Aleluya! Ginoong Jesus, nabanhaw Ka gikan sa mga patay ug mahimayaong nagmadaugon!
Ginoo, naghalad ako Kanimo sa kinasingkasing nga pagpasalamat kay makaapil ako sa pagsaulog sa Imong Pagkabanhaw! Nagpasalamat ako Kanimo sa Imong dakong gugma kanako nga tungod niini gidapit ako sa pag-ambit sa bag-ong kinabuhi nga Imong naangkon.
Minahal nga Ginoo, ang dalan padulong sa Pagkabanhaw puno sa hilabihang kasakit ug pag-antos. Gikinahanglan niini ang hingpit nga paghalad sa Imong kinabuhi. Wala Kay gihikaw, kondili gibubo Mo ang Imong kinabuhi hangtod sa kataposang tulo sa dugo.
Nabanhaw nga Ginoo, ang malipayong balita mao nga ang pag-antos ug kamatayon dili mao ang kataposan. Madaugon Kang nabanhaw sa usa ka bag-o ug gihimayang lawas, nga nag-abli sa pultahan aron ang tanan nga nagtuo Kanimo mabanhaw usab. Dad-a ako, minahal nga Ginoo, ngadto sa Imong pag-antos ug kamatayon aron madala usab ako ngadto sa himaya sa Imong Pagkabanhaw. Hatagi ako sa kaisog nga Imong gipakita sa dihang giantos Mo ang hilabihang kasakit. Tabangi ako sa pag-atubang sa mga krus sa akong kinabuhi pinaagi sa Imong kusog. Samtang ginabuhat ko kini, pun-a ako sa paglaom samtang akong gipaabot ang bag-ong kinabuhi nga Imong ipatungha gikan sa tanang pag-antos nga nahiusa Kanimo.
Aleluya! Ginoong Jesus, nabanhaw Ka gikan sa mga patay ug mahimayaong nagmadaugon!
Aleluya! Ang tanang himaya ug pagdayeg alang Kanimo, minahal nga Ginoo, tungod sa Imong Pagkabanhaw!
Aleluya! Hinaot nga ang himaya sa Imong Pagkabanhaw higugmaon, dawaton ug imantala hangtod sa kataposan sa panahon ug sa kahangtoran!