Samtang mitambong ug mihatag kog mga pakigpulong sa usa ka espirituwal nga kataposan sa semana alang sa mga magtiayon, migahin kog panahon sa pagsulat og sulat alang sa akong asawa. Samtang nagsulat niadtong sulata, kalit nakong nasulat ang mga pulong nga “Makasulod Ako sa imong kinabuhi kon tugotan mo Ako” sa kuwaderno nga akong gigamit. Natingala ug natay-og pag-ayo ang akong pagbati sa dihang nasulat ko kini, kay nasayod ko nga dili kini bahin sa akong sulat ngadto sa akong asawa kondili mga pulong nga direktang gipahibalo sa Dios kanako. Sa samang higayon, gibati nako ang hilabihang kalinaw nga wala pa gayod nako masinati kaniadto.
Sa among pagpauli, nakapadayon ako sa pagsulat og espirituwal nga mga pamalandong matag higayon nga magpakahilom ako, mag-ampo, mokuha og kuwaderno, mokupot og bolpen, ug magsugod pagsulat. Sa matag pagsulat nako, daw nagaagay ang mga pulong nga mga lima ka pilo nga mas paspas kay sa akong naandang pagsulat. Dili na gani nako kinahanglang hunahunaon ang mogula sa akong hunahuna. Ang mga pulong miagay lamang. Sa ulahi, tin-aw nakong nadungog ang mga pulong nga gisulti kanako: “Mosulat ka og libro, ug basahon kini sa daghan.”
Ang mga sinulat niining libroha maoy bunga niining mga paningkamot sulod sa misunod nga pipila ka tuig. Nagtuo ako nga gikan kini sa Dios kay sa dihang makasinati ka og lawom nga kalinaw, masayod ka gayod nga kini gihatag gikan sa kahitas-an ug dili gikan niining kalibotana.
Daghang tuig kong nakigbisog niining gasaha, ug hangtod karon mao gihapon. Kining gasaha napatik sa akong sulod, ug kanunay kong nasayod nga anaa kini. Wala gayod kini mawala. Nagpabilin kini sa kahangtoran. Niadtong panahona, pipila ka higala ang mitayp niining mga pamalandong gikan sa akong orihinal nga sinulat sa kuwaderno, apan wala namo mahibaloi unsaon pagmantala sa sulod niini. Nangayo kog tabang sa Dios ug mihangyo nga ipakita Niya ang dalan sa pag-abot sa hustong panahon. Trayntay-siyete ka tuig ang milabay sa wala pa makita ang paagi sa pagmantala niini. Mapasalamaton ako niini, kay natuman niini ang sugo nga akong nadawat.
Nanghinaot ako nga dawaton pag-ayo sa daghan kining libroha ug nga ang mga inspirasyon niini makahatag og daghang maayong sangpotanan. Ang labing maayong tambag nga akong nadawat sa paglabay sa panahon mao ang paghukom niini pinaagi sa mga bunga nga mamugna niini.
Nasayod ako nga kining katakos sa pagsulat usa ka tinuod nga gasa gikan sa Dios nga kinahanglang ampingan ug tahoron. Dili angayng makasulod ang garbo ug kinahanglang mopatigbabaw ang pagpaubos. Ang kahuyang nga angay bantayan mao ang pagsal-ot sa imong kaugalingon niini imbis nga mamati sa kahiladman sa imong kasingkasing. Nag-ampo ako nga sa umaabot, makapadayon ko niining pagsulat ubos sa paggiya sa Espiritu Santo. Itugyan ko kining maong desisyon sa pag-agak sa Espiritu.
Pagpahinungod
Alang sa akong asawa nga nagdasig kanako sa pagmantala niining mga sinulata. Alang sa akong anak nga lalaki nga naghatag og paagi sa pagmantala niining libroha ug alang sa tanang sakop sa akong pamilya. Alang sa usa ka anak nga babaye nga anaa sa langit nga naghimo sa iyang bahin sa pagdasig kanako. Alang sa pipila ka higala nga nagbasa niining mga panid, nag-edit niini, ug nadasig niining mga sinulata.
Alang sa atong Ginoong Jesucristo nga naghatag kanako sa gasa sa pagpamati sa mga pulong sa Espiritu.
Hinaot nga kining mga sinulata maghimaya sa ngalan sa Atong Ginoong Jesucristo.
Ni Robert Raymund
Ang “Robert Raymund” mao ang ngalan sa pagsulat nga gipili niining tagsulat—Robert ang ngalan sa tagsulat sa iyang Kumpirma, ug Raymund alang sa pagpangayo sa mga panalangin ni San Raimundo sa Peñafort alang niining buhata.
Sa sayo pang edad nga baynte anyos, nagtudlo na si San Raimundo og pilosopiya. Nakabaton siyag mga degree sa balaod sibil ug balaod kanoniko sa sayong bahin sa iyang pagka-traynta anyos. Hilabihan kataas ang katakos ni San Raimundo nga ang mga hari, mga papa, ug mga obispo nangayo sa iyang pag-alagad. Nakuha ni Papa Gregorio IX ang iyang pag-uyon, ug si San Raimundo sa Peñafort nakahatag og malungtarong amot sa Simbahan pinaagi sa paghan-ay og dakong koleksiyon sa mga balaod sa Simbahan, nga nahimong pangunang pakisayran sa mga abogado sa balaod kanoniko hangtod sa ikakawhaang siglo.
Sulod sa daghang tuig, kining tagsulat nag-ampo og nobena ngadto kang San Raimundo matag adlaw, nga nangayo og espesyal nga panalipod sa mga panghitabo sa kinabuhi.
San Raimundo, tudloi ug tabangi kami karong adlawa pinaagi sa kaalam nga gikinahanglan aron atubangon ang tanang hagit nga among giatubang niining kinabuhia. Pangamuyoi kami. Uban kanamo sa among pagpanaw gikan niining kalibotana ngadto sa gingharian sa langit nga naghulat kanamo.
Copyright © 2019 ni Robert Raymund. Gireserba ang tanang katungod. Gitugotan ang bisan unsang simbahan o institusyon sa pag-imprenta pag-usab alang sa dili komersiyal nga mga katuyoan.