारण्याची तुमच्यावर सक्ती करणार नाही. तुम्ही त्याला आमंत्रण दिले पाहिजे आणि तुमच्या जीवनाची सूत्रे त्याच्या हाती दिली पाहिजेत. ही निवड तुम्हाला एकदा, पुन्हा दुसऱ्यांदा आणि त्यानंतर आयुष्यातील प्रत्येक दिवसाच्या प्रत्येक क्षणी करायची आहे.

पुन्हा सांगायचे तर, देवाला तुम्हाला ‘पूर्णपणे व्यापून टाकायचे’ आहे. म्हणजेच, तुमचा देव आणि दैवी मार्गदर्शक म्हणून तुमच्या जीवनाच्या प्रत्येक अंगात प्रवेश करण्याची मोकळीक तुम्ही त्याला कोणतीही अट न घालता द्यावी, अशी त्याची इच्छा आहे. त्याला तुमच्यामध्ये आणि तुमच्याद्वारे कार्य करायचे आहे. त्याचे हृदय तुमच्या हृदयात वसावे, त्याचे विचार तुमचे विचार व्हावेत आणि त्याची कृती तुमची कृती व्हावी, अशी त्याची इच्छा आहे. 

तुमच्या जीवनाच्या प्रत्येक क्षेत्रात तुम्ही स्वतःला पूर्णपणे आणि न ढळता देवाला समर्पित केले, तरच हे घडते. देवाला समर्पित करण्यासाठी कोणतीही गोष्ट फार मोठी नाही आणि कोणतीही गोष्ट फार लहान नाही. मनातल्या अगदी छोट्या विचारापासून ते सर्वांच्या नजरेत भरणाऱ्या कृतीपर्यंत सर्व काही तुमचा प्रेमळ निर्माणकर्ता आणि मार्गदर्शक असलेल्या देवाच्या हाती सोपवले पाहिजे.

तुमच्या जीवनाची सूत्रे देवाच्या हाती असली, तरी तुम्ही स्वतःची ओळख गमावत नाही. उलट, तुमच्या जीवनातील प्रत्येक कृती त्याच्या अधीन असते, तेव्हा देवाने तुम्हाला जसे घडवले आहे तसे तुम्ही खऱ्या अर्थाने बनता. देवाशी पूर्णपणे एकरूप होण्यासाठी, त्याच्याशी जिव्हाळ्याचे नाते आणि ऐक्य अनुभवण्यासाठी तुमची निर्मिती झाली आहे. तुम्ही देवामध्ये राहावे आणि त्याने तुमच्यामध्ये राहावे, यासाठी तुमची निर्मिती झाली आहे. सर्व बाबतींत देव तुमचा मार्गदर्शक नसेल, तर तुमचे जीवन दिशाहीन आणि गोंधळाचे होते.

चिंतन: क्षणभर थांबा आणि या सुंदर सत्यावर मनन करा: विश्वाचा एकमेव सर्वशक्तिमान निर्माणकर्ता तुमच्या हृदयाचे दार ठोठावत आहे. तुमच्या हृदयात प्रवेश करून जीवनाच्या वाटेवरून तुम्हाला शाश्वत आनंदाकडे घेऊन जाण्याची त्याची इच्छा आहे. (मौन चिंतन)

त्याचे आमंत्रण ऐकताना संपूर्ण सृष्टीचा राजा, नेता, स्वामी आणि अधिपती असलेल्या त्याला ‘हो’ म्हणा. तुमच्याशी जिव्हाळ्याचे नाते असलेला देव आणि जीवनाच्या वाटेवरचा तुमचा मार्गदर्शक म्हणून त्याला ‘हो’ म्हणा. आज तुम्ही जे आहात आणि पुढे जे व्हाल, ते सर्व त्याला समर्पित करा. काहीही स्वतःकडे राखून ठेवू नका. (मौन चिंतन)

हे प्रभू, माझे सारे स्वातंत्र्य, माझी स्मरणशक्ती, माझी बुद्धी आणि माझी संपूर्ण इच्छाशक्ती, माझ्याजवळ जे काही आहे आणि जे काही माझे आहे, ते सर्व घे आणि स्वीकार…(मौन चिंतन)

पायाभूत ध्यानांची ओळख

  1. देव : सर्व अस्तित्वाचा निर्माणकर्ता
  2. देव : तुमच्या जीवनाचा जिव्हाळ्याचा मार्गदर्शक
  3. देव : तुमच्या जीवनाचे ध्येय, प्रयोजन आणि अंतिम गंतव्य
  4. देवदूतांचे पाप
  5. आदाम आणि हव्वा यांचे पाप
  6. पापाचे सर्वसाधारण परिणाम
  7. सातव्या ते नवव्या ध्यानांची ओळख
  8. वैयक्तिक पाप : दैवी सूर्याच्या प्रकाशात
  9. माझ्या जीवनातील वैयक्तिक पापे
  10. अपमान आणि नम्रता
  11. मृत्यू
  12. न्यायनिवाडा
  13. नरक

वहीत लिहिण्याचे सराव

अनुक्रमणिका

चित्र: ‘देवपिता आणि पवित्र आत्मा’ — दोमेनिको अंतोनियो वाक्कारो, मॉरित्सहाउस