Cebuano

Mga Pag-ampo alang sa Pentekostes

VENI CREATOR SPIRITUS

Umari, Espiritu Santo, bulahang Magbubuhat,

ug pumuyo sa among mga kalag;

umari uban sa Imong grasya ug langitnong tabang

aron pun-on ang mga kasingkasing nga Imong gibuhat.

O Maglilipay, Kanimo kami nangamuyo,

O langitnong gasa sa Labing Halangdong Dios,

O tuboran sa kinabuhi ug kalayo sa gugma,

ug matam-is nga pagdihog gikan sa kahitas-an.

Ikaw nailhan pinaagi sa Imong pito ka mga gasa;

Ikaw among giila nga tudlo sa kamot sa Dios;

Ikaw, ang saad sa Amahan,

Ikaw nga naghatag ug gahom sa dila.

Lamdagi gikan sa kahitas-an ang among mga salabutan,

ug himoa nga moawas sa gugma ang among mga kasingkasing;

pinaagi sa lig-ong pagpailob ug halangdong hiyas

lig-ona ang kahuyang sa among unod.

Ipahilayo kanamo ang kaaway nga among gikahadlokan,

ug ihatag hinuon kanamo ang Imong kalinaw;

aron kami, uban Kanimo isip giya, dili

motipas gikan sa dalan sa kinabuhi.

O, hinaot nga ang Imong grasya mohatag kanamo

nga mailhan ang Amahan ug ang Anak;

ug Ikaw, sa tanang kapanahonan giila,

nga bulahang Espiritung walay kataposan sa Duha.

Karon, sa Amahan ug sa Anak,

nga nabanhaw gikan sa kamatayon, ihatag ang himaya,

uban Kanimo, O Balaang Maglilipay,

sukad karon, gikan sa tanan sa yuta ug sa langit. Amen.


VENI SANCTE SPIRITUS

Umari Ka, O Espiritu Santo, umari Ka!

Gikan sa Imong mahayag ug malipayong Puloy-anan

Ipadan-ag ang mga silaw sa kahayag nga makaayo.

Umari Ka, Amahan sa mga kabos,

Tuboran sa mga gasa nga molungtad

Kahayag sa matag kasingkasing sa tawo.

Ikaw, ang labing maayo sa tanang maglilipay,

Ang labing malulotong Bisita sa kalag,

Ihatag ang kaisog nga makapalagsik.

Sa mabug-at nga pagpaningkamot, Ikaw ang kapahulayan,

Sa kainit, Ikaw ang labing makapabugnaw,

Ug naghatag Ka og paghupay sa among kasubo.

O labing bulahang Kahayag nga balaan,

Ipadan-ag sa among sulod ang Imong kahayag,

Ug pun-a ang among kinasulorang pagkatawo.

Walay maayo nga mahunahunaan ang tawo,

Walay matarong nga iyang mabuhat,

Sa dihang iyang gisalikway ang Imong maluloy-ong Kabubut-on.

Hinloi ang among mga kalag gikan sa mansa sa sala,

Bas-a sa Imong ulan ang among kauga

Ayoha ang among mga samad ug tul-ira ang among dalan.

Pahumoka ang gahig kasingkasing ug kabubut-on,

Tunawa ang nagyelo, painita ang nabugnawan,

Giyahi ang mga lakang nga nahisalaag.

Ngadto sa mga matinud-anon nga Kanimo,

Nagsalig uban sa pagkadiyosnon sa usa ka bata,

Itugot nga ipadala ang Imong pito ka gasa.

Hatagi sila og madagayaong pagtubo sa hiyas,

Grasyang makaluwas aron mamatay sa kalinaw,

Hatagi sila og kalipay nga walay kataposan. Amen. Aleluya.


Ang Pag-ampo alang sa Pito ka Gasa sa Espiritu Santo:

O Ginoong Jesukristo, nga sa wala Ka pa mosaka sa langit, misaad nga ipadala ang Espiritu Santo aron tapuson ang Imong buhat diha sa mga kalag sa Imong mga Apostoles ug mga Tinun-an, itugot nga ihatag Kanako ang mao gihapong Espiritu Santo, aron Iyang mahingpit diha sa akong kalag ang buhat sa Imong grasya ug sa Imong gugma.

Hatagi ako sa Espiritu sa Kaalam aron akong tamayon ang lumalabay nga mga butang niining kalibotana ug tinguhaon lamang ang mga butang nga walay kataposan,

sa Espiritu sa Pagsabot aron hayagan ang akong hunahuna sa kahayag sa Imong balaang kamatuoran,

sa Espiritu sa Pagtambag aron kanunay kong pilion ang labing luwas nga dalan sa pagpahimuot sa Dios ug pagkab-ot sa Langit,

sa Espiritu sa Kalig-on aron mapas-an ko ang akong krus uban Kanimo, ug aron maisog kong mabuntog ang tanang babag nga misupak sa akong kaluwasan,

sa Espiritu sa Kahibalo aron mailhan ko ang Dios ug ang akong kaugalingon ug motubo ngadto sa kahingpitan sa kahibalo sa mga Santos,

sa Espiritu sa Pagkadiyosnon aron makita ko nga matam-is ug makapahimuot ang pag-alagad sa Dios,

sa Espiritu sa Kahadlok aron mapuno ako sa mahigugmaong pagtahod sa Dios, ug mahadlok nga makapasubo Kaniya sa bisan unsang paagi.

Timan-i ako, minahal nga Ginoo, sa ilhanan sa Imong tinuod nga mga tinun-an ug dasiga ako sa tanang butang pinaagi sa Imong Espiritu. Amen.