ప్ర. నా ప్రేయసి బాప్టిస్టు విశ్వాసాన్ని అనుసరిస్తుంది. కొన్నిసార్లు ఆమెతో కలిసి వారి ఆరాధనలకు వెళ్లాను. కానీ నేను కతోలిక విశ్వాసాన్ని అనుసరిస్తున్నానని తన తల్లిదండ్రులకు చెప్పవద్దని ఆమె నన్ను అడిగింది. ఆమె కుటుంబం తమ విశ్వాసంలో ఎంతో సంతోషంగా ఉందనీ, తమ సంఘం కోసం, సమాజం కోసం ఎంతో చేస్తోందనీ నాకు తెలుస్తోంది. అయితే ఆమె ఆరాధనాలయంలో ఉన్నప్పుడు నాకు దివ్యబలిపూజలో ఉన్నట్లుగా ఏమాత్రం అనిపించదు. అంతేకాక, మన విశ్వాసంతో ఏమాత్రం పొసగని కొన్ని విషయాలను వారు చెప్పారు. మా భవిష్యత్తు గురించి మేము నిజంగా ఇంకా మాట్లాడుకోలేదు, కాబట్టి బహుశా ఇది అంత ముఖ్యమైనది కాకపోవచ్చు. అయినా నేను ఏ సభకు చెందినవాడిననే విషయం ఆమె తల్లిదండ్రులకు దాచకుండా చెప్పాలని నాకు అనిపిస్తోంది. ఇది నాకు ముఖ్యమని ఆమెను ఎలా ఒప్పించాలి? ఆ తరువాత ఆమె కుటుంబంతో ఈ విషయం ఎలా ప్రస్తావించాలి?
జ. ఈ విషయం గురించి మీ ప్రేయసితో, ఆమె కుటుంబంతో మాట్లాడటంలో కొంత ఆవశ్యకత ఉందని మీరు భావిస్తున్నట్లు అనిపిస్తోంది. మీకు అలా అనిపిస్తుంటే, ఆలస్యం చేయకుండా ఈ విషయాన్ని చర్చించమని మిమ్మల్ని గట్టిగా ప్రోత్సహిస్తున్నాను. మీరు అనుకుంటున్నదానికంటే ఇది ఎంతో ముఖ్యమైనది కావచ్చు. వివరిస్తాను.
యేసు మన రక్షకుడనే విశ్వాసం బాప్టిస్టులమైనా, కతోలికులమైనా మనందరికీ ఉమ్మడిగా ఉంది. బైబిలు దేవుని ప్రేరేపిత వాక్యమని మన ఇరువురమూ నమ్ముతాము (అయితే పవిత్ర గ్రంథాన్ని అర్థం చేసుకునే విషయంలో మన విధానాలు భిన్నంగా ఉంటాయి). మనం పరిశుద్ధ త్రిత్వాన్ని విశ్వసిస్తాము; ఇంకా అనేక విశ్వాసాలు మనకు ఉమ్మడిగా ఉన్నాయి. అయితే మన మధ్య కొన్ని స్పష్టమైన భేదాలు కూడా ఉన్నాయి. భవిష్యత్తులో మీరు వివాహం చేసుకుంటే, ఒకే ఇంట్లో మీరు మీ కతోలిక విశ్వాసాన్ని, ఆమె తన బాప్టిస్టు విశ్వాసాన్ని చురుకుగా ఆచరించడానికి ఈ భేదాలు ఆటంకం కావచ్చు.
మొదటిగా, మీరు వివాహం చేసుకోవాలనుకుంటే, కతోలిక దేవాలయంలో చేసుకోవాలి లేదా కనీసం “సభా చట్టం నిర్దేశించిన వివాహ విధానం నుంచి మినహాయింపు” అనేదాన్ని పొందాలి. అలా కాకుండా, కతోలిక విశ్వాసానికి చెందిన మీరు కతోలిక సభకు వెలుపల చేసుకునే ఏ వివాహమైనా చెల్లదనీ, అది అసలు వివాహమే కాదనీ మేము విశ్వసిస్తాము. దీన్ని అర్థం చేసుకోవడం అత్యంత ముఖ్యం. అంతేకాక, మరొక క్రైస్తవ విశ్వాస సంప్రదాయానికి చెందిన వ్యక్తిని వివాహం చేసుకునేటప్పుడు, మీరు మీ విశ్వాసాన్ని ఆచరిస్తూ ఉంటారనీ, దేవుడు మీకు అనుగ్రహించే సంతానాన్ని కతోలిక విశ్వాసంలో పెంచుతారనీ వాగ్దానం చేయాలి. ఆ వాగ్దానాన్ని నిజాయితీగా చేయకుండా, మీరు చెల్లుబాటయ్యే వివాహాన్ని పొందలేరు.
నేను అనేకమంది బాప్టిస్టులను కలిశాను. వారు చాలా మంచి వ్యక్తులనీ, తమ విశ్వాసానికి ఎంతో నిబద్ధులై ఉన్నారనీ గమనించాను. ఇది మంచిదే. అయితే, వారిలో అనేకమందికి మన కతోలిక విశ్వాసం గురించి తీవ్రమైన సందేహాలు ఉన్నాయని నేను భావిస్తున్నాను. కొన్ని విశ్వాస విషయాల్లో మనకూ వారికీ ముఖ్యమైన భేదాలు ఉన్నాయి. కాబట్టి, ఆమె కతోలిక విశ్వాసానికి చెందిన వ్యక్తితో ప్రేమ సంబంధంలో ఉండటం గురించి ఆమె తల్లిదండ్రులు ఏమనుకుంటారో అని నాకు అనిపిస్తోంది. భవిష్యత్తులో మీరు కతోలిక దేవాలయంలో వివాహం చేసుకుని, పిల్లలను కతోలిక విశ్వాసంలో పెంచితే వారు ఏమంటారో అని కూడా నాకు అనిపిస్తోంది.
ఇప్పుడే వివాహం గురించి మాట్లాడటం చాలా తొందరపాటుగా అనిపించవచ్చని నాకు తెలుసు. అయితే, జీవితాంతం కలిసి మెలిసి జీవించగలమని మీరు భావించే వ్యక్తితో మాత్రమే ప్రేమ సంబంధం ఏర్పరచుకోవడం మంచి పద్ధతి అని నేను అనుకుంటున్నాను. స్పష్టమైన ఆటంకం ఏదైనా మీకు కనిపిస్తే, బహుశా దాని గురించి వెంటనే మాట్లాడుకోవడం మంచిది.
ఆచరణలో పెట్టగల రెండు సూచనలు ఇవి: మొదటిగా, మీతో కలిసి దివ్యబలిపూజకు హాజరు కావాలని మీ ప్రియురాలిని ఆహ్వానించమని సూచిస్తాను. దీనికి ఆమె సుముఖంగా ఉంటుందని ఆశిస్తున్నాను. రెండవదిగా, మీరు కతోలిక విశ్వాసానికి చెందినవారనీ, ఆమె మీతో కలిసి దివ్యబలిపూజకు హాజరవుతోందనీ తన తల్లిదండ్రులకు చెప్పమని ఆమెను అడగండి. ఇవన్నీ సజావుగా జరిగితే, మీ విశ్వాసం మీ సంబంధానికి ఆటంకం కాబోదనడానికి అది మంచి సూచన. అయితే, దీనివల్ల తీవ్రమైన సమస్యలు వస్తే, ఆ విషయం మరో రెండేళ్ల తర్వాత కంటే ఇప్పుడే తెలుసుకోవడం మేలు. ఏదో ఒకరోజు ఆమెనో, మీ కతోలిక విశ్వాసాన్నో ఎంచుకోవలసిన స్థితిలో మీరు పడటం అన్నిటికంటే దురదృష్టకరమైన విషయం. మీరు అలాంటి స్థితిలో ఉండాలని దేవుడు కోరుకోడు. కాబట్టి, మీరు ఆ ఎంతో కష్టమైన పరిస్థితిలో చిక్కుకోకముందే, దీనికి వారి స్పందన ఎలా ఉంటుందో వెంటనే తెలుసుకోమని సూచిస్తాను.
మరిన్ని కతోలిక ప్రశ్నలు & సమాధానాలు
