Cebuano

P. Mosulod ba sa Langit ang mga Bata nga Wala Pa Matawo?

P. Mosulod ba sa Langit ang giaborsiyong mga bata, ang mga natawo nga patay, ug kadtong nakuhaan?

T. Kini nga pangutana adunay lawom nga personal nga kahulogan alang sa mga ginikanan nga nawad-an og anak sa usa niining mga paagiha. Ang unang angay ipasiugda mao nga ang Dios usa ka Dios sa hingpit nga gugma. Ang Iyang kalooy labaw pa sa atong masabtan. Angay kitang magmalinawon sa pagkahibalo nga ang Dios mao ang mosugat niining bililhong mga bata sa ilang pagbiya niining kinabuhia, bisan sa wala pa sila matawo.

Busa, unsay mahitabo niining bililhong mga gagmayng bata?  Sa kataposan, wala gayod kita mahibalo kay ang tubag wala pa gayod direktang gipadayag kanato pinaagi sa Balaang Kasulatan, ug ang Simbahan wala pa gayod makahatag ug pinal nga pagtulon-an bahin niini.  Apan, makahisgot kita ug nagkalainlaing posibilidad pinasikad sa mga prinsipyo sa atong pagtuo ug sa kaalam sa mga pagtulon-an sa mga santos. Ania ang pipila ka mga butang nga angay pamalandongan:

Una, nagtuo kita nga ang grasya sa Bunyag gikinahanglan alang sa kaluwasan.  Kining mga bata wala mabunyagi.  Dili kana angay magdala kanato sa paghinapos nga wala sila sa Langit.  Bisan tuod ang atong Simbahan nagtudlo nga ang Bunyag gikinahanglan alang sa kaluwasan, nagtudlo usab kini nga ang Diyos makahatag sa grasya sa Bunyag sa direktang paagi ug gawas sa pisikal nga pagbunyag.  Busa, mahimong pilion sa Diyos nga ihatag ang grasya sa Bunyag niining mga bata sa paagi nga Iyang pilion.  Gihigot sa Diyos ang Iyang Kaugalingon sa mga sakramento, apan dili Siya ginapos niini.  Busa, dili kita angay mabalaka tungod kay kining mga bata namatay nga wala makaagi sa gawasnong buhat sa pagbunyag.  Sayon ra alang sa Diyos nga direktang ihatag kanila kining grasyaha kon mao kana ang Iyang pilion.

Ikaduha, adunay nag-ingon nga ang Diyos nahibalo kon kinsa sa mga batang gipakuha ang mopili unta Kaniya o dili.  Bisan tuod wala gayod sila makapuyo niining kalibotana, adunay naghunahuna nga ang hingpit nga kahibalo sa Diyos naglakip sa pagkahibalo kon giunsa unta pagkinabuhi niining mga bata kon nahatagan pa sila ug higayon.  Pangagpas lamang kini apan usa gayod ka posibilidad.  Kon tinuod kini, nan kining mga bata pagahukman sumala sa moral nga balaod sa Diyos ug sa Iyang hingpit nga kahibalo sa ilang gawasnong kabubut-on.

Ikatulo, adunay nag-ingon nga ang Diyos nagtanyag ug kaluwasan niining mga bata sa paagi nga susama sa Iyang pagtanyag niini ngadto sa mga anghel.  Gihatagan sila ug higayon sa pagpili sa dihang moatubang sila sa Diyos, ug kanang usa ka pagpili mahimong ilang walay kataposang pagpili.  Maingon nga ang mga anghel kinahanglang mopili kon moalagad ba sila sa Diyos o dili diha sa gugma ug kagawasan, posible usab nga kining mga bata hatagan ug higayon sa pagpili o pagsalikway sa Diyos sa takna sa ilang kamatayon.  Kon pilion nilang higugmaon ug alagaran ang Diyos, maluwas sila.  Kon pilion nilang isalikway ang Diyos (sama sa gibuhat sa ikatulong bahin sa mga anghel), gawasnon nilang gipili ang Impiyerno.

Ikaupat, dili husto nga moingon lamang nga ang tanang batang gipakuha, nakuhang wala tuyoa, o natawo nga patay awtomatikong moadto sa Langit.  Kini naglimod sa ilang kagawasan sa pagpili.  Kinahanglan mosalig kita nga tugotan sila sa Diyos nga gamiton ang ilang kagawasan sa pagpili, sama sa Iyang gibuhat alang kanatong tanan.

Sa kataposan, kinahanglan motuo kita uban sa hingpit nga kasigurohan nga ang Diyos nahigugma niining labing bililhong mga bata labaw pa gayod sa bisan unsang gugma nga atong ikahatag.  Ang kalooy ug hustisya sa Diyos hingpit, ug kining mga bata pagatagdon sumala nianang kalooy ug hustisya.