తెలుగు

ప్ర. సభ బోధనాధికారం

ప్ర. సభ బోధనాధికారం గురించి విన్నాను, కానీ అది ఏమిటో నాకు సరిగా తెలియదు. అందులో ఎవరెవరు ఉంటారు? వారు ఏమి చేస్తారు?

జ. మీ ప్రశ్న నాకు నచ్చింది. సభ బోధనాధికారం గురించి మాట్లాడటం నాకు ఎంతో ఇష్టం! ఈ ప్రశ్నకు కేవలం అధ్యయనపరమైన స్థాయిలో కాకుండా, మరింత వ్యక్తిగత స్థాయిలో సమాధానం ఇవ్వడానికి ప్రయత్నిస్తాను.

యేసు పరలోకానికి ఆరోహణమయ్యే ముందు, తన ఆదరణకర్త అయిన పవిత్రాత్మ వచ్చి మనలను సంపూర్ణ సత్యంలోకి నడిపిస్తారని తన శిష్యులకు వాగ్దానం చేశారు. అంతేకాక, యుగాంతం వరకు తాను మనతో ఉంటానని వాగ్దానం చేశారు. ఇది నెరవేరే మార్గాలలో సభ బోధనాధికారం ఒకటి.

మనకు సభ బోధనాధికారం అవసరమవడానికి ప్రధాన కారణం ఏమిటంటే, యేసు భూమిపై ఉన్నప్పుడు, మన మనస్సులలోను హృదయాలలోను తలెత్తబోయే విశ్వాస సంబంధమైన ప్రతి ప్రశ్నకూ, ప్రతి నైతిక ప్రశ్నకూ సమాధానం ఇవ్వలేదు (ఇవ్వలేకపోయారు కూడా). ఈ రోజు మన చుట్టూ ఉన్న ప్రపంచాన్ని, మన సంస్కృతిని చూసినప్పుడు, విశ్వాసం, నైతికతలకు సంబంధించిన ఎన్నో కొత్త ప్రశ్నలు కనిపిస్తాయి. ఉదాహరణకు, ఎలాంటి కొత్త వైద్య సాంకేతిక పరిజ్ఞానాన్ని ఉపయోగించవచ్చు? క్లోనింగ్ చేయడం సమంజసమేనా? పిండ మూలకణాలపై శాస్త్రవేత్తలు పరిశోధన చేయడం సమంజసమేనా? స్వలింగ వివాహం లేదా “స్వలింగ పౌర భాగస్వామ్య బంధాలు” అని పిలిచేవాటి వంటి ఆధునిక సామాజిక అంశాల సంగతి ఏమిటి? లేదా మన విశ్వాసానికి సంబంధించి, దేవుడు ప్రపంచాన్ని సృష్టించారనే మన నమ్మకాన్ని పరిణామ సిద్ధాంతాలతో ఎలా సమన్వయపరచుకోవాలి?

ఇవన్నీ యేసు నేరుగా సమాధానం ఇవ్వని ప్రశ్నలే కదా? ఒకవైపు, “లేదు, యేసు వీటికి సమాధానం ఇవ్వలేదు” అని మనం చెప్పవచ్చు. కానీ మరోవైపు, “అవును, యేసు ప్రతిరోజూ ఈ ప్రశ్నలకు సమాధానం ఇస్తూనే ఉన్నారు!” అని చెప్పవచ్చు. మనం ఇలా ఎలా చెప్పగలం? సభ బోధనాధికారం అంటే అదే.

బోధనాధికారం అంటే, యేసు స్వయంగా పవిత్రాత్మ శక్తితో ఈ లోకంలో ఇప్పటికీ సజీవంగా ఉంటూ కార్యం చేస్తున్నారని మరో విధంగా చెప్పడమే. మరింత స్పష్టంగా చెప్పాలంటే, విశ్వాసం, నైతికత రంగాలలో నేడు మనకు తలెత్తే ప్రశ్నలన్నిటి విషయంలో యేసు మన లోకంలో సజీవంగా ఉంటూ కార్యం చేసే విధానాన్ని బోధనాధికారం సూచిస్తుంది. శాస్త్రవేత్తలు లేవనెత్తే పరిణామం, సృష్టికి సంబంధించిన ప్రశ్నలకు యేసు నిజంగా సమాధానమిస్తారు. పౌర భాగస్వామ్య బంధాలు, క్లోనింగ్, పిండ మూలకణాలపై పరిశోధన వంటి ఎన్నో విషయాలకు సంబంధించిన నైతిక ప్రశ్నలకు యేసు నిజంగా సమాధానమిస్తారు. ఆయన ఇది ఎలా చేస్తారు? పాపుగారి ద్వారా, పాపుగారితో ఐక్యతలో ఉండి బోధించే పీఠాధిపతుల ద్వారా.

పాపుగారు గానీ, పీఠాధిపతులతో కలిసి పాపుగారు గానీ ఏదైనా సత్యమని బోధించినప్పుడు, అది నిజంగా సత్యమేనని కతోలిక సభ విశ్వసిస్తుంది. మనం యేసుతో ఐక్యతలో ఉండాలనుకుంటే, దానిని విశ్వసించాలి! మన ఆధునిక ప్రపంచంలో తలెత్తే అనేక క్లిష్టమైన ప్రశ్నలను వివేచించడానికి యేసు ప్రతిరోజూ మనకు సహాయపడే మార్గాలలో ఇది ఒకటి. భవిష్యత్తును దృష్టిలో ఉంచుకొని చూస్తే, విశ్వాసం, నైతికతకు సంబంధించిన మరెన్నో అంశాలు తలెత్తుతాయని నాకు గట్టి నమ్మకం ఉంది. ఈ ప్రశ్నలు తలెత్తినప్పుడు, మనం ఒంటరిగానే వాటికి సమాధానాలు కనుగొనవలసిన అవసరం ఉండదు. సత్యమైన దానివైపు మనలను నడిపించడానికి యేసు మనకు పాపుగారిని, పీఠాధిపతులను ఇస్తారు. మనం దీనిని విశ్వసించి, వారితో ఐక్యతలో ఉంటూ, వారు మనకు మార్గనిర్దేశం చేయనిచ్చినప్పుడు, వాస్తవానికి యేసు స్వయంగా మనలను నడిపించడానికి అనుమతిస్తున్నాము.

కాబట్టి బోధనాధికారం దేవుడు మనకిచ్చిన అద్భుతమైన వరం! యేసు స్వయంగా మన జీవితాలలో సజీవంగా ఉంటూ కార్యం చేయడాన్ని కొనసాగించే అనేక మార్గాలలో ఈ వరం కూడా ఒకటని తప్పక గుర్తించండి!


మరిన్ని కతోలిక ప్రశ్నలు & సమాధానాలు