[T]an-awa, ang anghel sa Ginoo mipakita kang Jose sa usa ka damgo ug miingon, “Bangon, dad-a ang bata ug ang iyang inahan, kalagiw ngadto sa Ehipto, ug pabilin didto hangtod nga sultihan ko ikaw. Pangitaon ni Herodes ang bata aron patyon siya.” Mibangon si Jose ug gidala niya ang bata ug ang iyang inahan sa kagabhion ug milakaw ngadto sa Ehipto. Mateo 2:13-14
Samtang nagbarog ang atong Mahal nga Inahan atubangan sa Krus sa iyang Anak, lagmit nahinumdoman niya ang iyang pagkalagiw ngadto sa Ehipto uban kang San Jose. Mikalagiw sila aron panalipdan si Jesus gikan sa kabangis ni Herodes. Apan karon nakaabot na Kaniya ang maong kabangis.
Tingali naghunahuna si Inahang Maria kon unsa kaha ang buhaton ni San Jose niining adlawa kon anaa pa siya. Maluwas kaha niya pag-usab si Jesus pinaagi sa pagkalagiw gikan sa Jerusalem? Mapanalipdan kaha niya ang iyang Anak gikan sa kadaot nga midangat Kaniya?
Samtang gipamalandongan niya kining mga butanga, lagmit gigakos ni Inahang Maria ang misteryo niining pag-antos uban sa hingpit nga pagdawat. Mikalagiw sila gikan kang Herodes kaniadto tungod kay dili pa kadto ang Iyang panahon. Dili pa kadto ang panahon alang kang Jesus sa paghalad sa Iyang kinabuhi alang sa kaluwasan sa kalibotan. Apan karon miabot na ang Iyang takna. Karon ang iyang mahimo na lamang mao ang pagbarog diha sa pagtuo ug pagsalig samtang nag-atubang siya sa dakong misteryo sa pag-antos.
Sa kinabuhi sa matag usa kanato, adunay mga higayon sa paglikay sa pag-antos ug kasakit ug adunay mga higayon sa paggakos niini. Sa pipila ka mga kahimtang, panalipdan kita sa Dios. Sa uban, dapiton kita Niya sa hingpit nga paggakos sa krus nga gihatag kanato.
Samtang nagtan-aw kita sa Krus uban kang Inahang Maria, angay natong ilhon ang hingpit nga pagkatukma sa panahon sa kabubut-on sa Dios. Wala mag-antos si Jesus sa wala pa moabot ang Iyang panahon. Gipanalipdan Siya sa Amahan sa Langit gikan sa daotang mga tawo hangtod nga miabot ang Iyang higayon sa himaya. Kadto ang Iyang adlaw. Kadto ang Iyang takna. Kadto ang Iyang higayon sa paggakos sa sala ug kamatayon.
Pamalandongi karon ang panahon nga gitakda sa Dios sa imong kaugalingong kinabuhi. Unsa ang gitawag sa Dios kanimo nga gakson karon? Unsang krus ang gihatag kanimo karon? Kon tukma na ang panahon ug miabot na ang adlaw alang sa imong kaugalingong krus, ayaw pagpanuko sa paggakos niini. Ayaw pagpangitag paagi sa paglikay o dapit nga makalingkawasan. Atubanga ang Krus uban kang Jesus ug sa atong Mahal nga Inahan ug hibaloi nga gibuhat nimo kini uban sa ilang kusog ug pagpaluyo.
Mahal kaayong Inahan, gitawag ka aron panalipdan ang imong Anak sa tibuok Niyang kinabuhi. Gitawag ka aron magmabinantayon sa imong inahanong pag-atiman. Mahimo ka untang akong inahan niining adlawa, ug taboni ako sa imong kupo sa gugma. Luwasa ako gikan sa daotan kon mao kana ang kabubut-on sa Dios, ug panalipdi kanunay ako gikan sa sala.
Akong Inahan, sa pag-abot sa panahon sa akong kaugalingong pag-antos ug krus, tabangi ako sa pag-ingon og “Oo” nianang krus uban sa pagsalig, nga nasayod nga nagbarog ka diha gayod sa akong tupad.
Minahal kong Ginoo, nasayod ako nga panalipdan Mo kanunay ako gikan sa Yawa. Hatagi ako sa grasya nga makalahutay sa iyang kadaotan uban ang pagsalig ug paglaom. Hinaot nga magpabiling nagtutok Kanimo ang akong mga mata ug sa Imong mahimayaong trono sa Krus. Gihigugma ko Ikaw, mahal kong Ginoo. Tabangi ako sa pagsunod sa Imong hingpit nga panig-ingnan.
Inahan nga Maria, iampo ako. Jesus, misalig ako Kanimo.
Ikanapulog Duha nga Adlaw – Pag-antos nga Gihiambitan
Anaa sa eBook & Paperback!
