اردو

مقدس یوسف سے دعائیں

"باپ کے دل کے ساتھ” (Patris corde)
پوپ فرانسس کا رسولی خط 

پوپ فرانسس کی دعا

پوپ لیو 13ویں کی دعا

مقدس یوسف کی لیتانی

مقدس یوسف سے نووینا کی روزانہ دعا

مقدس یوسف سے نووینا

مقدس یوسف کے حضور صبح کا نذرانہ

مقدس یوسف سے «یاد کیجیے» کی دعا

اپنے آپ کو مقدس یوسف کے سپرد کرنے کی دعا

مقدس یوسف سے تیس روزہ دعا

مقدس یوسف کے سات غموں اور سات خوشیوں کے احترام میں دعائیں

مقدس یوسف کے بارے میں پوپ مقدس یوحنا پولس دوم کی رسولی نصیحت

مقدس یوسف کے بارے میں دیگر دستاویزات، تعلیمات اور وعظ

مقدس یوسف کے بارے میں بلیٹن کے منتخب مضامین


مقدس یوسف سے پوپ فرانسس کی دعا

سلام ہو، اے نجات دہندہ کے نگہبان،
مبارک کنواری مریم کے شوہر۔
خدا نے اپنا اکلوتا بیٹا آپ کے سپرد کیا؛
مریم نے آپ پر بھروسا کیا؛
آپ کے ساتھ مسیح انسان بنا۔

اے مبارک یوسف، ہمارے لیے بھی
باپ بن کر دکھائیے
اور زندگی کی راہ پر ہماری رہنمائی کیجیے۔
ہمارے لیے فضل، رحم اور حوصلہ حاصل کیجیے،
اور ہر بدی سے ہماری حفاظت کیجیے۔ آمین۔

(پوپ فرانسس نے یہ دعا Patris Corde میں لکھی۔)


 

مقدس یوسف سے پوپ لیو 13ویں کی دعا

اے مبارک یوسف، ہم اپنی مصیبت میں آپ کے پاس آتے ہیں۔ آپ کی نہایت مقدس زوجہ سے مدد کی التجا کرنے کے بعد، ہم بھروسے کے ساتھ آپ کی سرپرستی بھی مانگتے ہیں۔

اس محبت کے واسطے جس نے آپ کو خدا کی بے داغ کنواری ماں سے جوڑا، اور اس پدرانہ محبت کے واسطے جس سے آپ نے طفلِ یسوع کو گلے لگایا، ہم عاجزی سے التجا کرتے ہیں کہ اس میراث پر مہربانی سے نظر فرمائیے جسے یسوع مسیح نے اپنے خون سے خریدا، اور اپنی قوت و طاقت سے ہماری ضرورتوں میں ہماری مدد کیجیے۔

اے مقدس خاندان کے نہایت چوکس نگہبان، یسوع مسیح کے برگزیدہ فرزندوں کی حفاظت کیجیے؛ اے نہایت شفیق باپ، ہم سے دور رکھیے
ہر گمراہی کی چھوت اور ہر بگاڑنے والے اثر کو؛ اے ہمارے نہایت طاقتور محافظ، ہم پر مہربانی کیجیے اور تاریکی کی طاقت سے ہماری جدوجہد میں آسمان سے ہماری مدد کیجیے۔

جس طرح آپ نے ایک بار طفلِ یسوع کو جان لیوا خطرے سے بچایا، اسی طرح اب خدا کی مقدس کلیسیا کو دشمن کے پھندوں اور ہر مصیبت سے بچائیے۔ ہم میں سے ہر ایک کو بھی اپنی مسلسل پناہ میں رکھیے، تاکہ آپ کی مثال اور مدد کے سہارے ہم خدا ترسی کے ساتھ زندگی گزار سکیں، پاکیزگی کی حالت میں وفات پا سکیں اور آسمان میں ابدی خوشی حاصل کر سکیں۔

آمین۔

(پوپ لیو 13ویں نے یہ دعا اپنے 1889 کے عام نامے Quamquam pluries میں لکھی۔)


مقدس یوسف کی لیتانی

اے خداوند، ہم پر رحم فرما۔
اے مسیح، ہم پر رحم فرما۔
اے خداوند، ہم پر رحم فرما۔ اے مسیح، ہماری سن۔
اے مسیح، مہربانی سے ہماری سن۔

اے آسمانی خدا باپ، ہم پر رحم فرما۔
اے خدا بیٹے، دنیا کے نجات دہندہ، ہم پر رحم فرما۔
اے خدا روح القدس، ہم پر رحم فرما۔
اے مقدس تثلیث، واحد خدا، ہم پر رحم فرما۔

اے مقدسہ مریم، ہمارے لیے دعا کیجیے۔
اے مقدس یوسف، ہمارے لیے دعا کیجیے۔
اے داؤد کے نامور فرزند، ہمارے لیے دعا کیجیے۔
اے آبائے دین کی روشنی، ہمارے لیے دعا کیجیے۔
اے خدا کی ماں کے شوہر، ہمارے لیے دعا کیجیے۔
اے کنواری مریم کے پاک دامن نگہبان، ہمارے لیے دعا کیجیے۔
اے خدا کے بیٹے کے پرورش کرنے والے باپ، ہمارے لیے دعا کیجیے۔
اے مسیح کے چوکس محافظ، ہمارے لیے دعا کیجیے۔
اے مقدس خاندان کے سربراہ، ہمارے لیے دعا کیجیے۔

اے نہایت راست باز یوسف، ہمارے لیے دعا کیجیے۔
اے نہایت پاک دامن یوسف، ہمارے لیے دعا کیجیے۔
اے نہایت دانا یوسف، ہمارے لیے دعا کیجیے۔
اے نہایت دلیر یوسف، ہمارے لیے دعا کیجیے۔
اے نہایت فرماں بردار یوسف، ہمارے لیے دعا کیجیے۔
اے نہایت وفادار یوسف، ہمارے لیے دعا کیجیے۔
اے صبر کے آئینے، ہمارے لیے دعا کیجیے۔
اے ناداری سے محبت رکھنے والے، ہمارے لیے دعا کیجیے۔
اے محنت کشوں کے نمونے، ہمارے لیے دعا کیجیے۔
اے گھریلو زندگی کی عزت و شان، ہمارے لیے دعا کیجیے۔
اے کنواریوں کے نگہبان، ہمارے لیے دعا کیجیے۔
اے خاندانوں کے ستون، ہمارے لیے دعا کیجیے۔
اے مصیبت زدوں کی تسلی، ہمارے لیے دعا کیجیے۔
اے بیماروں کی امید، ہمارے لیے دعا کیجیے۔
اے دمِ آخر والوں کے سرپرست، ہمارے لیے دعا کیجیے۔
اے بدروحوں کے لیے باعثِ دہشت، ہمارے لیے دعا کیجیے۔
اے مقدس کلیسیا کے محافظ، ہمارے لیے دعا کیجیے۔

اے خدا کے برّے، جو دنیا کے گناہ دور کرتا ہے،
اے خداوند، ہمیں بخش دے!
اے خدا کے برّے، جو دنیا کے گناہ دور کرتا ہے،
اے خداوند، ہماری دعا کرم سے سن!
اے خدا کے برّے، جو دنیا کے گناہ دور کرتا ہے،
ہم پر رحم فرما!

دعائیہ: اُس نے یوسف کو اپنے گھرانے کا مختار بنایا،
جواب: اور اپنی ساری املاک پر حاکم مقرر کیا۔

آئیے دعا کریں
اے خدا، تُو نے اپنی اُس تدبیر میں جو بیان سے باہر ہے، مبارک یوسف کو اپنی نہایت مقدس ماں کا شوہر چننا پسند فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا سفارشی ہو۔ تُو ابدالآباد زندہ ہے اور سلطنت کرتا ہے۔ آمین۔


مقدس یوسف سے روزانہ کی نووینا دعا 

(یہ دعا خصوصاً 10–18 مارچ تک ہر روز، مریم کے شوہر مقدس یوسف کی عیدِ اعظم کی تیاری میں کی جاتی ہے۔)

اے مقدس یوسف، خدا کے تخت کے حضور آپ کی پناہ اتنی عظیم، اتنی مضبوط اور اتنی جلد میسر آنے والی ہے کہ میں اپنے سب معاملات اور آرزوئیں آپ کے سپرد کرتا ہوں۔

اے مقدس یوسف، اپنی مؤثر شفاعت سے میری مدد کیجیے اور ہمارے خداوند یسوع مسیح کے وسیلے سے اپنے الٰہی بیٹے سے میرے لیے سب روحانی برکات حاصل کیجیے، تاکہ میں یہاں زمین پر آپ کی آسمانی قوت کا تجربہ کر کے آپ کے حضور، جو سب باپوں سے بڑھ کر محبت کرنے والے ہیں، اپنا شکر اور خراجِ عقیدت پیش کر سکوں۔

اے مقدس یوسف، آپ کا اور آپ کی بانہوں میں سوئے ہوئے یسوع کا تصور کرتے ہوئے میں کبھی نہیں تھکتا۔ جب وہ آپ کے دل کے پاس آرام کر رہے ہوں تو مجھے قریب جانے کی جرأت نہیں ہوتی۔ میری طرف سے اُنہیں سینے سے لگائیے، اُن کے پیارے سر کو چو میے، اور اُن سے کہیے کہ جب میں آخری سانس لوں تو وہ بھی مجھے چومیں۔ اے مقدس یوسف، دنیا سے رخصت ہوتی روحوں کے سرپرست، میرے لیے دعا کیجیے۔

آمین۔


مقدس یوسف محنت کش سے دعا

اے جلیل القدر مقدس یوسف، محنت سے لگن رکھنے والے سب لوگوں کے نمونے، میرے لیے یہ فضل حاصل کیجیے کہ میں اپنے بہت سے گناہوں کی تلافی کے لیے توبہ کے جذبے سے کام کروں؛ فرض کے تقاضے کو اپنے فطری رجحانات پر مقدم رکھتے ہوئے فرض شناسی سے کام کروں؛ شکرگزاری اور خوشی سے کام کروں اور اسے اپنے لیے اعزاز سمجھوں کہ محنت کے ذریعے خدا کی عطا کی ہوئی صلاحیتوں کو کام میں لاؤں اور نکھاروں؛ نظم، سکون، اعتدال اور صبر سے کام کروں اور تھکن یا آزمائشوں سے کبھی نہ گھبراؤں؛ اور سب سے بڑھ کر نیت کی پاکیزگی سے اور اپنی ذات سے بے نیازی کے ساتھ کام کروں، اور ہمیشہ موت اور اُس حساب کو اپنی نگاہ کے سامنے رکھوں جو مجھے ضائع کیے ہوئے وقت، کام میں نہ لائی گئی صلاحیتوں، نہ کی گئی نیکیوں اور کامیابی پر اُس بے جا خود اطمینانی کا دینا ہے جو خدا کے کام کے لیے اس قدر تباہ کن ہے۔

سب کچھ یسوع کے لیے، سب کچھ مریم کے وسیلے سے، سب کچھ آپ کی مثال پر، اے بزرگِ خاندان مقدس یوسف۔ زندگی میں اور موت میں یہی میرا نصب العین ہوگا۔ آمین۔

(پوپ مقدس پیوس دہم کی تصنیف)


مقدس یوسف کے حضور صبح کا نذرانہ

اے پیارے اور برگزیدہ باپ، مجھے قبول کیجیے اور میرے جسم و جان کی ہر حرکت کا یہ نذرانہ بھی، جو میں آپ کے وسیلے سے اپنے مبارک خداوند کے حضور پیش کرنا چاہتا ہوں۔

سب کچھ پاک کر دیجیے! سب کچھ کامل سوختنی قربانی بنا دیجیے! میرے دل کی ہر دھڑکن روحانی عشائے ربانی میں شرکت بنے، ہر نگاہ اور ہر خیال محبت کا عمل، ہر کام ایک دل پسند قربانی، ہر لفظ الٰہی محبت کا تیر، اور ہر قدم یسوع کی طرف پیش قدمی ہو۔ ہمارے خداوند کے حضور میری ہر حاضری خدا کو اُتنی ہی پسند آئے جتنی فرشتوں کی خدمت، اور اے پیارے مقدس یوسف، آپ کا ہر خیال آپ کو یاد دلائے کہ میں آپ کی اولاد ہوں۔

میں وہ مواقع آپ کے سپرد کرتا ہوں جن میں مجھ سے عموماً کوتاہی ہوتی ہے، خصوصاً . . . [ان کا ذکر کیجیے]۔

دن بھر کی میری عقیدت کا ہر چھوٹا سا عمل قبول کیجیے، اگرچہ اُس میں بہت سی خامیاں ہوں، اور اُسے یسوع کے حضور پیش کیجیے۔ اُن کی رحمت ان سب خامیوں سے درگزر کرے گی، کیونکہ وہ نذرانے سے زیادہ نذرانہ پیش کرنے والے کی محبت کو دیکھتے ہیں۔

آمین۔


مقدس یوسف سے دعا: یاد کیجیے

اے مبارک کنواری مریم کے نہایت پاک دامن شوہر، اے میرے عظیم محافظ مقدس یوسف، یاد کیجیے کہ کبھی ایسا نہیں ہوا کہ کسی نے آپ کی پناہ لی ہو یا آپ سے مدد کی التجا کی ہو اور اُسے راحت نہ ملی ہو۔ اس لیے آپ کی نیکی پر بھروسا رکھتے ہوئے میں آپ کے حضور آتا ہوں۔ اے نجات دہندہ کے پرورش کرنے والے باپ، میری التجاؤں کو رد نہ کیجیے بلکہ مہربانی سے قبول فرمائیے۔

آمین۔


مقدس یوسف کے سپرد اپنے آپ کو کرنے کی دعا

اے نہایت عزیز مقدس یوسف، میں آپ کی تعظیم میں اپنے آپ کو وقف کرتا ہوں اور اپنے آپ کو آپ کے سپرد کرتا ہوں، تاکہ آپ ہمیشہ نجات کی راہ میں میرے باپ، میرے محافظ اور میرے رہنما رہیں۔ میرے لیے دل کی گہری پاکیزگی اور باطنی زندگی کی پرجوش محبت حاصل کیجیے۔ میں آپ کے نمونے پر چل کر اپنے سب کام خدا کے زیادہ سے زیادہ جلال کے لیے، یسوع کے الٰہی دل اور مریم کے بے داغ دل کے ساتھ متحد ہو کر انجام دوں! اور اے مبارک مقدس یوسف، میرے لیے دعا کیجیے کہ مجھے بھی آپ کی مقدس موت کے سکون اور خوشی میں حصہ ملے۔

آمین۔


مقدس یوسف سے تیس روزہ دعا

ایک قدیم روایت کے مطابق، مقدس یوسف کی وفات یسوع کی علانیہ خدمت کے آغاز سے عین پہلے ہوئی۔ اس لیے ان 30 برسوں کی یاد اور تعظیم میں، جو مقدس یوسف نے یسوع اور مریم کے ساتھ گزارے، درج ذیل دعا 30 دن تک کی جاتی ہے۔

اے ہمیشہ مبارک اور جلیل مقدس یوسف، اے مہربان اور شفیق باپ اور سب غم زدوں کی مدد کرنے والے دوست! آپ یتیموں کے نیک باپ اور محافظ، بے کسوں کے حامی اور حاجت مندوں اور غم زدوں کے سرپرست ہیں۔

میری درخواست پر مہربانی سے نظر کیجیے۔ میرے گناہوں کے باعث میرے خدا کی بجا ناراضی مجھ پر آئی ہے، اور اسی لیے میں دکھوں میں گھرا ہوں۔ اے ناصرت کے خاندان کے شفیق نگہبان، میں مدد اور حفاظت کے لیے آپ کے پاس آتا ہوں۔ پس میری التجا ہے کہ پدرانہ شفقت سے میری دلی دعائیں سنیے اور جن عنایتوں کی درخواست کرتا ہوں وہ میرے لیے حاصل کیجیے۔

میں خدا کے ازلی بیٹے کی بے پایاں رحمت کے واسطے یہ درخواست کرتا ہوں، اسی رحمت کے باعث اُس نے ہماری انسانی فطرت اختیار کی اور اس دکھ بھری دنیا میں جنم لیا۔

میں اُس تھکن اور تکلیف کے واسطے یہ درخواست کرتا ہوں جو آپ نے اُس وقت سہی جب بیت لحم کی سرائے میں مقدس کنواری کے لیے کوئی پناہ نہ ملی، نہ کوئی ایسا گھر ملا جہاں خدا کا بیٹا جنم لے سکے۔ پھر جب ہر جگہ سے انکار ہوا تو آپ کو آسمان کی ملکہ کو ایک غار میں دنیا کے نجات دہندہ کو جنم دینے دینا پڑا۔

میں اُس مقدس نام، یسوع، کی دل کشی اور قدرت کے واسطے یہ درخواست کرتا ہوں، جو آپ نے اُس لائقِ پرستش طفل کو دیا۔

میں اُس شدید اذیت کے واسطے یہ درخواست کرتا ہوں جو آپ نے مقدس شمعون کی پیش گوئی سن کر محسوس کی۔ اُس نے بتایا کہ طفل یسوع اور اُس کی مقدس ماں ہمارے گناہوں اور ہمارے لیے اپنی عظیم محبت کے باعث آنے والے وقت میں دکھ اٹھائیں گے۔

میں آپ کے اُس غم اور روحانی کرب کے واسطے یہ درخواست کرتا ہوں جو آپ نے اُس وقت محسوس کیا جب فرشتے نے آپ کو بتایا کہ طفل یسوع کے دشمن اُس کی جان کے درپے ہیں۔ اُن کے بُرے منصوبے سے بچنے کے لیے آپ کو اُس کے اور اُس کی مبارک ماں کے ساتھ مصر بھاگ جانا پڑا۔

میں اُس طویل اور خطرناک سفر کی تمام تکلیفوں، تھکن اور مشقتوں کے واسطے یہ درخواست کرتا ہوں۔

میں اُس تمام نگہداشت کے واسطے یہ درخواست کرتا ہوں جو آپ نے مقدس طفل اور اُس کی بے داغ ماں کی حفاظت کے لیے اپنے دوسرے سفر میں کی، جب آپ کو اپنے وطن واپس جانے کا حکم ملا۔

میں ناصرت میں آپ کی پُرسکون زندگی کے واسطے یہ درخواست کرتا ہوں، جہاں آپ نے بہت سی خوشیاں اور غم دیکھے۔ میں آپ کی اُس شدید پریشانی کے واسطے بھی یہ درخواست کرتا ہوں، جب وہ لائقِ پرستش طفل آپ اور اپنی ماں سے تین دن تک گم رہا۔

میں اُس خوشی کے واسطے یہ درخواست کرتا ہوں جو اُسے ہیکل میں پا کر آپ کو ہوئی، اور اُس تسلی کے واسطے جو آپ کو ناصرت میں طفل یسوع کی رفاقت میں رہتے ہوئے ملی۔

میں اُس حیرت انگیز فرماں برداری کے واسطے یہ درخواست کرتا ہوں جو اُس نے آپ کی اطاعت میں دکھائی۔

میں اُس کامل محبت اور رضائے الٰہی سے اُس کامل ہم آہنگی کے واسطے یہ درخواست کرتا ہوں جو آپ نے اُس وقت دکھائی جب آپ نے اس زندگی اور یسوع اور مریم کی رفاقت سے رخصت ہونے کا الٰہی حکم قبول کیا۔

میں اُس خوشی کے واسطے یہ درخواست کرتا ہوں جس سے آپ کی روح بھر گئی، جب دنیا کے نجات دہندہ نے موت اور جہنم پر فتح پا کر اپنی بادشاہی سنبھالی اور آپ کو خاص عزت کے ساتھ اُس میں داخل کیا۔

میں مریم کے جلال کے ساتھ جسم و روح سمیت آسمان پر اٹھائے جانے کے واسطے اور اُس بے پایاں خوشی کے واسطے یہ درخواست کرتا ہوں جو آپ کو اُن کے ساتھ خدا کے حضور حاصل ہے۔ اے نیک باپ! آپ کی تمام تکلیفوں، غموں اور خوشیوں کے واسطے میری التجا سنیے اور جو کچھ مانگتا ہوں وہ میرے لیے حاصل کیجیے۔

(یہاں اپنی درخواستیں بیان کیجیے یا اُنہیں دل میں یاد کیجیے۔)

جن سب لوگوں نے مجھ سے دعا کی درخواست کی ہے، اُن کے لیے وہ سب کچھ حاصل کیجیے جو خدا کے منصوبے کے مطابق اُن کے لیے مفید ہے۔ آخر میں، اے میرے عزیز سرپرست اور باپ، میرے اور میرے سب عزیزوں کے آخری لمحات میں ہمارے ساتھ رہیے، تاکہ ہم ابد تک یسوع، مریم اور یوسف کی ستائش کے گیت گائیں۔

”اے مقدس یوسف، آپ کی مہربان سرپرستی سے ہم خطرے سے محفوظ رہیں اور بے عیب زندگی گزاریں۔“


مقدس یوسف کے سات غموں اور سات خوشیوں کی تعظیم میں دعائیں

اس عقیدتی عمل کی ابتدا: دو فرانسسکن راہب فلینڈرز کے ساحل کے ساتھ ساتھ کشتی میں سفر کر رہے تھے کہ ایک ہولناک طوفان اٹھا، جس نے کشتی کو اس کے تین سو مسافروں سمیت ڈبو دیا۔ تاہم دونوں راہب تین دن اور تین راتیں لکڑی کا ایک تختہ تھامے رہے اور مسلسل مقدس یوسف سے التجا کرتے رہے۔ مقدس یوسف ایک نوجوان کی صورت میں اُن پر ظاہر ہوئے اور اُنہیں بحفاظت نکال لائے۔ پھر اُنہوں نے راہبوں سے کہا کہ اُن کے سات غموں اور سات خوشیوں کی یاد میں ہر روز «اے ہمارے باپ» اور «سلام اے مریم» کی دعائیں سات سات مرتبہ پڑھیں۔ ذیل کی دعائیں قابلِ احترام جانواریوس سارنیلی، C.S.S.R. (وفات: 1744) نے مرتب کیں۔ یہ دعائیں اس عقیدتی عمل کے لیے پڑھی جا سکتی ہیں۔ انہیں مسلسل سات اتواروں کو، مسلسل سات دنوں تک یا ایک ہی بار میں پڑھا جا سکتا ہے۔ جو لوگ یہ دعا روزانہ پڑھنا چاہیں، اُن کے لیے ایک ممکنہ ترتیب یہ ہے:

پہلا غم اور پہلی خوشی: ہر اتوار

دوسرا غم اور دوسری خوشی: ہر پیر

تیسرا غم اور تیسری خوشی: ہر منگل

چوتھا غم اور چوتھی خوشی: ہر بدھ

پانچواں غم اور پانچویں خوشی: ہر جمعرات

چھٹا غم اور چھٹی خوشی: جمعہ

ساتواں غم اور ساتویں خوشی: ہفتہ


پہلا غم: مقدس یوسف کا تردّد۔

لیکن اُس کے شوہر یوسف راست باز آدمی تھے اور نہیں چاہتے تھے کہ مریم کی رسوائی ہو، اِس لیے اُنہوں نے اُسے چپکے سے چھوڑ دینے کا ارادہ کیا۔ (متی 1:19)

پہلی خوشی: فرشتے کا پیغام۔

مگر جب وہ اِن باتوں پر غور کر رہے تھے تو دیکھو، خداوند کا ایک فرشتہ خواب میں اُن پر ظاہر ہوا اور کہنے لگا، ”اے یوسف، داؤد کے بیٹے، اپنی بیوی مریم کو اپنے ہاں لے آنے سے نہ ڈرو، کیونکہ جو اُس کے رحم میں ٹھہرا ہے وہ روح القدس سے ہے۔“ (متی 1:20)

اے نہایت مقدس مریم کے پاک دامن شوہر، اے جلیل القدر مقدس یوسف، جب آپ نے اپنی بے داغ زوجہ کو چپکے سے چھوڑ دینے کا ارادہ کیا تو آپ کا دل کتنی بے چینی اور اذیت میں تھا! لیکن جب فرشتے نے تجسّد کا بے مثال راز آپ پر آشکار کیا تو آپ کی خوشی بیان سے باہر تھی!

اِس غم اور اِس خوشی کے واسطے ہم آپ سے التجا کرتے ہیں کہ اب بھی اور ہماری آخری گھڑی کے دکھوں میں بھی ہماری روحوں کو اُس خوشی سے تسلی دیں جو آپ کے نمونے پر نیک زندگی گزارنے اور یسوع اور مریم کی آغوش میں مقدس موت پانے سے ملتی ہے۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


دوسرا غم: یسوع کی پیدائش کے وقت کی غربت۔

اور اُس نے اپنے پہلوٹھے بیٹے کو جنم دیا، اُسے کپڑوں میں لپیٹا اور چرنی میں لِٹا دیا، کیونکہ سرائے میں اُن کے لیے جگہ نہیں تھی۔ (لوقا 2:7)

دوسری خوشی: نجات دہندہ کی پیدائش۔

اور فرشتے نے اُن سے کہا، ”مت ڈرو، کیونکہ دیکھو، میں تمہیں بڑی خوشی کی بشارت دیتا ہوں جو سب لوگوں کے لیے ہوگی؛ کیونکہ آج داؤد کے شہر میں تمہارے لیے ایک نجات دہندہ پیدا ہوا ہے، جو مسیح خداوند ہے۔“ (لوقا 2:10-11)

اے نہایت مبارک بزرگ، اے جلیل القدر مقدس یوسف، آپ مجسّم کلام کے پرورش کرنے والے باپ چنے گئے۔ طفلِ یسوع کو ایسی غربت میں پیدا ہوتے دیکھ کر آپ کو جو غم ہوا، وہ اچانک آسمانی شادمانی میں بدل گیا جب آپ نے فرشتوں کا نغمہ سنا اور اُس روشن رات کی شان و شوکت دیکھی۔

اِس غم اور اِس خوشی کے واسطے ہم آپ سے التجا کرتے ہیں کہ ہمارے لیے یہ فضل حاصل کریں کہ جب ہم زندگی کی راہ سے رخصت ہوں تو فرشتوں کے حمدیہ نغمے سنیں اور آسمانی جلال کی درخشاں جلوہ گری میں شادمان ہوں۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


تیسرا غم: ختنہ۔

اور جب اُس کے ختنے کے لیے آٹھ دن پورے ہوئے تو اُس کا نام یسوع رکھا گیا، وہ نام جو فرشتے نے اُس کے رحم میں ٹھہرنے سے پہلے اُسے دیا تھا۔ (لوقا 2:21)

تیسری خوشی: یسوع کا مقدس نام۔

اور یوسف نے اُس سے ازدواجی تعلق قائم نہیں کیا جب تک اُس نے اپنے پہلوٹھے بیٹے کو جنم نہ دیا۔ اور اُنہوں نے اُس کا نام یسوع رکھا۔ (متی 1:25)

اے جلیل القدر مقدس یوسف، آپ نے وفاداری سے خدا کی شریعت کی پیروی کی، اور ننھے نجات دہندہ کے ختنے کے وقت اُس کا گراں بہا خون بہتا دیکھ کر آپ کا دل چھلنی ہو گیا۔ لیکن یسوع کے نام نے آپ کو نئی زندگی بخشی اور آپ کو پُرسکون خوشی سے بھر دیا۔

اِس غم اور اِس خوشی کے واسطے ہمارے لیے یہ فضل حاصل کریں کہ ہم زندگی میں ہر گناہ سے آزاد رہیں اور جب مریں تو شادمان ہوں، اور یسوع کا مقدس نام ہمارے دلوں میں اور ہمارے ہونٹوں پر ہو۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


چوتھا غم: شمعون کی پیش گوئی۔

شمعون نے انہیں برکت دی اور بچے کی ماں مریم سے کہا: ”دیکھو، یہ بچہ اسرائیل میں بہتوں کے گرنے اور اٹھنے کے لیے اور ایک ایسے نشان کے طور پر مقرر ہے جس کی مخالفت کی جائے گی۔ اور خود تمہاری جان کو ایک تلوار چھید دے گی۔“ (لوقا 2:34)

چوتھی خوشی: مخلصی کے ثمرات۔

وہ عین اسی وقت وہاں آئی، خداوند کی حمد کرنے لگی اور ان سب سے اُس کے بارے میں بات کرنے لگی جو یروشلیم کی مخلصی کے منتظر تھے۔ (لوقا 2:38)

اے جلیل القدر مقدس یوسف، اے نہایت وفادار مقدس، جو ہماری مخلصی کے بھیدوں میں شریک ہوئے، یسوع اور مریم کے دکھوں کے بارے میں شمعون کی پیش گوئی نے آپ کو جان لیوا خوف سے لرزا دیا۔ لیکن اسی وقت اُس پیش گوئی نے آپ کو اس مبارک خوشی سے بھر دیا کہ بے شمار جانیں، جیسا کہ شمعون نے کہا تھا، نجات اور جلالی قیامت پائیں گی۔

اس غم اور اس خوشی کے واسطے، ہمارے لیے یہ فضل حاصل کیجیے کہ ہم بھی اُن لوگوں میں شامل ہوں جو یسوع کی نیکیوں اور کنواری ماں مریم کی شفاعت کے وسیلے سے جلالی قیامت کے لیے پہلے ہی سے مقرر ہیں۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


پانچواں غم: مصر کی طرف فرار۔

پس وہ اٹھا، رات ہی کو بچے اور اُس کی ماں کو ساتھ لیا اور مصر چلا گیا۔ (متی 2:14)

پانچویں خوشی: مصر کے بتوں کا گر پڑنا۔

مصر کے بارے میں بارِ نبوت۔ دیکھو، خداوند ایک تیز رو بادل پر سوار ہو کر مصر میں داخل ہوگا۔ اُس کی حضوری میں مصر کے بت لرز اٹھیں گے اور مصر کا دل اُسی کے اندر پگھل جائے گا۔ (یسعیاہ 19:1)

اے مجسم خدا کے بیٹے کے نہایت چوکس نگہبان، اے جلیل القدر مقدس یوسف، آپ نے خدائے تعالیٰ کے بیٹے کی پرورش اور خدمت میں کتنی مشقت اٹھائی، خصوصاً مصر کی طرف فرار کے وقت! پھر بھی آپ کو کتنی خوشی تھی کہ خود خدا ہمیشہ آپ کے قریب تھا اور آپ نے دیکھا کہ مصریوں کے بت اُس کے سامنے منہ کے بل زمین پر گر پڑے۔

اس غم اور اس خوشی کے واسطے، ہمارے لیے یہ فضل حاصل کیجیے کہ ہم جہنم کے ظالم حاکم سے محفوظ رہیں، خصوصاً ایسے موقعوں سے دور رہ کر جہاں گناہ کا خطرہ ہو۔ دنیاوی لگاؤ کا ہر بت ہمارے دلوں سے گر پڑے۔ ہم پوری طرح یسوع اور مریم کی خدمت میں لگے رہیں، صرف اُنہی کے لیے جیئیں اور خوشی سے مریں۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


چھٹا غم: مصر سے واپسی۔

لیکن جب اُس نے سنا کہ ارخلاؤس اپنے باپ ہیرودیس کی جگہ یہودیہ میں حکومت کر رہا ہے تو وہ وہاں جانے سے ڈرا۔ پھر خواب میں خبردار کیے جانے پر وہ گلیل کے علاقے میں چلا گیا۔ (متی 2:22)

چھٹی خوشی: ناصرت میں یسوع اور مریم کے ساتھ زندگی۔

جب اُنہوں نے خداوند کی شریعت کے تمام احکام پورے کر لیے تو وہ گلیل میں اپنے شہر ناصرت کو لوٹ گئے۔ (لوقا 2:39)

اے جلیل القدر مقدس یوسف، زمین پر ایک فرشتے کی مانند، آپ یہ دیکھ کر حیران تھے کہ آسمان کا بادشاہ آپ کے حکم مانتا ہے۔ یسوع کو ملکِ مصر سے نکال لانے کی تسلی میں ارخلاؤس کے خوف نے خلل ڈالا؛ پھر بھی فرشتے کی یقین دہانی پا کر آپ ناصرت میں یسوع اور مریم کے ساتھ خوشی سے رہے۔

اس غم اور اس خوشی کے واسطے، ہمارے لیے یہ فضل حاصل کیجیے کہ ہمارے دل نقصان دہ خوفوں سے آزاد ہو جائیں، تاکہ ہم ضمیر کے اطمینان میں خوش رہیں، یسوع اور مریم کے ساتھ سلامتی سے زندگی گزاریں اور آپ ہی کی طرح اُن کی رفاقت میں وفات پائیں۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔


ساتواں غم: طفل یسوع کا کھو جانا۔

جب وہ اُنہیں نہ ملا تو وہ اُس کی تلاش میں یروشلیم واپس گئے۔ (لوقا 2:45)

ساتویں خوشی: طفل یسوع کا ہیکل میں ملنا۔

تین دن کے بعد اُنہوں نے اُسے ہیکل میں پایا۔ وہ معلموں کے درمیان بیٹھا اُن کی باتیں سن رہا تھا اور اُن سے سوال کر رہا تھا۔ (لوقا 2:46)

اے جلیل القدر مقدس یوسف، ہر طرح کی پاکیزگی کے نمونے، جب طفل یسوع آپ کی کسی خطا کے بغیر کھو گئے تو آپ تین دن تک غم کے ساتھ اُنہیں ڈھونڈتے رہے، یہاں تک کہ آپ نے بڑی خوشی سے اُنہیں پھر ہیکل میں علما کے درمیان بیٹھے پایا۔

اس غم اور اس خوشی کے واسطے، ہم دل کی گہرائی سے آپ سے التجا کرتے ہیں کہ ہمیں اس بدبختی سے ہمیشہ بچائیے کہ ہم مہلک گناہ کے باعث یسوع کو کھو بیٹھیں۔ لیکن اگر یہ سب سے بڑی بدبختی ہم پر آ پڑے تو ہمیں یہ توفیق دیجیے کہ ہم مسلسل رنج کے ساتھ اُنہیں ڈھونڈتے رہیں، یہاں تک کہ اُنہیں پھر پا لیں اور وہ ہم پر اپنی عظیم رحمت ظاہر کرنے کو تیار ہوں، خصوصاً موت کی گھڑی میں؛ تاکہ ہم آسمان میں پہنچ کر اُن کی حضوری کی خوشی پائیں اور وہاں آپ کی رفاقت میں اُن کی الٰہی رحمت کی حمد ہمیشہ گاتے رہیں۔

اے ہمارے باپ . . .
سلام اے مریم . . .
جلال ہو . . . 

آئیے دعا کریں۔

اے خدا، تُو نے اپنی ناقابلِ بیان تدبیر سے مبارک یوسف کو اپنی نہایت مقدس ماں کا شوہر چننا منظور فرمایا۔ ہم تجھ سے التجا کرتے ہیں کہ جس کی ہم زمین پر اپنے محافظ کی حیثیت سے تعظیم کرتے ہیں، وہ آسمان میں ہمارا شفیع ہو۔ تُو ابدالآباد زندہ ہے اور بادشاہی کرتا ہے۔ 

آمین۔

یہ صفحہ شیئر کریں: