ಕನ್ನಡ

ಆಗಮನಕಾಲದ “ಓ” ಅಂತಿಫೋನ್‌ಗಳು

ಕ್ರಿಸ್ಮಸ್‌ನ ಸಿದ್ಧತೆಗಾಗಿ ಡಿಸೆಂಬರ್ 17–23ರವರೆಗೆ 7 ದಿನಗಳ ಕಾಲ “ಓ ಅಂತಿಫೋನ್‌ಗಳನ್ನು” ಪ್ರಾರ್ಥಿಸಲಾಗುತ್ತದೆ. ಕಾಲಯಾಮ ಪ್ರಾರ್ಥನೆಯ ಪರಿಚಯವಿರುವವರಿಗೆ, ಇವು ಪ್ರತಿದಿನ ಮಾಗ್ನಿಫಿಕಾತ್ ಸ್ತುತಿಗೀತೆಯೊಂದಿಗೆ ಬಳಸುವ ಅಂತಿಫೋನ್‌ಗಳಾಗಿವೆ. ಇವು ಯೆಶಾಯರ ಪ್ರವಾದನೆಗಳನ್ನು ಆಧರಿಸಿವೆ ಮತ್ತು ಮೆಸ್ಸೀಯನಿಗೆ ನೀಡಲಾದ ವಿವಿಧ ಬಿರುದುಗಳನ್ನು ಪ್ರಕಟಿಸುತ್ತವೆ.

O Sapientia (ಓ ಜ್ಞಾನವೇ) ಯೆಶಾಯ 11:2–3; 28:29
O Adonai (ಓ ಪ್ರಭುವೇ) ಯೆಶಾಯ 11:4–5; 33:22
O Radix Jesse (ಓ ಇಷಯನ ಮೂಲವೇ) ಯೆಶಾಯ 1:1; 11:10
O Clavis David (ಓ ದಾವೀದನ ಬೀಗದಕೈಯೇ) ಯೆಶಾಯ 9:6; 22:22
O Oriens (ಓ ಉದಯಸೂರ್ಯನೇ) ಯೆಶಾಯ 9:1
O Rex Gentium (ಓ ಜನಾಂಗಗಳ ಅರಸನೇ) ಯೆಶಾಯ 9:5; 2:4
O Emmanuel (ನಮ್ಮೊಡನೆ ಇರುವ ದೇವರು) ಯೆಶಾಯ 7:14

ಪ್ರತಿಯೊಂದು ಅಂತಿಫೋನ್ ಚಿಕ್ಕದಾಗಿರುವುದರಿಂದ, ಕ್ರಿಸ್ಮಸ್‌ಗೆ ನಿಕಟವಾದ ಆಧ್ಯಾತ್ಮಿಕ ಸಿದ್ಧತೆಯಾಗಿ ಪ್ರತಿದಿನ ಅದನ್ನು ಓದಲು ಸಮಯ ಮೀಸಲಿಡುವುದು, ಅದನ್ನು ಮನನ ಮಾಡುವುದು ಮತ್ತು ದಿನವಿಡೀ ಧ್ಯಾನಪೂರ್ವಕವಾಗಿ ಪ್ರಾರ್ಥಿಸುವುದು ಸಹಾಯಕವಾಗಿದೆ.

ಡಿಸೆಂಬರ್ 17

ಓ ನಮ್ಮ ಸರ್ವೋನ್ನತ ದೇವರ ಜ್ಞಾನವೇ,
ಶಕ್ತಿಯಿಂದಲೂ ಪ್ರೀತಿಯಿಂದಲೂ ಸೃಷ್ಟಿಯನ್ನು ಮುನ್ನಡೆಸುವವನೇ:
ನಮಗೆ ತಿಳಿವಳಿಕೆಯ ಮಾರ್ಗವನ್ನು ಕಲಿಸಲು ಬನ್ನಿ!

+++

ಡಿಸೆಂಬರ್ 18

ಓ ಇಸ್ರಾಯೇಲ್ ಕುಲದ ನಾಯಕನೇ,
ಸೀನಾಯಿ ಬೆಟ್ಟದಲ್ಲಿ ಮೋಶೆಗೆ ಧರ್ಮಶಾಸ್ತ್ರವನ್ನು ನೀಡಿದವನೇ:
ನಿಮ್ಮ ಮಹಾಶಕ್ತಿಯಿಂದ ನಮ್ಮನ್ನು ಬಿಡಿಸಲು ಬನ್ನಿ!

+++

ಡಿಸೆಂಬರ್ 19

ಓ ಇಷಯನ ಕಾಂಡದ ಬೇರೇ,
ತಮ್ಮ ಸಮಸ್ತ ಜನರೆಡೆಗೆ ದೇವರಿಗಿರುವ ಪ್ರೀತಿಯ ಸಂಕೇತವೇ:
ತಡಮಾಡದೆ ನಮ್ಮನ್ನು ರಕ್ಷಿಸಲು ಬನ್ನಿ!

+++

ಡಿಸೆಂಬರ್ 20

ಓ ದಾವೀದನ ಬೀಗದಕೈಯೇ,
ದೇವರ ನಿತ್ಯರಾಜ್ಯದ ಬಾಗಿಲುಗಳನ್ನು ತೆರೆಯುವವನೇ:
ಬಂದು ಕತ್ತಲೆಯ ಸೆರೆಯಾಳುಗಳನ್ನು ಬಿಡುಗಡೆಗೊಳಿಸಿ!

+++

ಡಿಸೆಂಬರ್ 21

ಓ ಉಜ್ವಲ ಉಷೆಯೇ,
ನಿತ್ಯಜ್ಯೋತಿಯ ಪ್ರಭೆಯೇ, ನ್ಯಾಯಸೂರ್ಯನೇ:
ಕತ್ತಲೆಯಲ್ಲಿಯೂ ಮರಣದ ನೆರಳಿನಲ್ಲಿಯೂ ವಾಸಿಸುವವರ ಮೇಲೆ
ಬಂದು ಪ್ರಕಾಶಿಸಿ.

+++

ಡಿಸೆಂಬರ್ 22

ಓ ಸಕಲ ಜನಾಂಗಗಳ ಅರಸನೇ, ಧರ್ಮಸಭೆಯ ಆಧಾರಶಿಲೆಯೇ:
ನೀವು ಮಣ್ಣಿನಿಂದ ರೂಪಿಸಿದ ಮಾನವನನ್ನು ರಕ್ಷಿಸಲು ಬನ್ನಿ!

+++

ಡಿಸೆಂಬರ್ 23

ಓ ಇಮ್ಮಾನುವೇಲನೇ, ನಮ್ಮ ಅರಸನೇ, ಧರ್ಮಶಾಸ್ತ್ರದಾತನೇ:
ನಮ್ಮ ದೇವರಾದ ಪ್ರಭುವೇ, ನಮ್ಮನ್ನು ರಕ್ಷಿಸಲು ಬನ್ನಿ!

+++


ಆಗಮನಕಾಲಕ್ಕಾಗಿ ಇನ್ನಷ್ಟು

ಈ ಪುಟವನ್ನು ಹಂಚಿಕೊಳ್ಳಿ: