ಪ್ರ. ಕಳೆದ ಒಂದು ವರ್ಷದೊಳಗೆ ಶಸ್ತ್ರಚಿಕಿತ್ಸೆಯ ಮೂಲಕ ಮಗುವಿಗೆ ಜನ್ಮ ನೀಡಿದ ಮಹಿಳೆಯೊಬ್ಬಳು ಮತ್ತೆ ಗರ್ಭಿಣಿಯಾಗಿದ್ದಾಳೆ. ಗಂಭೀರ ತೊಡಕುಗಳು ಉಂಟಾಗುವ ಹೆಚ್ಚಿನ ಅಪಾಯವಿರುವುದರಿಂದ ಗರ್ಭಧರಿಸಬಾರದೆಂದು ಆಕೆಯ ವೈದ್ಯರು ಸೂಚಿಸಿದ್ದರೂ ಹೀಗಾಗಿದೆ. ಈ ಪರಿಸ್ಥಿತಿಯಲ್ಲಿ ಧರ್ಮಸಭೆಯು ಗರ್ಭಪಾತಕ್ಕೆ ಅನುಮತಿ ನೀಡುತ್ತದೆಯೇ?
ಉ. ಜನರು ಖಂಡಿತವಾಗಿಯೂ ಎದುರಿಸುವ ಮತ್ತು ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕುವ ಪರಿಸ್ಥಿತಿಯ ಕುರಿತಾದ ಪ್ರಶ್ನೆ ಎಂಬ ಅರ್ಥದಲ್ಲಿ ಇದು ನಿಜಜೀವನದ ಪ್ರಶ್ನೆಯಾಗಿದೆ. ಈ ಪ್ರಶ್ನೆಯನ್ನು ಕೇಳಿದ್ದಕ್ಕಾಗಿ ಧನ್ಯವಾದಗಳು.
ಹೆಚ್ಚಿನ ಅಪಾಯವಿರುವ ಗರ್ಭಧಾರಣೆಯ ಸಂದರ್ಭದಲ್ಲಿ ತಾಯಿಗೆ ಸಹಜವಾಗಿ ಉಂಟಾಗುವ ಭಯ ಮತ್ತು ಆತಂಕವನ್ನು ಒಪ್ಪಿಕೊಳ್ಳುವುದರೊಂದಿಗೆ ನಾವು ಆರಂಭಿಸೋಣ. ನೀವು ವಿವರಿಸಿರುವ ಸಂದರ್ಭದಲ್ಲಿ, ಆಕೆ ಒಂದು ವರ್ಷದೊಳಗೇ ಮಗುವಿಗೆ ಜನ್ಮನೀಡಿ ಈಗಾಗಲೇ ತಾಯಿಯಾಗಿದ್ದಾಳೆ ಎಂಬುದು ಸ್ಪಷ್ಟವಾಗಿದೆ. ಈಗ ಆಕೆ ಮತ್ತೆ ಗರ್ಭಿಣಿಯಾಗಿದ್ದಾಳೆ; ಈ ಹೊಸ ಗರ್ಭಧಾರಣೆಯಿಂದ ಆಕೆಯ ಜೀವಕ್ಕೆ ಅಪಾಯವಿದೆ ಎಂದು ವೈದ್ಯರು ವೈದ್ಯಕೀಯವಾಗಿ ನಿರ್ಣಯಿಸಿದ್ದಾರೆ. ಈ ಪರಿಸ್ಥಿತಿಯು ಆ ತಾಯಿಗೂ ಆಕೆಯ ಕುಟುಂಬಕ್ಕೂ ಸಾಕಷ್ಟು ಸಮಂಜಸವಾದ ಭಯ ಮತ್ತು ಕಳವಳವನ್ನು ಉಂಟುಮಾಡುತ್ತದೆ ಎಂಬುದು ಸುಲಭವಾಗಿ ಅರ್ಥವಾಗುವ ಸಂಗತಿಯಾಗಿದೆ.
ಈ ಪ್ರಶ್ನೆಯನ್ನು ಸರಿಯಾಗಿ ಅರ್ಥಮಾಡಿಕೊಳ್ಳಲು, ಇಲ್ಲಿ ಯಾವುದಕ್ಕೆ ಅಪಾಯವಿದೆ ಎಂಬುದನ್ನು ನಾವು ಸ್ಪಷ್ಟವಾಗಿ ನೋಡಬೇಕು. ಮೊದಲನೆಯದಾಗಿ, ತಾಯಿಯ ಜೀವವಿದೆ. ನಿಸ್ಸಂದೇಹವಾಗಿ, ಆಕೆಯ ಜೀವ ಅತ್ಯಂತ ಅಮೂಲ್ಯವಾದದ್ದು; ಆಕೆಯನ್ನು ಆರೋಗ್ಯವಂತಳಾಗಿ ಇರಿಸಲು ಸಾಧ್ಯವಿರುವ ಎಲ್ಲವನ್ನೂ ಮಾಡಬೇಕು. ನಾವು ಎರಡನೆಯ ಅತ್ಯಗತ್ಯ ಸಂಗತಿಯನ್ನೂ ಪರಿಗಣಿಸಬೇಕು. “ಅತ್ಯಗತ್ಯ” ಎಂದರೆ ಈ ಎರಡನೆಯ ಸಂಗತಿಯನ್ನು ಕಡೆಗಣಿಸುವಂತಿಲ್ಲ ಎಂಬುದು ನಮ್ಮ ಅರ್ಥ. ಆ ಸಂಗತಿಯೇನೆಂದರೆ, ನಾವು ಕೇವಲ ಒಂದು ಜೀವದ ಬಗ್ಗೆ ಅಲ್ಲ, ಎರಡು ಜೀವಗಳ ಬಗ್ಗೆ ಮಾತನಾಡುತ್ತಿದ್ದೇವೆ.
ಗರ್ಭಧಾರಣೆಯಾದ ಕೂಡಲೇ ಹೊಸ ಮಾನವ ಜೀವ ಅಸ್ತಿತ್ವದಲ್ಲಿರುತ್ತದೆ. ಇದರ ಅರ್ಥ, ದೇವರು ಹೊಸ ಮಗುವನ್ನು ಸೃಷ್ಟಿಸಿದ್ದಾರೆ ಮತ್ತು ಆ ಮಗು ತಾಯಿಯ ಗರ್ಭದಲ್ಲಿ ಜೀವಿಸುತ್ತಿದೆ. ಇದು ಸ್ಪಷ್ಟವಾದ ಸಂಗತಿಯಾಗಿದ್ದರೂ, ಈ ಪ್ರಶ್ನೆಯನ್ನು ಕೇಳುವಾಗ ಅನೇಕ ಬಾರಿ ಇದನ್ನು ಪೂರ್ಣವಾಗಿ ಪರಿಗಣಿಸುವುದಿಲ್ಲ. ಆದ್ದರಿಂದ, ಈ ದೃಷ್ಟಿಯಿಂದ ನೋಡುವುದು ಎಷ್ಟೇ ಕಷ್ಟವಾಗಿದ್ದರೂ, ಈ ಪ್ರಶ್ನೆಯನ್ನೂ ಕೇಳಲೇಬೇಕು: “ಯಾರ ಜೀವ ಹೆಚ್ಚು ಮುಖ್ಯ? ತಾಯಿಯ ಜೀವವೇ? ಅಥವಾ ಈಗಷ್ಟೇ ಗರ್ಭದಲ್ಲಿ ರೂಪುಗೊಂಡ ಮಗುವಿನ ಜೀವವೇ?” ನಿಜ ಹೇಳಬೇಕೆಂದರೆ, ಈ ಪ್ರಶ್ನೆಗೆ ಉತ್ತರವಿಲ್ಲ; ಏಕೆಂದರೆ ಒಂದು ಜೀವವು ಇನ್ನೊಂದಕ್ಕಿಂತ ಹೆಚ್ಚು ಮುಖ್ಯವಲ್ಲ. ಪ್ರತಿಯೊಂದು ಜೀವವೂ ಸಂಪೂರ್ಣವಾಗಿ ಪವಿತ್ರವಾದದ್ದು ಮತ್ತು ಅನಂತ ಮೌಲ್ಯವುಳ್ಳದ್ದು.
ತಾಯಿ ಈಗಾಗಲೇ ಒಂದು ಮಗುವಿನ ತಾಯಿಯಾಗಿರುವುದರಿಂದ ಮತ್ತು ಆ ಮಗು ಆಕೆಯ ಮೇಲೆ ಅವಲಂಬಿತವಾಗಿರುವುದರಿಂದ, ಈಗಷ್ಟೇ ಗರ್ಭದಲ್ಲಿ ರೂಪುಗೊಂಡ ಮಗುವಿನ ಜೀವಕ್ಕಿಂತ ತಾಯಿಯ ಜೀವ ಹೆಚ್ಚು ಮುಖ್ಯ ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಗರ್ಭದಲ್ಲಿರುವ ಮಗುವಿಗೆ ಯಾವುದೇ ಜವಾಬ್ದಾರಿಗಳಿಲ್ಲದಿರುವುದರಿಂದ, ಜೀವನದಲ್ಲಿ ಆಕೆಯ ಜವಾಬ್ದಾರಿಗಳು ಹೆಚ್ಚು ಎಂಬುದು ಸ್ಪಷ್ಟವಾಗಿ ನಿಜವೇ ಆಗಿದ್ದರೂ, ಜವಾಬ್ದಾರಿಯನ್ನು ಜೀವದ ಮೌಲ್ಯಕ್ಕೆ ಸಮಾನವೆಂದು ಪರಿಗಣಿಸುವುದು ತಪ್ಪಾಗುತ್ತದೆ. ಜೀವವು ಜೀವವಾಗಿರುವುದರಿಂದಲೇ ಅದಕ್ಕೆ ಅನಂತ ಮೌಲ್ಯವಿದೆ.
ಹಾಗಾದರೆ ಈ ಪ್ರಶ್ನೆಗೆ ನಾವು ಹೇಗೆ ಉತ್ತರಿಸಬೇಕು? ಗರ್ಭಪಾತವು ಯಾವಾಗಲೂ ತಪ್ಪು ಎಂಬುದೇ ಉತ್ತರ. ತಾಯಿಯು ಆ ಮಗುವನ್ನು ಪೂರ್ಣ ಗರ್ಭಾವಧಿಯವರೆಗೆ ಹೊತ್ತು ಹೆರಲು ನೆರವಾಗುವಂತೆ ಸಾಧ್ಯವಿರುವ ಎಲ್ಲವನ್ನೂ ಮಾಡುವುದೇ ಗುರಿಯಾಗಿರಬೇಕು. ಹೀಗಿದ್ದರೂ, ಕೆಲವು ಆಯ್ಕೆಗಳಿವೆ. ಉದಾಹರಣೆಗೆ, ಮಗುವಿಗೆ ಸ್ವಲ್ಪ ಅಪಾಯವಿದ್ದರೂ, ಅವಧಿಗೆ ಮುನ್ನ ಹೆರಿಗೆ ಮಾಡಿಸಬಹುದು. ಅಪಾಯವು ಅತಿಯಾಗದಂತೆ ಎಚ್ಚರ ವಹಿಸಬೇಕು; ಆದರೆ ಸ್ವಲ್ಪ ಅಪಾಯವನ್ನು ಸ್ವೀಕರಿಸುವುದು ಸಮಂಜಸವಾಗಿದೆ.
ತಾಯಿ ಮರಣಹೊಂದಿದರೆ ಮಗುವೂ ಮರಣಹೊಂದುತ್ತದೆ ಎಂಬ ನಿರ್ಣಯಕ್ಕೆ ಬಂದಾಗ ಇದು ವಿಶೇಷವಾಗಿ ಅನ್ವಯಿಸುತ್ತದೆ. ಅಂತಹ ಸಂದರ್ಭದಲ್ಲಿ, ತಾಯಿ ಮತ್ತು ಮಗು ಇಬ್ಬರಿಗೂ ಅಪಾಯ ಎಷ್ಟರಮಟ್ಟಿಗೆ ಹೆಚ್ಚಿದೆಯೆಂದರೆ ಸಾವು ಬಹುತೇಕ ಅನಿವಾರ್ಯ ಎಂದು ವೈದ್ಯರು ನಿರ್ಧರಿಸಿದರೆ, ಮಗುವಿಗೆ ದೊಡ್ಡ ಅಪಾಯವಿದ್ದರೂ ಅವಧಿಗೆ ಮುನ್ನ ಹೆರಿಗೆ ಮಾಡಿಸುವುದು ಬಹುತೇಕ ಅನಿವಾರ್ಯವಾಗುತ್ತದೆ. ಈ ಸಂದರ್ಭದಲ್ಲಿ, ಉದ್ದೇಶವು ಖಂಡಿತವಾಗಿಯೂ ಗರ್ಭಪಾತವಲ್ಲ; ತಾಯಿ ಮತ್ತು ಮಗು ಇಬ್ಬರ ಜೀವವನ್ನೂ ಉಳಿಸುವುದೇ ಉದ್ದೇಶ ಮತ್ತು ಗುರಿಯಾಗಿದೆ.
ಪರಿಗಣಿಸಬೇಕಾದ ಒಂದು ನಿರ್ದಿಷ್ಟ ಪರಿಸ್ಥಿತಿ ಅಂಡನಾಳದ ಗರ್ಭಧಾರಣೆ. ಇದರಲ್ಲಿ ಗರ್ಭಧಾರಣೆಯಾದ ಮಗು ಗರ್ಭಾಶಯದ ಗೋಡೆಗೆ ಬದಲಾಗಿ ಅಂಡನಾಳಕ್ಕೆ ಅಂಟಿಕೊಳ್ಳುತ್ತದೆ. ಈ ಸಂದರ್ಭದಲ್ಲಿ, ವೈದ್ಯಕೀಯವಾಗಿ ಏನಾಗುತ್ತದೆ ಎಂಬುದು ಸಾಕಷ್ಟು ಖಚಿತವಾಗಿದೆ. ಮಗು ಬದುಕುಳಿಯುವುದಿಲ್ಲ; ತಾಯಿಯೂ ಆಂತರಿಕ ರಕ್ತಸ್ರಾವದಿಂದ ಮರಣಹೊಂದುವ ಸಾಧ್ಯತೆ ಬಹಳ ಹೆಚ್ಚು. ಇಂತಹ ಸಂದರ್ಭದಲ್ಲಿ ಅನೇಕ ನೈತಿಕ ದೇವತಾಶಾಸ್ತ್ರಜ್ಞರು “ದ್ವಿಪರಿಣಾಮದ ತತ್ತ್ವ” ಎಂಬ ನೈತಿಕ ತತ್ತ್ವವನ್ನು ಅನ್ವಯಿಸಿದ್ದಾರೆ. “ದ್ವಿಪರಿಣಾಮ” ಎಂದರೆ ಒಂದು ಪರಿಣಾಮವು ಉದ್ದೇಶಿತವಾಗಿರುತ್ತದೆ, ಇನ್ನೊಂದು ಉದ್ದೇಶಿತವಾಗಿರುವುದಿಲ್ಲ. ನಿರ್ದಿಷ್ಟವಾಗಿ ಹೇಳುವುದಾದರೆ, ಈಗಾಗಲೇ ಒಡೆದಿರುವ ಅಥವಾ ಶೀಘ್ರದಲ್ಲೇ ಒಡೆಯಲಿರುವ ಅಂಡನಾಳದ ಭಾಗವನ್ನು ತೆಗೆದುಹಾಕುವುದು ಅನುಮತಿಸಲ್ಪಡುತ್ತದೆ ಎಂದು ಅನೇಕರು ವಾದಿಸಿದ್ದಾರೆ; ಹೀಗೆ ಮಾಡುವಾಗ ಮಾನವ ಭ್ರೂಣವೂ ತೆಗೆದುಹಾಕಲ್ಪಡುತ್ತದೆ ಎಂಬುದು ತಿಳಿದಿದ್ದರೂ ಇದು ಅನ್ವಯಿಸುತ್ತದೆ. ಈ ಸಂದರ್ಭದಲ್ಲಿ ನೇರ ಗರ್ಭಪಾತವು ಉದ್ದೇಶವಲ್ಲ.
ನೀವು ಅಥವಾ ನಿಮಗೆ ಪರಿಚಯವಿರುವ ಯಾರಾದರೂ ಈ ಪರಿಸ್ಥಿತಿಯಲ್ಲಿದ್ದರೆ, ದಯವಿಟ್ಟು ನಿಮ್ಮ ಧರ್ಮಕೇಂದ್ರದ ಗುರುಗಳನ್ನು ಸಂಪರ್ಕಿಸಿ ಅವರ ಸಲಹೆ ಪಡೆಯಿರಿ. ಪ್ರತಿಯೊಂದು ಪ್ರಕರಣದಲ್ಲೂ ವಿಶಿಷ್ಟ ಸಂದರ್ಭಗಳಿರುತ್ತವೆ; ಆದ್ದರಿಂದ ನಿಮ್ಮ ಪರಿಸ್ಥಿತಿಯನ್ನೂ ಅದಕ್ಕೆ ಸಂಬಂಧಿಸಿದ ಎಲ್ಲ ಅಂಶಗಳನ್ನೂ ಮೌಲ್ಯಮಾಪನ ಮಾಡುವುದು ಅತ್ಯಗತ್ಯ.
ಇನ್ನಷ್ಟು ಕತೋಲಿಕ ಪ್ರಶ್ನೋತ್ತರಗಳು
