ಪ್ರ. ದೇವರಲ್ಲಿ ನಂಬಿಕೆಯಿದ್ದರೂ ಜ್ಞಾನಸ್ನಾನ ಪಡೆಯದ ವ್ಯಕ್ತಿಯೊಬ್ಬರು ಮರಣಹೊಂದಿದರೆ, ಅವರು ನರಕಕ್ಕೆ ಹೋಗುತ್ತಾರೆಯೇ?
ಉ. ಸ್ಪಷ್ಟವಾದ ಉತ್ತರವನ್ನು ನೀಡಲು ಈ ಪ್ರಶ್ನೆಯ ಕೆಲವು ಸೂಕ್ಷ್ಮ ಅಂಶಗಳನ್ನು ಪರಿಗಣಿಸಬೇಕಾಗಿದೆ. ಕೆಳಗಿನ ಉತ್ತರವು My Catholic Worship! ಪುಸ್ತಕದ ಅಧ್ಯಾಯ 3ರಿಂದ ಬಂದಿದೆ. ಆ ಅಧ್ಯಾಯವನ್ನು ಪೂರ್ಣವಾಗಿ ಓದಲು ಈ ಕೊಂಡಿಯನ್ನು ಕ್ಲಿಕ್ ಮಾಡಿ. ನಿಮ್ಮ ಪ್ರಶ್ನೆಗೆ ಉತ್ತರಿಸುವ ಆ ಅಧ್ಯಾಯದ ಭಾಗವನ್ನು ಕೆಳಗೆ ನೀಡಲಾಗಿದೆ.
“ಹಾಗಾದರೆ ಜ್ಞಾನಸ್ನಾನ ಪಡೆಯದವರ ವಿಷಯವೇನು ಎಂದು ನೀವು ಕೇಳುತ್ತೀರಾ? ಅವರಿಗೆ ಏನಾಗುತ್ತದೆ? ಮತ್ತು ಜ್ಞಾನಸ್ನಾನ ಪಡೆಯದ ಮಕ್ಕಳ ವಿಷಯವೇನು? ಅವರು ನರಕದಂಡನೆಗೆ ಗುರಿಯಾಗುತ್ತಾರೆಯೇ?
ಎಲ್ಲ ವಿಷಯಗಳಲ್ಲಿಯೂ ದೇವರ ಪರಿಪೂರ್ಣ ಪ್ರೀತಿ ಮತ್ತು ಜ್ಞಾನವನ್ನು ನಾವು ಅರ್ಥಮಾಡಿಕೊಂಡರೆ ಮಾತ್ರ ಈ ಪ್ರಶ್ನೆಗಳನ್ನು ಅರ್ಥಮಾಡಿಕೊಳ್ಳಲು ಸಾಧ್ಯ. ದೇವರು ಕೇವಲ ನಿಯಮಕ್ಕೆ ಅಂಟಿಕೊಳ್ಳುವವರಲ್ಲ. ಅವರು ಮರಣಹೊಂದುವ ಮಗುವನ್ನು ನೋಡಿ, “ಕ್ಷಮಿಸು, ಆದರೆ ಜ್ಞಾನಸ್ನಾನ ಪಡೆದ ಮಕ್ಕಳನ್ನು ಮಾತ್ರ ನಾನು ಸ್ವರ್ಗಕ್ಕೆ ಸೇರಿಸಿಕೊಳ್ಳುತ್ತೇನೆ” ಎಂದು ಹೇಳುವುದಿಲ್ಲ. ಇದು ದೇವರ ಅಪರಿಮಿತ ಕರುಣೆ ಮತ್ತು ಜ್ಞಾನಕ್ಕೆ ವಿರುದ್ಧವಾಗಿರುತ್ತದೆ. ಅದೇ ಸಮಯದಲ್ಲಿ, ರಕ್ಷಣೆಗೆ ನಡೆಸುವ ಮಾರ್ಗಗಳಲ್ಲಿ ನಮಗೆ ತಿಳಿದಿರುವ ಏಕೈಕ ಮಾರ್ಗ ಜ್ಞಾನಸ್ನಾನ ಎಂದು ಧರ್ಮಸಭೆ ಬೋಧಿಸುತ್ತದೆ. ಆದ್ದರಿಂದ, ಅದು ಅಗತ್ಯವಾಗಿದೆ. ಹಾಗಾದರೆ ಪರಸ್ಪರ ವಿರುದ್ಧವೆಂದು ತೋರುವ ಈ ದೃಷ್ಟಿಕೋನಗಳನ್ನು ನಾವು ಹೇಗೆ ಹೊಂದಿಸಿಕೊಳ್ಳಬಹುದು? ಅಂದರೆ, ಪ್ರೀತಿಸುವ ದೇವರನ್ನೂ ರಕ್ಷಣೆಗೆ ಜ್ಞಾನಸ್ನಾನ ಅಗತ್ಯವೆಂಬ ವಿಚಾರವನ್ನೂ ನಾವು ಹೇಗೆ ಹೊಂದಿಸಿಕೊಳ್ಳಬಹುದು?
ಇವೆರಡನ್ನೂ ಹೊಂದಿಸಿಕೊಳ್ಳುವುದು ಬಹಳ ಸುಲಭ. ರಕ್ಷಣೆಯ ಅನುಗ್ರಹವನ್ನು ಪಡೆಯಲು ನಮಗೆ ತಿಳಿದಿರುವ ಏಕೈಕ ಮಾರ್ಗ ಜ್ಞಾನಸ್ನಾನವೆಂದು (ದೇವರು ನಮಗೆ ಪ್ರಕಟಿಸಿದ ಏಕೈಕ ಮಾರ್ಗವೆಂದು) ನಾವು ನಂಬುತ್ತೇವೆ. ಆದರೆ ಅಪಾರ ಪ್ರೀತಿ ಮತ್ತು ಜ್ಞಾನವುಳ್ಳ ದೇವರು, ನಮಗೆ ನೀಡಿರುವ ಸೀಮಿತ ಪ್ರಕಟಣೆಗೆ ತಾವೇ ಸೀಮಿತರಾಗಿಲ್ಲ. ದೇವರು ತಾವು ಬಯಸುವುದೆಲ್ಲವನ್ನೂ ಮಾಡಬಲ್ಲರು. ಆದ್ದರಿಂದ, ಜ್ಞಾನಸ್ನಾನ ಪಡೆಯುವ ಮೊದಲು ಮಗುವೊಂದು ಮರಣಹೊಂದಿದರೆ, ದೇವರು ಆ ಮಗುವನ್ನು ತಮಗಿಂತಲೂ ಎಷ್ಟೋ ಹೆಚ್ಚಾಗಿ ಪ್ರೀತಿಸುತ್ತಾರೆ ಎಂಬ ಭರವಸೆ ತಂದೆತಾಯಿಗಳಿಗೆ ಇರಬೇಕು. ಪರಿಪೂರ್ಣ ಪ್ರೀತಿಮಯರಾದ ಈ ದೇವರು ಆ ಮಗುವಿನೊಂದಿಗೆ ಪರಿಪೂರ್ಣ ಪ್ರೀತಿಯಿಂದಲೇ ನಡೆದುಕೊಳ್ಳುವರು. ದೇವರು ದೇವದೂತರಿಗೆ ನೀಡಿದಂತೆಯೇ ಆ ಮಗುವಿಗೂ ಆಯ್ಕೆಯನ್ನು ನೀಡುತ್ತಾರೆ ಎಂಬುದು ಒಂದು ಊಹೆ. ಆಯ್ಕೆ ಮಾಡಲು ದೇವದೂತರಿಗೆ ಒಮ್ಮೆ ಮಾತ್ರ ಅವಕಾಶ ದೊರಕಿತ್ತು. ಹಾಗೆಯೇ, ಈ ಮಗು ಮರಣಹೊಂದಿ ದೇವರ ಸನ್ನಿಧಿಗೆ ಬಂದಾಗ, ದೇವರನ್ನು ಸ್ವತಂತ್ರವಾಗಿ ಪ್ರೀತಿಸಲು ಆಯ್ಕೆ ಮಾಡುವಂತೆ ಅದಕ್ಕೆ ಆಹ್ವಾನ ದೊರೆಯುವ ಮತ್ತು ಆ ಮೂಲಕ ದೇವರೊಂದಿಗೆ ನಿತ್ಯಕಾಲವನ್ನು ಕಳೆಯುವ ಸಾಧ್ಯತೆ ಖಂಡಿತವಾಗಿಯೂ ಇದೆ. ಆದರೆ ಸ್ವರ್ಗವನ್ನು ಸೇರಲು ಸ್ವತಂತ್ರ ಆಯ್ಕೆ ಅಗತ್ಯವೆಂಬುದನ್ನು ನಾವು ಯಾವಾಗಲೂ ನೆನಪಿನಲ್ಲಿಡಬೇಕು. ಆದ್ದರಿಂದ, ಮಗುವನ್ನೂ ಸಹ ಅದರ ಇಚ್ಛೆಗೆ ವಿರುದ್ಧವಾಗಿ ಸ್ವರ್ಗದಲ್ಲಿರಲು ಬಲವಂತಪಡಿಸಲಾಗುವುದಿಲ್ಲ.
ಮತ್ತೊಂದು ಆಸಕ್ತಿಕರ ಸನ್ನಿವೇಶವೆಂದರೆ ಜ್ಞಾನಸ್ನಾನ ಪಡೆಯದ ವಯಸ್ಕರದ್ದು. ಅಂತಹ ವಯಸ್ಕರು ಮರಣಹೊಂದಿದಾಗ ಏನಾಗುತ್ತದೆ? ಇಲ್ಲಿಯೂ ನಾವು ಇದನ್ನು ಅನಂತ ಜ್ಞಾನವೂ ಅನಂತ ಪ್ರೀತಿಯೂ ಉಳ್ಳ ದೇವರ ದೃಷ್ಟಿಕೋನದಿಂದ ನೋಡಬೇಕು.
ಈ ಸಂದರ್ಭದಲ್ಲಿ ಕೆಲವು ಸಾಧ್ಯತೆಗಳಿವೆ. ಮೊದಲನೆಯದು “ರಕ್ತಸ್ನಾನ” ಎಂದು ಕರೆಯಲಾಗುವ ಸಾಧ್ಯತೆ. ಜ್ಞಾನಸ್ನಾನವನ್ನು ಬಯಸುವ ವ್ಯಕ್ತಿಯು ಈ ಸಂಸ್ಕಾರವನ್ನು ನಿಜವಾಗಿ ಪಡೆಯುವ ಮೊದಲೇ ತಮ್ಮ ವಿಶ್ವಾಸಕ್ಕಾಗಿ ರಕ್ತಸಾಕ್ಷಿಯಾಗಿ ಮರಣಹೊಂದಿದರೆ ಇದು ಅನ್ವಯಿಸುತ್ತದೆ. ಇಂದು ಇದು ಅಷ್ಟಾಗಿ ಕಂಡುಬರುವುದಿಲ್ಲವಾದರೂ, ಆದಿ ಧರ್ಮಸಭೆಯಲ್ಲಿ ಇಂತಹ ಸನ್ನಿವೇಶಗಳು ನಿಜವಾಗಿಯೂ ಇದ್ದವು. ಜ್ಞಾನಸ್ನಾನ ಪಡೆಯಬೇಕೆಂಬ ಈ ಬಯಕೆಯೂ ರಕ್ತಸಾಕ್ಷಿಯಾಗಿ ಮರಣಹೊಂದುವುದೂ ಜ್ಞಾನಸ್ನಾನದ ಅನುಗ್ರಹವನ್ನು ಒದಗಿಸುತ್ತವೆ; ಹೀಗೆ ಆ ವ್ಯಕ್ತಿಯು ದೇವರ ಅನುಗ್ರಹವನ್ನು ಪೂರ್ಣವಾಗಿ ಪಡೆಯುತ್ತಾರೆ ಎಂದು ನಾವು ನಂಬುತ್ತೇವೆ.
ಇದೇ ರೀತಿಯಲ್ಲಿ ನಾವು “ಅಭಿಲಾಷೆಯ ಜ್ಞಾನಸ್ನಾನ”ದ ಬಗ್ಗೆ ಮಾತನಾಡುತ್ತೇವೆ. ವಿಶ್ವಾಸವಿಟ್ಟು ಜ್ಞಾನಸ್ನಾನವನ್ನು ಬಯಸಿದರೂ, ಅದನ್ನು ನಿಜವಾಗಿ ಪಡೆಯುವ ಮೊದಲೇ ಮರಣಹೊಂದುವವರು ಇದರಲ್ಲಿ ಸೇರುತ್ತಾರೆ. ಇಲ್ಲಿಯೂ ದೇವರು ತಮ್ಮ ಅನುಗ್ರಹವನ್ನು ಸುರಿಸಲು ಆ ಬಯಕೆಯೊಂದೇ ಸಾಕಾಗುತ್ತದೆ. ತಮ್ಮ ಮಗುವಿಗೆ ಜ್ಞಾನಸ್ನಾನವಾಗಬೇಕೆಂದು ತಂದೆತಾಯಿಗಳು ಬಯಸಿದ್ದರೂ, ಜ್ಞಾನಸ್ನಾನ ಪಡೆಯುವ ಮೊದಲೇ ಮರಣಹೊಂದುವ ಮಕ್ಕಳಿಗೂ ಇದು ಅನ್ವಯಿಸುತ್ತದೆ. ಅನುಗ್ರಹವು ಸುರಿಸಲ್ಪಡಲು ತಂದೆತಾಯಿಗಳ ಬಯಕೆಯೇ ಸಾಕಾಗುತ್ತದೆ.
ಕೊನೆಯದಾಗಿ, ಜ್ಞಾನಸ್ನಾನ ಪಡೆಯಲು ಆಯ್ಕೆ ಮಾಡಿಕೊಳ್ಳದೆ, ಈ ಸಂಸ್ಕಾರವಿಲ್ಲದೆಯೇ ಮರಣಹೊಂದುವವರ ಸ್ಥಿತಿಯನ್ನು ನಾವು ನೋಡಬೇಕು. ಇಂತಹ ಪ್ರಕರಣಗಳು ಎರಡು ವರ್ಗಗಳಲ್ಲಿ ಒಂದಕ್ಕೆ ಸೇರುತ್ತವೆ. ಮೊದಲನೆಯದಾಗಿ, ತಮ್ಮದೇನೂ ತಪ್ಪಿಲ್ಲದೆ ಕ್ರಿಸ್ತನಲ್ಲಿ ಸ್ಪಷ್ಟವಾದ ವಿಶ್ವಾಸಕ್ಕೆ ಬಾರದೆ, ಅದರ ಪರಿಣಾಮವಾಗಿ ಜ್ಞಾನಸ್ನಾನವನ್ನು ಕೋರದವರು ಇದ್ದಾರೆ. ಈ ಸಂದರ್ಭದಲ್ಲಿ ದೇವರು ಹೃದಯವನ್ನು ಮಾತ್ರ ನೋಡಿ ತೀರ್ಪು ನೀಡುವರು. ಒಬ್ಬ ವ್ಯಕ್ತಿಯು ತಮ್ಮದೇನೂ ತಪ್ಪಿಲ್ಲದೆ ಕ್ರಿಸ್ತನಲ್ಲಿ ಸ್ಪಷ್ಟವಾದ ವಿಶ್ವಾಸಕ್ಕೆ ಬರದಿರುವುದಕ್ಕೆ ಅನೇಕ ಕಾರಣಗಳಿರಬಹುದು. ಉದಾಹರಣೆಗೆ, ಸುವಾರ್ತೆಯನ್ನು ಎಂದಿಗೂ ಸಾರದಿರುವ ಸಂಸ್ಕೃತಿಯೊಂದರಲ್ಲಿ ಒಬ್ಬರು ವಾಸಿಸುತ್ತಿದ್ದು, ಅವರು ನಿಜವಾಗಿಯೂ ಯೇಸುವಿನ ಬಗ್ಗೆ ಎಂದಿಗೂ ಕೇಳಿಯೇ ಇಲ್ಲವೆಂದು ಭಾವಿಸೋಣ. ಯೇಸುವಿನ ಬಗ್ಗೆ ಕೇಳಲು ಅವರಿಗೆ ಅವಕಾಶವೇ ಸಿಗಲಿಲ್ಲ ಎಂಬ ಕಾರಣಕ್ಕೆ ದೇವರು ಅವರನ್ನು ಶಾಶ್ವತ ದಂಡನೆಗೆ ಅರ್ಹರಾದ ದೋಷಿಗಳೆಂದು ಪರಿಗಣಿಸುವರೇ? ಖಂಡಿತವಾಗಿಯೂ ಇಲ್ಲ.
ಇನ್ನೊಂದು ಉದಾಹರಣೆಯೆಂದರೆ ಯೇಸುವಿನ ಬಗ್ಗೆ ಕೇಳಿದ್ದರೂ, ಕಪಟತೆಯಿಂದ ಕೂಡಿದ ಸಂದೇಶವನ್ನು ಮಾತ್ರ ಪಡೆದ ವ್ಯಕ್ತಿ. ಆ ಸಂದೇಶವನ್ನು ನಿರಂತರವಾಗಿ ಸಾರಿದ ರೀತಿಯೇ ವಿಕೃತವಾಗಿಯೂ ದುರುದ್ದೇಶಪೂರಿತವಾಗಿಯೂ ಇತ್ತೆಂದು ಭಾವಿಸೋಣ. ಬಹುಶಃ ಬೋಧಕರು ದ್ವಂದ್ವ ಜೀವನ ನಡೆಸುತ್ತಿದ್ದರು; ಆ ಸುವಾರ್ತೆಯ ಏಕೈಕ ಸಂದೇಶವಾಹಕರು ಅದನ್ನು ಬಹಳ ಅಸ್ತವ್ಯಸ್ತ ರೀತಿಯಲ್ಲಿ ಪ್ರಸ್ತುತಪಡಿಸುತ್ತಿದ್ದುದರಿಂದ, ಯೇಸುವಿನ ಬಗ್ಗೆ ಕೇಳಿದ ವ್ಯಕ್ತಿಯು ಸುವಾರ್ತೆಯ ಸ್ಪಷ್ಟ ಸಂದೇಶವನ್ನು ತಿರಸ್ಕರಿಸಿರಬಹುದು. ಅಂತಹ ಸಂದರ್ಭದಲ್ಲಿ, ಸಂದೇಶದ ತಿರಸ್ಕಾರವು ವಾಸ್ತವವಾಗಿ ಸಂದೇಶವಾಹಕರ ಕಪಟತೆಯ ತಿರಸ್ಕಾರವಷ್ಟೇ ಆಗಿರಬಹುದು. ಅದು ಒಳ್ಳೆಯದೇ ಆಗಿರಬಹುದು!
ಮುಖ್ಯ ಸಂಗತಿಯೆಂದರೆ ದೇವರು ಹೃದಯವನ್ನು ತಿಳಿದಿದ್ದಾರೆ ಮತ್ತು ಆ ಹೃದಯದಲ್ಲಿರುವ ಉದ್ದೇಶವನ್ನು ನೋಡುತ್ತಾರೆ. ಆದ್ದರಿಂದ ಯಾರಾದರೂ ಕ್ರಿಸ್ತನಲ್ಲಿ ಸ್ಪಷ್ಟವಾದ ವಿಶ್ವಾಸಕ್ಕೆ ಬರದೆ, ಅದರ ಪರಿಣಾಮವಾಗಿ ಜ್ಞಾನಸ್ನಾನ ಸಂಸ್ಕಾರವನ್ನು ಸ್ಪಷ್ಟ ರೀತಿಯಲ್ಲಿ ಪಡೆಯದಿದ್ದರೂ, ದೇವರು ಅವರ ಹೃದಯವನ್ನು ಮಾತ್ರ ನೋಡುವರು. ಅವರು ಆ ಹೃದಯದೊಳಗೆ ನೋಡಿದಾಗ, ಅಲ್ಲಿ ಒಳ್ಳೆಯತನವನ್ನೂ ವಿಶ್ವಾಸವನ್ನೂ ಕಂಡರೆ, ಆಗಲೂ ತಮ್ಮ ಅನುಗ್ರಹವನ್ನು ಸುರಿಸುವರು. ಹೀಗೆ, ಜ್ಞಾನಸ್ನಾನ ಪಡೆಯದ ವ್ಯಕ್ತಿಯು ತಮ್ಮ ಅಂತಃಕರಣದಲ್ಲಿ ಕೇಳಿಬರುವ ಸ್ವರ ಯಾರದೆಂದು ತಿಳಿಯದೆಯೇ ದೇವರ ಸ್ವರವನ್ನು ಅನುಸರಿಸುತ್ತಿರಬಹುದು. ವಾಸ್ತವವಾಗಿ ಈ ವ್ಯಕ್ತಿಗೆ ವಿಶ್ವಾಸವಿದೆ ಮತ್ತು ದೇವರು ಅದನ್ನು ನೋಡುವರು!
ಶಾಶ್ವತ ದಂಡನೆಯಲ್ಲಿ ಕೊನೆಗೊಳ್ಳಬಹುದಾದ ಏಕೈಕ ಪ್ರಕರಣವೆಂದರೆ, ತಮ್ಮದೇ ತಪ್ಪಿನಿಂದ ಜ್ಞಾನಸ್ನಾನ ಪಡೆಯದ ವ್ಯಕ್ತಿಯದ್ದು. ಅವರಿಗೆ ಸುವಾರ್ತೆಯನ್ನು ಕೇಳಲು ಎಲ್ಲ ಅವಕಾಶಗಳೂ ಸಿಕ್ಕಿರುತ್ತವೆ, ಇತರರ ಒಳ್ಳೆಯ ಕ್ರೈಸ್ತ ಸಾಕ್ಷ್ಯವೂ ದೊರೆತಿರುತ್ತದೆ; ಆದರೂ ಅವರು ತಮ್ಮ ಸ್ವತಂತ್ರ ಇಚ್ಛೆಯಿಂದ ಅಂತರಂಗದಲ್ಲಿ ಇದನ್ನು ತಿರಸ್ಕರಿಸುತ್ತಾರೆ. ಇಲ್ಲಿ ಸ್ವತಂತ್ರ ಇಚ್ಛೆಯೇ ಮುಖ್ಯ. ಮತ್ತೊಮ್ಮೆ ಹೇಳುವುದಾದರೆ, ದೇವರಿಗೆ ಮಾತ್ರ ಹೃದಯವು ತಿಳಿದಿದೆ ಮತ್ತು ದೇವರು ಮಾತ್ರ ಒಬ್ಬರ ಹೃದಯದ ತೀರ್ಪುಗಾರರಾಗಬಲ್ಲರು. ಆದ್ದರಿಂದ ದೇವರು ಆ ಹೃದಯದಲ್ಲಿ ಸ್ವತಂತ್ರವಾಗಿ ಆರಿಸಿಕೊಂಡ ಮೊಂಡುತನವನ್ನು ಕಂಡರೆ, ಆ ವ್ಯಕ್ತಿಯು ದೋಷಿಯಾಗಿರುತ್ತಾರೆ ಮತ್ತು ನಿತ್ಯರಕ್ಷಣೆಯ ಆ ಕೊಡುಗೆಯನ್ನು ಕಳೆದುಕೊಳ್ಳಬಹುದು. ಇದು ದುಃಖಕರ.”
ಇನ್ನಷ್ಟು ಕತೋಲಿಕ ಪ್ರಶ್ನೋತ್ತರಗಳು
