Imani Yangu Katoliki! Kipindi cha Kwanza

Kuifikia Imani

Pakua kipindi: PDF – Toleo linaloweza kuhaririwa

Maandalizi ya Kabla ya Mkutano
Washiriki waombwe kusoma Utangulizi na Sura ya Kwanza ya kitabu Imani Yangu Katoliki! kabla ya mkutano huu. Kiongozi aandae vinywaji na vitafunio vichache kwa ajili ya mkutano wa kwanza.

Dakika 5 – Kukusanyika
Muda huu wa mwanzo wa kukusanyika ni nafasi tu kwa kila mtu kufika na kufahamiana na wengine.

Katika muda huu wa mwanzo wa kukusanyika, kiongozi ahakikishe kwamba ana taarifa zote za mawasiliano za washiriki. Beji za majina zinaweza kusaidia.

Dakika 5 – Kujitambulisha
Kama mwenyeji, wakusanye wote pamoja na uwakaribishe. Eleza machache kuhusu wewe mwenyewe, kisha mpe kila mtu nafasi kwa zamu ajitambulishe kwa kifupi.

Dakika 5 – Sala ya ufunguzi na Maandiko Matakatifu
Wote wanaketi kimya huku kiongozi akianza kwa Ishara ya Msalaba, kisha anawaalika kukaa kimya kwa namna ifuatayo:

Tutulie tunapoanza kujifunza pamoja imani yetu tukufu ya Kikatoliki. “Bwana, tunapoketi hapa kimya kwa dakika moja, umsaidie kila mmoja wetu kukuletea maswali, mahangaiko, hofu na furaha zake. Utusaidie, katika muda huu wa ukimya, kuisikiliza kwa makini sauti Yako ya upole inayosema nasi, ikituongoza na kutuita tuwe na imani ya kina zaidi.”

Kaeni kimya kwa dakika moja mkiwa mmefumba macho ili kila mtu aweze kuzungumza na Bwana wetu kuhusu mahangaiko na wasiwasi wake binafsi.

Kiongozi anasoma mwaliko ufuatao:

Tulitafakari Neno la Mungu. Tutafakari safari yetu wenyewe ya imani kwa kuongozwa na maswali yafuatayo: Je, ninaamini? Imani yangu ina kina gani? Je, niko tayari kumruhusu Mungu aseme nami? Je, niko tayari kulipokea Neno la Mungu na kuruhusu ukweli wa Mungu upenye ndani yangu kwa kina zaidi? Je, niko tayari kuiruhusu imani hii mpya ibadilishe maisha yangu?

Kiongozi wa kikao anasoma kifungu kifuatacho cha Maandiko Matakatifu:

Warumi 10:9-17: Kwa maana, ukikiri kwa kinywa chako kwamba Yesu ni Bwana na kuamini moyoni mwako kwamba Mungu alimfufua kutoka kwa wafu, utaokolewa. Kwa maana mtu huamini kwa moyo na hivyo kuhesabiwa haki, naye hukiri kwa kinywa na hivyo kuokolewa. Kwa maana Maandiko yanasema, “Hakuna amwaminiye atakayetahayarishwa.” Kwa maana hakuna tofauti kati ya Myahudi na Mgiriki; Bwana yuleyule ni Bwana wa wote, akiwajalia utajiri wake wote wanaomwita. Kwa maana “kila mtu atakayeliitia jina la Bwana ataokolewa.” Lakini watamwitaje Yeye ambaye hawajamwamini? Na watamwaminije Yeye ambaye hawajamsikia? Na watasikiaje bila mtu wa kuwahubiria? Na watu watahubirije wasipotumwa? Kama ilivyoandikwa, “Jinsi ilivyo mizuri miguu ya wale wanaoleta habari njema!” Lakini si wote walioitii habari njema; kwa maana Isaya anasema, “Bwana, ni nani aliyeamini yale yaliyosikiwa kutoka kwetu?” Basi imani hutokana na kusikia, na kusikia hutokana na neno la Kristo.

Kisha kiongozi anasema: Tukae kimya kwa muda mfupi ili kutafakari maneno haya. (dakika moja ya ukimya). Muda wa sala unahitimishwa kwa wote kukiri Kanuni ya Imani ya Mitume:

Nasadiki kwa Mungu, Baba mwenyezi, Muumba mbingu na nchi; na kwa Yesu Kristo, Mwanawe pekee, Bwana wetu: aliyetungwa kwa uwezo wa Roho Mtakatifu, akazaliwa na Bikira Maria; akateswa kwa mamlaka ya Ponsyo Pilato, akasulubiwa, akafa, akazikwa. Akashuka kuzimu; siku ya tatu akafufuka katika wafu; akapaa mbinguni, ameketi kuume kwa Mungu Baba mwenyezi; kutoka huko atakuja kuwahukumu wazima na wafu. Nasadiki kwa Roho Mtakatifu, Kanisa takatifu katoliki, ushirika wa watakatifu, maondoleo ya dhambi, ufufuko wa mwili, na uzima wa milele. Amina.

Dakika 45-50 – Maswali ya majadiliano
Kila mtu aalikwe kushirikisha wengine jambo fulani au kuuliza swali, akipenda, kuhusu maswali au hoja za kuanzisha majadiliano zilizo hapa chini. Jadilianeni swali moja baada ya jingine, na mpe kila mtu nafasi ya kusema jambo akipenda. Epukeni kuwaacha mtu mmoja au wawili watawale majadiliano. Peaneni nafasi kwa zamu kuzunguka duara, wala msiogope kushirikisha wengine! Mawazo yenu yanaweza kumsaidia mtu mwingine kuelewa mada hizi. Huenda swali lako likawa ndilo swali alilo nalo mtu mwingine pia. Baadhi ya maswali yaliyo hapa chini yatawaalika kushirikisha wengine mambo ya maisha yenu wenyewe; mengine yatawaalika kushirikisha wengine yale mliyosoma katika Sura ya Kwanza. Lengo ni kushirikishana mambo ya maisha yenu wenyewe na pia kuhakikisha kwamba imani ya Kanisa letu inaelezwa wazi na kueleweka na wote.

1. “Nasadiki…” Safari yako ya imani imekuwaje? Je, umechunguza kwa kina suala la yale unayoamini? Je, hata unajua unachoamini? Je, umeshughulikia maswali magumu kuhusu Mungu, uumbaji wa ulimwengu, maisha baada ya kifo, maisha ya kimaadili, ibada na mambo mengine kama hayo?
2. Tamaa ya Furaha: Je, umewahi kutafakari tamaa hii ya furaha iliyoandikwa ndani kabisa ya roho yako? Je, umewahi kutambua kwamba tamaa hii huathiri karibu kila uamuzi unaofanya? Je, unatambua kwamba nyakati nyingine inakuongoza kutafuta aina ya “furaha” ya uongo na ya muda mfupi ambayo, mwishowe, hukuacha tu ukiwa mkavu na mtupu ndani?
3. Kuitimiza Tamaa Hiyo: Ni nini kinachokufurahisha? Ni nini kinachokupa furaha ya kweli? Ni jambo gani moja linalokupa utimilifu? Bila shaka, jibu ni Mungu. Utimilifu huo hupatikana kwa kumwamini Yeye. Jaribu kueleza jinsi ulivyogundua kwamba Mungu ndiye njia ya kuitimiza tamaa yako ya furaha. Labda kulikuwa na wakati maalumu ulipoanza kuongoka. Au labda unaweza kutaja nyakati nyingi ndogondogo ulipoanza kugundua jambo hili. Shirikisha wengine yale unayojisikia huru kuyashirikisha. Huenda simulizi lako likawa ndilo analohitaji kusikia mtu mwingine!
4. Kumjua Mungu: Kama ilivyoelezwa katika Sura ya Kwanza, tunafikia kumjua Mungu kwa njia mbili: akili ya binadamu & ufunuo (imani).
   1. Akili ya binadamu: Jadilianeni kuhusu yale tunayoweza kuyafahamu kwa akili yetu ya kibinadamu pekee. Tunaweza kufahamu kiasi gani kuhusu Mungu? Tunaweza kuthibitisha nini kuhusu Mungu? Kama ungeingia katika mabishano kuhusu Mungu na mtu asiyeamini kuwa Mungu yupo, ungetumia hoja gani kuthibitisha kwamba Mungu yupo?
   2. Ufunuo (imani): Ufunuo ni nini, na umetufikiaje katika nyakati zote? Peaneni nafasi kwa zamu katika kikundi kueleza yale ambayo Mungu ametuambia katika nyakati zote. Aliwaambia nini Adamu na Eva, Noa, Abrahamu, Musa, Manabii, Yohane Mbatizaji, Yesu na Kanisa? Aidha, jaribuni kushirikisha wengine uzoefu wowote binafsi mliokuwa nao katika mojawapo ya nyakati zile ambapo jambo liliwaelekea wazi ghafla. Je, unaweza kukumbuka kipengele fulani cha imani yetu ambacho, wakati fulani, kilieleweka kwako ghafla? Huu ni wakati wa ufunuo binafsi ambapo mafundisho ya Mungu yaliyotolewa kwa wote yanaingia moyoni mwako.
5. Majisterio: Je, unaielewa Majisterio, yaani mamlaka ya kufundisha ya Kanisa? Ikiwa mtu mmoja katika kikundi anaelewa wajibu na mamlaka ya Majisterio kama ilivyoelezwa katika Sura ya Kwanza, na awashirikishe wengine katika kikundi uelewa huo. Wengine wanaweza kuchangia hoja za ziada ili kufafanua au kusahihisha inapohitajika. Rejeeni sehemu hiyo katika Sura ya Kwanza ikihitajika.
6. Maandiko Matakatifu: Inamaanisha nini kusema kwamba Maandiko Matakatifu yanatoka kwa Mungu kwa 100% na kwa binadamu kwa 100%? Kwa mara nyingine, mtu mmoja anaalikwa kutoa mawazo kuhusu jambo hili kama lilivyoelezwa katika Sura ya Kwanza, na wengine wanaweza kuongeza ufafanuzi na michango ili lieleweke vizuri zaidi.
7. Imani: Lengo la ufunuo ni imani. Imani kwa Mungu ndiyo jambo muhimu zaidi kuelewa katika majadiliano haya. Peaneni nafasi kwa zamu kufanya majadiliano mafupi kuhusu vipengele vifuatavyo vya imani:
   1. Inamaanisha nini kusema kwamba “imani ina uhakika”?
   2. Ina maana gani kusema kwamba “imani hutafuta kuelewa”?
   3. Je, imani na sayansi vinapingana? Kwa nini vinapingana au kwa nini havipingani?
   4. Tunamaanisha nini tunaposema kwamba mtu lazima awe “huru” ili kuingia katika imani? Ni mifano gani ya mambo yanayoweza kuathiri uhuru wetu binafsi tunapoipokea zawadi halisi ya imani?

Dakika 20 – Tafakari za Mwisho na Kushirikishana
Peaneni nafasi kwa zamu, mkimpa kila mtu fursa ya kushirikisha wengine jambo ambalo huenda lilimgusa zaidi katika majadiliano ya jioni hii (ya leo), au jambo lililomchanganya zaidi, ili apate ufafanuzi au uelewa zaidi kutoka kwa wengine.

Dakika 5 – Sala ya Kuhitimisha
Kiongozi anaanza kwa Ishara ya Msalaba na kuwaalika wote kukaa kimya kwa dakika moja, wakiwa wamefumba macho. Kila mtu atafakari yale yaliyojadiliwa, hasa jambo lililomgusa zaidi.

Kisha kiongozi anasali sala ifuatayo:

Mungu Baba yetu, tunakushukuru kwa zawadi ya imani yetu. Tunakushukuru kwa kutufunulia yote katika nyakati zote. Tunakushukuru kwa Musa na manabii wa kale. Tunakushukuru hasa kwa Yesu Mwana Wako aliyekuja kuishi kati yetu ili akufunue Wewe na upendo Wako mkamilifu. Msaidie kila mmoja wetu katika safari yetu ya imani. Utusaidie si kuelewa tu, bali pia kuamini. Utusaidie kukua katika zawadi ya imani iliyo juu ya uwezo wa asili, na utuwezeshe kuiruhusu zawadi hiyo ya imani ibadilishe maisha yetu.

Bwana, ikiwa kuna maswali ambayo hayajajibiwa usiku huu (leo), tafadhali sema nasi kwa njia Yako mwenyewe na kwa wakati Wako mwenyewe. Ikiwa kuna majibu tuliyopewa usiku huu (leo) ambayo unataka tuwashirikishe wengine, utupe ujasiri, hekima na upendo tunaohitaji ili kuwashirikisha wengine imani hii kulingana na mapenzi Yako.

Yesu, tunakuamini kweli; utusaidie imani yetu inapoyumba na kuwa dhaifu.  Utuimarishe ili tukujue na kukupenda kwa namna kamilifu zaidi kila siku.  Yesu, nakutumainia.

Kisha kiongozi anawaalika wote waliopo kutoa sala zao wenyewe kwa namna ifuatayo (Zingatia: Hili linaweza kufanywa kwa sauti, lakini huenda ikafaa zaidi lifanywe kimya kimya, kadiri kiongozi atakavyoona inafaa):

Sasa kila mmoja wetu na alete mahangaiko yake binafsi mbele ya Bwana wetu, tukitumaini kwamba anatusikia na anajua yote tunayohitaji.  Tuyakabidhi maombi haya Kwake kwa kumtumainia kikamilifu, tukijua kwamba anatamani kushika hatamu.

(Tukae kimya kwa dakika moja ili kila mmoja azungumze na Mungu kuhusu mahitaji yake binafsi kwa usiku au mchana huo).

Kisha kiongozi anawaalika wote kuhitimisha kwa kusali Baba Yetu, Salamu Maria na Atukuzwe Baba.

Yaliyomo katika Vipindi vya Mafunzo