Cebuano

P. Moadto ba ang mga Hayop sa Langit?

P. Moadto ba ang mga hayop sa Langit?

T. Ang matag pari makadungog niini nga pangutana gikan sa mga bata! Morag ang lawom nga pagmahal sa mga bata (ug sa tanang tawo) sa ilang mga binuhing hayop maoy hinungdan nga dako kaayo ang ilang tinguha nga “oo” ang tubag niini nga pangutana. Busa ang tubag mao ang…“oo,” “tingali,” “dili gayod ingon niana,” ug “mahimo kang maglaom!”

Kining lisod nga pangutana walay tin-aw ug hingpit nga tubag. Busa, mahimong husto ang bisan hain sa mga tubag sa ibabaw. Apan, maghatag kita og pipila ka pagpatin-aw ug mga posibilidad bahin sa kinabuhi human sa kamatayon ug sa mga hayop.

Una sa tanan, kon kitang mga tawo mamatay, sa ato pa, kon mamatay kita niining panahona sa kasaysayan sa dili pa mobalik si Jesus aron tukoron ang “Bag-ong mga Langit ug Yuta,” nagtuo kita nga magbulag ang atong lawas ug kalag. Ang lawas mamatay ug “ipapahulay” hangtod nga mobalik si Jesus uban sa tibuok Niyang himaya ug ipahinabo ang pagkabanhaw sa lawas. Hangtod niana, patay ang lawas. Apan, ang mga espiritu sa tawo padayon nga mabuhi. Dili mamatay ang atong espiritu ug, busa, ang Langit (o Purgatoryo o Impiyerno) naghulat sa atong mga espiritu human sa kamatayon dinhi sa yuta. Ang mga tawo, mga anghel, ug ang Dios lamang ang adunay walay kataposang espiritu. Ang mga hayop wala niini. Busa, sa pagkakaron, kon mamatay ang usa ka hayop, patay na kini ug walay espiritu nga padayon nga mabuhi sa Langit.

Apan hulat usa kadiyot!  Adunay paglaom nga ang imong binuhing hayop, ug ang tanang binuhat, mabanhaw.  Sa unsang paagi ug ngano man?  Makabaton ka niini nga paglaom kay sukad pa sa sinugdanan sa panahon, sa orihinal nga kahimtang sa pagkabalaan (sa Tanaman sa Eden), dihay mga mananap.  Busa, bisan tuod ang mga mananap walay mga espiritung walay kataposan, sila adunay pisikal nga lawas ug adunay matawag nato nga kalag sa mananap.  Ang kalag sa mananap mamatay gayod sa dihang mamatay ang mananap, apan dili nato masulti kon unsay mahimong mahitabo sa pagkabanhaw sa mga patay!  Sa pagbalik ni Jesus uban sa tanan Niyang himaya ug sa pagkabanhaw sa tanang tawo gikan sa mga patay, mabanhaw ba usab ang mga mananap ug ang tanang buhing binuhat?  Usa kini ka butang nga mahimo nimong laoman.

Dugang pa, Isaiah 11:6 naghisgot sa matagnaong paagi mahitungod niining bag-ong panahon nga umaabot.  Nag-ingon kini nga teksto, “Unya ang lobo mahimong bisita sa nating karnero, ug ang leopardo mohigda uban sa nating kanding; Ang nating baka ug ang batan-ong liyon manibsib nga magkauban, ug usa ka gamayng bata ang mogiya kanila.”  Busa, literal ba kini nga pahayag?  Pamatuod ba kini nga mabanhaw ang mga mananap?  O simboliko ug mahulagwayon lamang kini?  Lisod masulti.  Bisan pa niana, tungod niini, angay nga maglaom nga ang mga mananap adunay bahin sa umaabot nga bag-ong mga Langit ug Yuta!


Dugang pang Katolikong mga Pangutana ug Tubag