పవిత్ర గ్రంథ పఠనం: యోహాను 20:24–29
నేపథ్యం: పునరుత్థాన ఆదివారం నాడు ప్రభువు ఇతర శిష్యులకు దర్శనమిచ్చినప్పుడు తోమా వారితో లేడు. యేసు పునరుత్థానమయ్యాడనే విషయంలో తోమా సందేహించాడు అనడం కంటే, నమ్మకూడదని ఉద్దేశపూర్వకంగానే నిర్ణయించుకున్నట్లు అనిపిస్తుంది. యేసు పునరుత్థానాన్ని ఇలా నిరాకరించడం కేవలం అవగాహన లోపం కంటే, వ్యక్తిగతంగా తీసుకున్న నిర్ణయమే అనిపిస్తుంది.
గర్వం వల్ల సువార్తను అంగీకరించడానికి నిరాకరించే వారందరికీ తోమా ఒక ఉదాహరణగా మనకు ఇవ్వబడ్డాడు. తాను అక్కడ లేనప్పుడు యేసు ఇతరులకు దర్శనమివ్వాలని నిర్ణయించుకున్నాడని తెలిసి బహుశా అతడు కలత చెంది ఉండవచ్చు. తోమా మొదట చూపిన ఈ నిరాకరణ మనకు ఒక పాఠం నేర్పాలి: దేవుని సత్యాలను మనస్ఫూర్తిగా అంగీకరించకుండా మన అహంకారం అడ్డుపడటానికి మనం ఎన్నడూ అనుమతించకూడదు.
ఎనిమిది రోజుల తరువాతే యేసు శిష్యులకు మళ్లీ దర్శనమిచ్చాడని గమనించండి. ఎనిమిది రోజులు! ఈ అనుభవం గురించే లోలోపల మథనపడుతూ ఉండిన తోమాకు అది యుగంలా అనిపించి ఉండాలి. ఇతర శిష్యులు మన ప్రభువును చూడటం ద్వారా తమకు లభించిన వరం గురించి ఆనందంగా పదేపదే మాట్లాడుకుంటున్నప్పుడు అతడు విని ఉంటాడు. కానీ తోమా మాత్రం తనకు మన ప్రభువు కనిపించలేదనే విషయాన్ని తలచుకుంటూ దిగులుతో కూర్చోవడం తప్ప మరేమీ చేయలేకపోయాడు.
అయితే, దేవుని అపారమైన కనికరం వల్ల, యేసు మరోసారి శిష్యులకు దర్శనమిచ్చినప్పుడు అదంతా మారిపోయింది; ఈసారి తోమా కూడా అక్కడ ఉన్నాడు. యేసు తన గొప్ప కనికరంతో, తన గాయాలను తాకి, నిరాకరణను, గర్వాన్ని అధిగమించి, విశ్వసించమని తోమాను ఆహ్వానిస్తున్నాడు. చూడకుండానే విశ్వసించడం ఎంతో మేలైనప్పటికీ, యేసు తోమా ముందు తనను తాను తగ్గించుకొని, అతడు చూసేందుకు అనుమతిస్తున్నాడు. మన ప్రభువు చూపిన వినయం ఎంత గొప్పది! గర్వంతో పోరాడుతున్న వారితో మనం ఎలా వ్యవహరించాలో తెలిపే గొప్ప పాఠం ఇది.
తోమా వైఫల్యాన్ని, విమోచనాన్ని వివరించే ఈ భాగం, మనలను మార్చడానికి దేవుడు ఎంత దూరమైనా వెళ్లడానికి సిద్ధంగా ఉన్నాడని నేర్పుతుంది. తోమా, “నా ప్రభువా, నా దేవా!” అని ఎలుగెత్తి అంటాడు. మనమందరం తోమాలాంటి వారమేనని అంగీకరించే సూచనగా, సభ చరిత్ర అంతటా అనేకమంది పవిత్ర దివ్యసత్ప్రసాద అప్పం ప్రతిష్ఠీకరణ సమయంలో సంప్రదాయంగా ఈ మాటలు పలుకుతూ వచ్చారు.
దేవుడు పవిత్ర గ్రంథం ద్వారా, సభ ద్వారా మనకు బోధించేవాటన్నిటినీ విశ్వసించడానికి మీ గర్వం వల్ల మీరు ఏ విధంగానైనా నిరాకరిస్తున్నారేమో ప్రత్యేకంగా పరిశీలించుకోవడానికి ఈ ధ్యానాన్ని ఉపయోగించుకోండి. విశ్వసించండి. మీ అవిశ్వాసాన్ని విడిచిపెట్టండి.
ఆత్మపరిశీలన: మీకు పరిచయమైన ధ్యాన, మనన పద్ధతులను ఉపయోగిస్తూ యోహాను 20:24–29 వచనాలను ప్రార్థనాపూర్వకంగా లోతుగా ఆలోచించండి.
ప్రధాన చిత్రం: సందేహించే తోమా, గ్వెర్చినో
- యేసు పునరుత్థానం మరియు మొదటి దర్శనం
- రెండవ దర్శనం
- మూడవ దర్శనం
- నాలుగవ దర్శనం
- ఐదవ దర్శనం
- ఆరవ దర్శనం
- ఏడవ దర్శనం
- ఎనిమిదవ దర్శనం
- తొమ్మిదవ దర్శనం
- మరిన్ని దర్శనాలు
- యేసు స్వర్గారోహణం
- దైవప్రేమను పొందేందుకు దైవచింతన
