ചോ. പൗരോഹിത്യമാണോ എന്റെ ദൈവവിളി?

ചോദ്യം: ഞാൻ കോളേജ് പഠനം പൂർത്തിയാക്കാൻ പോകുകയാണ്. എന്നിട്ടും, എന്തു ചെയ്യണമെന്ന കാര്യത്തിൽ എനിക്ക് ഇപ്പോഴും വ്യക്തതയില്ല. കഴിഞ്ഞ ഏതാനും വർഷങ്ങളായി പൗരോഹിത്യത്തെക്കുറിച്ച് ഇടയ്ക്കിടെ ചിന്തിക്കാറുണ്ട്. പക്ഷേ, അത് ശരിക്കും എനിക്കുള്ള വഴിയാണോ എന്ന് ഉറപ്പില്ല. ഞാൻ എന്തു ചെയ്യണമെന്നാണ് അങ്ങ് കരുതുന്നത്?

ഉത്തരം: നിങ്ങൾ പ്രാർഥിക്കണമെന്നാണ് ഞാൻ കരുതുന്നത്!

അതെ, ജീവിതത്തിലെ ചെറുതും വലുതുമായ എല്ലാ ചോദ്യങ്ങൾക്കും ഉത്തരം പ്രാർഥനയാണ്. ദൈവവുമായി നമ്മെ ബന്ധിപ്പിക്കുന്ന ജീവന്റെ കണ്ണിയാണ് പ്രാർഥന. ദൈവം നമ്മെ നയിക്കാൻ നാം അനുവദിക്കുന്നതും അവിടുന്ന് തന്റെ ശക്തി നമ്മിലേക്ക് ചൊരിയുന്നതും പ്രാർഥനയിലൂടെയാണ്. അതിനാൽ, പ്രാർഥന തന്നെയാണ് തീർച്ചയായും ഉത്തരം. എന്നാൽ, നിങ്ങളുടെ പ്രാർഥനയിൽ എന്തെല്ലാം ഉൾപ്പെടുത്താം എന്നതിനെക്കുറിച്ച് ഏതാനും ചിന്തകൾ കൂടി ഞാൻ പങ്കുവയ്ക്കട്ടെ.

ആദ്യമായി, ദൈവവിളിയെക്കുറിച്ചുള്ള ജീവിതനിർണായകമായ തീരുമാനത്തിന്റെ കാര്യത്തിൽ, പ്രാർഥിക്കാൻ സവിശേഷമായ ഒരു രീതിയുണ്ട്. നമുക്കോരോരുത്തർക്കും വേണ്ടി ദൈവത്തിന് തീർച്ചയായും ഒരു പദ്ധതിയുണ്ട്. അവിടുത്തെ തിരുഹിതത്തോടു സഹകരിക്കാനും ലോകത്തിൽ നന്മയുടെ അത്ഭുതകരമായ ഒരു ഉപകരണമായിത്തീരാനും നമുക്കു കഴിയുന്ന പൂർണമായ ഒരു പദ്ധതിയാണത്. എന്നാൽ, നമ്മുടെ ദൈവവിളിയെക്കുറിച്ച് പ്രാർഥിക്കുന്നതിന് ഏറ്റവും ഉചിതമായത് വളരെ സവിശേഷമായ ഒരു രീതിയാണ്. നാം എങ്ങനെ പ്രാർഥിക്കണം എന്നതിന് നമ്മുടെ പരിശുദ്ധ അമ്മയായ മറിയമാണ് ഉത്തമ മാതൃക.

നമ്മുടെ പരിശുദ്ധ അമ്മയ്ക്ക് ദൈവത്തിൽനിന്ന് അതുല്യവും സവിശേഷവുമായ ഒരു വിളി ലഭിച്ചിരുന്നു. ദൈവപുത്രന്റെ അമ്മയാകാനായിരുന്നു ആ വിളി. ഒരു തലത്തിൽ, ഇത് സമാനതകളില്ലാത്ത ഒരു സൗഭാഗ്യമാണ്. മറ്റൊരു തലത്തിൽ, ഒരാൾക്കു താങ്ങാനും സ്വീകരിക്കാനും കഴിയുന്നതിലപ്പുറമുള്ള ഒന്നായി ഇത് അനുഭവപ്പെടാമായിരുന്നു. എന്നാൽ പരിശുദ്ധ അമ്മ ഒരിക്കലും ആ വിളിയുടെ ഭാരത്തിൽ തളർന്നില്ല. പകരം, ആ വിളി പരിപൂർണമായി സ്വീകരിച്ചു. അങ്ങനെ പ്രാർഥനയിൽ, പ്രത്യേകിച്ച് നമ്മുടെ ജീവിതവിളിയെ സംബന്ധിച്ച പ്രാർഥനയിൽ, അമ്മ നമുക്ക് പരിപൂർണ മാതൃകയായി.

നമ്മുടെ പരിശുദ്ധ അമ്മയുടെ പ്രാർഥനയുടെ താക്കോൽ ദൈവത്തോടുള്ള അമ്മയുടെ “അതെ” എന്ന മറുപടിയാണ്. ഗബ്രിയേൽ ദൂതൻ അമ്മയ്ക്കു പ്രത്യക്ഷപ്പെട്ടപ്പോൾ, സമ്മതം നൽകുമോ എന്ന് ചോദിക്കുകപോലും ചെയ്തില്ല എന്നത് ശ്രദ്ധേയമാണ്. പകരം, അമ്മ ഗർഭം ധരിച്ച് ഒരു പുത്രനെ പ്രസവിക്കുമെന്നും അവൻ അത്യുന്നതന്റെ പുത്രൻ എന്നു വിളിക്കപ്പെടുമെന്നും ദൂതൻ അറിയിച്ചു. ഇത് എങ്ങനെ സംഭവിക്കുമെന്ന് അമ്മ ചോദിച്ചു. പരിശുദ്ധാത്മാവിന്റെ ശക്തിയാലായിരിക്കും അത് എന്നു മറുപടി ലഭിച്ചു. അപ്പോൾ അമ്മ ലളിതമായി ഇങ്ങനെ മറുപടി നൽകി: “നിന്റെ വാക്കുപോലെ എനിക്കു സംഭവിക്കട്ടെ” (ലൂക്കാ 1:38).

ഇവിടെ ശ്രദ്ധിക്കേണ്ട പ്രധാന കാര്യം, മറിയം ദൈവത്തോട് സമ്മതം അറിയിക്കുന്നത് ഇതാദ്യമായിരുന്നില്ല എന്നതാണ്. മറിച്ച്, “എനിക്കു സംഭവിക്കട്ടെ…” എന്ന ഈ മറുപടി ജീവിതകാലം മുഴുവൻ അമ്മയുടെ പ്രാർഥനയായിരുന്നു. ബാല്യംമുതൽ സ്വർഗാരോപണംവരെ അമ്മ ദൈവത്തോടു നിരന്തരം സമ്മതം അറിയിച്ചുകൊണ്ടിരുന്നു. അതുകൊണ്ടാണ് അത്യുന്നതന്റെ പുത്രനെ അമ്മ ഗർഭം ധരിക്കുമെന്ന് അറിയിക്കുന്നതിനുമുമ്പ് ദൂതന് അമ്മയുടെ മറുപടിക്കായി കാത്തിരിക്കേണ്ടിവരാതിരുന്നത്. ജീവിതകാലം മുഴുവൻ, വീണ്ടും വീണ്ടും, അമ്മ ദൈവത്തോടു സമ്മതം അറിയിച്ചുകഴിഞ്ഞിരുന്നു.

ഏതു ജീവിതവിളിയെക്കുറിച്ചും പ്രാർഥിക്കാനുള്ള ഏറ്റവും നല്ല മാർഗം ഇതാണ്. നിങ്ങൾക്കുവേണ്ടി ദൈവം എന്തു കരുതിവച്ചിട്ടുണ്ടെങ്കിലും, അതിന് ഇന്നുതന്നെ സമ്മതം അറിയിച്ചുകൊണ്ട് ഈ പ്രാർഥന അനുകരിക്കാൻ ഞാൻ നിങ്ങളെ പ്രോത്സാഹിപ്പിക്കുന്നു. ദൈവത്തിന്റെ തിരുഹിതം എന്തുതന്നെയായാലും, അതിനുള്ള നിങ്ങളുടെ മറുപടി സമ്മതമാണെന്ന് പ്രാർഥനയിൽ ദൈവത്തോടു പറയുക. അവിടുത്തെ തിരുഹിതം എന്താണെന്ന് അറിയുന്നതിനുമുമ്പുതന്നെ നിങ്ങളുടെ മറുപടി സമ്മതമാണെന്ന് ദൈവത്തോടു പറയുക. ഈ സമീപനം വലിയ സ്വാതന്ത്ര്യം നൽകുന്നു! പിന്നെ ശേഷിക്കുന്നത് ദൈവം നിങ്ങളോട് എന്താണ് പറയുന്നതെന്നു വിവേചിച്ചറിയുക മാത്രമാണ്. അതിനായി, ഓരോ ദിവസവും അവിടുന്ന് തന്റെ തിരുഹിതം സൗമ്യമായി കൂടുതൽ വെളിപ്പെടുത്തുന്നതുവരെ കാത്തിരുന്നാൽ മതി. ഇന്ന് നിങ്ങൾ സമ്മതം അറിയിച്ചാൽ, നിങ്ങളെക്കുറിച്ചുള്ള അവിടുത്തെ തിരുഹിതം കൂടുതൽ വ്യക്തമാകും.

“ഞാൻ എന്തു ചെയ്യാനാണ് ആഗ്രഹിക്കുന്നത്?” എന്ന ചോദ്യവുമായി പലപ്പോഴും നാം ജീവിതത്തെ സമീപിച്ചേക്കാം. ഇത് ശരിയായ സമീപനമല്ല. ദൈവത്തിന്റെ തിരുഹിതമാണ് നാം ആഗ്രഹിക്കുന്നതെന്നും ആ തിരുഹിതത്തിന് നമ്മുടെ സമ്മതമാണെന്നും ലളിതമായി അവിടുത്തോടു പറഞ്ഞാൽ, അവിടുത്തെ പദ്ധതി കൂടുതൽ എളുപ്പത്തിൽ നമ്മുടെ ജീവിതത്തെ നയിക്കുകയും നമുക്കും മറ്റുള്ളവർക്കും ഏറ്റവും നല്ലതിലേക്കു നമ്മെ കൊണ്ടുപോകുകയും ചെയ്യുന്നതായി നാം കണ്ടെത്തും.