விழாக்களும் பெருவிழாக்களும்

திருவருகைக் காலத்திற்கான தயாரிப்பு

திருத்தூதர் புனித அந்திரேயாவின் திருவிழா, நவம்பர் 30

இயேசு கலிலேயக் கடலோரமாக நடந்து சென்றபோது, பேதுரு எனப்படும் சீமோனும் அவருடைய சகோதரர் அந்திரேயாவும் கடலில் வலை வீசிக்கொண்டிருப்பதைக் கண்டார்; அவர்கள் மீனவர்கள். அவர் அவர்களிடம், “என்னைப் பின்தொடர்ந்து வாருங்கள்; நான் உங்களை மனிதரைப் பிடிப்பவர் ஆக்குவேன்” என்றார். உடனே அவர்கள் தங்கள் வலைகளை விட்டுவிட்டு அவரைப் பின்தொடர்ந்தார்கள். மத்தேயு 4:18-20

திருவருகைக் காலத்தைத் தொடங்கும் இந்நாளில் எவ்வளவு அருமையான விழாவைக் கொண்டாடுகிறோம்! நமது திருவருகைக் காலக் கொண்டாட்டத்தை எவ்வாறு தொடங்குவது என்பதற்குச் சிறந்த முன்மாதிரியாக விளங்கும் திருத்தூதரான புனித அந்திரேயாவை இன்று போற்றுகிறோம்.

மேலுள்ள இறைவார்த்தைப் பகுதி நாம் சிந்திப்பதற்குப் பலவற்றை வெளிப்படுத்துகிறது. அந்திரேயாவும் அவருடைய சகோதரர் பேதுருவும் மீனவர்கள். இந்த இரு மீனவர்களும் கடுமையாக உழைத்துக்கொண்டிருந்தபோது, திடீரென அவர்களுக்கு அறிமுகமில்லாத இயேசு அவ்வழியே நடந்து வந்து அவர்களை அழைக்கிறார். அவர்கள் உடனே தங்கள் வாழ்வாதாரத்தை விட்டுவிட்டு இயேசுவைப் பின்தொடர்கிறார்கள்.

இங்கே நிகழ்ந்ததைக் கவனிக்கத் தவறாதீர்கள். குறிப்பாக, இரண்டு நிகழ்வுகள் நடந்தன: 1) இயேசு இந்த இரு மீனவர்களின் அருகே நடந்து சென்று, “என்னைப் பின்தொடர்ந்து வாருங்கள்” என்றார். 2) அதற்குப் பதிலாக, இவ்விருவரும் உடனே “தங்கள் வலைகளை விட்டுவிட்டு அவரைப் பின்தொடர்ந்தார்கள்.”

புனித அந்திரேயா அழைக்கப்பட்ட இந்த நிகழ்வு, திருவருகைக் காலத்தின் தொடக்கத்திற்கு மிகவும் பொருத்தமானது. ஏனெனில், இயேசு நம்மைப் புதிதாக அழைப்பதைக் கேட்கும் காலமாகத் திருவருகைக் காலம் அமைய வேண்டும். அது நமக்குப் புதிய தொடக்கமாகவும் புதிய மனமாற்றமாகவும் அமைய வேண்டும். திருவருகைக் காலம் தொடங்கும்போது, “என்னைப் பின்தொடர்ந்து வாருங்கள்!” என்று இயேசு நம்மை அழைப்பதை நாம் கேட்க வேண்டும். தமது தெய்வீகத் திட்டத்திற்கும் நோக்கத்திற்கும் நம்மை முழுமையாக ஒப்படைக்க அவர் விடுக்கும் அழைப்பை நாம் கேட்க வேண்டும். அவருக்குச் செவிகொடுங்கள். அவர் அழைப்பது உங்களுக்குக் கேட்கிறதா?

திருவருகைக் காலத்தின் தொடக்கத்தில், நமது பதில்மொழியும் புனித அந்திரேயாவின் பதில்மொழியைப் போலவே இருக்க வேண்டும். எவ்விதத் தயக்கமுமின்றி, அனைத்தையும் விட்டுவிட்டு நாம் அவரைப் பின்தொடர வேண்டும். இதன் பொருள் என்ன? கிறிஸ்துவின் அழைப்புக்குப் பதிலளிப்பதிலிருந்து நம்மைத் தடுக்கும் எதையும், அனைத்தையும் நாம் விட்டுவிட வேண்டும் என்பதே இதன் பொருள். இயேசு நம்மிடம் கேட்பது எதுவாயினும், அதைச் செய்ய நாம் தயாராகவும் மனமுள்ளவர்களாகவும் இருக்க வேண்டும். அவர் கேட்கும் அந்தக் கணமே அதைச் செய்யவும் நாம் தயாராக இருக்க வேண்டும்.

திருவருகைக் காலம் புதிதாகத் தொடங்குவதற்கான காலம் என்பதை இன்று சிந்தியுங்கள். கிறிஸ்துவிடம் வருவதற்கான அழைப்பை ஏற்றுக்கொள்ள உங்களைத் திறந்துவைக்கும் காலம் இது. அவர் உங்களை அழைப்பதைக் கேளுங்கள்; முழு இதயத்தோடு அவருக்குப் பதிலளியுங்கள்.

ஆண்டவரே, எல்லாவற்றிற்கும் மேலாக உம்மை அன்பு செய்கிறேன். உம்மைப் பின்பற்ற என்னை அழைக்கும் உமது மென்மையான, அதே வேளையில் உறுதியான குரலைக் கேட்க எனக்கு உதவும். உமது மென்மையான அழைப்பிற்கு என்னை முழுமையாகக் கையளித்துப் பதிலளிக்கத் தேவையான துணிவை எனக்குத் தாரும். இந்தத் திருவருகைக் காலம் புதிய தொடக்கங்களுக்கும், உம்மைப் பின்பற்றுவதில் இன்னும் ஆழமான உறுதிக்கும் உரிய காலமாக அமையட்டும். இயேசுவே, நான் உம்மில் நம்பிக்கை வைக்கிறேன்.

கொடையாக வழங்கப்பட்ட நம் புனித அன்னை

புனித கன்னி மரியாவின் அமல உற்பவப் பெருவிழா, டிசம்பர் 8

மரியா, “இதோ, நான் ஆண்டவரின் அடிமை. உமது வார்த்தையின்படியே எனக்கு ஆகட்டும்” என்றார். லூக்கா 1:38

பெருவிழா நல்வாழ்த்துகள்! இது கொண்டாடி மகிழ வேண்டிய நாள்! கடவுளின் ஆழ்ந்த இரக்கத்தின் செயலாக விளங்கும் நம் தூய அன்னையின் மகிமையும் அற்புதமும் நிறைந்த அமலோற்பவத்தை இன்று போற்றுகிறோம்.

அமலோற்பவத்தை ஆழ்ந்த இரக்கத்தின் செயலாக நாம் காண்பது பொருத்தமானதே. ஏன் அவ்வாறு கூறுகிறோம்? இந்தப் பெருவிழா இரக்கத்தோடு இவ்வளவு நெருக்கமாக இணைந்திருப்பது எவ்வாறு?

இரக்கம் என்பது கடவுள் இலவசமாக அளிக்கும் கொடை. “இலவசமாக” என்பதன் பொருள், அது நமது தகுதியால் கிடைப்பதோ சம்பாதித்துப் பெறப்படுவதோ அல்ல என்பதே. இரக்கம் என்பது கடவுள் நமக்குக் கொடுக்கக் கடமைப்பட்ட ஒன்றல்ல. அவ்வாறு இருந்தால், அது இரக்கமாக இருக்காது; நமது உரிமையாக இருக்கும். ஆனால், இரக்கத்தின்மீது நமக்கு எந்த உரிமையும் இல்லை. கடவுள் அதைத் தாமாகவே அளிக்கிறார்; நிறைவாகவும் அளிக்கிறார்.

மகிமைமிக்க இந்த அமலோற்பவப் பெருவிழாவை, இலவசமாக அளிக்கப்பட்ட கொடையாக இரண்டு கோணங்களில் காண்பது முக்கியம். முதலாவதாக, “அமலோற்பவம்” என்பதன் பொருள், கடவுள் தூய கன்னி மரியாவைப் படைத்தபோது, அவரைப் பாவமின்றிப் படைத்தார் என்பதாகும். முன்னரே செயல்படும் அருள் என்று நாம் அழைக்கும் அருளின் வழியாக இது நிகழ்ந்தது. அவருக்கு அளிக்கப்பட்ட இந்த அருள், கடவுளின் நிறைவான, இலவசமாக வழங்கப்படும் இரக்கத்தின் செயலாகும். அவர் அதைச் சம்பாதிக்கவுமில்லை, அதற்குத் தகுதி பெறவுமில்லை. மாறாக, மகன் உலகிற்கு வருவதற்குப் பொருத்தமான கருவியாக அவர் இருக்கும்படி, கடவுள் தமது நன்மைத்தனத்தில் அவரை ஜென்மப் பாவமின்றிப் படைக்கத் திருவுளம் கொண்டார். மரியாவோ, தம் பங்கிற்கு, இந்தக் கொடையை ஏற்றுக்கொண்டு, தமது சுதந்திர விருப்பத்தைத் தொடர்ந்து செயல்படுத்துவதன் வழியாக வாழ்நாள் முழுவதும் பாவமின்றி நிலைத்திருக்கத் தேர்ந்துகொண்டார்.

இரண்டாவதாக, நம் தூய அன்னையை மாசின்றிப் படைத்த கடவுள், அவரைத் தமக்காக மட்டும் வைத்துக்கொள்ளவில்லை. அவரைப் பொறுத்தவரையில் கடவுள் தன்னலம் கொண்டிருக்கவில்லை. மாறாக, தமது படைப்பின் இந்த முழுமைமிக்கவரை நமக்கே அன்னையாக அளிக்கத் திருவுளம் கொண்டார். அமல அன்னை மரியா இப்போது கடவுளின் அருளும் இரக்கமும் சார்ந்த ஒழுங்கில் நமது ஆன்மிக அன்னையாக இருக்கிறார். இதுவும் நம் அன்புக் கடவுள் இலவசமாக அளிக்கும் நிறைவான இரக்கத்தின் செயலாகும். இத்தகைய ஆன்மிக அன்னையையும் பாதுகாவலியையும் பெற நாம் தகுதியற்றவர்கள். ஆயினும், அவர் நமக்கு அளிக்கப்பட்டுள்ளார். ஒரு முழுமையான அன்னை செய்வதுபோல, அவர் எப்போதும் நமக்காகப் பரிந்துபேசி, கடவுளிடமிருந்து பல அருள்கொடைகளை நமக்குப் பெற்றுத் தருகிறார்.

கடவுளின் இரக்கம் இலவசமாக அளித்த இந்த இருவகைக் கொடையை இன்று சிந்தியுங்கள்: 1) அவர் தமது இரக்கத்தால் மரியாவை மாசின்றிப் படைத்தார்; 2) அவரை நமக்கே அன்னையாகவும் அரசியாகவும் அளித்தார். இன்றும் ஆண்டு முழுவதும் அவரது தாயன்புமிக்க பராமரிப்பை நாடுங்கள்!

என் அரசியான அன்புத் தாயே, படைக்கப்பட்ட ஓர் உயிராக மட்டுமே இருந்தாலும், எல்லா வகையிலும் நிறைவுள்ளவராக விளங்கும் உமது அழகையும் புனிதத்தையும் உற்றுநோக்குகிறேன். கடவுளிடமிருந்து தனித்துவமிக்க இந்த அருள் உமக்குக் கொடையாக வழங்கப்பட்டுள்ளது; அதற்கு நீர் முழுமையாக ஒத்துழைத்தீர். உமது தாயன்பையும் பராமரிப்பையும் நான் எப்போதும் சார்ந்திருப்பேனாக; தந்தையின் திட்டத்தின்படி கடவுளின் அருளை நீர் எனக்கு வழங்க எப்போதும் இடமளிப்பேனாக. அன்புத் தாயே, நீர் எங்கள் அனைவருக்கும் இரக்கத்தினால் இலவசமாக வழங்கப்பட்ட கொடை! அன்னை மரியே, நான் உம்மை அன்பு செய்கிறேன். எனக்காக வேண்டிக்கொள்ளும். இயேசுவே, நான் உம்மில் நம்பிக்கை வைக்கிறேன்.

அமெரிக்கக் கண்டங்களின் அன்னை

குவாதலூப்பே அன்னையின் திருவிழா, டிசம்பர் 12

“அருள் நிறைந்தவரே, வாழ்க! ஆண்டவர் உம்முடன் இருக்கிறார்.” லூக்கா 1:28

இன்று மெக்சிகோவிலும், அமெரிக்க ஐக்கிய நாடுகளிலும், அமெரிக்கக் கண்டங்கள் எங்கும் குவாதலூப்பே அன்னையைப் போற்றுகிறோம்.

டிசம்பர் 9, 1531 அன்று, கிறிஸ்தவ நம்பிக்கையைத் தழுவிய பூர்வகுடி மக்களில் ஒருவரான ஹுவான் தியேகோ, திருப்பலியில் பங்கேற்பதற்காக அருகிலுள்ள ஒரு கிராமத்திற்கு நடந்து சென்றுகொண்டிருந்தார். வழியில், விண்ணக இசை ஒலிக்க, ஒரு பெண் அவருக்குக் காட்சியளித்தார். அவர் ஹுவானிடம் இவ்வாறு அறிவித்தார்:

உனக்கும், என்னை அன்பு செய்து, என்னில் நம்பிக்கை வைத்து, என் உதவியை நாடும் மனிதர்கள் அனைவருக்கும் நான் இரக்கமுள்ள தாயாக இருக்கிறேன். ஆகவே, மெக்சிகோ நகரில் உள்ள ஆயரின் இல்லத்திற்குச் சென்று, கன்னி மரியா தனது ஆழ்ந்த விருப்பத்தை அவருக்குத் தெரிவிக்க உன்னை அனுப்பியதாகச் சொல்.

ஹுவான் தியேகோ முதலில் இதை நிறைவேற்றவில்லை என்றாலும், அடுத்தடுத்த காட்சிகளில் குவாதலூப்பே கன்னி அன்னை வழங்கிய அறிவுரையை இறுதியில் பின்பற்றினார். அங்கே ஒரு திருத்தலம் கட்டப்பட வேண்டும் என்று கன்னி அன்னை விரும்புவதற்கு அடையாளமாக, மலை உச்சியிலிருந்து புதிதாக மலர்ந்த ரோஜா மலர்களை ஆயரிடம் கொண்டுவந்தார். ஆண்டின் அந்தக் காலத்தில் பொதுவாக ரோஜாக்கள் மலர்வதில்லை; எனவே, இது தெளிவாகவே ஓர் அற்புத அடையாளமாக இருந்தது. ஆயரின் இல்லத்திற்கு வந்ததும், ரோஜா மலர்களைச் சுமந்திருந்த தமது மேலங்கியை (தில்மா) ஹுவான் தியேகோ விரித்து, ஆயருக்கு முன்பாகத் தரையில் அந்த மலர்களைக் கொட்டினார். அவர் அவ்வாறு செய்தபோது, குவாதலூப்பே கன்னி அன்னை அந்த மேலங்கியின் நூலிழைகளில் அற்புதமாகத் தோன்றினார். அதைக் காண விரும்பும் அனைவரும் மெக்சிகோ நகரிலுள்ள திருத்தலத்தில் இன்றும் அந்த மேலங்கியைக் காணலாம். அறிவியல் கண்ணோட்டத்தில் வியப்புக்குரியது என்னவென்றால், அந்த உருவம் வண்ணம் தீட்டப்பட்டதல்ல; மாறாக, ஒவ்வொரு நூலிழையும் நிறம் மாறி இந்தப் புனித உருவத்தை உருவாக்கியுள்ளது. மேலும், அந்த மேலங்கி கள்ளிச் செடியிலிருந்து தயாரிக்கப்பட்டது; அது பொதுவாகப் பத்து ஆண்டுகளுக்குள் சிதைந்துவிடும். இன்று அந்த மேலங்கி ஏறக்குறைய ஐந்நூறு ஆண்டுகள் பழமையானது; இருந்தாலும், அது எப்போதும்போலப் புதுமையும் பொலிவும் கொண்டதாக இருக்கிறது.

ஹுவான் தியேகோவின் தில்மாவில் நிகழ்ந்த அற்புதத்தைப் பற்றிச் சிந்திப்பது வியப்பூட்டுவதாக இருந்தாலும், நம் புனித அன்னை ஹுவானுக்குக் காட்சியளித்தபோது வழங்கிய செய்தி அதைவிட மிகவும் முக்கியமானது. “நான் உன் இரக்கமுள்ள தாய்…” என்று அவர் கூறினார். நாம் அவரில் நம்பிக்கை வைத்து, அவரது உதவியை நாடும்போது அவர் நம் தாயாக இருக்கிறார்.

ஆகவே, அன்னையின் திருவிழாவை வெறுமனே பண்பாடு சார்ந்ததாகவோ, வரலாறு சார்ந்ததாகவோ, அற்புத நிகழ்வாகவோ மட்டும் பார்க்கக்கூடாது. மாறாக, விண்ணக அரசியை நம் தாயாக ஏற்றுக்கொள்ளும்படி அவர் விடுக்கும் மகிமைமிக்க அழைப்பாக அதைக் காண வேண்டும்.

இன்று, நம் விண்ணக அன்னையுடன் உங்களுக்கு உள்ள உறவைப் பற்றிச் சிந்தியுங்கள். அவரது பரிந்துரையிலும் உதவியிலும் நீங்கள் நம்பிக்கை வைக்கிறீர்களா? இயேசு உங்களை அவரது பராமரிப்பில் ஒப்படைத்திருக்கிறார் என்பது உங்களுக்குத் தெரியுமா? உங்கள் வாழ்வை அவரது பாதுகாப்பிற்கு அர்ப்பணித்திருக்கிறீர்களா? நம் புனித அன்னையைப் போற்றுவதற்கான சிறந்த வழிகளில் ஒன்று செபமாலை செபிப்பது. இன்று அதைச் செபியுங்கள்; குறைந்தது ஒரு பத்துமணியாவது செபியுங்கள். அவ்வாறு செபிக்கும்போது, அவரது திருமகன் இயேசுவிடம் உங்களை மென்மையாக வழிநடத்துமாறு அன்னையிடம் கேளுங்கள்.

அன்புத் தாயே, குவாதலூப்பே கன்னி அன்னையே, உமது தாய்மைப் பராமரிப்பிற்கு என்னை அர்ப்பணிக்கிறேன். உமது நிறைவான அக்கறைக்கும் உதவிக்கும் இரக்கத்திற்கும் நன்றி செலுத்துகிறேன். உம்மில் என் நம்பிக்கையை வைக்கும் எனக்காகப் பரிந்துபேசும். உமது அழகிய இதயத்தால் உமது திருமகன் இயேசுவை நான் அன்பு செய்யும்படி, அவரிடம் என்னை அழைத்துச் செல்லும். அன்னை மரியே, எங்களுக்காக வேண்டிக்கொள்ளும். புனித ஹுவான் தியேகோவே, எங்களுக்காக வேண்டிக்கொள்ளும். இயேசுவே, நான் உம்மில் நம்பிக்கை வைக்கிறேன்.

“கத்தோலிக்க அன்றாடச் சிந்தனைகள் வரிசை”யின் நான்கு தொகுதிகளும்

பொருளடக்கம் – திருவருகைக் காலம் & கிறிஸ்து பிறப்பு

காகித அட்டைப் பதிப்பு & மின்னூல் வடிவிலும் கிடைக்கிறது

Amazon.com – Google Play – iTunes – Barnes and Noble