
వందనీయ పౌలీన్ మేరీ జారికోట్ గారి ప్రార్థన
నా ఆశ యేసులోనే ఉంది, నా ఏకైక నిధి సిలువే…నేను అన్ని వేళలా ప్రభువును స్తుతిస్తాను; ఆయన స్తుతి ఎల్లప్పుడూ నా నోట ఉంటుంది. నా దేవుని చిత్తాన్ని ఆరాధిస్తున్నాను.
ఓ ప్రియమైన, ప్రేమించదగిన దైవచిత్తమా, నీవు నా నుండి భూసంబంధమైన ఆస్తులన్నిటినీ, కీర్తిని, గౌరవాన్ని, ఆరోగ్యాన్ని, ప్రాణాన్ని తీసుకున్నా నాకేమి; నన్ను అవమానాల అగాధంలోకి దిగజార్చినా నాకేమి. నీ పరలోక ప్రేమలోని గుప్తమైన అగ్నిని నేను కనుగొంటే — ఇవన్నీ నాకెంతమాత్రం లెక్క? నీ కోసం, నా తోటి సృష్టిప్రాణుల కోసం మరణించగలిగితే నాకు ఎంత సంతోషం!
యాజకుడవూ బలిగా అర్పితుడవూ అయిన యేసూ, నా కోసం చిందించిన నీ రక్తంతో నా జీవిత బలిని, నేను మోస్తున్న సిలువను ఐక్యం చేస్తున్నాను. నీ గాయాలలో ఆశ్రయం పొందుతున్నాను; సమస్త బలమూ నీ నుండే లభిస్తుందని ఆశిస్తున్నాను. ప్రభువా, నా హృదయం సిద్ధంగా ఉంది, నా హృదయం సిద్ధంగా ఉంది. నీ మహిమ మరింతగా ప్రకాశించడానికే అన్నీ చేయాలని కోరుకుంటున్నాను. అంతిమ ఘడియ వచ్చినప్పుడు నా సొంత బలంపై కాక, నీ బలంపై ఆధారపడుతున్నాను. నీ కరుణలో నా ఆశలు ఉంచాను. నేను మరణించేటప్పటికి ఎవరెవరికైతే అప్పుపడి ఉంటానో వారందరినీ నీకు అప్పగిస్తున్నాను. వారి కోసం నా ప్రాణాన్ని, నా రక్తాన్ని అర్పించిన తరువాత, నా మరణానంతరం నా స్నేహితులు నా అప్పులు తీర్చేలా చేయమని నిన్ను వేడుకుంటున్నాను.
ఆమెన్.
