Sw. Biblia ya rafiki yangu ina sura tofauti na zile za Biblia yangu. Kwa nini zinatofautiana?
J. Kwanza kabisa, niseme kwamba daima ni baraka kujua kuwa kuna mtu anayependezwa na Biblia! Biblia nyingi zinakaa tu kwenye rafu zetu za vitabu zikikusanya vumbi. Natumaini wewe na rafiki yako mtaendelea kupendezwa na Biblia na kuisoma mara kwa mara.
Ni kweli kwamba tangu mwanzoni mwa miaka ya 1500 kumekuwa na kutokubaliana miongoni mwa Wakristo kuhusu vitabu vinavyopaswa kujumuishwa katika Biblia. Lakini mapema kabisa, mwaka 382 B.K., Kanisa Katoliki lilitaja wazi vitabu vya Biblia kama tulivyo navyo leo.
Na katika karne tatu kabla ya hapo, vitabu vilivyomo katika Biblia yetu leo vilitumiwa kwa kawaida—na kukubaliwa kuwa vyenye uvuvio wa kweli wa Mungu—na watakatifu, mapapa na Mababa wengi sana wa Kanisa la awali.
Tofauti iliyopo leo kati ya Biblia ni kwamba Kanisa Katoliki linakubali vitabu saba vya Agano la Kale (Tobiti, Yudithi, Hekima, Mhubiri, Baruku, Wamakabayo wa Kwanza na wa Pili) pamoja na sehemu za vitabu vingine viwili (Esta 10:14 hadi 16:14; na Danieli 3:24- 90; 13; 14) ambavyo si lazima vijumuishwe katika matoleo ya Biblia ya Kiprotestanti.
Baadhi ya madhehebu ya Kikristo yanavikataa kabisa vitabu hivi vya ziada, na mengine yanavikusanya pamoja mwishoni mwa Biblia na kuviita vitabu vya “apokrifa” (yaani “vyenye kutiliwa shaka” au “visivyo na uvuvio wa Mungu”).
Basi tatizo ni nini? Kwa nini kuna tofauti? Tofauti ya msingi ni hii: vitabu vilivyopingwa na kutiliwa shaka katika miaka ya 1500 ni vitabu vya Agano la Kale ambavyo hatuna tafsiri yake ya Kiebrania. Nakala pekee za kale za vitabu hivyo tulizo nazo, za kabla ya Ukristo, ni za Kigiriki; kwa hiyo, zilitumiwa hasa na Wayahudi waliozungumza Kigiriki kabla ya wakati wa Yesu. Vitabu vingine vyote vya Agano la Kale pia vina nakala za kale za Kiebrania na vilitumiwa na Wayahudi wengine wengi kabla ya wakati wa Yesu.
Tafadhali, endelea kuisoma Biblia hiyo! Na ukikutana na rafiki mwenye Biblia iliyo na sura tofauti na zile za Biblia yako, huenda ukapenda kutumia nafasi hiyo kuzichunguza pamoja sura hizo zinazotofautiana. Hiyo ingekuwa njia nzuri sana kwa ninyi wawili kujifunza na kukua katika imani yenu pamoja!
Maswali & Majibu Zaidi ya Kikatoliki