I. Kuondoka
Miiba na michongoma kwa jasho la uso
Ndiyo mavuno yote ya taabu yangu hadi sasa.
Niambie, Baba: inawezekanaje
Kushindwa kote huku kukupendeze?
Wengine wangeweza kuipanda ardhi Yako vizuri zaidi.
Je, sijakugharimu zaidi ya thamani yangu?
Afadhali sasa niondoke
Kuliko kukukatisha tamaa na kukuhuzunisha zaidi.
Mizigo yangu yote nimeifunga; mbele Yako
Naondoka na urithi wangu.
Anasa za ugenini zitapumbaza uchungu
Wa kazi yangu yote niliyoifanya bure.
Njaa imeudhoofisha mwili na moyo wangu,
Tangu siku ile nilipoondoka.
Niliamini ahadi tupu.
Je, nimekuwa nikidanganywa muda wote huu?
II. Kurudi
Dhamiri inaniita: “Rudi nyumbani!”
Huko naweza kutumaini kupata mkate kwa kazi yangu.
Mbingu ilishuhudia dhambi hizi zangu.
Sitakula tena pamoja na nguruwe hawa.
“Baba,” nitasema, “kwa yote niliyotenda,
Sistahili tena kuitwa mwana Wako.
Nakuahidi nitafanya kazi kwa bidii zaidi,
Nitakuwa mtumishi bora zaidi.”
Unaponiona kwa mbali
Nikiwa na matambara na kovu nililojitia mwenyewe,
Huruma kutoka moyoni Mwako wa Baba
Hunivika na kunisihi nisiondoke tena kamwe.
Kwa ajili yangu niliyepunguza mali Yako kwa nusu,
Je, unamchinja ndama aliyenoneshwa?
Baba, nachukia jinsi nilivyokuwa.
Niambie, unawezaje kusherehekea?
III. Sherehe
Mwanangu mpendwa sana, hapo zamani ulikuwa pamoja Nami,
Nilipofanya kazi pamoja nawe kwa subira,
Tukipanda mbegu katika kila udongo,
Nami nilipata furaha katika uwepo wako.
Mahangaiko ya moyo yalikujaza hofu.
Ulipoondoka, nilingoja hapa,
Nikikutafuta huku na kule, mbali na karibu,
Ili uwe tena kando Yangu.
Sasa uko nyumbani, hai na salama.
Ifukuze kabisa ile minong’ono ya uongo ya zamani!
Huna kitu wala mtu wa kumwogopa,
Ikiwa utabaki hapa pamoja Nami.
Baba, usiniache nipotee.
Mkate wangu wa kila siku unipe leo.
Afadhali kulala katika ulinzi Wako wa hakika
Kuliko kukesha kwa wasiwasi mahali pengine.
IV. Mwaliko
Ni nini hiki ninachosikia kuhusu mwana aliyepotoka?
Aliporudi, karamu ikaanza?
Ningepaswa kuacha utumishi wangu wa taabu,
Ili nami nifurahie karamu.
Nikifanya kazi kwa bidii mchana na usiku,
Nilitumikishwa chini ya macho Yako yasiyokosea.
Kila kosa langu, hata moja,
Lilinifunga katika taabu zaidi.
Kwa kunipandia mbegu kwa machozi na jasho,
Mwanangu mpendwa, usijute.
Sikuyahesabu sana mafanikio yako
Kama nilivyohesabu juhudi zako na uchungu wa kazi yako.
Ndugu yako sasa amerudi.
Ingia nyumbani ambako nimetamani
Ukae nasi tule pamoja,
Na ujue kwamba yote niliyo nayo ni yako.
-Padre Timothy J. Draper
Picha Kuu: Kurudi kwa Mwana Mpotevu, na BARTOLOMÉ ESTEBAN MURILLO