Cebuano

Ikakawhaan ug Pito ka Adlaw: Katapolan o Kakugi?

Biyernes sa Ikaupat nga Semana sa Kwaresma

Dili mabungahon ang Kwaresma kon walay hingpit nga pagsusi sa konsensiya, nga atong hinayhinayng pagahisgotan sulod sa mosunod nga pito ka adlaw aron matabangan ka sa pagpangandam alang sa matahom ug makahinlo nga Sakramento sa Pakig-uli. Usa sa mga hinungdan nga daghan ang naglikay sa pagsusi sa ilang konsensiya mao ang unang sala nga atong pamalandonganโ€”ang katapolan.

Ang katapolan maoy pagkawalay kakugi nga tungod niini mapasagdan nato ang atong mga katungdanan ngadto sa Dios ug sa uban. Ang tapolan mopili sa kaharuhay inay sa disiplina, sa pagpahulay inay sa pagtrabaho, ug sa pagkawalay pagtagad inay sa kakugi. Ang katapolan mosangpot sa espirituhanong kasubo, pagkawalay paglaom, pagkaluyahon, kasuko, pagkawalay gibuhat, pagkadili mahimutang, pagkausikan, ug pagkamausisaon sa mga butang nga dili balaan. Kon mahimong naandan ang katapolan, ang unang hunahunaon sa usa ka tawo matag adlaw mao ang pagbuhat sa labing sayon ug labing makapahupay. Pananglitan, ang paggahin ug sobrang panahon sa mga plataporma sa sosyal nga midya mahimong modala sa usa ka tawo ngadto sa katapolan. Ang paghago, kakugi, pagkamay-tulubagon, pagpakabana sa uban, ug tinguha nga makahatag ug maayong kausaban gikinahanglan aron madasig ang usa ka tawo sa pagbiya niining daotang batasan.

Ang kakugi (o kadasig) mao ang hiyas nga kaatbang ug tambal sa katapolan, nga makapahimo kanato sa pag-angkon sa tulubagon alang sa atong inadlaw nga mga katungdanan ug sa pagtuman niini sumala sa kabubut-on sa Dios. Ang pagkaadik sa trabaho, nga mao ang pikas nga pagpasobra, dili tambal sa katapolan. Ang hiyas sa kakugi makapahimo kanato sa pagpangita sa hustong pagkabalanse sa tanan natong buhat, sa pagbuhat uban sa pagkamatinud-anon ug kadasig sa gitawag sa Dios nga atong buhaton, ug sa paglikay sa sobrang pagkahumaling sa mga butang nga makapahinabog tensiyon ug dili angay nga mga palas-anon.

Bahin sa uban, ang gugmang putli makatabang sa pagtambal sa katapolan kon ibalhin nato ang atong pagtagad gikan sa kaugalingong mga gusto ngadto sa mga paagi nga makapakita kita ug gugma ug pagpakabana sa mga tawo sa atong palibot. Ang katapolan magtukmod kanato sa pagtan-aw lamang sa atong kaugalingon. Ang gugmang putli makapahimo kanato sa pagtan-aw sa uban ug sa paghunahuna sa mga paagi nga atong mapaayo ang ilang kinabuhi, bisan kon kini nagkinahanglan ug dakong sakripisyo. Makakaplag kita ug kalipay niana nga sakripisyo.

Bahin sa Dios, ang katapolan motintal kanato sa paglikay sa inadlaw nga pag-ampo. Mahimo kitang mangatarongan nga walay epekto ang atong mga pag-ampo, o nga nag-alagad kita sa Dios pinaagi sa atong mga buhat, nga gihimo natong pag-ampo ang atong trabaho. Dako kaayog kamahinungdanon ang matinud-anong pasalig sa inadlaw nga pag-ampo, nga naggahin ug panahon matag adlaw aron walay laing buhaton gawas sa pag-ampo. Sa pagkatinuod, kon molingkod ka aron mag-ampo o moluhod sa atubangan sa atong Ginoo ug dihadiha matintal sa pagbiya niana nga buhat, ang pagbuntog niana nga tintasyon makatabang sa pagtambal sa katapolan.

Ang espirituhanong katapolan makasulod sa atong kinabuhi kon dili kita makadawat ug paghupay gikan sa pag-ampo, mawad-an kitag kadasig, ug mohunong na. Sa sinugdanan sa atong kinabuhi sa pag-ampo, ang Dios kasagarang mohatag ug espirituhanong pagdasig pinaagi sa mga paghupay nga mabati nato tungod sa pagpamalandong ug espirituhanong mga pagsabot. Apan moabot ang panahon nga mawala kining mga paghupay ug mobati kitag kahaw-ang. Kini nga kasinatian mahimong makapahinabog kalibog ug modala kanato sa pagbiya sa atong kinabuhi sa pag-ampo; kana mao ang espirituhanong katapolan. Ang tumong kinahanglan mao ang paglahutay taliwala sa espirituhanong pagkauga ug ang paglikay sa pagkawalay kadasig.

Sa dihang si Jesus himalatyon na didto sa Krus, misinggit Siya, โ€œGiuhaw Ako!โ€ Tingali ang Iyang kauhaw may pisikal usab nga hinungdan, kay nakulangan Siya ug tubig sa lawas. Apan sa mas lawom nga ang-ang, ang kauhaw ni Jesus alang sa matag kalag nga nagkinahanglan sa Iyang gugma. Kon makaambit kita sa kauhaw ni Jesus alang sa kaluwasan sa mga kalag, lakip ang atong kaugalingon, kining espirituhanong kauhaw magtukmod kanato sa pagbuntog sa tanang katapolan.

Ginoo kong giuhaw, ang nagdilaab nga tinguha sa Imong kalag mao ang pagbubo sa Imong kalooy ibabaw sa tanang tawo. Ang ilang pagdawat sa Imong gugma nakapatagbaw sa Imong Sagradong Kasingkasing ug nagtukmod Kanimo sa paghigugma pa gayod. Palihog pun-a ang akong kalag sa Imong diosnong kauhaw, una alang sa kaluwasan sa akong kalag, ug usab alang sa kaayohan niadtong gitawag ako sa pag-alagad. Himoa akong makugihon sa pag-ampo ug matinud-anon sa akong mga katungdanan sa kinabuhi. Jesus, misalig ako Kanimo.

Tan-awa usab:ย Ikakawhaan ug Pito ka Adlaw: 40 ka Adlaw sa Tiilan sa Krus

Talaan sa mga Sulod

Dugang Alang sa Kwaresma