Ika-32 nga Domingo sa Kasagarang Panahon (Tuig A)
“Busa, pagbantay kamo, kay wala kamo mahibalo sa adlaw ni sa takna.” Mateo 25:13
Hunahunaa kon nahibalo ka sa adlaw ug takna nga mobiya ka niining kinabuhia. Hinuon, adunay mga tawo nga nahibalo nga nagkaduol na ang kamatayon tungod sa sakit o sa katigulangon. Apan hunahunaa kini kalabot sa imong kaugalingong kinabuhi. Unsa kaha kon sultihan ka ni Jesus nga ugma mao na kana nga adlaw. Andam ka ba?
Lagmit daghan kang mahunahunaan nga praktikal nga mga butang nga gusto nimong atimanon. Daghan ang maghunahuna sa tanan nilang mga minahal ug sa mahimong epekto niini kanila. Isalikway una kining tanan ug palandonga ang pangutana gikan sa usa lamang ka panglantaw. Andam ka na ba nga makigkita kang Jesus?
Sa dihang mobiya ka niining kinabuhia, usa lamang ka butang ang mahinungdanon. Unsa ang isulti ni Jesus kanimo? Sa bahin nga nag-una mismo sa gikutlo sa ibabaw nga teksto sa Kasulatan, gisaysay ni Jesus ang Parabola sa Napulo ka Birhen. Ang uban maalamon ug adunay lana alang sa ilang mga suga. Sa pag-abot sa pamanhonon sa lawom na nga kagabhion, andam silang mosugat kaniya uban sa nagdagkot nga mga suga, ug gidawat niya sila. Ang mga hungog wala mangandam ug walay lana alang sa ilang mga suga. Sa pag-abot sa pamanhonon, wala nila siya maabti ug nadungog nila ang mga pulong, “Amen, sultihan Ko kamo, wala Ako makaila kaninyo” (Matthew 25:12).
Ang lana sa ilang mga suga, o ang pagkawala niini, usa ka simbolo sa gugma. Aron maandam kita sa pagpakigkita sa Ginoo sa bisan unsang takna, sa bisan unsang adlaw, kinahanglan nga adunay gugma sa atong kinabuhi. Ang gugma labaw pa kaayo sa usa ka mainitong pagbati o emosyon sa paghigugma. Ang gugma usa ka hingpit nga pasalig sa paghigugma sa uban uban sa kasingkasing ni Cristo. Usa kini ka inadlaw nga batasan nga atong maporma pinaagi sa pagpili nga unahon ang uban, nga itanyag kanila ang tanan nga gipangayo ni Jesus nga atong ihatag. Mahimong usa kini ka gamay nga sakripisyo o usa ka bayanihong buhat sa pagpasaylo. Apan bisan unsa pa kini, gikinahanglan nato ang gugma aron maandam kita sa pagpakigkita sa atong Ginoo.
Pamalandongi karon kadtong mga tawo sa imong kinabuhi nga buot sa Dios nga imong higugmaon. Unsa ka maayo nimo kini ginabuhat? Unsa ka hingpit ang imong pagpahinungod niini? Hangtod asa ka andam mopadayon? Bisan unsa ang mosantop sa imong hunahuna mahitungod sa imong kakulang niining gasaha, hatagi kini og pagtagad ug pakamayoa ang Ginoo alang sa Iyang grasya aron ikaw usab mahimong maalamon ug andam sa pagsugat sa Ginoo bisan kanus-a.
Ginoo, nangamuyo ako alang sa labaw-sa-kinaiyahan nga gasa sa gugma sa akong kinabuhi. Palihog pun-a ako sa gugma alang sa uban ug tabangi ako nga mahimong hilabihan ka manggihatagon niining gugmaha. Hinaot nga wala akoy ihikaw ug, sa pagbuhat niini, hingpit akong maandam sa pagsugat Kanimo bisan kanus-a Mo ako tawgon sa pagpauli. Jesus, misalig ako Kanimo.
Pag-ampo ug Pagpaubos
Ika-32 nga Domingo sa Ordinaryong Panahon (Tuig B)
“Pagbantay kamo sa mga eskriba, nga ganahang magsuroysuroy nga nagsul-ob og tag-as nga mga kupo ug modawat og mga pagtimbaya sa mga tiyanggihan, mga lingkoranan sa dungog sa mga sinagoga, ug mga dapit sa dungog sa mga kombira. Ilang gilamoy ang mga balay sa mga biyuda ug, isip pagpakaaron-ingnon, naglitok og tag-as nga mga pag-ampo. Makadawat sila og hilabihan kabug-at nga pagkahinukman sa silot.” Marcos 12:38-40
Mahinungdanon nga timan-an dinhi nga si Jesus nag-ingon, “Makadawat sila og hilabihan kabug-at nga pagkahinukman sa silot.” Kining mga pulonga gisulti Niya nga mao ang tinubdan sa kalooy ug grasya. Ang Iyang kasingkasing puno sa kaayo ug kaluoy, Siya malumo ug mapinasayloon, ug wala Siyay laing gitinguha gawas sa atong dayong kaluwasan. Bisan pa niana, tin-aw ang giingon ni Jesus nga ang mga eskriba pagahukman sa bug-at nga silot. Aguy!
Ang unang angay natong hunahunaon mao nga dili kita gustong mahisama sa mga eskriba! Dili kita gustong makadawat sa samang pagkahinukman sa silot ug, busa, kinahanglan natong likayan ang ilang kahimtang sa sala. Busa motumaw ang pangutana, “Unsang sala sa mga eskriba ang nakapahamtang kanila niining bug-at nga pagkahinukman sa silot?”
Sa laktod nga pagkasulti, mga mangingilad sila. Gigamhan sila sa tinguha alang sa “mga dapit nga dungganon.” Klaro nga daotan ang ilang pagtagad sa uban: “Ilang gilamoy ang mga balay sa mga biyuda.” Ang mas daotan pa, nagpakaaron-ingnon silang mga tawo nga maampoon bisan pa nga klarong dili sila ingon niana. Tungod niini, gikondenar sila ni Jesus sa hilabihan kabug-at.
Busa unsa may atong makat-onan gikan sa ilang mga sayop? Angay natong makat-onan bisan lang kining duha ka leksiyon:
1) Ang tinuod nga “dapit sa dungog” mao ang dapit sa kinadak-ang pagpaubos. Ang tinuod nga dungog, sa mga mata sa Dios, makaplagan kon mag-alagad kita nga walay makamatikod ug mohatag nga walay pag-ila nga madawat. Niining paagiha, ang atong paghatag ug pag-alagad gihimo tungod lamang sa gugma ug dili tungod sa mga tuyo nga alang sa kaugalingong kaayohan. Ang mapaubsanong tawo dili mangita og pagdayeg ug pagpasidungog tungod sa gugma nga iyang gihatag. Ang buhat mismo sa paghatag ug pag-alagad mao ang gasa nga iyang nadawat.
2) Ang paglitok ug tag-as nga mga pag-ampo dili pareho sa tinuod nga pag-ampo. Ang pag-ampo nagtumong sa usa ka butang. Kini mao ang pagsulod sa pakighiusa sa Dios. Kini mao ang pagtukod ug relasyon uban Kaniya sa lawom, matahom ug malungtarong paagi. Kini mahitungod sa gugma. Ang pag-ampo dili alang sa pagpasundayag o aron dayegon sa uban.
Pamalandongi karon ang bug-at nga hukom nga gipahayag ni Jesus batok sa mga eskriba. Hibaloi nga usa sa mga hinungdan niini mao ang pagtudlo kanato kon unsay likayan sa kinabuhi. Likayi ang tanang hakog nga garbo. Pangitaa ang pagpaubos ug ang tinuod nga pag-ampo ug madagayaon kang panalanginan.
Ginoo, tabangi ako nga mahimong tawo sa tinuod nga pag-ampo ug pagsimba. Tabangi ako nga magpabiling mapainubsanon ug matinud-anon. Tabangi ako nga mahigugma Kanimo tungod lamang sa akong gugma Kanimo. Jesus, nagsalig ako Kanimo.
Mabanhaw ang mga Minatay
Ikakatloan ug Duha nga Domingo sa Ordinaryong Panahon (Tuig C)
“Nga mabanhaw ang mga minatay, gipahibalo usab gani ni Moises sa teksto mahitungod sa sapinit, sa dihang gitawag niya nga ‘Ginoo’ ang Dios ni Abraham, ang Dios ni Isaac, ug ang Dios ni Jacob; ug Siya dili Dios sa mga minatay, kondili sa mga buhi, kay alang Kaniya buhi silang tanan.” Lucas 20:37-38
Samtang nagkaduol kita sa kataposan niining tuig sa Simbahan, ang atong mga pagbasa nagsugod sa pagpunting nga mas tin-aw sa kataposang mga butang nga umaabot. Ang mosunod usa ka kinutlo gikan sa Ang Akong Katolikong Pagtuo!, Kapitulo 5, mahitungod sa pagkabanhaw sa mga patay:
Ang ikatulo ug kataposang pag-anhi mao ang pagbalik ni Jesus sa Yuta diha sa kahalangdon ug himaya. Kini mao “ang kataposan sa kalibotan sumala sa atong nailhan.” Kini mao ang panahon nga matukod ang Iyang permanente nga Gingharian. Daghan ang ikasulti mahitungod niining higayona sa kasaysayan, ug makapadani gayod kaayo kini nga pamalandongan.
Kon basahon ninyo ang Katesismo sa Simbahang Katolika sa mga parapo #671-677, inyong madiskobrehan nga halos sama kini sa pagbasa og usa ka makapainteres kaayong nobelang misteryo nga hinanduraw, pinasikad sa siyensiya, ug nahitabo sa umaabot. Ang bugtong kalainan mao nga kining tanan tinuod, kining tanan mahimayaon, ug kining tanan labaw pa sa bisan unsang misteryo nga masabtan nato hangtod nga mahitabo na gayod kini. Ug mahitabo kini sa usa ka tino nga higayon sa umaabot!
Busa unsay kahulogan niining tanan? Nagpasabot kini nga si Jesus mobalik uban sa tanan Niyang kahalangdon ug himaya. Moabot ang adlaw nga mobalik Siya dinhi sa Yuta sa Iyang lawas, masanagon ug mahimayaon. Makita nato Siya, ug matapos ang kalibotan nga atong nailhan karon. Nianang higayona, ipatindog sa Dios ang Iyang gingharian nga magpabilin sa walay kataposan, ug ang Langit ug ang Yuta mahiusa. Mahimo kining “usa ka bag-ong Langit ug usa ka bag-ong Yuta” (Pinadayag 21:1). Ang kanhing Langit ug Yuta mahanaw ug matukod ang bag-ong kahikayan.
Apan dili lang kana! Nianang higayona mobangon ang tanang patay. Oo, ang tanang tawo nga namatay sukad mabanhaw. Kini nagpasabot nga ang tanan nga “gipapahulay” sa usa ka sementeryo o sa laing dapit pagabuhi-on pag-usab, hatagan og bag-ong lawas nga gihimaya, ug kana nga lawas pagahiusahon pag-usab sa iyang kalag.
Ang Katesismo nag-ingon usab:
Sa iyang pag-abot sa kataposan sa panahon aron paghukom sa mga buhi ug sa mga patay, ang mahimayaong Kristo mopadayag sa tinagong kahimtang sa mga kasingkasing ug mobalos sa matag tawo sumala sa iyang mga buhat ug sumala sa iyang pagdawat o pagsalikway sa grasya. (#682)
Makapadani kini nga hunahuna, ug makahahadlok usab og gamay! Nagpasabot kini nga ang tanang tinago mabutyag. Mahimong maayo o daotan kini depende kon unsa ang gitago. Kini nga hunahuna angayng mopuno kanato og diyutayng balaang kahadlok, ug angay usab kining mopuno kanato og balaang kalipay. Ang balaang kahadlok sa pagkatinuod usa ka gasa gikan sa Dios aron tabangan kitang wagtangon ang bisan unsang sekreto ug tinagong sala nga ania kanato karon o nga atong gipakigbisogan kaniadto. Sanglit mabutyag man gayod kining tanan sa umaabot nga adlaw, mas maayo nga atubangon na nato kini karon aron mawala na ang atong sala. Kon buhaton nato kini, bisan ang atong sala mahimo nga hiyas ug grasya. Ug unya, sa kataposan sa panahon, kana nga grasya ug hiyas mao ang igapadayag. Kini nga pagpadayag sa atong hiyas mahimong hinungdan sa balaang kalipay dili lamang alang kanato kondili usab alang sa uban nga makakita niini.
Busa, pagahukman kita pinasikad sa unsay anaa sa sulod sa atong konsensiya. Dili na lamang kini ibase sa panggawas. Dili na kita makahimo sa pagpakita og maayong dagway ug magpakaaron-ingnon nga kita usa ka tawo nga dili man gayod kita. Ang tibuok kamatuoran mogawas ug ipadayag aron makita sa tanan sumala sa laraw sa Dios.
Laing butang nga angayng hinumdoman mao nga sa Kataposang Paghukom, bisan kadtong anaa sa Impiyerno mabanhaw. Ngano? Kay isip mga tawo, gituyo nga mahiusa kita sa atong mga lawas hangtod sa kahangtoran. Sa atong kinaiya, kita lawas ug kalag. Busa bisan ang mga patay makadawat pag-usab sa ilang mga lawas. Apan makapasubo nga mag-antos sila hangtod sa kahangtoran dili lamang sa espirituhanong paagi kondili sa pisikal usab. Wala kita mahibalo kon unsa gayod ang nalangkit niini. Apan kini mahimong tinuod nga kasakit tungod sa pagkawala. Pagkawala sa Dios, ug pagkawala tungod kay ang lawas ug kalag dili makaambit sa kinabuhi uban sa Dios. Tingali daw mapintas ug dili makiangayon kini, apan kinahanglan natong pahinumdoman ang atong kaugalingon nga ang Dios hingpit nga makiangayon ug hingpit nga mahigugmaon, ug bisan unsaon pagsinati kining walay kataposang pagkawala ug walay kataposang pag-antos, matarong ug makiangayon kini.
Unsa kaha ang hitsura niining bag-ong kinabuhi alang niadtong makaambit sa Pagkabanhaw ngadto sa bag-ong kinabuhi? Kini mahimong kinabuhi uban sa Dios, sa lawas ug sa espiritu, ug kinabuhi usab uban sa usag usa. Ang Basahon sa Pinadayag naghulagway sa simbolikong paagi niining bag-ong kinabuhi ingong usa ka siyudad diin ang Dios naglingkod sa trono sa taliwala sa siyudad. Ang kahayag nagadan-ag gikan Kaniya busa dili na kinahanglan ang adlaw o ang bulan. Ang mga dalan bulawan. Ang mga ganghaan puno sa bililhong mga bato. Ug daghan pa gayod. Kining simbolikong pinulongan dili angay sabton sa literal nga paagi; hinuon, angay kining tan-awon ingong mga hulagway nga makatabang kanato sa pagsabot sa katahom, kahalangdon, ug kadungganan sa kinabuhi nga nagpaabot kanato. Kini mao ang bag-ong mga Langit ug bag-ong Yuta.
Ginoo, hinaot nga andam ako kanunay sa pagsugat Kanimo sa Imong pag-abot. Nagpasalamat ako Kanimo sa Imong hingpit nga saad sa pagbanhaw sa tanan gikan sa mga patay ug sa paghatag og bag-ong kinabuhi. Gamita ako sa pagtigom sa daghang tawo ngadto niining umaabot ug mahimayaong Gingharian, minahal nga Ginoo. Jesus, nagsalig ako Kanimo.
Pagpasaylo…Pito ka Higayon sa Usa ka Adlaw
Lunes sa Katloan ug Duha nga Semana sa Ordinaryong Panahon
“Pagbantay kamo! Kon ang imong igsoon makasala, badlonga siya; ug kon maghinulsol siya, pasayloa siya. Ug kon makasala siya batok kanimo sa pito ka higayon sulod sa usa ka adlaw ug mobalik kanimo sa pito ka higayon nga moingon, ‘Nagbasol ako,’ kinahanglan nga pasayloon mo siya.” Lucas 17:3-4
Ang hingpit nga pagpasaylo mahimong lisod kaayo usahay. Ilabi na kini kon ang mao gihapong tawo makasala batok kanimo “sa makapito sulod sa usa ka adlaw” sumala sa giingon ni Jesus.
Apan ang mga pulong ni Jesus angayng itanom sa kasingkasing. Wala Siya maghisgot lamang og usa ka mithi nga dili makab-ot; hinuon, realistiko kaayo Siya. Kinahanglan ihatag ang pagpasaylo, balikbalik ug balik na usab. Dili kita angayng magpanuko sa paghatag niini, ilabi na ngadto niadtong matinud-anong naghinulsol.
Usa sa unang mga butang nga angay natong matikdan niining teksto mao nga kon adunay makasala batok kanato, kinahanglan nato siyang badlongon. Ang pagbadlong dili angayng usa ka buhat nga nagtumong sa pagpanimalos; hinuon, kinahanglan kining buhaton aron pagdapit sa paghinulsol. Mao lamang kini ang hinungdan sa pagbadlong sa laing tawo. Kon mobati kita nga ang usa nga nakasala batok kanato tingali andam modawat og kausaban, nan kinahanglan nato siyang badlongon uban sa gugma. Ug kon dawaton niya kini ug mangayo sa atong pasaylo, kinahanglan nato kining ihatag.
Apan, sumala sa nahisgotan, mahimong labi kining lisod kon ang sala balikbalik nga ginabuhat. Mahimo kining makapakapoy ug makapaluya sa kadasig. Ug kon ang usa ka sala balikbalik nga ginabuhat, sayon rang magduhaduha sa pagkamatinud-anon sa pagbasol sa nangayog pasaylo.
Apan dili nato angayng kabalak-an ang bisan hain niana. Ang ato lamang angayng hatagan og pagtagad mao ang pagpaminaw niining mga pulonga, “Nagbasol ako.” Kini ang sugo ni Jesus. Kon adunay mosulti niining mga pulonga, kinahanglan kitang mopasaylo ug buhaton kini dihadiha.
Kini nga teksto sa Kasulatan nagpadayag usab kanato sa kahinungdanon sa pagpahayag sa atong pagbasol ngadto sa atong napasakitan. Peligroso ang pagdahom lamang nga pasayloon kita sa laing tawo. Adunay dakong gahom sa aktuwal nga pagsulti ngadto sa laing tawo, “Palihog pasayloa ako, nagbasol ako sa akong sala.” Bisan tuod mahimong lisod isulti kining mga pulonga, mga pulong kini nga makahatag og dakong kaayohan.
Pamalandongi karon ang buhat sa pagpangayo og pasaylo ug sa pagpasaylo sa uban. Gihatagan kitang tanan og daghang kahigayonan matag adlaw sa pagpasaylo ug pagpangayo og pasaylo. Ayaw pagpanuko sa pagbuhat niini ug magmapasalamaton ka nga gibuhat nimo kini.
Ginoo, tinuod gayod akong nagbasol sa daghang sala nga akong nabuhat batok Kanimo. Palihog pasayloa ako. Kon magmagahi ako sa akong kaugalingon, palihog badlonga ako uban sa gugma. Kon kinahanglan akong mangayo og pasaylo sa uban, palihog hatagi ako sa kaisog sa pagbuhat niini. Jesus, nagsalig ako Kanimo.
Kristohanong Pag-alagad
Martes sa Ika-katloan ug Duha nga Semana sa Ordinaryong Panahon
“Kon nabuhat na ninyo ang tanan nga gisugo kaninyo, ingna, “Kami mga sulugoon nga walay kapuslanan; gibuhat lamang namo ang among katungdanan.” Lucas 17:10b
Lisod kining mga pulonga nga isulti, ug mas lisod pa gayod nga tinuoray kining tuyo-on sa dihang isulti.
Handurawa ang kahimtang diin kining tinamdan sa Kristohanong pag-alagad kinahanglang ipahayag ug isabuhay. Pananglitan, handurawa ang usa ka inahan nga naggahin sa tibuok adlaw sa pagpanglimpyo ug dayon sa pag-andam sa pagkaon sa pamilya. Sa kataposan sa adlaw, nindot gayod nga ilhon ang iyang kahago ug pasalamatan siya tungod niini. Siyempre, kon ang pamilya mapasalamaton ug moila niining mahigugmaong pag-alagad, kining pagkamapasalamaton maayo ug walay lain kondili usa ka buhat sa gugma. Maayo ang pagkamapasalamaton ug ang pagpahayag niini. Apan kining tekstoha dili kaayo mahitungod sa atong pagpaningkamot nga magmapasalamaton sa gugma ug pag-alagad sa uban; hinunoa, mahitungod kini sa atong kaugalingong kadasig sa pag-alagad. Nag-alagad ka ba aron pasalamatan? O nag-alagad ka tungod kay maayo ug husto ang pag-alagad?
Giklaro ni Jesus nga ang atong Kristohanong pag-alagad sa uban, diha man sa pamilya o sa laing kahimtang, kinahanglang magagikan una sa tanan sa pag-ila nga katungdanan nato ang pag-alagad. Kinahanglan kitang mag-alagad tungod sa gugma, dawaton man o ilhon kini sa uban o dili.
Handurawa, nan, nga imong gigahin ang imong adlaw sa usa ka pag-alagad ug nga gibuhat nimo kini tungod sa imong gugma sa uban. Dayon handurawa nga walay usa nga nagpahayag og pagpasalamat sa imong gibuhat. Angay ba nianang usbon ang imong pasalig sa pag-alagad? Angay ba nga ang tubag sa uban, o ang ilang pagkawalay tubag, makapugong kanimo sa pag-alagad sumala sa gusto sa Dios? Dili gayod. Kinahanglan kitang mag-alagad ug motuman sa atong Kristohanong katungdanan tungod lamang kay kini ang hustong buhaton ug tungod kay kini ang gusto sa Dios nga atong buhaton.
Pamalandongi karon ang imong kadasig sa mahigugmaong pag-alagad sa uban. Sulayi pagsulti kining mga pulong sa Ebanghelyo diha sa kahimtang sa imong kinabuhi. Mahimong lisod kini sa sinugdanan, apan kon makaalagad ka uban sa hunahuna nga ikaw usa ka “sulugoon nga walay kapuslanan” ug nga wala kay gibuhat gawas sa imong “katungdanan,” nan imong makaplagan nga ang imong gugma nakaangkon og usa ka bag-ong kalawom.
Ginoo, tabangi ako sa pag-alagad nga gawasnon ug kinasingkasing tungod sa gugma alang Kanimo ug sa uban. Tabangi ako sa paghatag sa akong kaugalingon bisan unsa pa ang tubag sa uban ug sa pagkaplag og katagbawan diha lamang niining buhat sa gugma. Jesus, nagsalig ako Kanimo.
Mainiton ug Mapainubsanong Pagpasalamat
Miyerkules sa Ikakatloan ug Duha nga Semana sa Ordinaryong Panahon
Ug ang usa kanila, sa pagkahibalo nga siya naayo na, mibalik nga naghimaya sa Dios sa makusog nga tingog; ug mihapa siya sa tiilan ni Jesus ug nagpasalamat kaniya. Usa siya ka Samarianhon. Lucas 17:15-16
Kining sanlahona usa sa napulo nga giayo ni Jesus samtang Siya miagi sa Samaria ug Galilea. Usa siya ka langyaw, dili usa ka Judio, ug siya lamang ang mibalik kang Jesus aron magpasalamat sa iyang pagkaayo.
Timan-i nga adunay duha ka butang nga gibuhat niining Samarianhon human siya maayo. Una, siya “mibalik nga naghimaya sa Dios sa makusog nga tingog.” Mahinungdanon kini nga paghulagway sa nahitabo. Wala lamang siya mibalik aron moingon og salamat; hinunoa, ang iyang pagkamapasalamaton gipahayag sa mainiton kaayong paagi. Sulayi paghanduraw kining sanlahon nga nagsinggit ug nagdayeg sa Dios tungod sa kinasingkasing ug lalom nga pagkamapasalamaton.
Ikaduha, kining tawhana “mihapa sa tiilan ni Jesus ug nagpasalamat Kaniya.” Sa makausa pa, dili kini gamayng buhat alang niining Samarianhon. Ang paghapa sa tiilan ni Jesus laing timaan sa iyang dakong pagpasalamat. Dili lamang kay nalipay siya pag-ayo, kondili nahimo usab siyang mapainubsanon pag-ayo tungod niining pagkaayo. Makita kini sa iyang mapainubsanong paghapa sa tiilan ni Jesus. Nagpakita kini nga kining sanlahona mapainubsanong miila sa iyang pagka-dili takos atubangan sa Dios niining buhat sa pag-ayo. Usa kini ka matahom nga lihok nga nag-ila nga dili igo ang pagpasalamat. Hinuon, gikinahanglan ang lalom nga pagpasalamat. Ang lalom ug mapainubsanong pagpasalamat kinahanglan mao kanunay ang atong tubag sa kaayo sa Dios.
Pamalandongi karon ang imong pagtagad sa kaayo sa Dios. Sa napulo nga naayo, kining usa lamang ka sanlahon ang nagpakita sa hustong tinamdan. Tingali mapasalamaton usab ang uban, apan dili sa sukod nga angay unta kanila. Ikaw, kumusta man? Unsa kalalom ang imong pagkamapasalamaton ngadto sa Dios? Hingpit ka bang nahibalo sa tanan nga gibuhat sa Dios alang kanimo matag adlaw? Kon dili, paningkamoti nga sundogon kining sanlahon ug imong makaplagan ang samang kalipay nga iyang nakaplagan.
Ginoo, nagaampo ako nga modangop ako Kanimo matag adlaw uban sa lalom ug hingpit nga pagpasalamat. Hinaot nga makita nako ang tanan Mong ginabuhat alang kanako matag adlaw ug hinaot nga motubag ako uban sa kinasingkasing nga pagpasalamat. Jesus, nagsalig ako Kanimo.
Si Jesus Hari
Huwebes sa Ikakatloan ug Duha nga Semana sa Ordinaryong Panahon
Sa dihang gipangutana Siya sa mga Pariseo kon kanus-a moabot ang Gingharian sa Dios, mitubag si Jesus, “Ang pag-abot sa Gingharian sa Dios dili makita pinaagi sa pagpaniid, ug walay moingon, ‘Tan-awa, ania dinhi,’ o, ‘Atua didto.’ Kay tan-awa, ang Gingharian sa Dios anaa sa inyong taliwala.” Lucas 17:20-21
Ang Gingharian sa Dios anaa sa inyong taliwala! Unsay kahulogan niana? Hain ang Gingharian sa Dios ug sa unsang paagi nga anaa kini sa atong taliwala?
Ang Gingharian sa Dios mahimong hisgotan sa duha ka paagi. Sa kataposang pag-abot ni Kristo, sa kataposan sa panahon, ang Iyang Gingharian magpabilin sa kahangtoran ug makita sa tanan. Iyang laglagon ang tanang sala ug daotan ug ang tanan himoong bag-o. Maghari Siya sa kahangtoran ug ang gugma maoy magdumala sa matag hunahuna ug kasingkasing. Pagkamalipayong gasa nga atong paaboton uban sa dakong paglaom!
Apan kining tekstoha ilabina nagtumong sa Gingharian sa Dios nga ania na sa atong taliwala. Unsa man kana nga Gingharian? Mao kini ang Gingharian nga anaa pinaagi sa grasya nga nagpuyo sa atong mga kasingkasing ug anaa alang kanato sa dili maihap nga mga paagi matag adlaw.
Una, nagtinguha si Jesus nga maghari sa atong mga kasingkasing ug magmando sa atong kinabuhi. Ang mahinungdanong pangutana mao kini: Gitugotan ko ba Siya nga modumala? Dili Siya ang matang sa Hari nga mamugos sa Iyang kaugalingon sama sa usa ka diktador. Dili Niya gamiton ang Iyang awtoridad aron ipamugos nga motuman kita. Siyempre, mahitabo kini sa kataposan, sa pagbalik ni Jesus, apan sa pagkakaron ang Iyang pagdapit mao gayod kana—usa ka pagdapit. Gidapit kita Niya nga ihatag Kaniya ang pagkahari sa atong kinabuhi. Gidapit kita Niya nga tugotan Siya sa hingpit nga pagdumala. Kon buhaton nato kana, mohatag Siya kanato og mga sugo nga mga sugo sa gugma. Kini mga mando nga modani kanato ngadto sa kamatuoran ug katahom. Kini mopapresko ug mobag-o kanato.
Ikaduha, ang presensya ni Jesus naglibot kanato. Anaa ang Iyang Gingharian sa matag higayon nga adunay gugma nga mapanggihatagon. Anaa ang Iyang Gingharian sa matag higayon nga ang grasya naglihok. Sayon kaayo alang kanato nga mabug-atan sa mga daotan niining kalibotana ug dili mamatikdan ang presensya sa Dios. Ang Dios buhi ug naglihok sa dili maihap nga mga paagi sa atong palibot. Kinahanglan kanunay kitang maningkamot nga makita kining presensya, madasig niini ug higugmaon kini.
Pamalandongi karon ang presensya sa Gingharian sa Dios diha sa inyong taliwala. Nakita ba nimo kini sa imong kasingkasing? Gidapit ba nimo si Jesus matag adlaw nga magmando sa imong kinabuhi? Giila ba nimo Siya isip imong Ginoo? Ug nakita ba nimo ang mga paagi sa Iyang pagduol kanimo pinaagi sa imong adlaw-adlaw nga mga kahimtang, diha sa ubang mga tawo ug sa imong adlaw-adlaw nga mga sitwasyon? Pangitaa Siya kanunay ug kini magdala og kalipay sa imong kasingkasing.
Ginoo, gidapit ko Ikaw karon nga moanhi ug maghari sa akong kasingkasing. Gihatag ko Kanimo ang hingpit nga pagdumala sa akong kinabuhi. Ikaw ang akong Ginoo ug akong Hari. Gihigugma ko Ikaw ug gusto kong magkinabuhi sumala sa Imong hingpit ug balaang kabubut-on. Jesus, misalig ako Kanimo.
Pagtugyan sa Kaugalingon ngadto sa Dios
Biyernes sa Ikatreyntay-Duhang Semana sa Ordinaryong Panahon
“Bisan kinsa nga maninguha sa pagpreserbar sa iyang kinabuhi mawad-an niini, apan bisan kinsa nga mawad-an sa iyang kinabuhi makaluwas niini.” Lucas 17:33
Kanunay gayong adunay isulti si Jesus nga makapahunong ug makapahunahuna kanato. Kini nga pahayag gikan sa Ebanghelyo karon maoy usa niana. Gipakita Niya kanato ang usa ka daw nagkasumpaki nga kamatuoran. Ang pagpaningkamot sa pagluwas sa imong kinabuhi mao hinuon ang hinungdan nga mawad-an ka niini, apan ang pagkawala sa imong kinabuhi mao ang paagi nga maluwas nimo kini. Unsay kahulogan niini?
Kini nga pahayag ilabinang nagtandog sa kinauyokan sa pagsalig ug pagtugyan. Sa yanong pagkasulti, kon sulayan nato pagdumala ang atong kinabuhi ug ang atong kaugmaon pinaagi lamang sa atong kaugalingong paningkamot, dili kini molampos. Sa pagtawag kanato nga “mawad-an” sa atong kinabuhi, gisultihan kita ni Jesus nga kinahanglan natong itugyan ang atong kaugalingon Kaniya. Kinahanglan natong tugotan Siya nga maoy magdumala sa tanang butang ug mogiya kanato ngadto sa Iyang labing balaang kabubut-on. Kini lamang ang paagi aron maluwas ang atong kinabuhi. Maluwas nato kini pinaagi sa pagbuhi sa atong kaugalingong kabubut-on ug pagtugot sa Dios nga maoy modumala.
Kini nga ang-ang sa pagsalig ug pagtugyan lisod kaayo sa sinugdanan. Lisod ang pagkab-ot sa ang-ang sa hingpit nga pagsalig sa Dios. Apan kon mahimo gayod nato kana, matingala kita nga ang mga paagi ug plano sa Dios alang sa atong kinabuhi mas maayo gayod kay sa bisan unsang atong mahunahunaan sa atong kaugalingon. Ang Iyang kaalam dili matupngan ug ang Iyang solusyon sa tanan natong mga kabalaka ug problema hingpit.
Pamalandongi karon kon unsa ka kaandam ug kaandam motugot nga ihatag ang hingpit nga pagdumala sa imong kinabuhi ngadto sa atong maloloy-ong Dios. Igo ba ang imong pagsalig Kaniya aron tugotan Siya sa hingpit nga pagdumala? Buhata kining buhat sa pagtuo sa labing matinud-anong paagi nga imong mahimo ug tan-awa samtang sugdan Niya ang pagpanalipod kanimo ug pagtabang kanimo nga molambo sa paagi nga ang Dios lamang ang makahimo.
Ginoo, gihatag ko Kanimo ang akong kinabuhi, ang akong mga kabalaka, ang akong mga gikabalak-an ug ang akong kaugmaon. Misalig ako Kanimo sa tanang butang. Gitugyan ko ang tanan. Tabangi ako nga mosalig pa gayod Kanimo matag adlaw ug modangop Kanimo uban sa hingpit nga pagtugyan sa akong kaugalingon. Jesus, misalig ako Kanimo.
Pagtuo
Sabado sa Ikakatloan ug Duha nga Semana sa Kasagarang Panahon
“Sa pag-abot sa Anak sa Tawo, makakaplag ba siya og pagtuo dinhi sa yuta?” Lucas 18:8b
Maayo ug makapainteres kini nga pangutana nga gisukna ni Jesus. Gisukna Niya kini sa matag usa kanato ug gihangyo kita nga tubagon kini sa personal nga paagi. Ang tubag nagdepende kon ang matag usa ba kanato adunay pagtuo sa atong kasingkasing o wala.
Busa unsa ang imong tubag kang Jesus? Lagmit ang tubag mao ang “Oo.” Apan dili kini tubag nga oo o dili lamang. Gilaoman nga kini usa ka “oo” nga padayon nga nagkalalom ug nagkalig-on sa kasigurohan.
Unsa ang pagtuo? Ang pagtuo mao ang tubag sa matag usa kanato ngadto sa Dios nga nagsulti sa atong mga kasingkasing. Aron adunay pagtuo, kinahanglan una kitang maminaw sa Dios nga nagsulti. Kinahanglan tugotan nato Siya nga mopadayag sa Iyang Kaugalingon kanato diha sa kahiladman sa atong konsensiya. Ug sa dihang buhaton Niya kini, atong gipakita ang pagtuo pinaagi sa pagtubag sa tanan Niyang gipadayag. Mosulod kita sa pagtuo sa Iyang Pulong nga gisulti kanato, ug kining buhat sa pagtuo mao ang makapausab kanato ug makaporma sa pagtuo sa atong sulod.
Ang pagtuo dili lamang kay pagtoo. Kini mao ang pagtoo sa gisulti sa Dios kanato. Kini mao ang pagtoo sa Iya mismong Pulong ug sa Iya mismong Persona. Makapainteres nga kon mosulod gayod kita sa gasa sa pagtuo, motubo sa hilabihan gayod nga sukod ang atong kasigurohan mahitungod sa Dios ug sa tanan Niyang gisulti. Kana nga kasigurohan mao ang gipangita sa Dios sa atong kinabuhi ug mao ang mahimong tubag sa Iyang pangutana sa ibabaw.
Pamalandongi karon kon unsa ka tinuod ug ka sigurado ang imong pagtuo. Pamalandongi si Jesus nga nangutana kanimo niini. Makakaplag ba Siya og pagtuo sa imong kasingkasing? Patuboa ang imong “Oo” Kaniya ug ipasalig ang imong kaugalingon sa mas lawom nga pagdawat sa tanan Niyang gipadayag kanimo matag adlaw. Ayaw kahadlok sa pagpangita sa Iyang tingog aron makaingon ka og “Oo” sa tanan Niyang gipadayag.
Ginoo, nagtinguha ako nga motubo sa pagtuo. Nagtinguha ako nga motubo sa akong gugma ug sa akong kahibalo mahitungod Kanimo. Hinaot nga buhi ang pagtuo sa akong kinabuhi ug hinaot nga makita Nimo kana nga pagtuo isip usa ka bililhong gasa nga akong gihalad Kanimo. Jesus, misalig ako Kanimo.
Anaa usab sa Paperback & eBook
