Ang mga Misteryo sa Kahayag

Mitoo ako sa Dios,
Amahan nga makagagahom sa tanan,
Magbubuhat sa langit ug sa yuta,
ug kang Jesucristo, iyang bugtong Anak, atong Ginoo,
nga gipanamkon pinaagi sa Espiritu Santo,
natawo kang Birhen Maria,
nag-antos ubos ni Poncio Pilato,
gilansang sa krus, namatay ug gilubong;
mikanaog sa dapit sa mga minatay;
sa ikatulong adlaw nabanhaw gikan sa mga minatay;
misaka sa langit,
ug nagalingkod sa tuo sa Dios Amahan nga makagagahom sa tanan;
gikan didto mobalik siya sa paghukom sa mga buhi ug sa mga minatay.

Mitoo ako sa Espiritu Santo,
sa balaang Simbahang Katolika,
sa panag-ambit sa mga santos,
sa kapasayloan sa mga sala,
sa pagkabanhaw sa lawas,
ug sa kinabuhing walay kataposan.
Amen.

Amahan namo, nga anaa sa langit,
pagdayegon ang imong ngalan;
umabot kanamo ang imong gingharian;
matuman ang imong pagbuot dinhi sa yuta maingon sa langit.
Hatagi kami karon sa among kalan-on sa matag adlaw;
ug pasayloa kami sa among mga sala
maingon nga kami nagapasaylo sa mga nakasala
kanamo;
ug ayaw kami itugyan sa panulay,
hinunoa luwasa kami sa daotan.
Amen

Maghimaya ka, Maria, napuno ka sa grasya, ang Ginoo anaa kanimo;
bulahan ikaw sa mga babaye,
ug bulahan usab ang bunga sa imong tiyan, si Jesus.
Santa Maria, Inahan sa Dios,
iampo mo kaming mga makasasala
karon ug sa takna sa among kamatayon.
Amen.

Himaya sa Amahan, ug sa Anak, ug sa Espiritu Santo;
maingon sa sinugdan, karon ug sa gihapon,
ug sa mga katuigan nga walay kataposan.
Amen.

Maghimaya ka, balaang Rayna, Inahan sa kalooy,
among kinabuhi, among katam-is, ug among paglaom.
Kanimo kami nagatuaw, kabus nga hininginlang mga anak ni Eva;
kanimo namo gipadangat ang among mga pagpanghupaw,
nga nagbangotan ug naghilak niining walog sa mga luha.
Busa, labing maloloy-ong manlalaban,
ilingi kami sa imong maloloy-ong mga mata;
ug human niining among pagkahininginlan,
ipakita kanamo ang bulahang bunga sa imong tiyan, si Jesus.
O maloloy-on, O mahigugmaon, O matam-is nga Birheng Maria.

V. Iampo mo kami, O balaang Inahan sa Dios.
R. Aron mahimo kaming takos sa mga saad ni Cristo.

Mag-ampo kita:

O Dios, ang Imong bugtong Anak, pinaagi sa Iyang kinabuhi, kamatayon, ug pagkabanhaw, nakapalit alang kanamo sa mga ganti sa kinabuhing dayon. Nangamuyo kami Kanimo, itugot nga pinaagi sa pagpamalandong niining mga misteryo sa labing balaang Rosaryo sa Mahal nga Birhen Maria, among masundog ang ilang gilangkob ug among maangkon ang ilang gisaad, pinaagi sa mao gihapong Kristo nga among Ginoo. Amen.

Ibubo, nangamuyo kami Kanimo, O Ginoo, ang Imong grasya sa among mga kasingkasing, aron kami nga gipahibalo sa pagpakatawo ni Kristo, Imong Anak, pinaagi sa mensahe sa usa ka anghel, madala pinaagi sa Iyang pag-antos ug krus ngadto sa himaya sa Iyang pagkabanhaw, pinaagi sa mao gihapong Kristo nga among Ginoo. Amen.

San Miguel nga Arkanghel,
panalipdi kami sa pakiggubat.
Mahimo ka untang among panalipod batok sa kadaotan ug mga lit-ag sa Yawa.
Hinaot nga badlongon siya sa Dios, mapaubsanon kaming nag-ampo,
ug ikaw,
O Prinsipe sa langitnong kasundalohan,
pinaagi sa gahom sa Dios,
itambog sa impiyerno si Satanas,
ug ang tanang daotang espiritu,
nga naglatagaw sa kalibotan
aron sa paglaglag sa mga kalag. Amen.

Kining pag-ampo kang San Jose—asawa sa Birhen Maria, amahan sa pag-amuma ni Jesus, ug santos nga patron sa tibuok Simbahan—gisulat ni Papa Leon XIII diha sa iyang ensiklika sa 1889, Quamquam Pluries. Gihangyo niya nga idugang kini sa kataposan sa Rosaryo, ilabina panahon sa bulan sa Oktubre, nga gipahinungod sa Rosaryo. Ang pag-ampo adunay parsiyal nga indulhensiya (Manwal sa mga Indulhensiya, conc. 19) ug mahimong iampo human sa naandang Salve Regina ug panapos nga pag-ampo. Mahimo usab kining gamiton sa pagtapos sa ubang mga debosyon kang Maria. (Gikan sa www.usccb.org)

Kanimo, O bulahang Jose,
modangop kami sa among kalisdanan,
ug human mangamuyo sa tabang sa imong labing balaang Asawa,
masaligon usab kaming nangayo sa imong pagpanalipod.

Pinaagi niadtong gugma nga nagbugkos kanimo
ngadto sa Walay Buling nga Birhen nga Inahan sa Dios
ug pinaagi sa imong inamahang gugma
nga imong gigakos sa Batang Jesus,
mapaubsanon kaming nangamuyo nga maloloy-on mong tan-awon ang kabilin
nga gipalit ni Jesu-Kristo pinaagi sa Iyang Dugo,
ug pinaagi sa imong gahom ug kusog tabangan kami sa among mga panginahanglan.

O labing mabinantayong magbalantay sa Balaang Pamilya,
panalipdi ang piniling mga anak ni Jesu-Kristo;
O labing mahigugmaong amahan, ipahilayo kanamo
ang tanang makatakod nga sayop ug makadaot nga impluwensiya;
O among labing gamhanang tigpanalipod, kaloy-i kami
ug gikan sa langit tabangi kami sa among pakigbisog
batok sa gahom sa kangitngit.

Maingon nga kaniadto imong giluwas ang Batang Jesus gikan sa makamatay nga katalagman,
panalipdi usab karon ang Balaang Simbahan sa Dios
gikan sa mga lit-ag sa kaaway ug sa tanang kalisdanan;
panalipdi usab ang matag usa kanamo pinaagi sa imong walay hunong nga pag-amoma,
aron, nga gipalig-on sa imong panig-ingnan ug sa imong tabang,
makahimo kami sa pagkinabuhi nga diosnon, sa pagkamatay diha sa pagkabalaan,
ug sa pagkab-ot sa walay kataposang kalipay sa langit.

Amen.

Ang mosunod nga duha ka pag-ampo gihalad ni Papa Francisco niadtong 2020 panahon sa pandemya sa coronavirus. Ang ikaduhang pag-ampo gamayng gipahaom dinhi aron maampo kini sa mas kinatibuk-ang paagi alang sa mga nag-antos sa sakit, kasubo, kawalay kasigurohan, ug uban pang mga kalisdanan sa tibuok kalibotan.

O Maria,

Kanunay kang nagdan-ag sa among panaw
ingon nga timaan sa kaluwasan ug paglaom.
Gitugyan namo ang among kaugalingon kanimo, Kaayohan sa mga Masakiton,
ikaw nga, sa tiilan sa krus,
nahiusa sa pag-antos ni Jesus,
ug nagpabiling lig-on sa imong pagtuo.

“Tigpanalipod sa katawhang Romano”,
nasayod ka sa among mga panginahanglan,
ug nasayod kami nga ikaw motagana,
aron, sama didto sa Cana sa Galilea,
mobalik ang kalipay ug kasaulogan
human niining panahon sa pagsulay.

Tabangi kami, Inahan sa Diosnong Gugma,
sa pagpahiuyon sa among kaugalingon sa kabubut-on sa Amahan
ug sa pagbuhat sa gisulti ni Jesus kanamo.
Kay Iyang gidawat ang among pag-antos,
ug Iyang gipas-an ang among mga kasubo
aron dad-on kami, pinaagi sa krus,
ngadto sa kalipay sa Pagkabanhaw.

Amen.

Modangop kami sa imong panalipod,
O Balaang Inahan sa Dios;
Ayaw isalikway ang among mga pangamuyo
sa among mga panginahanglan,
hinunoa luwasa kami kanunay
gikan sa tanang katalagman,
O Mahimayaon ug Bulahang Birhen.

“Modangop kami sa imong panalipod, O Balaang Inahan sa Dios”.

Niining makapasubo nga kahimtang karon, nga ang tibuok kalibotan gigapos sa pag-antos ug kabalaka, modangop kami kanimo, Inahan sa Dios ug among Inahan, ug mangitag dalangpanan ubos sa imong panalipod.

Birhen Maria, ilingi kami sa imong maloloy-ong mga mata taliwala sa mga pag-antos ug mga sakit niining kalibotana. Lipaya kadtong nabalaka pag-ayo ug nagbangotan sa ilang mga minahal nga namatay, ug nga usahay gilubong sa paagi nga nakapasubo kanila pag-ayo. Duol kanila nga nabalaka alang sa ilang mga minahal nga masakiton ug nga, aron mapugngan ang pagkaylap sa sakit, dili makaduol kanila. Pun-a sa paglaom kadtong nabalaka tungod sa kawalay kasigurohan sa umaabot ug sa mga sangpotanan alang sa ekonomiya ug panarbaho.

Inahan sa Dios ug among Inahan, iampo kami ngadto sa Dios, ang Amahan sa mga kalooy, nga matapos na kining dakong pag-antos ug nga mosubang pag-usab ang paglaom ug kalinaw. Pakilooy sa imong diosnong Anak, sama sa imong gibuhat didto sa Cana, aron mahupay ang mga pamilya sa mga masakiton ug sa mga biktima, ug maablihan ang ilang mga kasingkasing sa pagsalig ug pagtuo.

Panalipdi ang mga doktor, nars, kawani sa panglawas ug mga boluntaryo nga anaa sa atubangan sa pakigbatok sa sakit ug pag-antos sa katawhan, ug nagbutang sa ilang kinabuhi sa peligro aron sa pagluwas sa uban. Suportahi ang ilang bayanihong paningkamot ug hatagi sila og kusog, pagkamanggihatagon ug padayong maayong panglawas.

Duoli kadtong nag-atiman sa mga masakiton adlaw ug gabii, ug ang mga pari nga, tungod sa ilang pastoral nga pag-amuma ug pagkamatinud-anon sa Ebanghelyo, naningkamot sa pagtabang ug pagsuporta sa tanan.

Bulahang Birhen, hayagi ang mga hunahuna sa mga lalaki ug babaye nga nagahimo og siyentipikong panukiduki, aron makakaplag sila og epektibong mga paagi sa pagpugong ug pagbuntog sa sakit.

Lig-ona ang mga pangulo sa mga nasod, aron uban sa kaalam, pag-amuma ug pagkamanggihatagon makatabang sila niadtong nakulangan sa batakang mga kinahanglanon sa kinabuhi ug makamugna og mga solusyon sa katilingban ug ekonomiya nga gidasig sa halapad nga panan-aw sa umaabot ug panaghiusa.

Labing Balaang Maria, pukawa ang among mga konsensiya, aron ang dagkong pondo nga gigahin sa pagpalambo ug pagtigom og mga armas igasto hinuon sa pagpalambo sa epektibong panukiduki kon unsaon pagpugong nga mahitabo pag-usab ang susamang mga trahedya sa umaabot.

Hinigugmang Inahan, tabangi kami nga makaamgo nga kitang tanan mga sakop sa usa ka dakong pamilya ug nga makaila sa bugkos nga naghiusa kanato, aron, diha sa espiritu sa panag-igsoonay ug panaghiusa, makatabang kami sa paghupay sa dili maihap nga mga kahimtang sa kakabos ug panginahanglan. Lig-ona kami sa pagtuo, mapadayonon sa pag-alagad, ug makanunayon sa pag-ampo.

Maria, Paghupay sa mga Sinakit, gaksa ang tanan mong mga anak nga anaa sa kalisdanan ug iampo nga ituy-od sa Dios ang iyang makagagahom sa tanan nga kamot ug luwason kami gikan sa daghang mga kasakitan nga nagpabug-at sa atong kalibotan, aron ang kinabuhi mabag-o diha sa kalinaw ug paglaom.

Kanimo, nga nagdan-ag sa among panaw isip timaan sa kaluwasan ug paglaom, among gitugyan ang among kaugalingon, O Maloloy-on, O Mahigugmaon, O Matam-is nga Birhen Maria. Amen.