Tafakari ya Sala katika Oktava ya Pasaka

Aleluya! Utukufu wote, sifa na heshima ni Kwako, Bwana Yesu mwenye utukufu mkuu! Umefufuka kutoka kaburini, umeshinda dhambi na mauti, umefungua malango ya Mbinguni! Aleluya! Sifa zote na heshima ni Kwako, Bwana Yesu mwenye utukufu mkuu!

Bwana wangu, matumaini yamerejea, furaha na shauku vinajaa katika mioyo mingi unapofufuka kutoka kwa wafu kwa utulivu, upole na utukufu na kuleta uzima mpya kwa ulimwengu huu ulioanguka dhambini. Yesu mpendwa, nipe macho ya imani ili niweze kuona na kuamini Ufufuko Wako. Nisaidie kutambua matokeo ya ushindi Wako katika maisha yangu. Ninapozidi kukujua, Bwana wangu uliyefufuka, nisaidie kukukabidhi yote niliyo na yote ninayotumaini kuwa. Nisaidie kutumainia Huruma tele inayotiririka kutoka katika roho Yako iliyofufuka.

Bwana mpendwa, nisaidie kuingia kwa kina katika fumbo la Pasaka wakati wa adhimisho hili la siku nane za Oktava ya Pasaka. Ninaomba kwamba kila siku ya Oktava hii iwe siku ya kuongezeka kwa matumaini yangu Kwako na kuimarika kwa muungano wangu Nawe katika utukufu wa Ufufuko Wako.

Bwana wa Huruma, Kanisa letu linapojiandaa kwa adhimisho tukufu la Huruma inayomiminwa kwa namna ya pekee siku ya nane ya Oktava hii katika Jumapili ya Huruma ya Mungu, nisaidie kuufungua moyo wangu kwa kina zaidi kuliko wakati mwingine wowote ili kupokea wingi wa Neema na Huruma unayotaka kunijalia. Mimina Huruma Yako katika maisha yangu na katika maisha ya watoto Wako wote. Ninakutolea familia yangu, marafiki zangu, jumuiya yangu na ulimwengu mzima. Ninawaombea waamini, mwenye dhambi, waliopotea na waliochanganyikiwa, makleri, Baba yetu Mtakatifu na watoto Wako wote wa thamani. Sisi sote na tuutarajie, kwa matumaini yenye shauku, wingi wa neema unayotaka kutujalia.

Yesu wangu mwenye Huruma uliyefufuka, nakutumainia. Yesu, nakutumainia. Yesu, nakutumainia!