తెలుగు

ఆగమనకాలం – మొదటి వారం

అలవాటుగా మారిన సంసిద్ధత

ఆగమనకాలపు మొదటి ఆదివారం (సంవత్సరం A)

“అలాగే, మీరు కూడా సిద్ధంగా ఉండాలి. ఎందుకంటే మీరు ఊహించని గడియలో మనుష్యకుమారుడు వస్తాడు.” మత్తయి 24:44

మరోసారి మనం పవిత్రమైన ఆగమనకాలంలోకి ప్రవేశిస్తున్నాం. అన్నిటికంటే ముఖ్యంగా, ఆగమనకాలం ఆధ్యాత్మికంగా సిద్ధపడే సమయం. ఈ సిద్ధపాటు ద్వారా మనం పొందగల వరాలన్నిటిలోకీ అత్యంత గొప్ప వరమైన క్రీస్తు యేసునే స్వీకరించడానికి మనల్ని మనం మరింత సంపూర్ణంగా సిద్ధం చేసుకుంటాం!

లోక రక్షకుడు ఒకరోజు తిరిగి భూమిపైకి వస్తారని ఆగమనకాలపు ఈ మొదటి ఆదివారపు పఠనాలు మనకు గుర్తుచేస్తున్నాయి. ఆయన తన సంపూర్ణ వైభవమహిమలతో తిరిగి వస్తారని, ఈ రాకడ “మీరు ఊహించని గడియలో…” ఉంటుందని మనకు గుర్తుచేయబడుతోంది.

అంతిమ తీర్పు కోసం, ఆకాశభూములను నూతనంగా సృష్టించడం కోసం మన ప్రభువు ఏ సమయంలోనైనా తిరిగి భూమిపైకి రావచ్చన్నది నిజమే అయినా, అది త్వరలోనే జరుగుతుందని చాలామంది ఆశించడం లేదు. అలా ఉన్నప్పటికీ, ఆ అంతిమ రాకడకు ఎల్లప్పుడూ సిద్ధంగా ఉండమని మనల్ని ప్రోత్సహించడానికి మన ప్రభువు ఎంతో కృషి చేస్తున్నారు. అది నిజంగానే ఏ సమయంలోనైనా జరగవచ్చని ఆయన స్పష్టంగా చెబుతున్నారు.

ఆ రోజు ఈ రోజే అయితే, మీరు ఎంతవరకు సిద్ధంగా ఉన్నారు? అది ఈ రోజు అయ్యే అవకాశం చాలా తక్కువనే సమర్థనను పక్కనపెట్టి, చరిత్రలోని ఆ నిర్ణయాత్మక క్షణానికి మీ సంసిద్ధతను గురించి ఆలోచించండి. మనం పవిత్రంగా జీవించడానికి ఈ సంసిద్ధత ప్రధానమైన కీలకాంశాలలో ఒకటి. ఈ రోజును, ఇకముందు వచ్చే ప్రతి రోజును, మన ప్రభువు తిరిగి వచ్చే ఆ రోజుగానే భావించి మనం జీవించగలిగితే, ఈ నిరంతర నిరీక్షణతో, సంసిద్ధతతో జీవించడంవల్ల మన జీవిత పవిత్రత ఎంతో వృద్ధి చెందుతుందనడంలో సందేహం లేదు.

రోజుల తరబడి, సంవత్సరాల తరబడి నిరంతర సంసిద్ధతతో జీవించడంవల్ల కలిగే ఫలితాలలో ఒకటి ఇది: మన ప్రభువు నిజంగానే ఈ రోజు తిరిగి వచ్చినా మనం సిద్ధంగా ఉంటాం. అంతే ముఖ్యంగా, ఆయన ప్రతిరోజూ మన దగ్గరకు వచ్చే లెక్కలేనన్ని విధానాల పట్ల కూడా మనం ఎల్లప్పుడూ శ్రద్ధగా ఉంటాం. ఈ విధమైన నిరంతర సంసిద్ధత, దేవుని స్వరాన్ని విని స్పందించే, ఆయన ప్రతిరోజూ మనకు పంపే లెక్కలేనన్ని కృపలకు స్పందించే ఆధ్యాత్మిక అలవాటును మనలో ఏర్పరుస్తుంది. అలవాటుగా మారిన ఈ సంసిద్ధత ఒక సద్గుణం. దీని ద్వారా క్రీస్తు రాకడ ఇక్కడే, ఇప్పుడే మనల్ని రూపాంతరం చేస్తుంది. మనలోను, మన ద్వారాను లోకాన్ని విమోచించే తన కార్యాన్ని నెరవేరుస్తూ, ఆయన మనలో మరింత సంపూర్ణంగా జీవించడానికి ఇది వీలు కల్పిస్తుంది.

ఎల్లప్పుడూ తన పట్ల శ్రద్ధగా ఉండే ఈ పవిత్ర అలవాటును మనం అలవరచుకోవాలని, మన జీవితాలలో తన పవిత్ర సాన్నిధ్యాన్ని నిరంతరం స్వీకరించే స్థితిలో ఉండాలని క్రీస్తు హృదయంలో రగులుతున్న కోరికను గురించి ఈ రోజు ధ్యానించండి. ఈ రోజే, ఇప్పుడే ఆయనను మీ దగ్గరకు రానివ్వండి; వేచి ఉండకండి. ఈ రోజు మీ దృష్టిని ఆయనపై నిలపండి. యేసు ఈ రోజు మిమ్మల్ని కోరుతున్నదాన్ని రేపటికి వాయిదా వేయకండి. ఇలా చేయడం లోకాంతంలో ఆయన అంతిమంగా, మహిమతో వచ్చే రాకడకు మిమ్మల్ని సిద్ధం చేయడమే కాకుండా, మీ జీవితం ప్రతిరోజూ సంపూర్ణంగా రూపాంతరం చెందడానికి కూడా మిమ్మల్ని సిద్ధం చేస్తుంది.

ఎల్లప్పుడూ నాతో ఉండే నా ప్రభువా, నా జీవితంలో నీ కృపను, కనికరాన్ని కుమ్మరించడానికి నీవు నిరంతరం అనుకోని వేళలో నా దగ్గరకు వస్తున్నావు. నీకూ, నా జీవితంపట్ల నీ పరిపూర్ణ చిత్తానికీ నన్ను నేను నిరంతరం తెరచి ఉంచుకునేలా, ఎల్లప్పుడూ సిద్ధంగా ఉండే అలవాటును నాలో పెంపొందించుకోవడానికి సహాయం చేయి. నిన్ను కలుసుకునేందుకు నాకున్న సంసిద్ధత నూరింతలు పెరిగే నిజమైన సమయంగా ఈ ఆగమనకాలం ఉండునుగాక. యేసూ, నేను నీపై నమ్మకం ఉంచుతున్నాను.


ఆగమనకాలంలో జాగరూకత

ఆగమనకాలపు మొదటి ఆదివారం (సంవత్సరం బి)

“నేను మీతో చెప్పేది అందరితోనూ చెబుతున్నాను: ‘మెలకువగా ఉండండి!’” మార్కు 13:37

మీరు క్రీస్తుపట్ల శ్రద్ధగా ఉన్నారా? ఇది ఎంతో ప్రాముఖ్యమైన ప్రశ్న అయినప్పటికీ, దీని అర్థాన్ని పూర్తిగా గ్రహించని వారు కూడా చాలామంది ఉండవచ్చు. అవును, పైకి చూస్తే దీని అర్థం స్పష్టమే: “శ్రద్ధగా ఉండటం” అంటే మీ జీవితంలోనూ, మీ చుట్టూ ఉన్న ప్రపంచంలోనూ మన ప్రభువు సన్నిధిని గుర్తిస్తూ ఉండటం. మరి మీరు శ్రద్ధగా ఉన్నారా? మెలకువగా ఉన్నారా? క్రీస్తు రాక కోసం చూస్తున్నారా, వెదుకుతున్నారా, వేచి ఉన్నారా, ఎదురుచూస్తున్నారా, సిద్ధపడుతున్నారా? యేసు 2,000 సంవత్సరాలకు పూర్వమే చిన్న శిశువుగా ఈ భూమిపైకి వచ్చినప్పటికీ, ఆయన ఈ రోజూ మన దగ్గరకు వస్తూనే ఉన్నారు. ఆయన గాఢమైన సన్నిధిని మీరు ప్రతిరోజూ గుర్తించకపోతే, ఆధ్యాత్మికంగా చూస్తే మీరు ఇప్పటికే కొంతవరకు నిద్రలో ఉండవచ్చు.

ఈ లోకంలోని గతించిపోయే, ప్రాముఖ్యంలేని, పాపభరితమైన వాటివైపు కూడా మన అంతరంగ దృష్టిని మళ్లించిన ప్రతిసారీ మనం ఆధ్యాత్మికంగా “నిద్రలోకి జారుకుంటాం.” అలా జరిగినప్పుడు క్రీస్తునే మనం ఇక చూడలేకపోతాం. విచారకరంగా, ఇలా జరగడం అంతకంతకూ సులభమవుతోంది. హింస, అనారోగ్యం, ద్వేషం, విభేదాలు, అపకీర్తికర సంఘటనలు వంటివి ప్రతిరోజూ మనలను పీడిస్తున్నాయి. సాధ్యమైనంతగా దిగ్భ్రాంతిని, సంచలనాన్ని కలిగించే వార్తలను మనకు అందించడానికి వార్తామాధ్యమాలు రోజూ పోటీపడుతున్నాయి. ఒక్క క్షణం మాత్రమే తృప్తినిచ్చే చిన్నచిన్న మాటలు, చిత్రాలతో మన కొద్దిపాటి శ్రద్ధాసమయాన్ని నింపడానికి సామాజిక మాధ్యమాలు రోజూ ప్రయత్నిస్తున్నాయి. ఫలితంగా, మన ఆత్మ నేత్రాలు, అంటే మన అంతరంగ విశ్వాస దృష్టి, మసకబారిపోతోంది; అది నిర్లక్ష్యానికి, మరపునకు, తిరస్కారానికి గురవుతోంది. దాని ఫలితంగా, నేడు మన ప్రపంచంలోని చాలామంది, పెరుగుతున్న గందరగోళపు శబ్దాలను దాటి, లోక రక్షకుని మృదువైన, స్పష్టమైన, గంభీరమైన స్వరాన్ని గుర్తించలేకపోతున్నట్లు కనిపిస్తున్నారు.

మనం ఆగమనకాలాన్ని ప్రారంభిస్తున్న ఈ సమయంలో, మీ ఆత్మలోని అట్టడుగు లోతుల్లో మన ప్రభువు మీతో మాట్లాడుతున్నారు. “మేలుకోండి.” “వినండి.” “మెలకువగా ఉండండి” అని ఆయన మృదువుగా చెబుతున్నారు. ఆయన కేకలు వేయరు; మీరు మీ శ్రద్ధనంతటినీ ఆయనకు ఇవ్వవలసి వచ్చేలా మెల్లని స్వరంతో మాట్లాడతారు. మీరు ఆయనను చూస్తున్నారా? ఆయన స్వరం వింటున్నారా? ఆయన మాటలను శ్రద్ధగా ఆలకిస్తున్నారా? ఆయనను అర్థం చేసుకుంటున్నారా? ఆయన స్వరం మీకు తెలుసా? లేక మీ చుట్టూ ఉన్న అనేక స్వరాలు, ఆయన మీకు తెలియజేయాలనుకుంటున్న లోతైన, గంభీరమైన, మిమ్మల్ని రూపాంతరం చేసే సత్యాలనుంచి మిమ్మల్ని దూరం చేస్తున్నాయా?

దేవుడు ప్రతిరోజూ మీ ఆత్మ లోతుల్లో మాట్లాడుతున్నారనే వాస్తవాన్ని ఈ రోజు ధ్యానించండి. ఆయన ఇప్పుడు మీతో మాట్లాడుతున్నారు. జీవితంలో నిజంగా ముఖ్యమైనదంతా ఆయన చెప్పే మాటలే. వినడానికి, శ్రద్ధగా ఉండటానికి, స్పందించడానికి మీ నిబద్ధతను పునరుద్ధరించుకునేందుకు ఆగమనకాలం మరే సమయంకన్నా అనువైనది. నిద్రలోనే ఉండిపోకండి. మేల్కొని, మన ప్రభువు గంభీరమైన స్వరాన్ని శ్రద్ధగా ఆలకించండి.

ప్రభువైన యేసూ, రమ్ము! రమ్ము! ప్రియమైన ప్రభువా, ఈ ఆగమనకాలం నా జీవితంలో లోతైన పునరుద్ధరణకు సమయమగునుగాక. నీ మృదువైన, గంభీరమైన స్వరాన్ని వెదకడానికి నా పూర్ణహృదయంతో కృషిచేసే సమయమగునుగాక. ప్రియమైన ప్రభువా, నా శ్రద్ధను ఆకర్షించడానికి పోటీపడే ఈ లోకపు అనేక శబ్దాలనుంచి వైదొలగి, నీవైపునకూ, నీవు చెప్పదలచిన సమస్తం వైపునకూ మాత్రమే తిరగడానికి నాకు కృపను దయచేయి. ప్రభువైన యేసూ, రమ్ము; ఈ ఆగమనకాలంలో నా జీవితంలోకి మరింత లోతుగా రమ్ము. యేసూ, నేను నీపై నమ్మకం ఉంచుతున్నాను.


ఆగమనకాలం ప్రారంభమవుతోంది!

ఆగమనకాలపు మొదటి ఆదివారం (సంవత్సరం సి)

“ఎల్లవేళలా మెలకువగా ఉండి ప్రార్థించండి.” లూకా 21:36a

పై వాక్యభాగంలో కనిపిస్తున్నట్లుగా, మెలకువగా ఉండాలనే పిలుపుతో ఆగమనకాలం ప్రారంభమవుతుంది. ఈ జాగరూకతకూ, ప్రభువు రాకకోసం ఎదురుచూడటానికీ మనలను పిలిచే వాక్యభాగాలు పవిత్ర గ్రంథంలో ఎన్నో ఉన్నాయి. మెలకువగా ఉండటం అంటే మనం సిద్ధంగా ఉండటం కూడా. అప్పుడు ఏదీ మనలను ఆదమరచిన స్థితిలో పట్టుకోదు. క్రిస్మస్ ఉదయం వచ్చి, మీరు మేల్కొని, సిద్ధపడటం మరచిపోయారని హఠాత్తుగా గ్రహిస్తే ఎలా ఉంటుందో ఊహించండి! మీ దగ్గర బహుమతులేవీ లేకుండా, ఆహారపదార్థాలేవీ కొనకుండా, ఎలాంటి ఏర్పాట్లూ చేయకుండా ఉంటే ఎలా ఉంటుందో ఊహించండి. తప్పకుండా మీరు అలా జరగనివ్వరు. అయితే ఆధ్యాత్మికంగా మాత్రం కొన్నిసార్లు అలా జరగనిస్తాం. మన హృదయాల్లో క్రీస్తు జననాన్ని వేడుకగా జరుపుకోవడానికి తరచూ మనం సిద్ధంగా ఉండం.

ఆగమనకాలపు మొదటి వారం క్రీస్తు రెండవ రాకపై కూడా మన దృష్టిని కేంద్రీకరిస్తుంది. సజీవులకూ మృతులకూ తీర్పు తీర్చడానికి యేసు సమస్త వైభవంతోనూ మహిమతోనూ తిరిగి వస్తారు. ప్రతి ఆదివారం మన విశ్వాస ప్రమాణంలో ఈ సత్యాన్ని అంగీకరిస్తాము. కాబట్టి, ఆగమనకాలం శరీరధారియై వచ్చిన యేసు మొదటి రాకను వేడుకగా జరుపుకోవడానికి సిద్ధపడే కాలమే అయినప్పటికీ, ఆయన మొదటి రాక అంతిమంగా ఆయన చివరి మహిమాన్విత రాకలో పరిపూర్ణమవుతుందని గుర్తించే కాలం కూడా.

ఆగమనకాలం ప్రారంభమవుతుండగా, యేసు రాకకు మీరు ఎంతవరకు సిద్ధంగా ఉన్నారో ధ్యానించండి. వస్తువులు కొనడం, వంటలు చేయడం, అలంకరించడం మొదలైనవాటితో క్రిస్మస్‌కు సిద్ధపడేటప్పుడు చూపే అదే ఉత్సాహంతో మీరు ఆయన రాకకు సిద్ధపడుతున్నారా? ఆయన తిరిగి వచ్చే ఆ రోజు కోసం మీరు ఎదురుచూస్తున్నారా? ఆయన జననాన్ని ఆధ్యాత్మికంగా వేడుక చేసుకోవడానికి సిద్ధపడుతున్నారా? దేవుడు ప్రతిరోజూ మీతో మాట్లాడే అనేక విధానాలను గుర్తించడానికి మీరు మెలకువగా, శ్రద్ధగా ఉన్నారా?

మహిమతో ఆయన తిరిగి రావడానికి మీరు కోరుకున్నంతగా సిద్ధంగా లేరని గుర్తిస్తే, మీ హృదయాన్ని సిద్ధం చేసుకునే కాలంగా ఈ ఆగమనకాలాన్ని మార్చుకోండి. ప్రార్థనకు, ఆధ్యాత్మిక సాధనలకు, ధ్యానానికి, మృదువైనదీ మహిమాన్వితమైనదీ అయిన ఆయన స్వరాన్ని శ్రద్ధగా వినడానికి నిబద్ధులై ఉండండి.

ప్రభువా, ఆగమనకాలం ప్రారంభమవుతుండగా, నా దృష్టిని నీపై నిలపడానికి నాకు సహాయం చేయి. నీ స్వరాన్ని వినడానికి నా చెవులను తెరవడానికి సహాయం చేయి. నీ మహిమాన్విత సన్నిధికి నా హృదయాన్ని తెరవడానికి సహాయం చేయి. నీవు నా దగ్గరకు రావాలని కోరుకునే ప్రతి విధానంలోనూ నేను నీ పట్ల శ్రద్ధగా ఉండునుగాక. యేసూ, నేను నీపై నమ్మకం ఉంచుతున్నాను.


అతిపరిశుద్ధ దివ్యసత్ప్రసాదంపై విశ్వాసం

ఆగమనకాలపు మొదటి వారంలోని సోమవారం

“ప్రభువా, నీవు నా ఇంటి కప్పు కిందకు రావడానికి నాకు అర్హత లేదు; నీవు ఒక్క మాట చెప్పు, నా సేవకుడు స్వస్థత పొందుతాడు.” మత్తయి 8:8

మనకు సుపరిచితమైన ఈ మాట రోమా శతాధిపతి విశ్వాసం నుండి వచ్చింది. తన సేవకుని స్వస్థపరచమని ఆయన యేసును అడిగాడు. అతనిని స్వస్థపరచడానికి వస్తానని యేసు అంగీకరించినప్పుడు, ఆ శతాధిపతి యేసుపట్ల తనకున్న ఈ ప్రగాఢ విశ్వాసాన్ని రెండు విషయాలలో వ్యక్తం చేశాడు: 1) యేసు తన ఇంటికి రావడానికి తాను యోగ్యుడు కాదని, 2) యేసు ఒక్క మాట పలికితే చాలు, తన సేవకుని స్వస్థపరచగలడనే నమ్మకం తనకు ఉందని.

ఆ వ్యక్తి విశ్వాసానికి యేసు ఎంతో ముగ్ధులై, దూరం నుంచే ఆయన సేవకుడికి శారీరక స్వస్థతను అనుగ్రహించి ఆయన కోరికను నెరవేర్చారు. అయితే యేసు కేవలం స్వస్థపరచడం కంటే ఎంతో ఎక్కువే చేశారు. ఆ వ్యక్తిని అందరికీ విశ్వాస ఆదర్శంగా కూడా నిలిపారు.

శతాధిపతి చేసిన ఈ అందమైన విశ్వాస ప్రకటనను దివ్యబలిపూజలో దివ్యసత్ప్రసాదానికి సంబంధించిన రెండు విశ్వాస విషయాలను వ్యక్తం చేయడానికి ఉపయోగిస్తారు: 1) దివ్యసత్ప్రసాదాన్ని స్వీకరించడానికి మనకు అర్హత లేదు, 2) అయినప్పటికీ వచ్చి మన ఆత్మలను స్వస్థపరచమని యేసును ఆహ్వానిస్తాము.

ఆగమనకాలం మనం మానవావతార మహా రహస్యాన్ని ప్రత్యేకంగా ధ్యానించే కాలం. దేవుడు శరీరధారియై వచ్చి మనతో నివసించే రహస్యాన్ని మనం ప్రత్యేకంగా ధ్యానించే కాలమిది. ఇది రెండు వేల సంవత్సరాల కంటే ముందు జరిగినప్పటికీ, ప్రతి దివ్యబలిపూజలోనూ కొనసాగుతూనే ఉంది. ప్రతి దివ్యబలిపూజలోనూ ఈ రోమా శతాధిపతి వ్యక్తపరచిన విశ్వాసాన్నే వ్యక్తపరచడానికి మనం పిలువబడుతున్నాము.

అతిపరిశుద్ధ దివ్యసత్ప్రసాదంలో క్రీస్తు రాక పట్ల మీకున్న విశ్వాసాన్ని గురించి ఈ రోజు ధ్యానించండి. మన మధ్య నివసించడానికి, మనలో నివసించడానికి వచ్చిన దేవుడూ మానవుడూ అయిన క్రీస్తు ప్రతి దివ్యబలిపూజలోనూ ప్రత్యక్షమవుతారు. ఈ శతాధిపతికి ఉన్న విశ్వాసం మనకూ ఉంటే, మనం కూడా మన దేవుని నుంచి అపరిమితమైన దీవెనలు పొందుతాము.

ప్రభువా, నేను నిజంగా విశ్వసిస్తున్నాను. నా అవిశ్వాసాన్ని తొలగించడానికి సహాయం చేయు. దివ్యసత్ప్రసాదాన్ని స్వీకరించడానికి సిద్ధపడే ప్రతిసారీ నా అయోగ్యతను గుర్తించడానికి నాకు సహాయం చేయు. అలా వినయంతో అంగీకరిస్తూ, స్వస్థతనిచ్చే నీ సన్నిధిని కూడా నా జీవితంలోకి ఆహ్వానించుదును గాక. యేసూ, నేను నీపై నమ్మకం ఉంచుతున్నాను.


విశ్వాస రహస్యం ముందు వినయం

ఆగమనకాలపు మొదటి వారంలోని మంగళవారం

“పరలోకానికి, భూమికి ప్రభువైన తండ్రీ, నిన్ను స్తుతిస్తున్నాను. ఎందుకంటే నీవు ఈ సంగతులను జ్ఞానులకు, పండితులకు మరుగుపరచి, పసిబిడ్డలవంటి వారికి వెల్లడించావు.” లూకా 10:21b

మరి మీరు “జ్ఞానులూ విద్యావంతులూ” అయినవారా, లేక “పసిబిడ్డలవంటి మనస్సుగలవారా?” వీటిలో ఏది మీ జీవితాన్ని మరింత సరిగ్గా వర్ణిస్తుంది? మొదట్లో ఆ ప్రశ్నకు సమాధానం చెప్పడం కష్టంగా అనిపించవచ్చు. పసిబిడ్డలవంటి మనస్సు కలిగి ఉండే గుణాన్ని యేసు గొప్పదిగా ఎంచారని మనకు తెలియకపోతే, మనల్ని మనం జ్ఞానులమనీ విద్యావంతులమనీ చెప్పుకోవడానికి మొగ్గుచూపవచ్చు.

జ్ఞానం గలవారిగా లేదా పాండిత్యం గలవారిగా ఉండటంలో తప్పేమీ లేదు. అయితే యేసు ఉద్దేశంలో ఈ లక్షణాలు దేనిని సూచిస్తున్నాయనే దగ్గరే సమస్య వస్తుంది. తమను తాము గొప్పగా భావించేవారిని, కొంత ఆడంబరంగా ప్రవర్తించేవారిని, “అన్నీ తమకే తెలుసు” అన్నట్లు ఉండేవారిని సూచించడానికి యేసు ఈ మాటలను ఉపయోగిస్తున్నాడు.

విచారకరమైన నిజం ఏమిటంటే, “అన్నీ తెలుసు” అనుకునే వ్యక్తికి నిజానికి అన్నీ తెలిసి ఉండవు. వాస్తవానికి వారు తమను తాము మాత్రమే మోసం చేసుకుంటారు. ఒక బిడ్డలా ఉండటమే ఆదర్శం. ఎందుకంటే ఒక బిడ్డ కనీసం ఎక్కువ సందర్భాలలోనైనా వినయంతో నేర్చుకోవడానికి సిద్ధంగా ఉంటుంది. పసిబిడ్డలలో ఉండే ఈ వినయం, విశాల హృదయం పైనుండి వచ్చే నిజమైన జ్ఞానాన్ని స్వీకరించడానికి మనలను సిద్ధం చేస్తాయి.

విశ్వాస రహస్యాలను జ్ఞానులకు, విద్యావంతులకు మరుగుచేసి, చిన్నబిడ్డలవంటి మనస్సు గలవారికి వెల్లడించినందుకు యేసు తండ్రిని స్తుతిస్తున్నాడు. ఆగమనకాలంలోకి ప్రవేశిస్తున్న మనం దీనిని గురించి ధ్యానించడం ఎంతో ముఖ్యం. మానవావతారంలోని సుందరమైన రహస్యాలను అర్థం చేసుకొని, వాటి లోతులను గ్రహించడానికి చిన్నబిడ్డలవంటి విశ్వాసం, స్వీకరించే మనస్సు మనకు అవసరమయ్యే కాలమే ఆగమనకాలం. వినయంతో స్వీకరించే ఈ మనస్సు లేకపోతే, ఈ క్రిస్మస్‌లో దేవుడు అందించే అద్భుతమైన కానుకను మనం ఎన్నటికీ పూర్తిగా అర్థం చేసుకోలేము.

ఈ రోజు, మీ హృదయంలో స్వీకరించే మనస్సు ఎంతగా ఉందో ధ్యానించండి. మనతోనూ, మనలోనూ నివాసం ఏర్పరచుకోవడానికి వచ్చిన దేవుని గొప్ప రహస్యాలను పూర్తిగా హృదయంగమం చేసుకోవడానికి మీరు సిద్ధంగా, సుముఖంగా ఉన్నారా? మన విశ్వాసంలోని గొప్ప రహస్యాల లోతులను గ్రహించడానికి అవసరమైన చిన్నబిడ్డలవంటి విశ్వాసాన్ని స్వీకరించడానికి మీరు సుముఖంగా ఉన్నారా? అలా అయితే, ఈ ఆగమనకాలం, క్రిస్మస్ అద్భుతంగా ఉంటాయి.

ప్రభువా, ఒక బిడ్డకు ఉండే సరళమైన, వినయపూర్వకమైన విశ్వాసాన్ని నాకు దయచేయు. నీవు ఉన్నట్లుగానే నిన్ను చూడటానికి, మన లోకంలో ఉన్న నీ సన్నిధి నా జీవితాన్ని ఆవరించడానికి అనుమతించేలా నాకు సహాయం చేయు. యేసూ, నేను నీపై నమ్మకం ఉంచుతున్నాను.


చిన్న విషయాలను కూడా యేసు పట్టించుకుంటాడు

ఆగమనకాలం మొదటి వారంలోని బుధవారం

యేసు తన శిష్యులను పిలిచి ఇలా అన్నాడు: “ఈ జనసమూహాన్ని చూసి నా హృదయం జాలితో కరిగిపోతోంది. వారు ఇప్పటికి మూడు రోజులుగా నాతో ఉన్నారు; వారికి తినడానికి ఏమీ లేదు. దారిలో సొమ్మసిల్లి పడిపోతారేమోనని, వారిని ఆకలితో పంపివేయడం నాకు ఇష్టం లేదు.” మత్తయి 15:32

ఈ వచనం వెల్లడించే మొదటి విషయాన్ని మనం సులభంగా గమనించకుండా పోవచ్చు. అది ప్రజాసమూహాల పట్ల యేసుకున్న ప్రగాఢమైన శ్రద్ధను వెల్లడిస్తుంది. ఆయన వారి ఆత్మల గురించే కాదు, వారి శరీరాల గురించి కూడా శ్రద్ధ వహించాడు; అందుకే వారు ఆకలితో వెళ్లిపోవడం ఆయనకు ఇష్టం లేదు. తనను అనుసరించేవారి పట్ల యేసుకున్న సంపూర్ణమైన శ్రద్ధను ఇది వెల్లడిస్తుంది.

ఈ సంఘటనలో ఆ తర్వాత ఏమి జరిగిందో మనకు తెలుసు. యేసు రొట్టెలను, చేపలను విస్తరింపజేసి జనసమూహానికి భోజనం పెడతాడు. భౌతిక స్థాయిలో ఇది నమ్మశక్యం కానంత అద్భుతమైనా, వ్యక్తిగతంగానూ, ఆధ్యాత్మికంగానూ అంతే అద్భుతమైనది.

వ్యక్తిగత దృష్టితో చూస్తే, సర్వశక్తిమంతుడు, సర్వసామర్థ్యుడు అయిన దేవుడు ఆ జనసమూహానికి తదుపరి పూట భోజనం పెట్టడమనే చిన్న విషయం గురించి కూడా ఎంతో శ్రద్ధ చూపడమే ఆ అద్భుతం. దేవుడు మన నిత్యరక్షణ గురించి మాత్రమే కాకుండా, మన దైనందిన అవసరాల గురించి కూడా శ్రద్ధ వహిస్తాడని ఇది వెల్లడిస్తుంది.

ఈ వాక్యభాగంలో యేసు, “ఈ జనసమూహాన్ని చూసి నా హృదయం జాలితో కదిలిపోతోంది…” అనీ, “వారిని ఆకలితో పంపివేయడం నాకు ఇష్టం లేదు…” అనీ చెప్పడాన్ని గమనించండి. యేసు చూపించే ఈ ఎంతో వ్యక్తిగతమైన, మానవీయమైన శ్రద్ధ, ఆయన మనపట్ల చూపే శ్రద్ధ ఎంతో లోతైనదనీ, అన్ని విషయాలనూ కలుపుకుంటుందనీ తెలియజేస్తూ మనకు గొప్ప ఓదార్పును ఇవ్వాలి.

తనను అనుసరించేవారి శారీరక అవసరమైన ఆహారం పట్ల యేసుకున్న శ్రద్ధ, వారి ఆత్మల పట్ల ఆయనకున్న ఆధ్యాత్మిక శ్రద్ధను కూడా సూచిస్తుంది. ఆయన శరీరం గురించి ఇంతగా శ్రద్ధ వహిస్తే, ఆత్మ గురించి మరింతగా శ్రద్ధ వహిస్తాడు; నిత్యజీవాహారంతో వారి ఆత్మలను పోషించాలని ప్రగాఢంగా కోరుకుంటాడు.

ఈ రోజు, మీ పట్ల యేసుకున్న ప్రగాఢమైన, సర్వసమగ్రమైన శ్రద్ధ గురించి ధ్యానించండి. మీ జీవితంలోని ఏ చిన్న విషయమూ ఆయన దృష్టిని తప్పించుకోదని తెలుసుకోండి. కొన్నిసార్లు దీనిని నమ్మడం కష్టమైనా, ఇది పూర్తిగా నిజమని తెలుసుకోండి! నమ్మకంతో సమస్తాన్నీ ఆయనకు అప్పగించండి; మీ ప్రతి అవసరంలోనూ మీకు చేయూతనివ్వడానికి ఆయన ఉన్నాడని తెలుసుకోండి.

ప్రభువా, నా జీవితంలోని ప్రతి చిన్న విషయంపట్ల నీకున్న ఎన్నటికీ తగ్గని, పరిపూర్ణమైన శ్రద్ధకు నీకు కృతజ్ఞతలు. నా అవసరాలను నీవు సంపూర్ణంగా గమనిస్తున్నందుకు నీకు కృతజ్ఞతలు. నాపట్ల నీకున్న పరిపూర్ణమైన శ్రద్ధపై నేను ఎల్లప్పుడూ నమ్మకం ఉంచి, ప్రేమతో నన్ను నడిపించే నీ దైవపరిపాలనకు నన్ను సమర్పించుకుందును గాక. యేసూ, నేను నీపై నమ్మకం ఉంచుతున్నాను.


వినండి, అర్థం చేసుకోండి, ఆచరించండి

ఆగమనకాలం మొదటి వారంలోని గురువారం

“నా ఈ మాటలు విని, వాటి ప్రకారం నడుచుకునే ప్రతి ఒక్కరూ బండమీద తన ఇల్లు కట్టుకున్న వివేకవంతునిలా ఉంటారు. వాన కురిసింది, వరదలు వచ్చాయి, గాలులు వీచి ఆ ఇంటిని బలంగా తాకాయి. అయినా అది కూలిపోలేదు; ఎందుకంటే అది బండమీద దృఢంగా కట్టబడింది.” మత్తయి 7:24–25

జీవితంలో చేయడానికి అత్యంత కష్టమైన పనులలో వినడం బహుశా ఒకటి కావచ్చు. మీరు శ్రద్ధగా వింటారా? ఎలా వినాలో మీకు తెలుసా? చాలామందికి ఇది కష్టమైన విషయం కాబట్టి, బహుశా మీకూ ఇది ఒక పోరాటమే కావచ్చు.

ఆలకించడం అంటే కేవలం వినడం మాత్రమే కాదు. ఆలకించడంలో వినడమూ, అర్థం చేసుకోవడమూ రెండూ ఇమిడి ఉన్నాయి. అంతేకాక, ఈ లేఖన భాగంలో “ఆలకించడం” మాత్రమే సరిపోదని యేసు స్పష్టం చేస్తున్నారు. మనం ఆలకించిన తరువాత, అంటే విని అర్థం చేసుకున్న తరువాత, ఆచరించాలి. దేవుని వాక్యాన్ని ఆచరించడం అంటే ఆయన వాక్యాన్నీ చిత్తాన్నీ సంపూర్ణంగా స్వీకరించి, వాటికి లోబడడం. అంటే, మీ చేతలను దేవుని వాక్యం నడిపించేలా, మీ పాదాలను “శిలపై దృఢంగా” నిలిపేలా అనుమతించడం.

యేసు ఉపయోగించిన ఉపమానం ఎంతో స్పష్టంగా ఉంది. ఇసుకపై కట్టిన ఇంటికీ, దృఢమైన శిలపై కట్టిన ఇంటికీ ఎంతో తేడా ఉంది. ఇసుకపై కట్టిన ఇంటికి ఎదురయ్యే సమస్యలను ఊహించుకోవచ్చు. వచ్చే ప్రతి తుఫాను ఎంతో ఆందోళనను, చింతను కలిగిస్తుంది. ఇసుక పునాది మెల్లగా కొట్టుకుపోతుంటే భయం ఎల్లప్పుడూ ఉంటుంది. కానీ ఇల్లు దృఢమైన శిలపై ఉంటే, తుఫాను మధ్యలో కూడా ఎంతో ధైర్యం ఉంటుంది.

ఈ రోజు మీ జీవితపు పునాది గురించి ధ్యానించండి. మన జీవితపు పునాది యేసేనా కాదా అని పరిశీలించుకునే సమయం ఆగమనకాలం. ఆ శిలాపునాదిగా ఉండేందుకు ఆయన మన లోకంలోకి వచ్చి, మానవ శరీరాన్ని ధరించారు. ఆ శిలాపునాదిని చేరుకునే మార్గం ఆలకించడం, అర్థం చేసుకోవడం, ఆచరించడం. ఈ విధంగా మీ “ఇంటిని” ఆయనపై నిలపండి. అప్పుడు ఏ తుఫానూ మీ జీవితపు పునాదిని కొట్టివేయదు.

ప్రభువా, నీ మానవ జీవితం నా జీవితానికి పునాదిగా మారును గాక. దృఢమైన పునాదిరాయి అయిన నీపై నా జీవితం నిర్మించబడును గాక. యేసూ, నేను నీపై నమ్మకం ఉంచుతున్నాను.


నేను చూడాలనుకుంటున్నాను

ఆగమనకాలం మొదటి వారంలోని శుక్రవారం

“మీ విశ్వాసం ప్రకారం మీకు జరుగును గాక.” అప్పుడు వారి కళ్ళు తెరుచుకున్నాయి. “ఈ సంగతి ఎవరికీ తెలియకుండా చూసుకోండి” అని యేసు వారిని గట్టిగా హెచ్చరించాడు. కానీ వారు బయటకు వెళ్లి ఆ ప్రాంతమంతటా ఆయన గురించి ప్రచారం చేశారు. మత్తయి 9:29b–31

తన వద్దకు వచ్చి, కరుణ చూపి స్వస్థపరచమని వేడుకొని, యేసు తమను స్వస్థపరుస్తారని విశ్వసించి, ఆ తరువాత స్వస్థత పొందిన ఇద్దరు అంధులతో యేసు ఈ మాటలు అన్నారు. అయితే, తమకు కలిగిన స్వస్థత గురించి ఇతరులతో చెప్పవద్దని యేసు వారికి చెప్పడం ఎంతో ఆసక్తికరమైన విషయం. ఆయన అలా ఎందుకు అన్నారు?

మొదటిగా, యేసు కోరినదాన్ని పాటించడం అసాధ్యమై ఉండేది. ఈ ఇద్దరు అంధులను ఎరిగిన వారందరికీ వారికి చూపు లేదని తెలిసే ఉంటుంది. అలాంటిది, ఉన్నట్టుండి వారికి చూపు వచ్చింది. ఇటువంటి విషయాన్ని ఎలా దాచి ఉంచగలరు?

ఇంతటి అద్భుతాన్ని వారు దాచి ఉంచలేరని యేసుకు తప్పక తెలుసు. అయినప్పటికీ ఆయన వారితో ఈ మాటలు అన్నారు. యేసు అలా ఎందుకు అన్నారో అర్థం చేసుకోవాలంటే, వారిని స్వస్థపరచడంలో ఆయన ఉద్దేశం ఏమిటో మనం అర్థం చేసుకోవాలి.

యేసు వారిని స్వస్థపరచింది పూర్తిగా వారిపట్ల ప్రేమతోనే. కరుణ కోసం వారు మొరపెట్టుకున్నారు; యేసు వారికి కరుణ చూపాలని కోరుకున్నారు. ప్రజల ప్రశంసలు పొందడానికో, పేరు ప్రఖ్యాతులు సంపాదించడానికో ఆయన అలా చేయలేదు. ఆ ఇద్దరు అంధులపై ప్రేమతోనే ఆయన అలా చేశారు.

మన హృదయాల అంధత్వాన్ని కూడా తాను స్వస్థపరచగలనని బోధించేందుకు ఆయన ఈ అద్భుతం చేశారు. ఈ ఇద్దరూ తనపై విశ్వాసం ఉంచి, తాను నిజంగా ఎవరో “చూడాలని” ఆయన కోరుకున్నారు. అందువల్ల, ఈ అద్భుతం ఎంతో లోతుగా వారిని వ్యక్తిగతంగా స్పృశించింది. ఈ ఇద్దరి పట్ల శ్రద్ధతో, వారి విశ్వాసాన్ని బలపరచేందుకు ఆయన దీనిని చేశారు.

అయితే, గమనించవలసిన ఆసక్తికరమైన విషయం ఏమిటంటే, మన ప్రభువు నుండి ఈ వరాన్ని పొందిన ఆనందాన్ని వారు తమలో దాచుకోలేకపోయారు. కృతజ్ఞతతో గొంతెత్తి, తమకు జరిగినదాన్ని పంచుకోకుండా ఉండలేకపోయారు. దీనివల్ల యేసు నొచ్చుకోలేదనీ, దీనిని వారి విశ్వాసం నుండి తప్పక వెలువడే ఫలితంగా చూశారనీ మనం నిశ్చయంగా చెప్పవచ్చు.

మరి మీ సంగతి ఏమిటి? మీ జీవితంలో దేవుడు కార్యం చేయడాన్ని మీరు చూసి, మీ జీవితంలో ఆయన చేసిన కార్యం వల్ల కలిగిన ఆనందాన్ని వ్యాపింపజేయడానికి ప్రయత్నిస్తున్నారా? ఆయన కార్యానికీ, ఆయన ప్రసాదించిన స్వస్థతకూ మీరు తరచూ సాక్ష్యమిస్తున్నారా? దేవుడు మీ కోసం చేసినదంతా ఇతరులు చూడగలిగేలా చేయడానికి మీరు ప్రయత్నిస్తున్నారా?

ఈ రోజు, స్వస్థత పొందిన ఆ ఇద్దరు అంధుల హృదయాల్లోని ఆనందాన్ని గురించి ధ్యానించండి. మీ జీవితంలో దేవుడు చేస్తున్న కార్యాల వల్ల మీకు కలిగే ఆనందాన్ని గురించి కూడా ఆలోచించండి. మీ ఆనందం పొంగిపొర్లకపోతే, మీరు చూడగలిగేలా సహాయం చేయమని లోతైన విశ్వాసంతో ప్రభువును అడగడానికి బహుశా ఈ రోజు మంచి రోజు కావచ్చు!

ప్రభువా, నేను చూడగలిగేలా నాకు సహాయం చేయు. నిన్ను చూడటంలోని ఆనందాన్ని ఇతరులతో పంచుకోవడానికి కూడా నాకు సహాయం చేయు. అందరూ చూడగలిగేలా ఆ ఆనందం నా జీవితం నుండి ప్రవహించును గాక. యేసూ, నేను నీపై నమ్మకం ఉంచుతున్నాను.


దేవుని వరం

ఆగమనకాలం మొదటి వారంలోని శనివారం

“ఉచితంగా పొందారు; ఉచితంగానే ఇవ్వాలి.” మత్తయి 10:8b

మనం “ఉచితంగా” పొందినది ఏమిటి? ప్రతి మంచి విషయాన్నీ మనం ఉచితంగానే పొందాము. ఇది నిజం! మంచిదైన ప్రతిదీ దేవుని వరమే. అది ఆయన ఉచితంగా ఇచ్చే వరం. మన జీవితాలలో ఆయన ఆశీర్వాదాలను సంపాదించుకోవడానికి మనం చేయగలిగినదేమీ లేదు. మీరు దీనిని విశ్వసిస్తున్నారా?

తన నామమున బోధించడానికి, స్వస్థపరచడానికి, దయ్యాలను వెళ్లగొట్టడానికి యేసు తన పన్నెండుమంది అపొస్తలులను పంపుతూ వారికి ఇచ్చిన ఉపదేశంలో పైన పేర్కొన్న లేఖన వాక్యం ఒక భాగం. వారు తన నుండి పొందినదంతా ఉచితంగా లభించిన వరమేనని, అందువల్ల వారు కూడా అందరికీ సువార్తను ఉచితంగా అందించాలని ఆయన వారికి గుర్తుచేస్తున్నారు.

త్వరలో రానున్న క్రిస్మస్ వరాన్ని ఉత్సవంగా జరుపుకోవడంపై మనం ప్రత్యేకంగా దృష్టి పెట్టవలసిన సమయం ఆగమనకాలం. క్రిస్మస్ సమయంలో మనం బహుమతులు ఇచ్చిపుచ్చుకుంటాం. అయితే, ఒక “వరం”కూ ఒక “బహుమతి”కీ మధ్య ఉన్న తేడాను అర్థం చేసుకోవడం ముఖ్యం. బహుమతి అనేది లభిస్తుందని ఆశించేది. ఉదాహరణకు, మీ జీవిత భాగస్వామి గానీ, మీ బిడ్డ గానీ తమ పుట్టినరోజున లేదా క్రిస్మస్ రోజున బహుమతిని ఆశిస్తారు. కానీ వరం అనేది అంతకంటే ఎంతో గొప్పది. వరం అనేది సంపాదించుకోకపోయినా, అర్హత లేకపోయినా, స్వేచ్ఛగా అందించబడేది. ఎలాంటి షరతులూ లేకుండా ప్రేమతో ఇవ్వబడేది. మానవావతారంలోని సారాంశం ఇదే.

దేవుడు మన అర్హతనుబట్టి కాకుండా, ఉచితంగా తనను తాను మనకు ఇవ్వడానికి భూమిపైకి వచ్చాడనే సత్యాన్ని మనం ధ్యానించే కాలంగా ఆగమనకాలం ఉండాలి. ఆయన జీవితం మనకు పూర్తిగా ఉచితంగా లభించిన వరం; మనం ఎన్నడూ పొందిన వరాలన్నిటిలోకీ అదే అత్యంత గొప్పది. అలాగే, క్రీస్తు యేసు అనే వరాన్ని ఇతరులకు అందించాలనే మన పిలుపును కూడా మనం ధ్యానించే కాలంగా ఆగమనకాలం ఉండాలి.

మీ జీవితంలో యేసును స్వీకరించడం గురించి, ఇతరులకు ఆయనను అందించడం గురించి ఈ రోజు ధ్యానించండి. ఈ ఆగమనకాలంలో మీ హృదయం కృతజ్ఞతతో నిండిపోనివ్వండి. అప్పుడు మీరు కూడా యేసు అనే వరాన్ని ఇతరులకు అందించగలుగుతారు.

ప్రభువా, నీ జీవితం అనే వరానికి నీకు కృతజ్ఞతలు. నా జీవితంలోకి ప్రవేశించడానికి భూమిపైకి వచ్చినందుకు నీకు కృతజ్ఞతలు. నిన్ను తెలుసుకోవడంలోనూ, ప్రేమించడంలోనూ కలిగే ఆనందానికి నీకు కృతజ్ఞతలు. నిన్ను ఇతరులకు అందించడానికి నేను నిరంతరం ప్రయత్నించేలా, ఈ ఆనందం నా జీవితాన్ని పూర్తిగా మార్చడానికి అనుమతించుదును గాక. యేసూ, నేను నీపై నమ్మకం ఉంచుతున్నాను.

 

ఆగమనకాలం – రెండవ వారం

విషయ సూచిక


మృదుబంధ పుస్తకం & ఈ-పుస్తక రూపాల్లో కూడా లభ్యం

Amazon.com – గూగుల్ ప్లే – ఐట్యూన్స్ – బార్న్స్ అండ్ నోబుల్