Ang Paghigugma sa Dios Labaw sa Tanan
Ikanapulog Tulo nga Domingo sa Ordinaryong Panahon, Tuig A
Miingon si Jesus sa iyang mga apostoles: “Ang nahigugma sa iyang amahan o inahan labaw kanako dili takos kanako, ug ang nahigugma sa iyang anak nga lalaki o babaye labaw kanako dili takos kanako; ug ang dili mopas-an sa iyang krus ug mosunod kanako dili takos kanako.” Mateo 10:37-38
Gipasabot ni Jesus ang usa ka makapainteres nga sangpotanan sa pagpili nga higugmaon ang mga sakop sa pamilya labaw sa Dios. Ang sangpotanan sa paghigugma sa usa ka sakop sa pamilya labaw sa Dios mao nga ang usa ka tawo dili takos sa Dios. Kini usa ka bug-at nga pamahayag nga gituyo aron mag-aghat sa seryosong pagsusi sa kaugalingon.
Una, kinahanglan natong masabtan nga ang bugtong paagi sa tinuod nga paghigugma sa atong inahan o amahan, anak nga lalaki o babaye, mao ang paghigugma una sa Dios sa tibuok natong kasingkasing, hunahuna, kalag ug kusog. Ang paghigugma sa atong pamilya ug sa uban kinahanglan magagikan niining putli ug hingpit nga paghigugma sa Dios.
Tungod niini, kinahanglan natong tan-awon ang pasidaan ni Jesus isip usa ka tawag sa pagsiguro nga dili lamang nato Siya higugmaon sa hingpit, kondili usa usab ka tawag sa pagsiguro nga hingpit natong higugmaon ang atong pamilya pinaagi sa pagtugot nga ang atong paghigugma sa Dios mahimong tinubdan sa atong paghigugma sa uban.
Sa unsang paagi nato mahimong malapas kining sugo sa atong Ginoo? Sa unsang paagi nato higugmaon ang uban labaw kang Jesus? Nagbuhat kita niining makasasala nga paagi sa dihang tugotan nato ang uban, bisan ang mga sakop sa pamilya, nga mopahilayo kanato gikan sa atong pagtuo. Pananglitan, sa usa ka buntag sa Domingo samtang nangandam ka sa pagsimba, usa ka sakop sa pamilya ang mosulay sa pagkombinsir kanimo nga dili motambong sa Misa aron mohimo og laing kalihokan. Kon mouyon ka aron lamang mapahimuot siya, nan “gihigugma” nimo siya labaw sa Dios. Siyempre, sa kataposan, dili kini tinuod nga paghigugma nianang sakop sa pamilya kay ang gihimong desisyon supak sa kabubut-on sa Dios.
Pamalandongi karon kon sa unsang paagi nimo tinuod nga mahigugma ang imong mga kapamilya pinaagi sa pagpunting una sa imong kasingkasing ug kalag ngadto sa gugma sa Dios. Tugoti nga kining bug-os nga pagdawat sa gugma sa Dios mahimong sukaranan sa gugma sa matag relasyon. Niana lamang mamunga og maayo ang paghigugma sa uban.
Ginoo sa hingpit nga gugma, akong gitugyan Kanimo ang akong tibuok hunahuna, kasingkasing, kalag ug kusog. Tabangi ako sa paghigugma Kanimo labaw sa tanang butang ug diha sa tanang butang ug, gikan nianang gugmaa, tabangi ako sa paghigugma niadtong Imong gibutang sa akong kinabuhi. Jesus, misalig ako Kanimo.
Paghikap kang Jesus
Ikanapulog Tulo nga Domingo sa Ordinaryong Panahon, Tuig B
Miingon siya, “Kon makahikap lang ako sa Iyang bisti, mamaayo ako.” Marcos 5:28
Ania ang usa ka panig-ingnan sa usa ka tawo nga miduol kang Jesus uban sa dakong pagtuo. Makapadani kini nga sugilanon kay gihatagan kita sa gasa nga mahibaloan ang iyang mga hunahuna.
Kini nga babaye nag-antos pag-ayo sulod sa daghang katuigan. Gisulayan niya ang tanan aron mamaayo pinaagi sa mga doktor. Nahurot niya ang tanan niyang kabtangan. Ug unya, niining kahimtanga nga daw wala nay paglaom, midangop ang babaye kang Jesus uban sa pagtuo.
Tingali dako na ang iyang pagtuo sa tibuok niyang kinabuhi; wala kita mahibalo. Ang atong nahibaloan mao nga sa iyang pag-antos, napaubos siya pag-ayo ug wala na siyay laing kapilian. Niining mapaubsanong kahimtang, gibuhat niya ang buhaton sa bisan kinsang santos. Migunit siya sa lig-ong pagtuo nga si Jesus mao ang tubag. Kon mapakyas ang tanan, dili siya pakyason ni Jesus. Tingali wala siya mahibalo kon mamaayo ba ang iyang lawas, apan nasayod siya nga bisan pa niana kinahanglan siyang modangop kang Jesus.
Adunay dakong leksiyon niining sugilanon: kinahanglan nga aduna usab kitay ingon niana kalalom nga pagsalig ug ingon niana kalig-on nga pasalig sa pagdangop kang Jesus uban sa atong kinabuhi. Bisan kon wala pa nato sulayi ang tanang ubang kapilian sa kinabuhi, kinahanglan kitang tanan modawat sa pagpamatuod nga gihatag niining babayhana.
Ang pagdangop kang Jesus uban sa lawom nga kasigurohan ug pagtuo nagpasabot nga nasayod kita nga ang Iyang kabubut-on lamang ang labing mahinungdanon. Nagpasabot kini nga pilion nato Siya labaw sa tanan ug sa matag kahimtang sa kinabuhi. Nagpasabot kini nga dili lamang kita modangop Kaniya uban sa atong mga problema, kondili usab uban sa atong mga kalipay ug sa mga panalangin nga atong nadawat. Ang tanan natong buhaton kinahanglan magagikan sa lawom nga kombiksiyon sa atong kasingkasing nga si Jesus mao ang tubag sa tanan sa kinabuhi.
Tingali daw sobra ra kini paminawon. Tingali naanad kita nga modangop lamang Kaniya kon daw napakyas na kita sa tanan. Apan dili unta ingon niana. Gitawag kita sa pag-ugmad sa adlaw-adlaw nga batasan sa pagtinguha nga “makahikap sa Iyang bisti,” ingnon ta. Usa kini ka paagi sa pag-ingon nga kinahanglan kanunay natong ipunting ngadto Kaniya ang atong kasingkasing, hunahuna, kabubut-on ug kalag.
Pamalandongi karon kon unsa kalalom ang imong naandan nga pagdangop kang Jesus. Siya ba ang una nimong dayegon tungod sa mga panalangin nga imong nadawat? Ug Siya ba ang una nimong dangpan sa imong mga kahadlok ug mga pakigbisog? Ugmara kining batasana diha sa imong kasingkasing ug makakita ka og mga milagro sa grasya sa imong kinabuhi.
Akong Ginoo nga nagbuhat og mga milagro, tabangi ako nga kanunayng modangop Kanimo sa tanang butang. Tabangi ako sa pagsalig Kanimo sa dihang daw lisod ang kinabuhi ug daw nagkagubot ang tanan. Tabangi usab ako nga modangop Kanimo diha sa tanang daghang panalangin nga akong madawat. Jesus, misalig ako Kanimo.
Pagmalig-on sa Hukom
Ikanapulog Tulo nga Domingo sa Ordinaryong Panahon, Tuig C
Sa dihang miabot na ang mga adlaw nga si Jesus pagabayawon ngadto sa langit, lig-on siyang mihukom sa pagpanaw ngadto sa Jerusalem, ug nagpadala siya og mga mensahero nga mag-una kaniya. Lucas 9:51-52a
Si Jesus “lig-on nga mihukom” sa Iyang misyon sa pagpanaw ngadto sa Jerusalem. Dali rang dili mamatikdan ang kahulogan niining mga pulonga.
Adunay duha ka butang nga angay ipasiugda bahin niining teksto. Una, ang Jerusalem mao ang dapit nga Iyang padulngan diin sa kataposan Siya mamatay alang sa mga sala sa kalibotan. Didto Siya pagahimayaon pinaagi sa Sakripisyo sa Krus. Busa, dili gusto sa mga tinun-an nga moadto si Jesus sa Jerusalem kay nasayod sila nga peligroso kini. Apan nakita ni Jesus, lapas sa pag-antos nga sa dili madugay Iyang antoson, ang umaabot nga himaya sa Sakripisyo nga Iyang ihalad.
Ikaduha, ang kamatuoran nga si Jesus “lig-on” sa Iyang hukom nga moadto sa Jerusalem ug mosakripisyo sa Iyang kinabuhi nagpadayag sa Iyang kaisog ug hingpit nga gugma. Wala Siya mahadlok sa mahitabo Kaniya tungod kay anaa sa Iyang hunahuna ang mas halapad nga katuyoan. Nakita Niya ang maayong bunga sa kaluwasan sa daghang kalag, ug kini mipatigbabaw sa bisan unsang tentasyon nga mopugong Kaniya sa pagtuman sa Iyang diosnong misyon.
Daghan kitag makat-onan gikan sa lig-ong hukom ni Jesus nga mosakripisyo sa Iyang kinabuhi didto sa Jerusalem alang sa kaluwasan sa kalibotan. Sa pagkatinuod, kinahanglan natong makita ang bunga niining sakripisyo ug magpasalamat niini hangtod sa kahangtoran. Apan kinahanglan usab nato kining tan-awon isip usa ka pagdapit sa pagsundog sa mga buhat ni Jesus. Sa atong kaugalingong kinabuhi, daghan kitag mga kahigayonan nga gihatag kanato sa pagpili og kinabuhi sa dili hakog nga pagsakripisyo alang sa kaayohan sa uban. Kini nga mga kahigayonan moabot sa nagkalainlaing porma, apan sa kataposan, mga kahigayonan kini kanunay sa paghigugma ug paghatag sa kaugalingon. Bisan tuod ang pagsakripisyo makatintal kanato sa paglayas ngadto sa laing direksiyon, kon ipunting nato kanunay ang atong mga mata sa maayong bunga sa tanang dili hakog nga pagsakripisyo, madasig kita sa pagmalig-on sa atong hukom sa paghigugma.
Pamalandongi karon kon unsa ang imong “Jerusalem.” Unsa man ang gidapit kanimo nga halaran sa imong kinabuhi tungod sa gugma. Kon imong madiskobrehan kon unsa kini, susiha usab ang imong pagkaandam sa pagdawat niini nga sakripisyo alang sa kaayohan sa uban ug paningkamoti ang pagsundog sa lig-ong determinasyon sa atong Ginoo.
Akong Ginoo nga lig-on og determinasyon, akong gihalad ang akong kinabuhi Kanimo ug gidawat ang Imong pagdapit nga ihalad ang akong kinabuhi alang sa kaayohan sa uban. Hatagi ako sa kaisog ug determinasyon nga akong gikinahanglan aron makita ang bili sa pagkinabuhi nga dili hakog, ug pun-a ako sa dili matarog nga gugma alang sa Imong balaang kabubut-on. Jesus, misalig ako Kanimo.
Pagkaandam ug Pagkakinabubut-on
Lunes sa Ikanapulog Tulong Semana sa Ordinaryong Panahon
Usa ka eskriba miduol ug miingon kang Jesus, “Magtutudlo, mosunod ako kanimo bisan asa ka moadto.” Mateo 8:19
Husto ang gisulti niining magtutudlo sa Balaod ngadto kang Jesus. Mao kini ang kinaiya nga angay natong tanan nga batonan ngadto sa atong Ginoo. Kinahanglan nga andam ug kinabubut-on kitang mosunod Kaniya bisan unsa pay mahitabo. Apan makapainteres ang tubag ni Jesus niining magtutudlo sa Balaod. Miingon Siya, “Ang mga singgalong adunay mga lungag ug ang mga langgam sa kalangitan adunay mga salag, apan ang Anak sa Tawo walay kabutangan sa iyang ulo aron makapahulay” (Mateo 8:20).
Unsa may atong makat-onan gikan niini nga tubag? Morag kini usa ka paagi ni Jesus sa pag-ingon sa eskriba, “Andam ug kinabubut-on ba gayod kang mosunod kanako bisan unsay mahitabo?” Sa laing pagkasulti, buot ipakita ni Jesus sa eskriba nga ang pagpili sa pagsunod Kaniya usa ka pasalig sa pagsubay sa dalan nga peligroso lamang sa diwa nga ang pagsunod kang Jesus nagkinahanglan og bug-os nga pagsalig Kaniya. Dili kita sultihan daan kon asa kita dad-on sa atong Ginoo ug unsa ang Iyang pangayoon kanato. Hinuon, kon mopili kita sa pagsunod kang Jesus nga walay pagpanagana, nagbutang kita sa atong pagsalig Kaniya isip usa ka persona ug nag-ingon Kaniya nga atong gidawat ang Iyang kabubut-on bisan unsa pa kini. Kini nga ang-ang sa pagsalig mao ang yawe sa gitinguha ni Jesus.
Pamalandongi karon ang duha ka butang. Una, pamalandongi kining mga pulong sa magtutudlo sa Balaod ug pangutan-a ang imong kaugalingon kon makasulti ka ba niini uban sa pagsalig diha sa imong kaugalingong kinabuhi. Balikbalika kini pagsulti ug paningkamoti nga dili lamang kini magpabilin sa imong hunahuna kondili motuhop usab sa imong kasingkasing isip kinabubut-ong pagdawat sa plano sa Ginoo alang sa imong kinabuhi. Ikaduha, pamalandongi ang mga epekto sa maong tubag diha sa imong kaugalingong kinabuhi. Andam ka bang dili lamang mosulti niining mga pulonga kondili modawat usab sa tanan nga mosunod tungod sa maong pasalig? Andam ka bang mosalig sa Ginoo sa tibuok mong kinabuhi? Paningkamoti nga mohimo niining lig-ong paghukom, ug kini nga paghukom mogiya kanimo sa dalan sa dakong kalipay.
Akong Ginoo nga kasaligan, tinuod kong gipasalig ang akong kaugalingon sa pagsunod Kanimo bisan asa Ka moadto. Gipili ko ang Imong labing balaang kabubut-on labaw sa tanang butang. Tabangi ako sa pagkinabuhi nga matinumanon sumala sa Imong diosnong kabubut-on ug sa pag-ingon og “Oo” Kanimo matag adlaw. Jesus, misalig ako Kanimo.
Pagpakalma sa Bagyo
Martes sa Ikanapulog Tulo nga Semana sa Ordinaryong Panahon
Miduol sila ug gipukaw si Jesus, nga nag-ingon, “Ginoo, luwasa kami! Malunod na kami!” Miingon siya kanila, “Nganong nahadlok man kamo, kamong diyutay og pagtuo?” Unya mibangon siya, gibadlong ang mga hangin ug ang dagat, ug milinaw kini pag-ayo. Mateo 8:25-26
Handurawa nga didto ka sa dagat uban sa mga Apostoles. Usa ka mangingisda ug migugol ka og dili maihap nga mga takna sa dagat sa tibuok mong kinabuhi. Sa pipila ka mga adlaw hilabihan kalinaw ang dagat, ug sa ubang mga adlaw dagko ang mga balod. Apan lahi ra gayod kining adlawa. Hilabihan kadagko ug kusog nga nagdasmag kining mga balora, ug nahadlok ka nga dili maayo ang dangatan sa tanan. Busa, uban sa uban pang sakay sa sakayan, gipukaw nimo si Jesus nga nagkataranta, nga naglaom nga luwason ka Niya.
Unsa kaha ang labing maayong buhaton sa mga Apostoles niining kahimtanga? Lagmit, ang labing maayo unta mao ang pagpasagad kang Jesus nga magpadayon sa pagkatulog. Ang labing maayo unta mao nga ilang atubangon ang mabangis nga unos uban sa pagsalig ug paglaom. Ang mga “unos” nga daw dili nato makaya tingali panagsa ra moabot, apan makasiguro kita nga moabot gayod kini. Moabot kini ug mobati kita nga daw dili na nato makaya.
Kon wala pa magtaranta ang mga Apostoles ug gipasagdan pa nila si Jesus nga matulog, tingali kinahanglan pa unta nilang antuson ang unos og mas dugay-dugay. Apan sa kadugayan mohunong ra unta kini ug molinaw ang tanan.
Si Jesus, sa Iyang dakong kalooy, dili mosupak nga motuaw kita Kaniya sa atong panginahanglan sama sa gibuhat sa mga Apostoles didto sa sakayan. Dili Siya mosupak nga modangop kita Kaniya sa atong kahadlok ug mangayo sa Iyang tabang. Kon buhaton nato kini, anaa Siya alang kanato sama sa usa ka ginikanan nga anaa alang sa anak nga nahigmata sa kagabhion tungod sa kahadlok. Apan ang labing maayo unta mao nga atubangon nato ang unos uban sa pagsalig ug paglaom. Ang labing maayo unta mao nga masayod kita nga kini usab molabay ra ug nga angay lamang kitang mosalig ug magpabiling lig-on. Mao kini, matod pa sa makita nato, ang labing maayong leksiyon nga atong makat-onan gikan niining sugilanona.
Pamalandongi karon kon giunsa nimo pag-atubang ang mga kalisdanan ug mga problema sa imong kinabuhi. Dagko man o gagmay, giatubang ba nimo kini uban sa pagsalig, kalinaw ug paglaom nga buot ni Jesus nga imong batonan? Mubo ra kaayo ang kinabuhi aron pun-on kini sa grabeng kahadlok. Salig sa Ginoo bisan unsa pay imong atubangon matag adlaw. Kon daw natulog Siya, pasagdi Siya nga magpadayon sa pagkatulog. Nasayod Siya sa Iyang gibuhat, ug makasiguro ka nga dili gayod Niya tugotan nga mag-antos ka og labaw sa imong makaya.
Akong Ginoo nga natulog, bisan unsa pay moabot sa akong kinabuhi, misalig ako Kanimo. Nasayod ako nga anaa Ka kanunay ug dili gayod Ka mohatag kanako og labaw sa akong maarangan. Jesus, misalig gayod ako Kanimo.
Luwasa Kami Gikan sa Daotan
Miyerkules sa Ikanapulog Tulong Semana sa Ordinaryong Panahon
Sa pag-abot ni Jesus sa yuta sa mga Gadareno, gisugat siya sa duha ka tawo nga giyawaan nga nanggawas gikan sa mga lubnganan. Hilabihan sila kabangis nga walay makaagi niadtong dalana. Misinggit sila, “Unsay imong labot kanamo, Anak sa Dios? Mianhi ka ba dinhi aron sa pagsakit kanamo sa wala pa ang gitakdang panahon?” Mateo 8:28-29
Kining tudling sa Balaang Kasulatan nagpadayag og duha ka butang: 1) Ang mga demonyo mabangis; 2) Si Jesus adunay hingpit nga gahom ibabaw kanila.
Una sa tanan, angay natong matikdan nga ang duha ka tawo nga gisudlan sa mga demonyo “bangis kaayo nga walay makaagi nianang dalana.” Mahinungdanon kaayo kana nga pamahayag. Klaro nga ang mga demonyo nga misulod niining duha ka lalaki mabangis ug nagpuno sa mga tawo sa lungsod sa dakong kahadlok. Hilabihan kini nga wala gayoy mangahas bisan sa pagduol kanila. Dili kini makapahimuot nga hunahuna, apan kini tinuod ug angay sabton. Tinuod, tingali dili kita kanunayng makasugat sa daotan sa ingon ka direkta nga paagi, apan usahay moatubang kita niini. Ang daotan buhi ug kanunayng naningkamot sa pagtukod sa iyang demonyohong gingharian dinhi sa Yuta.
Hunahunaa ang mga higayon nga ang daotan daw dayag, madaogon-daogon, malisyoso, tinuyo ug maampingong giplano, ug uban pa. Adunay mga higayon sa kasaysayan nga ang daotan daw midaog sa gamhanang mga paagi. Ug adunay mga paagi nga ang iyang kalihokan makita gihapon sa atong kalibotan karon.
Kana nagdala kanato ngadto sa ikaduhang leksiyon niining sugilanona. Si Jesus adunay bug-os nga awtoridad ibabaw sa mga demonyo. Makapainteres nga gipagula Niya sila ug gipasulod sa panon sa mga baboy, ug ang mga baboy unya midalagan paubos sa bungtod ug nangamatay. Talagsaon gayod. Hilabihan ang pagkakurat sa mga tawo sa lungsod nga mihangyo sila kang Jesus nga mobiya sa lungsod. Ngano kaha nga gibuhat nila kana? Ang usa sa mga hinungdan daw mao nga ang pagpagula ni Jesus sa mga demonyo gikan niining duha ka lalaki nakapahinabo og dakong kagubot. Kini tungod kay ang dayag nga daotan dili mobiya nga malinawon.
Kini usa ka mahinungdanong leksiyon nga angay hinumdoman sa atong panahon karon. Mahinungdanon kini tungod kay ang daotan daw nagpasabot sa iyang presensiya sa mas nagkadakong sukod karon. Ug sigurado gayod nga nagplano siya sa pagpaila pa gayod sa iyang presensiya sa umaabot nga mga tuig. Makita nato kini sa pagkahugno sa moralidad sa atong mga katilingban, sa dayag nga pagdawat sa imoralidad, sa pagkawalay relihiyosong kinaiya sa nagkalainlaing kultura sa kalibotan, sa pagsaka sa terorismo, ug uban pa. Dili maihap ang mga paagi nga ang daotan daw nagdaog sa gubat.
Si Jesus makagagahom sa tanan ug modaog sa kataposan. Apan ang lisod mao nga ang Iyang kadaugan lagmit makapahinabo og dakong kagubot ug makapasamok sa daghan. Sama nga giingnan nila Siya nga mobiya sa ilang lungsod human Niya mapahigawas ang mga tawo nga gisudlan sa mga demonyo, daghan usab karong mga Kristohanon nga andam kaayong magpakabuta-bungol sa pag-uswag sa gingharian sa daotan aron malikayan ang bisan unsang panagbangi.
Pamalandongi karon kon andam ka bang moatubang sa gitawag nga “mga sangpotanan” sa pagsukol sa gingharian sa daotan pinaagi sa Gingharian sa Dios. Andam ka bang mobuhat sa gikinahanglan aron makabarog nga malig-on sulod sa usa ka kultura nga padayon nga nagkadaot? Andam ka bang magpabiling lig-on atubangan sa kasaba sa daotan? Dili sayon ang pag-ingon og “Oo” niini, apan kini mahimong mahimayaong pagsundog sa atong Ginoo Mismo.
Labing gamhanang Ginoo, tabangi ako nga magpabiling lig-on atubangan sa daotan ug sa iyang gingharian sa kangitngit. Tabangi ako nga atubangon kana nga gingharian uban sa pagsalig, gugma ug kamatuoran aron mopatungha sa Imong Gingharian puli niini. Jesus, nagsalig ako Kanimo.
Kaisog sa Pagpangayo og Pasaylo
Huwebes sa Ikanapulog Tulo nga Semana sa Ordinaryong Panahon
Sa pagkakita ni Jesus sa ilang pagtuo, miingon Siya sa paralitiko, “Isog, anak, gipasaylo na ang imong mga sala.” Mateo 9:2b
Kini nga sugilanon natapos sa pag-ayo ni Jesus sa paralitiko ug sa pag-ingon kaniya, “bangon, dad-a ang imong higdaanan ug pauli.” Mao gayod kini ang gibuhat sa tawo ug nahibulong ang mga panon sa katawhan.
Adunay duha ka milagro nga nahitabo dinhi. Ang usa pisikal ug ang usa espirituhanon. Ang espirituhanon mao ang pagpasaylo sa mga sala niining tawhana. Ang pisikal mao ang pag-ayo sa iyang pagkaparalitiko.
Hain niining mga milagro ang mas mahinungdanon? Hain sa imong hunahuna ang labing gitinguha sa maong tawo?
Lisod tubagon ang ikaduhang pangutana kay wala kita mahibalo sa gihunahuna sa tawo, apan sayon ang unang pangutana. Ang espirituhanong pag-ayo, ang pagpasaylo sa iyang mga sala, mao gayod ang labing mahinungdanon niining duha ka milagro. Kini ang labing mahinungdanon tungod kay adunay kini walay kataposang mga sangpotanan alang sa iyang kalag.
Alang sa kadaghanan kanato, sayon ang pag-ampo sa Dios alang sa mga butang sama sa lawasnong pag-ayo o sa susamang mga butang. Tingali sayon ra kaayo alang kanato ang pagpangayo og mga pabor ug mga panalangin gikan sa Dios. Apan unsa man kasayon alang kanato ang pagpangayo og pasaylo? Tingali mas lisod kini buhaton alang sa daghan tungod kay nagkinahanglan kini nga magsugod kita sa usa ka buhat sa pagpaubos. Nagkinahanglan kini nga ilhon una nato nga kita mga makasasala nga nanginahanglan og pasaylo.
Ang pag-ila sa atong panginahanglan og pasaylo nagkinahanglan og kaisog, apan kini nga kaisog usa ka dakong hiyas ug nagpadayag sa dakong kalig-on sa atong kinaiya. Ang pagduol kang Jesus aron mangayo sa Iyang kalooy ug pasaylo sa atong kinabuhi mao ang labing mahinungdanong pag-ampo nga mahimo natong iampo ug ang patukoranan sa tanan pa natong mga pag-ampo.
Pamalandongi karon kon unsa ka kaisog sa pagpangayo og pasaylo sa Dios ug kon unsa ka mapaubsanon nga andam moila sa imong sala. Ang pagbuhat sa ingon niini nga buhat sa pagpaubos usa sa labing mahinungdanong mga butang nga mahimo nimong buhaton.
Akong mapinasayloong Ginoo, hatagi ako og kaisog. Hatagi ako og kaisog, ilabina, sa pagpaubos sa akong kaugalingon sa Imong atubangan ug sa pag-ila sa tanan kong sala. Niining mapaubsanong pag-ila, tabangi ako nga mangayo usab sa Imong pasaylo matag adlaw sa akong kinabuhi. Jesus, nagsalig ako Kanimo.
Kalooy alang sa Makasasala
Biyernes sa Ikapulog Tulo nga Semana sa Ordinaryong Panahon
“Ang mga himsog wala magkinahanglan og mananambal, apan ang mga masakiton nagkinahanglan. Lakaw kamo ug sabta ang kahulogan sa mga pulong, Kalooy ang Akong gitinguha, dili sakripisyo. Wala Ako moanhi aron tawgon ang mga matarong kondili ang mga makasasala.” Mateo 9:12-13
Si Jesus wala moanhi alang sa mga “matarong” kondili alang sa mga “makasasala.” Mahimong makapatingala kini sa sinugdan kay daw angay unta nga miingon si Jesus nga mianhi Siya alang sa tanang tawo, sa matarong ug sa makasasala. Apan ang angay natong sabton mao nga walay usa nga tinuod nga matarong. Sa laing pagkasulti, ang matag usa usa ka makasasala nga nanginahanglan sa Manluluwas.
Sa pagsulti niining paagiha, gitumong ni Jesus ang kinaiya sa pagpakamatarong sa kaugalingon sa mga Pariseo nga daw naghunahuna nga si Jesus angay lamang makig-uban sa mga walay sala. Ang mga Pariseo naglihok nga daw sila mga “matarong” ug nga si Jesus angay lamang makig-uban kanila ug sa uban nga wala mailhi sa publiko nga mga makasasala.
Ikasubo, ang sala sa mga Pariseo labaw pang mabug-at kay sa mga sala sa mga maniningil og buhis ug sa ubang mga makasasala nga miduol kang Jesus. Ang mga Pariseo sad-an sa sala sa espirituhanong garbo ug nakasala tungod sa ilang pagtuo nga sila matarong. Kon ang usa ka tawo dili makakita sa iyang sala, dili siya mapasaylo sa Dios kay wala man siya maghinulsol.
Bisan tuod kini usa ka kusganong pagsaway sa mga Pariseo ug sa uban nga sad-an sa pagpakamatarong sa kaugalingon, usa usab kini ka pagdapit ni Jesus ngadto sa tanan nga andam moangkon sa ilang sala. Kon makapaubos kita sa atong kaugalingon atubangan sa kahingpitan sa Dios ug makita nato ang atong mga sala diha sa kahayag sa Iyang himaya, matintal kita nga mawad-an og paglaom ug mobati og kaulaw tungod sa atong sala. Apan ang kaulaw mahimong kalipay ug kagawasan kon tugotan nato ang atong Ginoo nga molihok isip Diosnong Mananambal sa atong kinabuhi. Ang katuyoan sa Iyang kinabuhi dinhi sa yuta mao ang pag-ayo sa atong mga samad nga gipahinabo sa sala. Kon makaamgo kita kon giunsa kita pag-ayo sa hingpit sa Iyang hingpit nga kalooy, andam kitang modangop Kaniya.
Pamalandongi karon kon unsa ka andam ug ka kinabubut-on nga mosugid sa imong sala ngadto kang Jesus. Ayaw pagpanuko sa pagsalig sa Iyang hingpit nga gugma alang kanimo ug sa pag-abli sa imong kaugalingon sa hingpit ngadto sa Iyang diosnong kalooy.
Ginoo nga hingpit sa kalooy, midangop ako Kanimo sa akong panginahanglan ug miangkon sa akong sala ug pagkasad-an. Nagbasol ako sa akong pagpasakit Kanimo ug nasayod ako nga Ikaw ra gayod ang bugtong tubag sa akong sala. Kaloy-i intawon ako, minahal nga Ginoo, ug pasayloa ako sa tanan kong sala. Jesus, nagsalig ako Kanimo.
Pagpuasa ug Kagawasan
Sabado sa Ikanapulog Tulo nga Semana sa Ordinaryong Panahon
Ang mga tinun-an ni Juan miduol kang Jesus ug miingon, “Nganong kami ug ang mga Pariseo kanunay mangpuasa, apan ang Imong mga tinun-an dili man mangpuasa?” Si Jesus mitubag kanila, “Makahimo ba sa pagbangotan ang mga dinapit sa kasal samtang ang pamanhonon kauban pa nila? Moabot ang mga adlaw nga kuhaon ang pamanhonon gikan kanila, ug unya mangpuasa sila.” Mateo 9:14-15
Gusto ka bang mahimong gawasnon? Gusto ka bang makakaplag sa tinuod nga kagawasan sa imong kinabuhi? Sa walay duhaduha, gusto gayod nimo. Apan unsay kahulogan niini? Ug unsaon nimo kini pagbaton?
Gilalang kita alang sa kagawasan. Gilalang kita nga gawasnong magkinabuhi sa kahingpitan niini ug makasinati sa dili matugkad nga mga kalipay ug panalangin nga buot ihatag sa Dios kanato. Apan kasagaran kaayo, sayop ang atong pagsabot kon unsa gayod ang tinuod nga kagawasan. Labaw sa tanan, ang kagawasan mao ang pagsinati sa kalipay nga ania uban kanato ang Pamanhonon. Kini ang kalipay sa kombira sa kasal sa Ginoo. Gilalang kita aron saulogon ang atong panaghiusa uban Kaniya hangtod sa kahangtoran.
Sa Ebanghelyo karong adlawa, tin-aw nga gipahayag ni Jesus nga ang mga dinapit sa kasal dili makabangotan samtang ang pamanhonon kauban pa nila. Apan, “Moabot ang mga adlaw nga kuhaon ang pamanhonon gikan kanila, ug unya mangpuasa sila.”
Makatabang ang pagsusi sa kalambigitan tali sa pagpuasa ug kagawasan. Sa sinugdan, daw katingad-an kini nga panag-uban. Apan kon hustong masabtan ang pagpuasa, makita kini isip usa ka dalan padulong sa mahimayaong gasa sa tinuod nga kagawasan.
Adunay mga higayon sa atong kinabuhi nga “ang Pamanhonon kuhaon.” Mahimo kining magtumong sa daghang butang. Usa sa ilabinang gipasabot niini mao ang mga higayon nga mobati kitang daw nawala si Cristo sa atong kinabuhi. Mahimo gayod kini nga resulta sa atong kaugalingong sala, apan mahimo usab kini nga resulta sa atong pagsamot og kaduol kang Cristo. Sa unang kahimtang, ang pagpuasa makatabang sa pagpahigawas kanato gikan sa daghang makasasalang pagkagapos nga anaa sa atong kinabuhi. Ang pagpuasa adunay gahom sa pagpalig-on sa atong kabubut-on ug sa pagputli sa atong mga tinguha. Sa ikaduhang kahimtang, adunay mga higayon nga nagkasuod na kaayo kita kang Cristo ug, tungod niini, gitago Niya ang Iyang presensya sa atong kinabuhi. Mahimong katingad-an kini sa sinugdan, apan gihimo kini aron labi pa gayod nato Siyang pangitaon. Niining kahimtanga usab, ang pagpuasa mahimong paagi sa pagpalalom sa atong pagtuo ug sa atong pagtugyan sa kaugalingon ngadto Kaniya.
Ang pagpuasa mahimong adunay daghang porma, apan sa kinauyokan niini, usa lamang kini ka buhat sa pagdumili ug pagsakripisyo sa kaugalingon alang sa Dios. Makatabang kini kanato sa pagbuntog sa kalibotanon ug unodnong mga tinguha aron ang atong mga espiritu labaw pang bug-os nga mangandoy kang Cristo.
Pamalandongi karon kon unsa kalalom ang imong pangandoy kang Cristo sa imong kinabuhi. Kon makita nimo nga adunay ubang mga tinguha nga nakig-indigay ug lagmit motabon kang Cristo, hunahunaa ang paghalad og mga buhat sa pagpuasa ug ubang mga porma sa pagdumili sa kaugalingon. Himoon kini nga gagmayng mga sakripisyo alang sa Dios, ug makita nimo ang maayong bunga nga ipatungha niini.
Akong Ginoo nga naghalad sa Imong kaugalingon, Ikaw ang akong gitinguha sa akong kinabuhi labaw sa tanang butang. Tabangi ako nga makita ang mga butang nga nakig-indigay sa Imong gugma ug sa paghalad og sakripisyo aron ang akong kalag maputli ug makapuyo sa kagawasan nga Imong gitinguha alang kanako. Jesus, nagsalig ako Kanimo.
Ika-katorse nga Semana sa Ordinaryong Panahon
Anaa usab sa Paperback & eBook
