Pangandam nga Pag-ampo:
Akong minahal ug balaang Ginoo, sa akong pagsugod sa pagsusi sa akong konsensya, tabangi ako nga makita ang akong kalag sama sa Imong pagtan-aw niini. Sa Imong hingpit nga kalooy, gihigugma Mo ako ingon nga mao ako, bisan pa nga ang akong sala nagpugong kanako sa pagtugyan sa akong kinabuhi nga mas hingpit diha Kanimo.
Hinaot nga makita ko ang akong sala aron hinayhinay Mo akong mapahigawas gikan niining mga babag sa Imong gugma. Hatagi ako og kaisog ug pagsalig Kanimo nga mao gayod ang Gugma ug Kalooy. Jesus, nagsalig ako Kanimo. Kaloy-i ako. Amen.
Garbo: Ang garbo usa ka sayop nga pagtan-aw sa atong kaugalingon, usa ka dili tinuod nga pagtuo kon unsa kita.
Nagpakalabaw ba ako sa akong panghunahuna, pagsulti o paglihok? Matapobre ba ako? Mapasipalahon ug mapahitas-on ba ang akong paglihok o pagdala sa akong kaugalingon? Nag-isip ba ako nga labaw ako sa uban? Nagpugos ba ako nga ilhon ang akong bili? Nagtinguha ba ako nga kanunayng mauna? Nangayo ba ako og tambag? Andam ba ako modawat og tambag? Sa bisan unsang paagi, nagdaogdaog ba ako sa uban? Mahilig ba ako sa pagmando-mando? Nagsulti ba ako og daotan batok sa uban? Nakapamakak ba ako bahin sa uban? Gibutyag ba nako ang mga sayop sa uban? Naningkamot ba ako nga ipasangil sa uban ang sala aron makapangulipas ang akong kaugalingon? Aduna bay tawo nga dili ko gustong istoryahon? Aduna bay tawo nga dugay na nakong wala istoryaha? Hilig ba ako makiglalis? Mapasipalahon ba ako kon makiglalis? Kon makiglalis ako, nagpakalabaw ba ako nga daw nahibalo sa tanan? Sobra ba akong kabalaka kon unsay hunahuna sa uban bahin kanako? Balat-sibuyas ba ako? Dali ba akong masakitan?
Kasina: Ang kasina usa ka kasubo nga atong bation tungod sa maayong mahitabo sa atong isigkatawo.
Masubo ba ako sa kauswagan sa uban? Sa ilang kalampusan sa mga dula? Sa mga paugnat sa kusog? Malipay ba ako sa ilang kapakyasan? Masina ba ako sa bahandi sa uban?
Katapolan: Ang katapolan usa ka matang sa katalawan ug pag-ayad nga maoy hinungdan nga atong mapasagdan ug dili tumanon ang atong mga katungdanan imbes nga disiplinahon ang atong kaugalingon.
Sobra ba ang akong paghigugma sa pagpahulay hangtod nga mapasagdan ko ang akong mga katungdanan? Tapolan ba ako sa akong mga buhat? Sobra ba ang akong pagkahilig sa pagpahulay? Tapolan ba ang akong postura sa pagtubag sa mga pag-ampo? Nagluhod ba ako nga daw nagpahayahay lang? Nagakalipay ba ako sa walay kapuslanang panag-istorya? Kulang ba ako sa kadasig sa pag-alagad sa Dios?
Kaulag: Ang kaulag mao ang paghigugma sa mga kalipay nga supak sa kaputli.
Nagtinguha ba ako o nagbuhat og mga butang nga mahugaw? Nagakalipay ba ako sa paglingaw sa mahugaw nga mga hunahuna o tinguha? Nagbasa ba ako og mahugaw nga mga sinulat, naminaw og musika nga adunay mahugaw nga mga pulong, o mitan-aw og mahugaw nga mga hulagway, sa mga litrato man, sa telebisyon, sa mga salida o sa Internet? Nagpukaw ba ako og seksuwal nga tinguha sa akong kaugalingon o sa uban pinaagi sa mahugaw nga paghalok, paggakos o paghikap? Nagbuhat ba ako nga nag-inusara og mahugaw nga mga buhat, sama sa masturbasyon? Nagbisti ba ako nga dili desente o sobra ba akong kabalaka sa akong panagway? Naggamit ba ako og bastos nga pinulongan o nagsulti o naminaw og mahugaw nga mga komedya o sugilanon? Nagpadala ba ako sa mga tinguha sa pagpanapaw bisan sa akong imahinasyon lamang?
Kahakog: Ang kahakog mao ang dili hustong paghigugma sa mga butang niining kalibotana.
Gigamit ba nako ang akong kuwarta sa dili hustong paagi o alang lamang sa akong kaugalingon? Gituman ba nako ang akong mga katungdanan sa hustisya ngadto sa akong isigkatawo? Gituman ba nako ang akong mga katungdanan sa hustisya ngadto sa Simbahan?
Pagpatuyang sa Pagkaon ug Pag-inom: Ang pagpatuyang sa pagkaon ug pag-inom mao ang dili hustong paghigugma sa pagkaon ug pag-inom.
Nagkaon ba ako aron mabuhi o nabuhi aron mokaon? Nag-inom ba ako og sobra? Nahubog ba ako? Gigamit ba nako sa dili hustong paagi ang mga tambal nga gireseta? Naggamit ba ako og ilegal nga mga droga? Gipasagdan ba nako nga maadik ako sa alkohol ug/o mga droga?
Kasuko: Ang kasuko usa ka pagbati sa kalag nga nagtukmod kanato sa mapintas nga pagsalikway sa bisan unsang makapasakit o dili makapahimuot kanato.
Dali ba akong masuko? Bisan ang pinakagamay nga butang makapasuko ba kanako? Napakyas ba ako sa pagpugong sa unang mga timailhan sa kasuko? Napakyas ba ako sa maayong pagpakig-uban sa tanan? Sige ba nakong hunahunaon ang mga pagtamay o pagpasakit kanako, ug magdahom pa gani nga gitamay o gipasakitan ako bisan wala? Nalipay ba ako sa mga katalagman nga midangat sa uban? Naghunahuna ba ako og mga paagi sa pagpanimalos? Sa โpagbalos aron mabawi ang gibuhat kanakoโ? Hilig ba akong makiglalis? Hilig ba akong mosupak? Hilig ba akong mobiaybiay sa mga tawo, mga dapit, o mga butang? Lisod ba akong pakig-ubanan? Nagtanom ba ako og dumot ug nagpabiling dili makig-uli sa uban? Naghisgot ba ako sa mga sayop sa uban? Gibutyag ba nako ang mga sayop o mga kakulangan sa uban? Gibutyag ba nako ang mga sayop sa uban tungod sa dili maayong tuyo?
Pagsusi sa Konsensya: Pito ka Pangulong Sala
Pagsusi sa Konsensya: Napulo ka Sugo
Sinemanang Pagsusi sa Konsensya alang sa Balaang Takna
Pagsusi sa Konsensya: Pagtuo, Paglaom & Gugma
Mubo nga Pagsusi sa Konsensya: Pagtuo, Paglaom & Gugma
Adlaw-adlaw nga Kinatibuk-ang Pagsusi sa Konsensya sa Gabii
Pagsusi sa Kahiladman – Kompletong Talaan sa mga Sulod
Ikaduhang Bahin: Mga Ignasyanong Pamalandong nga Gihan-ay Sumala sa Tuig Liturhiko
Ikatulong Bahin: Dugang nga mga Materyal sa Pag-ampo nga Magamit sa Tibuok Tuig
