நம் ஆண்டவர் இயேசு கிறிஸ்துவின் திருஇருதயத்திற்கு என்னையே கையளித்து அர்ப்பணிக்கிறேன். என் வாழ்வையும் செயல்களையும் வலிகளையும் துன்பங்களையும் அர்ப்பணிக்கிறேன். திருஇருதயத்தை மதித்துப் போற்றி, அன்புசெய்து, மகிமைப்படுத்துவதற்காக அன்றி வேறு எதற்காகவும் என்னில் எதையும் பயன்படுத்த நான் விரும்பாதிருப்பேனாக. முழுவதும் அவருக்கே உரியவனாக இருப்பதும், அவர் மீதுள்ள அன்பிற்காகவே அனைத்தையும் செய்வதும், அதே வேளையில் அவருக்கு உகந்ததல்லாத அனைத்தையும் முழு இதயத்தோடு விலக்குவதுமே என் மாறாத உறுதி. ஆகவே, திருஇருதயமே, நீரே என் அன்பிற்குரிய ஒரே பொருளாகவும், என் வாழ்வின் காவலராகவும், என் மீட்பின் உறுதியாகவும், என் பலவீனத்திற்கும் நிலையற்ற தன்மைக்கும் மருந்தாகவும், என் வாழ்வின் குற்றங்கள் அனைத்திற்கும் பரிகாரமாகவும், இறக்கும் வேளையில் என் உறுதியான அடைக்கலமாகவும் உம்மை ஏற்றுக்கொள்கிறேன்.
எனவே, நன்மை நிறைந்த இருதயமே, தந்தையாகிய கடவுளின் முன் நான் நீதிமானாக்கப்படுவதற்கு நீரே ஆதாரமாக இரும்; அவரது நீதியான சினத்தின் அடிகள் என்னைத் தாக்காதவாறு விலக்கியருளும். அன்பு நிறைந்த இருதயமே, என் நம்பிக்கை முழுவதையும் உம்மில் வைக்கிறேன். ஏனெனில் என் சொந்தத் தீமையையும் பலவீனத்தையும் நினைத்து எல்லாவற்றிற்கும் அஞ்சுகிறேன்; ஆனால் உமது நன்மைத்தனத்தாலும் தாராளக் கொடைத்தன்மையாலும் அனைத்தையும் பெறுவேன் என நம்புகிறேன்.
உமக்கு உகந்ததல்லாத அல்லது உமது திருவுளத்தை எதிர்க்கக்கூடிய அனைத்தையும் என்னிடமிருந்து அகற்றியருளும். நான் ஒருபோதும் உம்மை மறக்கவோ உம்மைவிட்டுப் பிரியவோ இயலாதபடி, உமது தூய அன்பு உமது சாயலை என் இதயத்தில் ஆழமாகப் பதிப்பதாக.
உமது அன்பு நிறைந்த இரக்கத்தால், என் பெயர் உமது இருதயத்தில் எழுதப்படும் அருளை நான் பெறுவேனாக. ஏனெனில் உமக்கு அடிமையாக வாழ்ந்து இறந்து, என் மகிழ்ச்சியையும் மகிமையையும் முழுமையாக உம்மிலேயே வைக்க விரும்புகிறேன்.
ஆமென்.