తెలుగు

ఆరవ రోజు: ఏకాంతం

తపస్సు కాలపు మొదటి వారంలోని మంగళవారం

మానవులు ఒంటరితనంలో, ఒకరికొకరు దూరంగా జీవించడానికి ఉద్దేశించబడలేదు. దేవునితోనూ, ఒకరితో ఒకరమూ సహవాసంలో జీవించడానికే మనం సృష్టించబడ్డాం. దేవునితో ఏర్పడిన విడదీయరాని ప్రేమబంధాలలోనూ, దేవుని ప్రేమలో పాలుపంచుకునే పరలోకంలోని ప్రతి ఒక్కరితోనూ కలిసి పరలోక జీవితం గడుపుతాం. అలాంటప్పుడు యేసు తన బహిరంగ పరిచర్యకు ఏకాంతంలో ఎందుకు సిద్ధపడ్డారు? అంతకాలం ఒంటరిగా ఉండడానికి ఎందుకు వెళ్లారు?

దేవుడైన యేసు తన తండ్రితో కలిగియున్న ఆధ్యాత్మిక ఐక్యతలో తన మానవ స్వభావం విశ్రాంతి పొందేందుకు ఆయన ఏకాంతం ఒక అవకాశమైంది. శరీరధారియైన యేసు క్రీస్తు వ్యక్తిలో పుత్రుడైన దేవుడు, ఎలాంటి కార్యకలాపాలూ పరధ్యానాలూ లేకుండా, పరలోకంలోని తన తండ్రితో పరిపూర్ణ ఐక్యతలో నివసించారు. భూమిపైనే పరలోకాన్ని ఇలా రుచిచూడటం ఎడారిలోని ఏకాంతం వల్లనే సాధ్యమైంది.

మీ జీవితంలో కూడా, దేవునితో మరింత సంపూర్ణంగా సహవాసంలోకి ప్రవేశించడానికి అప్పుడప్పుడు ఏకాంతం అవసరం. దేవునితో మరింత గాఢమైన సహవాసాన్నీ ఏకత్వాన్నీ కలిగించే శక్తి ఏకాంతానికి ఉంది. దేవునితో ఆ లోతైన సహవాసం, ఇతరులతో మరింత గాఢమైన, నిజమైన, పవిత్రమైన సహవాసాన్ని పంచుకోవడానికి మిమ్మల్ని సిద్ధం చేస్తుంది.

దీనిని ఒక పోలిక ద్వారా అర్థం చేసుకోవడానికి, మీ జీవిత భాగస్వామి, మీ సంతానం, తల్లి లేదా తండ్రి, లేదా స్నేహితులు వంటి మీకు అత్యంత సన్నిహితమైన వ్యక్తి గురించి ఆలోచించండి. వారితో మాట్లాడటం అవసరమే; అది సన్నిహిత బంధాన్ని పెంపొందించడంలో తోడ్పడుతుంది. అయినా, వారితో కలిసి ఏకాంతంలో ఉండటం కూడా మీ బంధాన్ని మరింత గాఢం చేస్తుంది. ఉదాహరణకు, ఒక భార్యాభర్తలు సాయంకాలం కలిసి కూర్చుని, మాట్లాడకుండా, నిశ్శబ్దంగా ఒకరి సన్నిధిలో మరొకరు ఉన్నట్లు ఊహించుకోండి. వారు పంచుకునే ఏకాంతమూ నిశ్శబ్దమూ, మాటలతో ఏర్పరచలేని లోతైన ఆధ్యాత్మిక బంధాన్ని ఏర్పరుస్తాయి.

దేవునితో కూడా ఇలాగే ఉంటుంది. ఈ జీవితంలో సాధ్యమైనంత గాఢమైన ఐక్యతలోకి దేవునితో ప్రవేశించాలని మీరు కోరుకుంటే, ఆయనతో ఏకాంతంలోనూ నిశ్శబ్దంలోనూ ఉండటం అవసరం. అప్పుడు మీరు కేవలం ఆయనతో “ఉండగలుగుతారు.” ఆచరణలో చెప్పాలంటే, ప్రతిరోజూ కొంత సమయం కేటాయించి, కళ్లు మూసుకొని, మీ ఆత్మ అంతరాళంలోకి ప్రవేశించి, మీలోని దేవుని సన్నిధిని గుర్తించి, ఆపై అక్కడే మీ ఆత్మ లోతుల్లో ఆయనతో ఉండటం దీనిని సాధించడానికి ఉత్తమ మార్గం కావచ్చు. ఆవిలా పునీత తెరేసా దీనిని “అంతరంగ ఏకాగ్రతా ప్రార్థన” అని పేర్కొన్నారు.

ఏకాంతం దేవునితోనూ ఇతరులతోనూ సహవాసం కోసమేనన్న విషయాన్ని ధ్యానించండి. దేవునితోనూ ఇతరులతోనూ ఎంతో గాఢంగా, లోతుగా ఐక్యమవడానికి ఏకాంతం మనకు తోడ్పడుతుంది. ఎడారిలో ఒంటరిగా ఉన్న యేసు గురించి ఆలోచిస్తూ, తన ఏకాంతంలోనూ నిశ్శబ్దంలోనూ ఆయన తన తండ్రితో గాఢంగా ఐక్యమై ఉన్నారన్న విషయాన్ని ధ్యానించండి. నిశ్శబ్ద భాష ప్రేమలోని అత్యంత లోతైన సత్యాలను తెలియజేయనిస్తూ, మనం కూడా ఏకాంతంలో దేవునితోనూ ఇతరులతోనూ ప్రేమనూ ఐక్యతనూ వెదకాలని ఆయన ఆదర్శం మనకు బోధిస్తుంది.

ఏకాంతంలో నివసించే నా ప్రభువా, ఎడారి నిశ్శబ్దంలో నీ పవిత్ర ఏకాంతం, నీ మానవత్వంలో నీ తండ్రితో సహవాసంలో సంపూర్ణంగా విశ్రాంతి పొందడానికి నీకు తోడ్పడింది. అక్కడే నీవు నీ మానవత్వాన్ని తండ్రికి అర్పిస్తూ, ఆయనతో ఏకమై జీవించసాగావు. నా జీవితంలోని ఏకాంతంలో నన్ను నీకూ నీ తండ్రికీ మరింత దగ్గరగా ఆకర్షించు. ప్రతిరోజూ నీతో ఉండటం తప్ప మరేమీ చేయని సమయాన్ని నిబద్ధతతో కేటాయించడానికి నాకు సహాయం చేయి. నా ప్రభువా, నేను నిన్ను ప్రేమిస్తున్నాను. నిన్ను మరింతగా ప్రేమించడానికి నాకు సహాయం చేయి. యేసూ, నేను నీపై నమ్మకం ఉంచుతున్నాను.

ఇది కూడా చూడండి: ఆరవ రోజు: సిలువ పాదాల వద్ద 40 రోజులు

విషయ సూచిక

తపస్సుకాలం కోసం మరిన్ని