Pagkatapos nito, batid ni Jesus na naganap na ang lahat, sinabi Niya, upang matupad ang Kasulatan, “Nauuhaw ako.” May isang sisidlang puno ng karaniwang alak. Kaya naglagay sila ng esponghang binasa sa alak sa isang sanga ng isopo at inilapit ito sa Kanyang bibig. John 19:28-29
Nang marinig ng ating Mahal na Ina ang mga salitang ito mula sa kanyang Anak, “Nauuhaw ako,” agad niyang nanaising pawiin ang Kanyang uhaw. Pinagtutuunan niya ng pansin ang pisikal na pagkauhaw ng kanyang Anak, ngunit higit niyang pinagtutuunan ang Kanyang espirituwal na pagkauhaw.
Nang kumuha ang kawal ng isang espongha, ibinabad ito sa alak at inilapit sa Kanyang bibig, maaaring nakadama siya ng kaunting kaaliwan sa gawang ito ng kabutihan. Ngunit makikita rin niya ang malalim na kahulugan ng kilos na ito. Ang kawal ay sagisag ng sangkatauhang nahulog sa kasalanan, at ang maasim na alak ay sagisag ng ating kalagayang wala sa tamang kaayusan. Ngunit ang mismong kalagayan nating ito ang hinangad ni Jesus na tubusin. Hindi Niya hinangad ang “sariwang alak” o “dalisay na tubig sa bukal.” Hinangad Niya ang sangkatauhang nahulog sa kasalanan. Nauhaw Siya sa ating paglapit sa Kanya taglay ang ating kahinaan at kasalanan. Mauunawaan ng ating Mahal na Ina ang makapangyarihang sagisag na ito.
Hanggang ngayon ay sumisigaw pa rin si Jesus, “Nauuhaw ako!” Nauuhaw Siya sa iyo. Madalas nating nadarama na makalalapit lamang tayo sa Kanya upang pawiin ang Kanyang uhaw kung lalapit tayong parang mga anghel. Madalas nating paniwalaan na nginingitian lamang tayo ni Jesus kapag lumalapit tayong walang kasalanan. Ngunit hindi ito totoo. Ang dahilan kung bakit Siya namatay sa gayong kalupit na paraan ay upang makalapit tayo sa Kanya sa kabila ng ating pagkawasak. Lumalapit tayo sa nagdurusa at nauuhaw na Kristo taglay ang ating kasalanan at kawalan ng kaayusan. Hindi tayo sariwang alak; tayo ay maasim na alak. Ngunit kapag hinayaan natin ang ating sarili na lumapit sa ating Panginoon sa ganitong kalagayan, napapawi ang Kanyang uhaw.
Ano ang kalagayan ng iyong kaluluwa? Ikinahihiya mo ba ang iyong kasalanan? Nagkukunwari ka bang iba sa tunay mong pagkatao, sa pag-aakalang tatanggapin ka lamang ni Jesus kung ikaw ay perpekto? Wala nang mas malayo pa sa katotohanan kaysa rito. Huwag kang mag-atubiling lumapit sa ating Panginoon taglay ang lahat ng iyong kahinaan, pakikibaka at kasalanan. Huwag kang mag-alala kung ano ang Kanyang iisipin o sasabihin. Lumapit ka sa Kanya. Kung magtitiwala ka sa Kanya, ang mapagpakumbaba mong paghahandog sa Kanya ng iyong makasalanang sarili ay magbibigay-ginhawa sa Kanyang kaluluwa.
Pagnilayan mo ngayon ang dalawang banal na salitang iyon ng ating naghihingalong Panginoon, “Nauuhaw ako.” Alamin mong ikaw ang Kanyang kinauuhawan at hinahangad ka Niya kung ano ka ngayon. Lumapit ka sa Kanya, isuko mo ang iyong sarili sa Kanya at bigyan Siya ng galak. Ang ating Mahal na Ina ay nakamasid at naghihintay na pawiin mo ang pananabik sa Puso ng kanyang Anak na Diyos.
Pinakamamahal kong Ina, pinagtutuunan mo ng pansin ang espirituwal na pagkauhaw sa Puso ng iyong Anak. Batid mo rin na ako at ang buong sangkatauhan ang Kanyang kinauuhawan. Ipanalangin mo ako upang ako ay maging katulad ng maasim na alak na iyon, na inilapit sa mga labi ng iyong Anak na Diyos.
Mapagmahal kong Ina, ipanalangin mo ako upang makita ko ang aking kasalanan at hindi ako mag-atubiling lumapit sa iyong Anak sa ganitong kalagayan. Dalangin kong magkaroon ako ng lakas ng loob na kailangan ko upang lumapit taglay ang aking kahinaan, nang sa gayon ay mapawi ko ang pagkauhaw ng Puso ng iyong Anak at ng iyong sariling Kalinis-linisang Puso.
Aking nauuhaw na Panginoon, alam kong ang mga salitang binigkas Mo mula sa Krus ay nag-aanyaya sa akin na pawiin ang Iyong espirituwal na pananabik. Tulungan Mo akong magtiwala na minamahal Mo ako kung ano ako ngayon. Ipagkaloob Mo sa akin ang lakas ng loob na kailangan ko upang magtiwala sa Iyong awa at lumapit sa Iyo sa araw na ito. Mahal Kita, minamahal kong Panginoon. Tulungan Mo akong mahalin Ka nang higit pa.
Inang Maria, ipanalangin mo ako. Jesus, nagtitiwala ako sa Iyo.
Ikatatlumpu’t Limang Araw – “Naganap na”
Mayroon Din sa eBook & Paperback!
