கே. பாலுறவில் ஈடுபடும் நண்பர்கள் எனக்கு இருக்கிறார்கள். அவர்கள்மீது எனக்கு அக்கறை உண்டு; அவர்கள் நல்லவர்கள் என்றே நினைக்கிறேன். எனவே, அவர்களைப் புண்படுத்த நான் விரும்பவில்லை. ஆனால், தங்கள் நடத்தையை மறுபரிசீலனை செய்யுமாறு அவர்களை நாசூக்காக எப்படி ஊக்குவிப்பது?
ப. உங்கள் கேள்விக்கும், குறிப்பாக உங்கள் நண்பர்கள்மீது நீங்கள் கொண்டுள்ள அக்கறைக்கும் நன்றி! சில சிந்தனைகளைப் பகிர்ந்துகொள்கிறேன்.
நீங்கள் சொல்வதுபோல், உங்கள் நண்பர்களைப் “புண்படுத்த” விரும்பாதது நல்லதே என்பேன். பொதுவாக, நாம் என்ன சொல்கிறோம் என்பது எவ்வளவு முக்கியமோ, அதை எப்படிச் சொல்கிறோம் என்பதும் அவ்வளவு முக்கியம். நீங்கள் தங்களைப் புரிந்துகொள்ளவில்லை என்றோ, தங்களைத் தீர்ப்பிடுகிறீர்கள் என்றோ, தங்கள்மீது கோபமாக இருக்கிறீர்கள் என்றோ உங்கள் நண்பர்கள் உணர்ந்தால், அவர்கள் நீங்கள் சொல்வதைக் கேட்காமல் போகலாம். ஆனால், நீங்கள் அவர்களுடன் பகிர்ந்துகொள்ள வேண்டிய செய்தியை அவர்கள் கேட்பது மிகவும் முக்கியம்! திருமணத்திற்கு வெளியே பாலுறவு கொள்வது யாருக்குமே கடவுளின் திட்டத்தில் அடங்காது. நீங்கள் பகிர்ந்துகொள்ள வேண்டிய செய்தியையும், அதை அவர்களிடம் எவ்வாறு சிறந்த முறையில் எடுத்துரைக்கலாம் என்பதையும் பார்ப்போம்.
கடவுள் பாலுறவு நெருக்கத்தைத் தமது படைப்பின் மிக நல்லதொரு பகுதியாக அமைத்தார். நம்மைப் பாலியல் இயல்புடையவர்களாகப் படைத்ததன் வழியாக, கணவனும் மனைவியும் ஆழமாகவும், நிரந்தரமாகவும், ஒருவருக்கொருவர் மட்டுமே உரியவர்களாகவும் ஒன்றித்திருக்கக் கடவுள் வழிவகுத்தார். இந்தப் பாலுறவின் வழியாகக் குழந்தைகள் பிறக்கும்போது, கணவனும் மனைவியும் தமது படைப்பாற்றலில் பங்குபெறவும் அவர் வழிவகுத்தார். ஆனால், குழந்தைகளை ஏற்கவும் திறந்த மனம் கொண்டவர்களாக, இவ்வாறு நிரந்தரமாகவும் ஒருவருக்கொருவர் மட்டுமே உரியவர்களாகவும் வாழ்வதற்கு உறுதிப்பாடு அளித்த பின்னரே இருவர் பாலுறவு கொள்ள வேண்டும்.
பாலுறவும் ஒருவகையில் ஒரு “மொழி” என்பதை அறிந்துகொள்வது முக்கியம். ஒரு மொழியாக, பாலுறவு என்பது தம்பதியர் சில உண்மைகளை ஒருவருக்கொருவர் தெரிவிக்கும் வழியாகும். பாலுறவை வடிவமைத்தவர் கடவுளே என்பதால், இந்த உண்மைகளைப் பாலுறவிலிருந்து பிரிக்க முடியாது. பாலுறவு தெரிவிக்கும் செய்திகளில் ஒன்று: “வாழ்நாள் முழுவதும் உனக்கு உறுதியாக இருப்பேன்!” மேலும் அது, “வாழ்நாள் முழுவதும் உனக்கு, உனக்கு மட்டுமே உறுதியாக இருப்பேன்!” என்றும் தெரிவிக்கிறது. திருமணத்திற்கு வெளியே கொள்ளும் பாலுறவின் முக்கியப் பிரச்சினை, அது ஒரு பொய் என்பதுதான். திருமணத்தில் நிரந்தரமாகவும் ஒருவர் மற்றவருக்கு மட்டுமே உரியவராகவும் வாழ உறுதிகொள்ளாத இருவர், தங்கள் உடல்களால் அத்தகைய உறுதிப்பாட்டைக் கொண்டிருப்பதாகச் சொல்லக்கூடாது. இவ்வாறு நிகழும்போது, பாலுறவுச் செயல் பெரும் குழப்பத்தை ஏற்படுத்துகிறது! இதை உள்ளத்தின் ஆழத்தில் எல்லாரும் அறிந்திருக்கிறார்கள் என்றே நினைக்கிறேன். பிரச்சினை என்னவென்றால், வாழ்க்கைத்துணையுடன் பகிர்ந்துகொள்வதற்கென உள்ள இந்த நல்ல விருப்பங்கள், சில வேளைகளில் வேறு எந்த விதத்தில் பயன்படுத்தப்பட்டாலும் பெரும் தீங்கை விளைவிக்கும். உண்மையில், உங்கள் நண்பர்களோ, திருமணத்திற்கு வெளியே பாலுறவு கொள்ளும் வேறு எவருமோ, தாங்கள் செய்வது தவறு என்பதை அறிந்திருக்கிறார்கள் என்று நான் மிகவும் உறுதியாக நம்புகிறேன். மேலும், குழந்தைகள் பிறப்பதற்கான வாய்ப்பையும் நோக்கமாகக் கொண்டே பாலுறவு அமைந்துள்ளது என்பதையும் நாம் மறக்க முடியாது. ஆகவே, அடிப்படையில், இருவர் பாலுறவு கொள்ளும்போது, கடவுள் தங்களுக்கு ஒரு குழந்தையை அருள விரும்பினால், அந்தக் குழந்தையைப் பெற்றுக்கொள்ளத் தாங்கள் தயாராக இருப்பதாகவும் சொல்கிறார்கள்.
ஆனால் இதை உங்கள் நண்பர்களுக்கு எடுத்துச் சொல்வதுதான் ஒருவேளை மிகவும் கடினமான பகுதியாக இருக்கலாம். முதலில், அவர்கள் மீது உங்களுக்கு அக்கறை இருக்கிறது என்றும், அதனால்தான் அவர்கள் எடுக்கும் முடிவைக் குறித்து நீங்கள் கவலைப்படுகிறீர்கள் என்றும் சொல்லித் தொடங்குமாறு நான் கூறுவேன். நீங்கள் சொல்வதை அவர்கள் முதலில் ஏற்றுக்கொள்ளாமல் இருக்கலாம்; உங்கள் மீது சற்று கோபப்படவும் கூடும். ஆனால், பணிவுடனும் தெளிவாகவும் மென்மையாகவும் புன்னகையுடனும் அவர்களிடம் பேச நீங்கள் முயன்றால், ஒரு மாற்றத்தை ஏற்படுத்தும் வாய்ப்பு உங்களுக்குக் கிடைக்கலாம்.
உங்கள் நண்பர்கள் உடனடியாக உங்கள் பேச்சைக் கேட்காவிட்டாலும், அதற்காக நான் அதிகம் வருந்த மாட்டேன். அன்போடு உங்கள் எண்ணங்களை அவர்களுடன் பகிர்ந்துகொள்வது ஒரு விதையை விதைக்கக்கூடும்; அதன் பொருளை அவர்கள் புரிந்துகொள்ளச் சிறிது காலம் ஆகலாம். எனவே, தொடர்ந்து முயலுங்கள், உங்கள் நிலைப்பாட்டில் உறுதியாக இருங்கள், அன்புடன் நடந்துகொள்ளுங்கள்; எல்லாவற்றிற்கும் மேலாக, அவர்களுக்காகச் செபியுங்கள். நீங்கள் சொல்ல வேண்டியதை அவர்கள் உண்மையிலேயே கேட்க வேண்டியிருக்கிறது என்பதையும், ஒருவேளை அதைக் கேட்க அவர்கள் விரும்பக்கூடும் என்பதையும் நினைவில் கொள்ளுங்கள்.
மேலும் கத்தோலிக்கக் கேள்விகள் & பதில்கள்