ಪ್ರ. ಅಂತರ್ಜಾಲದಲ್ಲಿ ಅಶ್ಲೀಲ ಚಿತ್ರಗಳನ್ನು ನೋಡಲು ಇಷ್ಟಪಡುವ ಕೆಲವು ಸ್ನೇಹಿತರು ನನಗಿದ್ದಾರೆ. ಅಂಥ ವಿಷಯಗಳು ಮಹಿಳೆಯರನ್ನು ಕೀಳಾಗಿಸುತ್ತವೆ ಎಂದು ನನ್ನ ತಂದೆತಾಯಿ ಯಾವಾಗಲೂ ಹೇಳುತ್ತಾ ಬಂದಿದ್ದಾರೆ. ಅವರು ಆ ಚಿತ್ರಗಳನ್ನು ನೋಡಲು ಪ್ರಾರಂಭಿಸಿದಾಗ ನಾನು ನೋಡದೆ ಸುಮ್ಮನಿರುತ್ತೇನೆ; ಆದರೆ ನಾನು ಎಂದೂ ಏನನ್ನೂ ಹೇಳಿಲ್ಲ. ಅವರನ್ನು ಸ್ನೇಹಿತರಾಗಿ ಕಳೆದುಕೊಳ್ಳಲು ನನಗೆ ನಿಜವಾಗಿಯೂ ಇಷ್ಟವಿಲ್ಲ. ಜನರು ನನ್ನನ್ನು ವಿಚಿತ್ರ ವ್ಯಕ್ತಿ ಎಂದು ಭಾವಿಸುವುದೂ ನನಗೆ ಇಷ್ಟವಿಲ್ಲ. ನಾನು ಏನು ಮಾಡಬಹುದು?
ಉ. ನನ್ನ ಪ್ರಿಯ ಸ್ನೇಹಿತನೇ…ದುರದೃಷ್ಟವಶಾತ್, ನಮ್ಮಲ್ಲಿ ಹೆಚ್ಚಿನವರು ಒಪ್ಪಿಕೊಳ್ಳಲು ಇಚ್ಛಿಸುವುದಕ್ಕಿಂತಲೂ ಹೆಚ್ಚು ಜನರನ್ನು ಬಾಧಿಸುವ ವಿಷಯವಿದು. ಕೆಲವು ವಿಚಾರಗಳನ್ನು ಹಂಚಿಕೊಳ್ಳುತ್ತೇನೆ.
ಮೊದಲನೆಯದಾಗಿ, ನಿನ್ನ ತಂದೆತಾಯಿಯ ಪ್ರತಿಕ್ರಿಯೆ ಸಂಪೂರ್ಣವಾಗಿ ಸರಿಯಾಗಿದೆ! ಅಶ್ಲೀಲ ಚಿತ್ರಣವು ಪುರುಷರನ್ನೂ ಕೀಳಾಗಿಸುತ್ತದೆ ಎಂದೂ ನಾನು ಸೇರಿಸಿ ಹೇಳುತ್ತೇನೆ. ಈ ವಿಷಯದ ಚರ್ಚೆ ಅಥವಾ ಪ್ರಲೋಭನೆ ಎದುರಾದಾಗಲೆಲ್ಲ ಮನಸ್ಸಿನಲ್ಲಿ ಮೊದಲು ನೆನಪಿಡಬೇಕಾದ ಒಳ್ಳೆಯ ದೃಢನಿಲುವು ಇದು.
ಅದು ಘನತೆಗೆ ಕುಂದು ತರುವುದು ಏಕೆ? ಇತ್ತೀಚೆಗೆ ನಾನು ಕೇಳಿದ, ಶೀಲಶುದ್ಧತೆಯ ಕುರಿತು ಮಾತನಾಡುವ ಒಬ್ಬ ಉತ್ತಮ ವಾಗ್ಮಿ ಹೀಗೆ ಹೇಳಿದರು: “ಅಶ್ಲೀಲ ಚಿತ್ರಸಾಮಗ್ರಿಯ ಸಮಸ್ಯೆ ಅದು ಅತಿಯಾಗಿ ತೋರಿಸುತ್ತದೆ ಎಂಬುದಲ್ಲ; ಬದಲಿಗೆ, ಅದು ತೀರಾ ಕಡಿಮೆಯನ್ನು ತೋರಿಸುತ್ತದೆ ಎಂಬುದೇ!” ಅವರು ಹೇಳಿದ್ದು ಸಂಪೂರ್ಣವಾಗಿ ಸರಿ. ಅವರ ಮಾತಿನ ಅರ್ಥವೇನೆಂದರೆ, ಅಶ್ಲೀಲ ಚಿತ್ರಸಾಮಗ್ರಿಯು ಇನ್ನೊಬ್ಬರ ದೇಹವನ್ನು ಮಾತ್ರ ತೋರಿಸುತ್ತದೆ; ಅದೂ ಆ ವ್ಯಕ್ತಿಯನ್ನು ಬೇರೊಬ್ಬರ ಅಸ್ತವ್ಯಸ್ತ ಸುಖಾಸಕ್ತಿಯನ್ನು ತಣಿಸುವ ಸ್ವಾರ್ಥದ ವಸ್ತುವನ್ನಾಗಿ ಮಾಡುವ ರೀತಿಯಲ್ಲಿ. ಇದನ್ನು ನಾವು “ವಸ್ತುವಿನಂತೆ ಕಾಣುವುದು” ಎಂದು ಕರೆಯುತ್ತೇವೆ. ಆದ್ದರಿಂದ, ಅಶ್ಲೀಲ ಚಿತ್ರಸಾಮಗ್ರಿಯಲ್ಲಿ ಪ್ರದರ್ಶಿಸಲ್ಪಡುವ ವ್ಯಕ್ತಿಯ ನಿಜವಾದ ಸೌಂದರ್ಯ ಮತ್ತು ಘನತೆಯನ್ನು ಅದು ತೋರಿಸುವುದಿಲ್ಲ ಎಂಬ ಅರ್ಥದಲ್ಲಿ ಅದು “ತೀರಾ ಕಡಿಮೆಯನ್ನು ತೋರಿಸುತ್ತದೆ.” ಈ ವ್ಯಕ್ತಿ ನಿಜಕ್ಕೂ ಒಬ್ಬ ವ್ಯಕ್ತಿ… ದೇವರ ಸ್ವರೂಪ ಮತ್ತು ಸಾದೃಶ್ಯದಲ್ಲಿ ಸೃಷ್ಟಿಸಲ್ಪಟ್ಟ ದೇವರ ಮಗ ಅಥವಾ ಮಗಳು ಎಂಬುದನ್ನು ಅದು ಹೊರಗೆಡಹುವುದಿಲ್ಲ. ಅಶ್ಲೀಲ ಚಿತ್ರಸಾಮಗ್ರಿಯು ಆ ಚಿತ್ರಗಳನ್ನು ನೋಡುವ ವ್ಯಕ್ತಿಗೂ ಬಹಳ ಹಾನಿ ಮಾಡುತ್ತದೆ. ಏಕೆಂದರೆ ಅದು ಆ ವ್ಯಕ್ತಿಯನ್ನು ಅಸ್ತವ್ಯಸ್ತ ಲೈಂಗಿಕ ಬಯಕೆಯೊಳಗೆ ಸೆಳೆಯುತ್ತದೆ. ಅಂದರೆ, ಅಶ್ಲೀಲ ಚಿತ್ರಸಾಮಗ್ರಿಯನ್ನು ಬಳಸುವುದರಿಂದ ಆ ವ್ಯಕ್ತಿಯ ಲೈಂಗಿಕ ಬಯಕೆಗಳು ಅಸ್ತವ್ಯಸ್ತಗೊಂಡು ನಿಯಂತ್ರಣ ತಪ್ಪುವ ಸಾಧ್ಯತೆ ಹೆಚ್ಚು. ಇದು ಒಂದು ರೀತಿಯ “ಬಂಧನ” ಮತ್ತು ಅನಾರೋಗ್ಯಕರ ಅಂಟಿಕೊಳ್ಳುವಿಕೆಯನ್ನು ಉಂಟುಮಾಡುತ್ತದೆ. ಇದರ ಪರಿಣಾಮವಾಗಿ, ಅಶ್ಲೀಲ ಚಿತ್ರಸಾಮಗ್ರಿಯ ಜಗತ್ತಿನಲ್ಲಿ ಸಿಕ್ಕಿಬಿದ್ದ ವ್ಯಕ್ತಿಗೆ ಇತರರನ್ನು ಘನತೆ, ಗೌರವ ಮತ್ತು ನಿಜವಾದ ಪ್ರೀತಿಯಿಂದ ನೋಡುವುದು ಕಷ್ಟವಾಗುತ್ತದೆ. ಇದು ಒಬ್ಬರ ಸಂಬಂಧಗಳ ಮೇಲೆ ಬಹಳ ನಕಾರಾತ್ಮಕ ಹಾಗೂ ಸ್ವಾರ್ಥಪರ ರೀತಿಯಲ್ಲಿ ಪರಿಣಾಮ ಬೀರುವ ಸಾಮರ್ಥ್ಯವನ್ನು ನಿಜವಾಗಿಯೂ ಹೊಂದಿದೆ. ಆದ್ದರಿಂದ, ಹೌದು, ಅದು ಎಲ್ಲ ರೀತಿಯಲ್ಲಿಯೂ ಘನತೆಗೆ ಕುಂದು ತರುತ್ತದೆ.
ಅಶ್ಲೀಲ ಚಿತ್ರಸಾಮಗ್ರಿಯನ್ನು ನೋಡುತ್ತಿರುವ ಮತ್ತು ನಿನಗೂ ಅದನ್ನು ತೋರಿಸಲು ಪ್ರಯತ್ನಿಸುತ್ತಿರುವ ನಿನ್ನ ಸ್ನೇಹಿತರ ವಿಷಯದಲ್ಲಿ, “ಅವರ ಸ್ನೇಹವನ್ನು ಕಳೆದುಕೊಳ್ಳಲು ನಿಜವಾಗಿಯೂ ಇಷ್ಟವಿಲ್ಲ” ಎಂದೂ, “ಜನರು [ನಿನ್ನನ್ನು] ವಿಚಿತ್ರವೆಂದು ಭಾವಿಸುವುದು ಬೇಡ” ಎಂದೂ ನೀನು ಹೇಳುತ್ತೀಯ. ಈ ಕುರಿತು ನನಗೆ ಒಂದೆರಡು ವಿಚಾರಗಳನ್ನು ಹೇಳಬೇಕಿದೆ. ಮೊದಲನೆಯದಾಗಿ, ಇನ್ನೊಬ್ಬ ವ್ಯಕ್ತಿಯ ಘನತೆಯನ್ನು ಗೌರವಿಸುವುದು ಮತ್ತು ದೇವರು ಅವರನ್ನು ನೋಡುವ ರೀತಿಯಲ್ಲಿಯೇ ನೋಡುವುದು ಯಾವ ಅರ್ಥದಲ್ಲಿಯೂ “ವಿಚಿತ್ರ” ಅಲ್ಲ. ಅಶ್ಲೀಲ ಚಿತ್ರಗಳಲ್ಲಿ ಇನ್ನೊಬ್ಬ ವ್ಯಕ್ತಿಯನ್ನು ತೋರಿಸುವ ರೀತಿಯಲ್ಲಿ ನೀನು ಅವರನ್ನು ನೋಡಬೇಕೆಂದು ದೇವರು ಎಂದಿಗೂ ಬಯಸುವುದಿಲ್ಲ. ನನ್ನನ್ನು ನಂಬು, ಈ ಅಭ್ಯಾಸಕ್ಕೆ ಒಳಗಾಗಲು ಬಯಸದಿರುವುದರಿಂದ ನೀನು ವಿಚಿತ್ರವಾಗುವುದೇ ಇಲ್ಲ.
ಅವರ ಸ್ನೇಹವನ್ನು ಕಳೆದುಕೊಳ್ಳುವ ವಿಚಾರಕ್ಕೆ ಬಂದರೆ, ಸ್ನೇಹಿತ ಎಂದರೆ ಯಾರು, ಯಾರು ಅಲ್ಲ ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ. ನಿಜವಾದ ಸ್ನೇಹಿತನು ಅಶ್ಲೀಲ ಚಿತ್ರಸಾಮಗ್ರಿಯನ್ನು ನೋಡುವಂತೆ ನಿನ್ನನ್ನು ಒತ್ತಾಯಿಸುವುದಿಲ್ಲ. ಈ ಅಭ್ಯಾಸ ಅನಾರೋಗ್ಯಕರವೆಂದು ನಿಜವಾದ ಸ್ನೇಹಿತನು ಅರಿತುಕೊಳ್ಳುತ್ತಾನೆ ಮತ್ತು ಅದರಲ್ಲಿ ಭಾಗವಹಿಸದಿರುವ ನಿನ್ನ ಆಯ್ಕೆಯನ್ನು ಗೌರವಿಸುತ್ತಾನೆ. ಆದ್ದರಿಂದ, ನಿನ್ನ ಸ್ನೇಹಿತರು ನಿನ್ನೊಂದಿಗೆ ಸಮಯ ಕಳೆಯಲು ಬಯಸದಿದ್ದರೆ, ನಿನ್ನನ್ನು ಗೇಲಿ ಮಾಡಿದರೆ, ಅಥವಾ ಅವರೊಂದಿಗೆ ಸೇರಲು ಆಸಕ್ತಿ ತೋರಿಸದಿರುವುದಕ್ಕಾಗಿ ನಿನ್ನನ್ನು “ವಿಚಿತ್ರ” ಎಂದೂ ಕರೆದರೆ, ಇವರು ನಿನ್ನ ನಿಜವಾದ ಸ್ನೇಹಿತರಲ್ಲ ಎಂದು ನಾನು ಖಚಿತವಾಗಿ ಹೇಳಬಲ್ಲೆ. ಗುಂಪಿನೊಂದಿಗೆ “ಹೊಂದಿಕೊಳ್ಳಬೇಕು” ಎಂಬ ಒತ್ತಡ ಬಲವಾಗಿರಬಹುದು ಎಂದು ನನಗೆ ಗೊತ್ತು. ಆದರೆ ಅದಕ್ಕಾಗಿ ಇಂಥ ಬೆಲೆ ತೆರುವುದು ಯೋಗ್ಯವಲ್ಲ. ಈ ಅಸ್ತವ್ಯಸ್ತ ನಡವಳಿಕೆಯ ಪ್ರವಾಹದೊಂದಿಗೆ ಹೋಗುವುದಕ್ಕಿಂತ, ನಿನ್ನ ನಿಲುವಿನಲ್ಲಿ ದೃಢವಾಗಿ ನಿಂತು ಅವರ ತಿರಸ್ಕಾರವನ್ನು ಎದುರಿಸುವುದೇ ನಿನಗೆ ಹೆಚ್ಚು ಒಳ್ಳೆಯದು. ಮಿದುಳಿನ ವಿಜ್ಞಾನಕ್ಕೆ ಸಂಬಂಧಿಸಿದ ಇತ್ತೀಚಿನ ಅಧ್ಯಯನಗಳು, ಅಶ್ಲೀಲ ಚಿತ್ರಸಾಮಗ್ರಿಯು ಅತ್ಯಂತ ಹೆಚ್ಚು ವ್ಯಸನ ಉಂಟುಮಾಡುವ ಕೆಲವು ಮಾದಕವಸ್ತುಗಳಷ್ಟೇ ಪ್ರಬಲವಾಗಿರಬಲ್ಲದು ಎಂದು ತೋರಿಸುತ್ತವೆ. ದುಃಖಕರ ಸಂಗತಿಯೆಂದರೆ, ಅನೇಕರು ಇದಕ್ಕೆ ಎಷ್ಟರಮಟ್ಟಿಗೆ ವ್ಯಸನಿಗಳಾಗಿದ್ದಾರೆಂದರೆ, ತಮ್ಮ ಅಭ್ಯಾಸವನ್ನು ಬಿಡಲು ಅವರಿಗೆ ದಾರಿಯೇ ಸಿಗುವುದಿಲ್ಲ. ಈ ವ್ಯಸನವು ವರ್ಷಗಳವರೆಗೆ ಮುಂದುವರಿದು ಬಹಳ ಸಂಕಟ, ಅಪರಾಧಪ್ರಜ್ಞೆ, ನಾಚಿಕೆ ಮತ್ತು ಲೈಂಗಿಕ ಗೊಂದಲವನ್ನು ಉಂಟುಮಾಡಬಹುದು. ಅಂತಿಮ ಪರಿಣಾಮವೇನೆಂದರೆ, ದೇವರು ನೀನು ಇತರರನ್ನು ಹೇಗೆ ಪ್ರೀತಿಸಬೇಕೆಂದು ಬಯಸುತ್ತಾರೋ, ಹಾಗೆ ಪ್ರೀತಿಸುವ ನಿನ್ನ ಆರೋಗ್ಯಕರ ಸಾಮರ್ಥ್ಯದ ಮೇಲೆ ಅಶ್ಲೀಲ ಚಿತ್ರಸಾಮಗ್ರಿಯ ವ್ಯಸನವು ಪರಿಣಾಮ ಬೀರಬಹುದು (ಮತ್ತು “ಬೀರುತ್ತದೆ” ಎಂದೂ ನಾನು ಧೈರ್ಯವಾಗಿ ಹೇಳುತ್ತೇನೆ).
ಆದ್ದರಿಂದ, ದೃಢವಾಗಿರು ಮತ್ತು ಈ ಕುರಿತು ನಿನ್ನ ಹೆತ್ತವರೊಂದಿಗೆ ಮಾತನಾಡುತ್ತಿರು. ಅವರೊಂದಿಗಿನ ಈ ಮುಕ್ತ ಸಂಭಾಷಣೆ ಮುಂದಿನ ಅನೇಕ ವರ್ಷಗಳವರೆಗೂ ನಿನಗೆ ಸಹಾಯ ಮಾಡುತ್ತದೆ!
ಅಶ್ಲೀಲ ಚಿತ್ರಸಾಮಗ್ರಿಯ ವ್ಯಸನವನ್ನು ಹೇಗೆ ಜಯಿಸಬಹುದು ಎಂಬುದರ ಕುರಿತು ಹೆಚ್ಚಿನ ಮಾಹಿತಿಗಾಗಿ, ಭೇಟಿ ನೀಡಿ: covenanteyes.com
ಇನ್ನಷ್ಟು ಕತೋಲಿಕ ಪ್ರಶ್ನೋತ್ತರಗಳು