తెలుగు

దేవుడు మరియమ్మను ఎందుకు ఎన్నుకున్నారు? ఆమె అంత చిన్న వయస్సులో ఎందుకు ఉన్నారు?

ప్ర. యేసు తల్లిగా ఉండటానికి దేవుడు మరియమ్మను ఎందుకు ఎన్నుకున్నారు? ఆమె అంత చిన్న వయస్సులో ఎందుకు ఉన్నారు?

జ. నిజానికి ఈ రెండు ప్రశ్నలకు కచ్చితమైన సమాధానం ఇవ్వడం కష్టం.  అనేక విధాలుగా, వీటి సమాధానాలు రహస్యంగానే మిగిలిపోతాయి. 

వేదాంతశాస్త్ర దృష్టితో చూస్తే, మరియమ్మ స్వయంగా జన్మపాపరహితంగా గర్భధారణ పొందారు కాబట్టి దేవుడు ఆమెను యేసు తల్లిగా ఎన్నుకున్నారని చెప్పవచ్చు.  అంటే, మానవ శరీరాన్ని ధరించిన దేవునికి తల్లిగా ఉండటానికి తగినవారు ఆమె ఒక్కరే. మరియమ్మ తన తల్లి గర్భంలో పాపం లేకుండా ఉనికిని పొందారు; ఈ విధంగా ఆమె గర్భధారణ అద్భుతమైనది.  దేవుడు ఆమెకు “పాపం నుండి కాపాడే కృపను” అనుగ్రహించాలని ఎన్నుకున్నారు. అంటే, ఆమె తన తల్లి గర్భంలో సృష్టించబడిన క్షణంలోనే, దేవుడు ఆమెను జన్మపాపంతో సహా పాపపు ప్రతి మలినం నుండి కాపాడారు.  నిశ్చయంగా, కుమారుడైన దేవుడు ఆమె గర్భంలో మానవావతారం ఎత్తడానికి ఆమె తగిన పాత్రగా ఉండాలని ఆయన ఇలా చేశారు. ఆమెను కాపాడిన కృప ఆమె కుమారుడైన యేసు సిలువ నుండి వచ్చింది; అయితే, ఆమె గర్భధారణ క్షణంలోనే ఆమెను పాపం నుండి విముక్తిగా ఉంచడానికి ఆ కృప కాలాన్ని అధిగమించింది.  అలా, కాలక్రమంలో ఆమె కుమారుడు ఇంకా జన్మించకపోయినా, ఆయనే ఆమె రక్షకుడయ్యారు. ఇది అయోమయంగా అనిపిస్తే, కొంతసేపు దీని గురించి ధ్యానించడానికి ప్రయత్నించండి. ఇది విశ్వాసానికి సంబంధించిన గొప్ప రహస్యం, ఎంతో లోతైనది కూడా.

అంతేకాక, మరియమ్మ తన జీవితమంతా పాపరహితంగా ఉండటాన్ని ఎన్నుకున్నారు.  ఆదాము, హవ్వ పాపం లేకుండా జన్మించినట్లే, మరియమ్మ కూడా పాపం లేకుండా జన్మించారు. కానీ ఆదాము, హవ్వల వలె కాకుండా, మరియమ్మ తన జీవితమంతా ఎన్నడూ తన స్వేచ్ఛతో పాపం చేయాలని ఎన్నుకోలేదు.  ఇది ఆమెను దేవుని కుమారునికి పరిపూర్ణమైన పాత్రగా చేసింది. ఆమె శరీరం, ఆత్మ పరిపూర్ణంగా ఉండటం వల్ల ఆమె పరిపూర్ణమైన సాధనమయ్యారు.

అయితే ఇది మీ ప్రశ్నకు ఒక దృక్కోణం నుండి మాత్రమే సమాధానమిస్తుంది.  “కానీ మరియమ్మనే ఎందుకు?” అని కూడా మీరు ఆలోచిస్తుండవచ్చు. ఈ ప్రశ్నకు సమాధానం ఇవ్వడం అసాధ్యమని చెప్పలేకపోయినా, కష్టమే.  ఇది బహుశా దేవుని రహస్యమైన చిత్తానికి సంబంధించిన విషయం కావచ్చు. అన్నిటినీ చూడగలిగే, మనుష్యులందరూ పుట్టకముందే వారిని ఎరిగిన దేవుడు, అన్ని కాలాల్లోని స్త్రీలందరినీ చూసి, తన స్వేచ్ఛతో పాపం చేయాలని ఎన్నడూ ఎన్నుకోనివారు మరియమ్మేనని గమనించి ఉండవచ్చు.  బహుశా ఆ కారణంగానే దేవుడు ఆమెకు జన్మపాపరహిత గర్భధారణ అనే వరాన్ని అనుగ్రహించాలని ఎన్నుకుని ఉండవచ్చు. కానీ అంతిమంగా ఇది పరలోకంలో మాత్రమే వెల్లడి కాబోయే విశ్వాస రహస్యం.

మీ రెండవ ప్రశ్న, “ఆమె అంత చిన్న వయస్సులో ఎందుకు ఉన్నారు?” అనే విషయానికి వస్తే, చారిత్రక దృష్టితో దీనికి సమాధానం ఇవ్వడం కొంత సులభం కావచ్చు.  నేటి ఇరవై ఒకటవ శతాబ్దంలో, పదిహేనేళ్ల బాలిక వివాహం చేసుకుని బిడ్డను కనడం సాధారణం కాదు. కానీ అప్పట్లో పరిస్థితి అలా ఉండేది కాదు.  మరియమ్మ యేసుకు జన్మనిచ్చినప్పుడు, ఆమెను ఇతరులపై ఆధారపడే చిన్నపిల్లగా కాకుండా, కుటుంబ జీవితాన్ని ప్రారంభించడానికి సిద్ధంగా ఉన్న యువతిగా చూశారు. కాబట్టి చరిత్రకు సంబంధించిన ప్రశ్నలను పరిశీలించేటప్పుడు, ఆ కాలపు సంస్కృతిని అర్థం చేసుకోవడానికి ప్రయత్నించడం ఎల్లప్పుడూ ముఖ్యం.

ఈ అంశం గురించి మరింత తెలుసుకోవడానికి, మీరు నా కతోలిక విశ్వాసం! గ్రంథంలోని అధ్యాయం 3 చదవాలనుకోవచ్చు.


మరిన్ని కతోలిక ప్రశ్నలు–జవాబులు